ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་ཚེས་དྲུག་ཉིན་མགོ་འཛིན་མཛད་དེ་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་བསྡུས།གྲོས་ཚོགས་ནས་ཉིས་སྟོང་བཅུ་བཞི་ལོའི་རྒྱལ་ཡོངས་ཀྱི་ཚོགས་ཆེན་གཉིས་ཀྱི་གྲོས་གཞི་བསྒྲུབས་པའི་བྱ་བའི་ཡར་ཞུར་ཉན་ནས།སྤྱི་པའི་ཇུས་ཆོད་ཐད་དམངས་ཀྱི་འདོད་བློ་དང་ལེན་བྱེད་པའི་སྒྲིག་ལུགས་འཐུས་ཚང་དུ་བཏང་བ་དང་།སྲིད་གཞུང་གི་དངུལ་གཏོང་དོ་དམ་བྱེད་ཐབས་བཅོས་སྒྱུར་དང་འགན་ནུས་བསྒྱུུར་བར་བཀོད་སྒྲིག་བྱས་ཏེ།དངུལ་གཏོང་ལས་སྐྲུན་ལ་སྟབས་བདེ་བཟོས་པ་དང་།ཚོང་རའི་སྒྲིག་ལམ་ཚད་ལྡན་དུ་བཏང་བ་མ་ཟད།རྒྱལ་ཡོངས་དམངས་འཐུས་ཚོགས་ཆེན་ལ་ཡར་ཞུ་བྱས་ནས་ས་ཞིང་ལམ་ལུགས་བཅོས་སྒྱུར་གྱི་ཚོད་ལྟའི་ས་ཁུལ་ནས་གནས་སྐབས་སུ་ས་ཞིང་དོ་དམ་བཅའ་ཁྲིམས་དང་གྲོང་ཁྱེར་ཁང་སའི་ཐོན་ལས་དོ་དམ་བཅའ་ཁྲིམས་ཀྱི་འབྲེལ་ཡོད་གཏན་ཁེལ་ལེགས་སྒྲིག་སྒོས་ལག་བསྟར་བྱེད་པར་ཆོག་མཆན་འགོད་པའི་ཆོད་དོན་འཆར་ཟིན་ལ་གྲོས་བསྡུར་བྱས་ནས་གྲོས་འཆམ་བྱུང་།
 གྲོས་ཚོགས་ནས་བསྟན་དོན།དམངས་འཐུས་ཚོགས་ཆེན་གྱི་འཐུས་མིའི་གྲོས་གཞི་དང་སྲིད་གྲོས་ཨུ་ཡོན་གྱི་གྲོས་གཞི་ནི་སྲིད་གཞུང་གིས་ཁྲིམས་ལྟར་ལྟ་སྐུལ་དང་དམངས་གཙོ་ལྟ་སྐུལ་བྱེད་པའི་རྣམ་པ་གལ་ཆེན་ཞིག་ཡིན།གྲོས་གཞི་སྒྲུབ་པའི་བྱ་བ་བཟང་བོར་སྒྲུབ་ན།དམངས་སེམས་གཅིག་ཏུ་བསྡུ་བ་དང་བློ་གྲོས་གཅིག་ཏུ་བསྡུ་བ།ཐུན་མོང་གི་ལྟ་བ་ཇེ་དྲག་ཏུ་གཏོང་བ་བཅས་བྱས་ཏེ།སྤྱི་པའི་ཇུས་ཆོད་ཀྱི་ཆུ་ཚད་ཇེ་མཐོར་གཏོང་བར་ཕན།ན་ནིང་རྒྱལ་སྲིད་སྤྱི་ཁྱབ་ཁང་གི་སྡེ་ཁག་སོ་སོས་འཐུས་མིའི་གྲོས་གཞི་སྟོང་བདུན་དང་བཞི་བརྒྱ་སོ་བདུན་དང་ཨུ་ཡོན་གྱི་གྲོས་གཞི་སྟོང་བཞི་དང་དྲུག་བརྒྱ་དོན་གཉིས་བསྒྲུབས་པ་དང་།སོ་སོར་གྲོས་གཞི་སྤྱིའི་བརྒྱ་ཆའི་གྱ་དྲུག་ལྷག་དང་བརྒྱ་ཆའི་གོ་གཉིས་ལྷག་ཟིན།དེའི་རྨང་གཞིའི་སྟེང་སྡེ་ཁག་སོ་སོས་འབྲེལ་ཡོད་བྱེད་ཐབས་སྟོང་གཅིག་དང་བདུན་བརྒྱ་བཀོད་དེ།སྲིད