ཟླ་གཉིས་པའི་ཚེས་བཞི་ཉིན།རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕེན་གྱིས་མི་དམངས་ཚོགས་ཁང་ཆེན་མོའི་ནང་ཨ་ཀེན་ཐིན་གྱི་ཙུང་ཐུང་ཁི་ལེ་སི་ཏེ་ན་དང་གྲོས་མོལ་མཛད།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕེན་གྱིས་ཚེས་བཞི་ཉིན་མི་དམངས་ཚོགས་ཁང་ཆེན་མོའི་ནང་ཨ་ཀེན་ཐིན་གྱི་ཙུང་ཐུང་ཁི་ལེ་སི་ཏེ་ན་དང་གྲོས་མོལ་མཛད།
ཞི་ཅིན་ཕེན་གྱིས་བསྟན་དོན།ན་ནིང་ཟླ་བདུན་པར།ངས་ཨ་ཀེན་ཐིན་ལ་ཕུན་སུམ་ཚོགས་པའི་རྒྱལ་དོན་འཚམས་འདྲི་བྱས་ཏེ།ངེས་གཉིས་ཀྱིས་ཀྲུང་གོ་དང་ཨ་ཀེན་ཐིན་བར་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་བཙུགས་པ་བསྒྲགས་པ་དང་།རྒྱལ་ཁབ་གཉིས་ཀྱི་ཁྱབ་ཁོངས་སོ་སོའི་གཉིས་ཕན་མཛད་མཐུན་མཉམ་ལས་ལ་ཤུགས་སྣོན་པའི་ཐད་ནས་ཐུན་མོང་གི་ལྟ་བ་གལ་ཆེན་བྱུང་།ཕྱོགས་གཉིས་ཀྱིས་མཉམ་དུ་འབད་བརྩོན་བྱས་པས།ང་ཚོའི་བར་བྱུང་བའི་ཐུན་མོང་གི་ལྟ་བ་དེ་དོན་དངོས་སུ་འགྱུར་བཞིན་ཡོད།ཀྲུང་གོ་དང་ཨ་ཀེན་ཐིན་གྱི་གཉིས་ཕན་མཛའ་མཐུན་མཉམ་ལས་ཀྱི་ཕན་འབྲས་གསར་བས་རྒྱལ་ཁབ་གཉིས་ཀྱི་འབྲེལ་བའི་འཕེལ་རྒྱས་ལ་སྒུལ་ཤུགས་ཆེན་པོ་བསྣན་ཡོད་ལ།ང་ཀྲུང་གོ་དང་ཨ་ཀེན་ཐིན་གྱི་འབྲེལ་བའི་མདུན་ལྗོངས་ལ་ཡིད་ཆེས་སྔར་ལས་ཆེན་པོས་ཁེངས་ཡོད་ཟེར།
ཞི་ཅིན་ཕེན་གྱིས་ནན་གྱིས་བསྟན་དོན།ཀྲུང་གོ་དང་ཨ་ཀེན་ཐིན་གཉིས་ནི་གསར་དར་ཁྲོམ་རའི་རྒྱལ་ཁབ་གལ་ཆེན་གཉིས་ཡིན་པས།ཕྱོགས་གཉིས་ཀྱིས་འགྲོ་འོང་དང་མཉམ་ལས་ཇེ་ཟབ་ཏུ་གཏོང་བ་དང་།འཕེལ་རྒྱས་ཀྱི་གོ་སྐབས་མཉམ་དུ་ལོངས་སུ་སྤྱད་དེ།འགྲན་རྩོད་ལ་མཉམ་དུ་ཁ་གཏད་འཇལ་དགོས།རྒྱལ་ཁབ་གཉིས་ཀྱིས་ཕྱོགས་ཡོངས་ཀྱི་འགྲོ་འོང་ལ་ཤུགས་སྣོན་པ་དང་།རྒྱལ་ཁབ་གཉིས་ཀྱི་སྲིད་གཞུང་བར་གྱི་རྒྱུན་བཙུགས་ཨུ་ཡོན་ལྷན་ཁང་གི་གཅིག་གྱུར་བཀོད་འདོམས་དང་མཐུན་སྦྱོར་ནུས་པ་འདོན་སྤེལ་བཟང་བོ་བྱས་ཏེ།རྒྱལ་ཁབ་གཉིས་ཀྱི་སྲིད་གཞུང་གི་ཐུན་མོང་འགུལ་སྐྱོད་འཆར་གཞི་དངོས་འབེབ་བྱེད་དགོས།དངོས་གཉེར་མཉམ་ལས་ཟབ་སྤེལ་བྱེད་པ་དང་།དཔལ་འབྱོར་མཉམ་ལས་དང་མཐུན་སྦྱོར་འཐབ་ཇུས་གྲོས་མོལ་སོགས་ཀྱི་སྒྲིག་སྲོལ་བཀོལ་སྤྱོད་བཟང་བོ་བྱས་ཏེ།ཕྱོགས་གཉིས་ཀྱི་གཉིས་ཕན་མཉམ་ལས་རྒྱུན་བསྲིང་དང་བརྟན་བརླིང་།གཏིང་ཟབ་སྒོས་འཕེལ་བར་སྐུལ་འདེད་གཏོང་དགོས།ཀྲུང་གོས་ཨ་ཀེན་ཐིན་གྱི་ཁེ་ལས་ཀྱིས་ཀྲུང་གོའི་ཁྲོམ་ར་གསར་སྤེལ་གང་ལེགས་བྱེད་པར་དགའ་བསུ་ཞུ་བཞིན་ཡོད་ལ།ཀྲུང་གོའི་ཁེ་ལས་ཨ་ཀེན་ཐིན་དུ་དངུལ་གཏོང་ལས་སྤེལ་བྱེད་དུ་འགྲོ་བར་སྔར་བཞིན་རྒྱབ་སྐྱོར་བྱེད་རྒྱུ་ཡིན།ཀྲུང་གོས་རྒྱལ་སྤྱིའི་རྩ་འཛུགས་དང་ཕྱོགས་མང་སྒྲིག་གཞིའི་ཁྲོད་དུ་ཨ་ཀེན་ཐིན་བར་གྱི་རོགས་ལས་ལ་ཤུགས་སྣོན་འདོད་ཡོད་ཟེར།
ཁི་ལེ་སི་ཏེ་ན་ཡིས་བསྟན་དོན།ཨ་ཀེན་ཐིན་ཕྱོགས་ཀྲུང་གོའི་བར་གྱི་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བར་ཤུགས་སྣོན་པར་ཧ་ཅང་མཐོང་ཆེན་བྱེད་བཞིན་ཡོད་ལ།ཕྱོགས་གཉིས་ཀྱི་མཉམ་ལས་ལ་གྲུབ་འབྲས་གཡུར་དུ་ཟ་བ་ཐོབ་པར་རེ་སྒུག་བྱས་ཡོད།ཨ་ཀེན་ཐིན་དང་ཀྲུང་གོ་ཕྱོགས་གཉིས་ཀྱིས་ཕ་རོལ་བས་ཧ་ཅང་དོ་སྣང་བྱེད་པའི་གནད་དོན་ཐད་ནས་ཕན་ཚུན་ལ་རྒྱབ་སྐྱོར་བྱེད་བཞིན་ཡོད་ལ།ཨ་ཀེན་ཐིན་ཕྱོགས་ཀྱིས་མཉམ་འབྲེལ་རྒྱལ་ཚོགས་དང་འཛམ་གླིང་ཉོ་ཚོང་རྩ་འཛུགས་སོགས་རྒྱལ་སྤྱིའི་རྩ་འཛུགས་ཁྲོད་ནས་ཀྲུང་གོའི་བར་གྱི་མཉམ་ལས་ལ་ཤུགས་སྣོན་འདོད་ཡོད་ཟེར།
གྲོས་མོལ་གྱི་རྗེས་སུ།རྒྱལ་ཁབ་གཉིས་ཀྱི་གཙོ་འཛིན་གྱིས་མཉམ་དུ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དང་ཨ་ཀེན་ཐིན་སྤྱི་མཐུན་རྒྱལ་ཁབ་ཀྱི་རྒྱལ་ཁབ་གཉིས་ཀྱི་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བར་ཤུགས་སྣོན་པའི་སྐོར་གྱི་མཉམ་འབྲེལ་གསལ་སྒྲོག་སྟེང་མིང་བཀོད།རྒྱལ་ཁབ་གཉིས་ཀྱི་གཙོ་འཛིན་གྱིས་ད་དུང་ཆབ་སྲིད་དང་དཔལ་འབྱོར་ཉོ་ཚོང་།དངུལ་ལོར།ཉིང་རྡུལ་ནུས་པ།རིག་གནས།འཕྲོད་བསྟེན།ཁྲིམས་འཛིན།མཁའ་སྐྱོད།གློག་འཕྲིན།གནས་སྐོར་སོགས་ཁྱབ་ཁོངས་ཀྱི་མཉམ་ལས་ཡིག་ཆ་འགོད་པར་བདེན་དཔང་བྱས།
