མི་དམངས་དྲ་བ་ནས་གནས་ཚུལ་འབྱོར་གསལ།ཟླ་བ6པའི་ཚེས30ཉིན་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་ཆབ་སྲིད་ཅུས་ཀྱི་ཚོགས་འདུ་གཙོ་འགན་བཞེས་ནས་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི《ཞུའེ་ཚའེ་ཧོའུ་ཡི་ཚབས་ཆེའི་སྒྲིག་འགལ་གྱོ ད་དོན་ལ་ཞིབ་བཤེར་བྱ་རྒྱུའི་སྐོར་གྱི་སྙན་ཞུ》གསན་པ་དང་འབྲེལ《ཀྲུང་གོ་གུང་ཁྲན་ཏང་གི་སྒྲིག་ཡིག》དང《ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག》གི་འབྲེལ་ཡོད་གཏན་འབེབས་ལ་གཞིགས་ནས་ཞུའེ་ཚའེ་ཧོའུ་ཏང་གི་སྐྱིད་སྡུག་ནས་འབུད་རྒྱུའི་ཆད་པ་བཅད་པ་དང་དེས་ལྐོག་རྔན་བླངས་པའི་ཉེས་གསོག་གནད་དོན་དང་གནད་དོན་གྱི་ཁུངས་སྣེ་ཆེས་མཐོའི་མི་དམངས་ཞིབ་དཔྱོད་ཁང་གིས་དམག་དོན་ཞིབ་དཔྱོད་ལས་ཁུངས་ལ་བཅའ་ཁྲིམས་ལྟར་ཐག་གཅོད་བྱ་རྒྱུར་རྩིས་སྤྲད་པ་རེད། 2014ལོའི་ཟླ་བ3པའི་ཚེས15ཉིན་ཀྲུང་གུང་ཀྲུང་དབྱང་གིས་ཏང་གི་སྒྲིག་ཁྲིམས་སྲོལ་ཡིག་གཞིར་བཟུང་ཞུའེ་ཚའེ་ཧོའུ་སྒྲིག་འགལ་གནད་དོན་དང་འབྲེལ་བ་ཡོད་པར་རྩ་འཛུཊ་ཀྱིས་ཞིབ་བཤེར་བྱ་རྒྱུའི་གཏན་འབེབས་བྱས་པ་རེད།ཞིབ་དཔྱད་བྱས་པར་བརྒྱུད་ཞུའེ་ཚའེ་ཧོའུ་ཡིས་གོ་གནས་ལ་བརྟེན་ནས་མི་གཞན་ལ་གོ་གནས་སྤོར་རྒྱུའི་ཐད་རོགས་རམ་བྱས་ནས་ཐད་ཀར་ཁྱིམ་མི་བརྒྱུད་ལྐོག་རྔན་བླངས་ཡོད་པ་དང་།གོ་གནས་ཀྱི་ཤུགས་རྐྱེན་ལ་བརྟེན་ནས་མི་གཞན་ལ་ཕན་པ་ཐོབ་ཐབས་བྱས་ཏེ་དེའི་ཁྱིམ་མིས་ལྐོག་ཏུ་མི་གཞན་གྱི་རྒྱུ་ནོར་བླངས་ཡོད་པས་ཏང་གི་སྒྲིག་ཁྲིམས་ལས་ཚབས་ཆེན་འགལ་བར་མ་ཟད།ལྐོག་རྔན་བླངས་པའི་ཉེས་པ་བསགས་པ་དང་།གནས་ཚུལ་ཚབས་ཆེ་བ་དང་ཤུགས་རྐྱེན་ཧ་ཅང་ངན་པ་བཟོས་པ་རེད།
ཚོགས་འདུའི་ཐོག་རིམ་ཁག་ཏང་ཨུས་ཏང་ཡོན་ལས་བྱེད་པ་དང་ལྷག་པར་དུ་མཐོ་རིམ་དང་འབྲིང་རིམ་ལས་བྱེད་པར་སློབ་གསོ་དང་།དོ་དམ།ལྟ་སྐུལ་བཅས་བྱེད་ཤུགས་ཆེ་རུ་གཏོང་བ་དང་།ཏང་གི་སྒྲིག་ཁྲིམས་ནན་པོ་གཏོང་བ།རྒྱུན་ཆད་མེད་པར་རང་ངོས་དྭངས་གཙང་དང་།རང་ངོས་འཐུས་ཚང་།རང་ངོས་གསར་བརྗེས།རང་ངོས་ཡར་རྒྱས་བཅས་ཀྱི་ནུས་པ་ཆེ་རུ་གཏོང་བ།རྒྱུན་ཆད་མེད་པར་ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་འཐབ་རྩོད་ཀྱི་གྲུབ་འབྲས་གསར་པ་ཐོབ་པར་བྱས་ནས་ཏང་གི་སྔོན་ཐོན་རང་བཞིན་དང་དྭངས་གཙང་རང་བཞིན་དུས་ནམ་ཡང་གནས་པ་བྱེད་དགོས།རིམ་ཁག་འགོ་ཁྲིད་ལས་བྱེད་པ་ཚོས་ངེས་པར་དུ་ཏང་གཤིས་བློ་སྦྱོང་ལ་ཤུགས་སྣོན་བརྒྱབ་ནས་མར་ཁེ་སི་རིང་ལུགས་ཀྱི་འཇིག་རྟེན་ལྟ་བ་དང་།མི་ཚེའི་ལྟ་བ།རིན་ཐང་ལྟ་བ་བཅས་བརྟན་པོ་འཆང་བ་དང་།ཡང་དག་པའི་དབང་ཆའི་ལྟ་བ་དང་།གོ་གནས་ལྟ་བ།ཁེ་ཕན་ལྟ་བ་བཅས་འཆང་བའི་ཐོག་ནས་རང་རྟོགས་ངང་བསླུ་བྲིད་དང་ཚོད་བགམ་སྣ་ཚོགས་ཐེག་ཐུབ་པ་བྱེད་དགོས་པའི་ནན་བཤད་བྱས་པ་རེད།