་གཞུང་གི་སྲིད་ཇུས་བྱེད་ཐབས་འཐུས་ཚང་དུ་བཏང་ནས།མང་ཚོགས་ཀྱིས་དོ་སྣང་བྱེད་པའི་གནད་དོན་གལ་ཆེན་སྐོར་ཞིག་ཐག་གིས་བཅད་དེ།ཐོན་ཚད་བརྟན་འཇགས་ངང་འཕར་བ་དང་།བཅོས་སྒྱུར་ལ་ཡར་སྐུལ་བྱེད་པ།གྲུབ་ཚུལ་ལེགས་སྒྲིག་བྱེད་པ།དམངས་ཚིས་ལ་ཕན་འདོགས་པ།ཉེན་ཁ་སྔོན་འགོག་བྱེད་པ་བཅས་ལ་སྐུལ་འདེད་བཏང་།ད་ལོའི་རྒྱལ་ཡོངས་ཀྱི་ཚོགས་ཆེན་གཉིས་མི་འགྱང་བར་འཚོགས་ལ་ཉེ་བས།སྡེ་ཁག་སོ་སོས་འཐུས་མི་དང་ཨུ་ཡོན་རྣམས་ཀྱི་བསམ་འཆར་དང་གྲོས་གཞིར་ནན་གྱིས་ཉན་ནས།བྱ་བའི་ནང་རྐྱེན་གསར་སྐྲུན་བྱས་ཏེ།གྲོས་གཞི་སྒྲུབ་པའི་བྱ་བ་དང་རང་བབ་ཀྱི་ལས་སྒོ་གཉིས་ལ་མཉམ་དུ་འདང་རྒྱག་པ་དང་།དེར་མཉམ་གཅིག་ཏུ་བཀོད་སྒྲིག་བྱས་ཏེ།མཉམ་གཅིག་ཏུ་སྤེལ་དགོས།གཅིག་ནས་གོ་རིམ་ལྡན་པའི་སྒོ་ནས་སྤྱི་པའི་ཁེ་ཕན་དང་།སྤྱི་དམངས་ཀྱི་ཁེ་ཕན་དང་འབྲེལ་བའི་གྲོས་གཞིར་གོ་རིམ་ལྡན་པའི་སྒོ་ནས་ཡིག་ལན་བསྐུར་ཏེ།མང་ཚོགས་ཀྱི་སེམས་ཁུར་བྱེད་པའི་གནད་དོན་ལ་ལན་འདེབས་དགོས།གཉིས་ནས་གྲོས་གཞི་སྒྲུབ་པའི་རྣམ་པ་གསར་སྐྲུན་བྱས་ནས།གཙོ་སྒྲུབ་ལས་ཁུངས་ཀྱིས་དངོས་སུ་གྲོས་གཞི་སྒྲུབ་པའི་བྱ་བ་ཡར་ཞུ་བྱེད་ཅི་ཐུབ་བྱེད་དགོས།གསུམ་ནས་གཞི་རིམ་དམངས་ཆེན་གྱི་འཐུས་མི་དང་སྲིད་གྲོས་ཨུ་ཡོན་རྣམས་སྡེ་ཁག་སོ་སོར་རྟོག་ཞིབ་ཏུ་འགྲོ་བར་བཀོད་སྒྲིག་བྱེད་དགོས།བཞི་ནས་དཔྱད་ཞིབ་བྱ་བ་ཇེ་དྲག་ཏུ་གཏོང་བ་དང་།གྲོས་གཞི་སྒྲུབ་པའི་བྱ་བ་དེ་སྲིད་གཞུང་བྱ་བ་ཇེ་བཟང་དུ་གཏོང་བའི་བྱེད་ཐབས་གལ་ཆེན་དུ་འགྱུར་བར་བྱས་ནས།སྲིད་གཞུང་གི་སྤྱིའི་ཡིད་རྟོན་གྱི་ཚད་དང་ཕན་ནུས་ཇེ་མཐོར་གཏོང་དགོས་ཟེར།
གྲོས་ཚོགས་ནས་བལྟས་ན།སྡེ་ཁག་དང་ས་གནས་ཀྱིས་མཐུན་སྦྱོར་མཉམ་འབྲེལ་བྱེད་པའི་དངུལ་གཏོང་ལས་གཞིའི་ཞིབ་མཆན་ལྟ་སྐུལ་དོ་དམ་ལམ་ལུགས་འཛུགས་པ་ནི།སྲིད་བསྡུ་དབང་གཏོང་དང་།དབང་གཏོང་དང་དོ་དམ་ཟུང་སྦྲེལ་བྱེད་པའི་བྱེད་ཐབས་གལ་ཆེན་ཞིག་ཡིན་ལ།དེས་སྲིད་གཞུང་གི་དོ་དམ་སྔར་ལས་ཚད་ལྡན་དང་ཕན་ནུས་མཐོ་བར་གཏོང་བ་དང་