རྒྱལ་ཁབ་གཉིས་ཀྱི་གཙོ་འཛིན་གྱིས་མཉམ་དུ་གསར་འགོད་པར་མཇལ་འཕྲད་གནང་།ཞི་ཅིན་ཕེན་གྱིས་བསྟན་དོན།ང་དང་ཙུང་ཐུང་ཁི་ལེ་སི་ཏེ་ན་གཉིས་ཀྱིས་གཏིང་ཟབ་ཅིང་ཕན་འབྲས་ཕུན་སུམ་ཚོགས་པའི་གྲོས་མོལ་བྱས་ཏེ།ཐུན་མོང་གི་ལྟ་ཚུལ་གལ་ཆེན་མང་བོ་བྱུང་།ད་ལོ་ནི་ཀྲུང་གོ་དང་ཨ་ཀེན་ཐིན་གྱི་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་སྤེལ་མགོ་རྩོམ་པའི་ལོ་ཡིན་ལ།ཕྱོགས་གཉིས་ཀྱི་འབད་བརྩོན་འོག་ཏུ།ཀྲུང་གོ་དང་ཨ་ཀེན་ཐིན་གྱི་འབྲེལ་བ་མུ་མཐུད་གོང་འཕེལ་དུ་འགྲོ་ཐུབ་པར་ང་ལ་ཡིད་ཆེས་ཡོད་ཟེར།
ཁི་ལེ་སི་ཏེ་ན་ཡིས་བསྟན་དོན།ཨ་ཀེན་ཐིན་དང་ཀྲུང་གོའི་བར་དུ་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་བཙུགས་པ་དེས་རྒྱལ་ཁབ་གཉིས་ཀྱི་འབྲེལ་བ་རྩ་བ་ནས་གོང་འཕེལ་དུ་སོང་བ་མཚོན་ཡོད་ལ།ཕྱོགས་གཉིས་ཀྱིས་དེ་རིང་མཉམ་ལས་ཡིག་ཆ་སྣ་ཚོགས་བཀོད་པ་དེས་རྒྱལ་ཁབ་གཉིས་ཀྱི་མཉམ་ལས་ལ་གྲུབ་འབྲས་གསར་བ་ཐོབ་པ་མཚོན་ཡོད།གྲུབ་འབྲས་འདི་དག་གིས་ཨ་ཀེན་ཐིན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཡར་སྐུལ་དང་།ཨ་ཀེན་ཐིན་གྱི་རྒྱལ་སྤྱིའི་འགྲན་རྩོད་ནུས་ཤུགས་ཇེ་ཆེར་བཏང་ནས།ཨ་ཀེན་ཐིན་དང་ཀྲུང་གོའི་ཕྱོགས་ཡོངས་ཀྱི་མཉམ་ལས་སྔར་ལས་ཇེ་ཟབ་ཏུ་གཏོང་ཐུབ་ཟེར།
གྲོས་མོལ་གྱི་སྔོན་ལ།ཞི་ཅིན་ཕེན་གྱིས་མི་དམངས་ཚོགས་ཁང་ཆེན་མོའི་ཚོམས་ཆེན་བྱང་མ་ནས་ཁི་ལེ་སི་ཏེ་ན་ལ་དགའ་བསུའི་མཛད་སྒོ་བསྡུས།རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ་ཡན་ཅོན་ཆི་དང་།རྒྱལ་སྲིད་ཨུ་ཡོན་དབྱང་ཅེ་ཁྲི།རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་ཀྲང་ཆིན་ལིས་སོགས་དགའ་བསུའི་མཛད་སྒོར་ཞུགས།  །