རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕེན་གྱིས་ཚེས་གཉིས་ཉིན་མི་དམངས་ཚོགས་ཁང་ཆེན་མོའི་ནང་རྒྱ་གར་གྱི་ཕྱི་འབྲེལ་པུའུ་ཀྲང་སི་ཝ་ལ་ཅེ་ལ་མཇལ་འཕྲད་གནང་།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕེན་གྱིས་ཚེས་གཉིས་ཉིན་མི་དམངས་ཚོགས་ཁང་ཆེན་མོའི་ནང་རྒྱ་གར་གྱི་ཕྱི་འབྲེལ་པུའུ་ཀྲང་སི་ཝ་ལ་ཅེ་ལ་མཇལ་འཕྲད་གནང་།མཇལ་འཕྲད་གནང་སྐབས་ཞི་ཅིན་ཕེན་གྱིས་གསུངས་རྒྱུར།ཀྲུང་གོ་དང་རྒྱ་གར་གྱི་འབྲེལ་བ་བརྟན་འཇགས་སྒོས་འཕེལ་རྒྱས་སུ་སོང་བ་དེ་རྒྱལ་ཁབ་གཉིས་ཀྱི་མགོ་ཁྲིད་པས་མུ་མཐུད་དུ་བསགས་པའི་ཆབ་སྲིད་ཡིད་ཆེས་དང་གནད་དོན་གལ་ཆེན་ཁ་ཤས་ཐད་ནས་བྱུང་བའི་ཐུན་མོང་གི་ལྟ་ཚུལ་ལ་འབྲེལ་བ་ཡོད་པས།རྒྱལ་ཁབ་གཉིས་ཀྱི་མགོ་ཁྲིད་པས་མུ་མཐུད་དུ་འབྲེལ་འདྲིས་དང་བརྗེ་རེས་སྲུང་འཛིན་བྱེད་པ་དང་རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་སུ་གཏོང་བའི་ཡང་དག་པའི་ཁ་ཕྱོགས་གསལ་བོར་ཤེས་པར་བྱེད་དགོས།ཕྱོགས་གཉིས་ཀྱིས་དུས་རབས་གསར་བའི་གོ་སྐབས་དམ་འཛིན་བྱས་ཏེ།འཕེལ་རྒྱས་འཐབ་ཇུས་དང་འབྲེལ་མཐུད་བྱེད་པ་དང་ཐོན་ལས་ས་ཁུལ་དང་ལྕགས་ལམ་སོགས་འཐབ་ཇུས་རང་བཞིན་གྱི་མཉམ་ལས་སྔ་མོ་ནས་ཡོངས་འགྲུབ་བྱས་ནས།རྒྱལ་ཁབ་གཉིས་ཀྱི་མི་དམངས་དུང་ཕྱུར་ཉེར་ལྔ་ལྷག་ལ་ཁེ་ཕན་སྐྲུན་དགོས་པར་མ་ཟད་འཛམ་གླིང་གི་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་དགོས་ཟེར།
སི་ཝ་ལ་ཅེ་ཡིས་བཤད་རྒྱུར།རྒྱ་གར་ཕྱོགས་ཀྱིས་ཀྲུང་གོས་མུ་མཐུད་དུ་རྒྱ་གར་ལ་མ་དངུལ་གཏོང་བའི་ཤུགས་ཚད་ཇེ་ཆེར་གཏོང་བར་རེ་སྒུག་བྱེད་བཞིན་ཡོད་པ་དང་།རྒྱལ་ཁབ་གཉིས་ཀྱི་ཉོ་ཚོང་དོ་མཉམ་མིན་པའི་གནད་དོན་ཞི་འཇགས་སུ་གཏོང་དགོས་པར་མ་ཟད།ཕྱོགས་གཉིས་ཀྱིས་གྲོས་མོལ་ལ་ཤུགས་བསྣན་ནས་མཐའ་མཚམས་གནད་དོན་འོས་འཚམ་སྒོས་ཐག་གཅོད་དགོས་ཟེར།།