།སྔར་ལས་བཟང་བོའི་སྒོ་ནས་མང་ཚོགས་ལ་ཞབས་ཕྱི་སྒྲུབ་པར་སྟབས་བདེ་བཟོ་ཐུབ་ལ།དེ་དངུལ་གཏོང་བྱ་བར་ཡར་སྐུལ་དང་ལས་ཞུགས་གསར་སྐྲུན་བྱ་བར་སྣེ་ཁྲིད་བྱེད་པར་དོན་སྙིང་གལ་ཆེན་ལྡན་པར་འདོད།གྲོས་ཚོགས་ནས་མཉམ་འབྲེལ་དྲ་རྒྱ་དང་གཞི་གྲངས་ཆེན་མོའི་ལག་རྩལ་བཀོལ་སྤྱོད་བྱས་ནས།མྱུར་དུ་དངུལ་གཏོང་ལས་གཞིའི་ཞིབ་མཆན་ལྟ་སྐུལ་དོ་དམ་སྟེགས་བུ་འཛུགས་པ་དང་།བཅོས་སྒྱུར་འཕེལ་རྒྱས་དང་།མཁར་གྲོང་འཆར་འགོད།རྒྱལ་ཁོངས་ཐོན་ཁུངས།ཁོར་ཡུག་སྲུང་སྐྱོབ་སོགས་སྡེ་དག་དང་འབྲེལ་མཐུད་བྱེད་པ་དང་།རིམ་པ་སོ་སོའི་སྲིད་གཞུང་དང་འབྲེལ་མཐུད་བྱས་ཏེ།དྲ་ཐོག་ནས་ལྟ་སྐུལ་དོ་དམ་བྱེད་པ་སོགས་ཀྱི་ཞབས་ཞུའི་བྱ་བ་སྤེལ་ནས།མང་ཚོགས་ལ་དོན་བཟང་སྒྲུབ་དགོས་པ་གཏན་ཁེལ་བྱས།
 ཞིང་སྡེའི་ས་ཞིང་ལམ་ལུགས་བཅོས་སྒྱུར་ཚོད་ལྟའི་བྱ་བ་བརྟན་བརླིང་ངང་སྤེལ་ཏེ།ཞིང་བའི་ཁྲིམས་མཐུན་ཁེ་དབང་ལ་སྔར་ལས་བཟང་བོར་སྲུང་སྐྱོབ་བྱེད་ཆེད།གྲོས་ཚོགས་ནས་རྒྱལ་ཡོངས་དམངས་འཐུས་ཚོགས་ཆེན་ལ་ཡར་ཞུ་བྱས་ནས་ཚོད་ལྟའི་ས་ཁུལ་ནས་གནས་སྐབས་སུ་ས་ཞིང་དོ་དམ་བཅའ་ཁྲིམས་དང་གྲོང་ཁྱེར་ཁང་སའི་ཐོན་ལས་དོ་དམ་བཅའ་ཁྲིམས་ཀྱི་འབྲེལ་ཡོད་གཏན་ཁེལ་ལེགས་སྒྲིག་སྒོས་ལག་བསྟར་བྱེད་པར་ཆོག་མཆན་འགོད་པའི་ཆོད་དོན་འཆར་ཟིན་ལ་གྲོས་འཆམ་བྱུང་།འཆར་ཟིན་ལས་བསྟན་དོན།ས་ཞིང་སྤྱི་ལ་དབང་བའི་ལམ་ལུགས་ཀྱི་ངོ་བོ་མི་འགྱུར་བ་དང་།རྨོ་ཞིང་གི་ཚད་ལས་མི་འདའ་བ།ཞིང་བའི་ཁེ་ཕན་ལ་གྱོང་གུད་མི་ཐེབས་པ་བཅས་ཀྱི་ཚད་མཐའ་བརྟན་སྲུང་བྱེད་པའི་སྔོན་འགྲོའི་ཆ་རྐྱེན་འོགས་ཁུལ་ཁ་ཤས་གདམ་ནས་ཚོད་ལྟ་བྱས་ཏེ།ཆ་རྐྱེན་དང་མཐུན་པའི་ཞིང་སྡེའི་ཐུན་མོང་བདག་གཉེར་རང་བཞིན་གྱི་འཛུགས་སྐྲུན་ས་ཞིང་བཀོལ་སྤྱོད་དབང་ཆ་དེ་གཞན་ལ་བསྐོར་བ་དང་།གླ་བ།མ་རྐང་དུ་ཞུགས་པ་སོགས་བྱེད་ཆོག་ལ།དེ་རྒྱལ་དབང་འཛུགས་སྐྲུན་ས་ཞིང་གི་བཀོལ་སྤྱོད་དབང་ཆ་དང་གཅིག་མཚུངས་སྒོས་ཚོང་རར་ཞུགས་པ་དང་།དབང་ཆ་དང་རིན་གོང་ཡང་གཅིག་འདྲ་ཡིན་དགོས་ཟེར།  །