ཀྲུང་གོ་བོད་ཀྱི་དྲ་བའི་འཕྲིན། ཉེ་བའི་ལོའི་ནང་བོད་ལྗོངས་ཀྱིས་སྤུས་ལེགས་ཚྭ་མེད་ཆུའི་ཐོན་ཁུངས་ཀྱི་ལེགས་ཆ་དམ་འཛིན་ནན་པོ་བྱས་ནས། ཆུའི་སྐྱེ་ཁམས་ཐོན་ཁུངས་ལུགས་མཐུན་གསར་སྤེལ་དང་སྲུང་སྐྱོབ་བེད་སྤྱོད་བྱེད་པའི་རྨང་གཞིའི་ཐོག ཚན་རྩལ་ལ་བརྟེན་ནས་རང་བྱུང་འཐུང་ཆུའི་ཐོན་ལས་གོང་འཕེལ་གྱི་གཟིགས་སྐྱོང་སྲིད་ཇུས་བཟོས་པ་དང་། བྱ་ཐབས་སྣ་ཚོགས་མཉམ་སྤྱོད་ཀྱིས་རང་བྱུང་འཐུང་ཆུའི་ཐོན་ལས་གོང་འཕེལ་ལ་སྐུལ་འདེད་བཏང་བ་རེད།
རང་ལྗོངས་ཀྱི་རང་བྱུང་འཐུང་ཆུའི་ཐོན་ལས་ཀྱི་འབྲེལ་ཡོད་ཁེ་ལས་ཀྱིས་ཀྲུང་དབྱང་ནས་གནང་བའི་བོད་ཀྱི་དམིགས་བསལ་གྱི་ནོར་ཁྲལ་དང་དངུལ་རྩ་སོགས་ཀྱི་གཟིགས་སྐྱོང་སྲིད་ཇུས་ལོངས་སྤྱོད་གང་ལེགས་བྱས་པ་སྟེ། བོད་རང་གི་རང་བྱུང་འཐུང་ཆུའི་ཁེ་ལས་བོད་ལྗོངས་ཐན་ཀྲའོ་གཏེར་ཆུ་མ་རྐང་ཚད་ཡོད་ཀུང་སི་ལྟ་བུས། ཁེ་ལས་ཀྱི་ཐོན་སྐྱེད་གཉེར་སྐྱོང་གི་ཡོང་འབབ་ཐོག་མ་གཏོད་པ་ནས་བཟུང་། ཁེ་ལས་ཀྱི་ཐོབ་ཁྲལ་ལོ་ལྔ་རྩ་ཆག་གཏོང་བའི་སྲིད་ཇུས་ལོངས་སྤྱོད་བྱས་ཡོད་པ་རེད།
དེང་སྐབས་རང་ལྗོངས་ཀྱི་ཆུའི་ཐོན་ཁུངས་ཀྱི་ཁེ་ལས་གཙོ་བོ་ལྷ་ས་དང་གཞིས་རྩེར་ཡོད་པ་དང་། ལྗོངས་ཡོངས་སུ་འཐུང་ཆུའི་ཐོན་སྐྱེད་ཁེ་ལས37ཡོད་སྟབས་སྤྱིའི་ཐོན་སྐྱེད་ནུས་པ་ཀྲོན་ཁྲི་ཚོ230ཟིན་ཡོད་པ་དང་། 2013ལོའི་ལྗོངས་ཡོངས་ཀྱི་རང་བྱུང་འཐུང་ཆུའི་ཐོན་སྐྱེད་ཁེ་ལས་ཀྱི་བཟོ་ལས་ཀྱི་སྤྱིའི་ཐོན་ཚད་རིན་ཐང་དུང་ཕྱུར4ཟིན་ནས། ཆུའི་ཐོན་ཁུངས་གསར་སྤེལ་བེད་སྤྱོད་བྱས་པ་དེས་རང་ལྗོངས་ཀྱི་ཁྱད་ལྡན་ཆུའི་ཐོན་ལས་གོང་འཕེལ་ཡོང་རྒྱུར་སྐུལ་འདེད་ནུས་ལྡན་བཏང་ཡོད་པ་རེད།  །