ཀྲུང་གོ་བོད་ཀྱི་དྲ་བའི་འཕྲིན། ཟླ6པའི་ཚེས30ཉིན། མཚོ་སྔོན་ཞིང་ཆེན་གྱི་ཆེས་ཆེ་བའི་བོད་ཀྱི་རིག་གནས་ཐོན་ལས་གསར་སྐྲུན་གླིང་སྟེ། མཚོ་ལྷོ་བོད་རིགས་རང་སྐྱོང་ཁུལ་བོད་ཀྱི་རིག་གནས་ཐོན་ལས་གླིང་གི་སྒོ་ཕྱེས་པའི་མཛད་སྒོ་དེ་གུང་ཧི་རྫོང་ཤམ་བྷ་ལ་ཐང་ཆེན་ནས་ཚོགས།

2011ལོའི་ཟླ5བར་ལས་འགོ་བརྩམས་པའི་མཚོ་ལྷོ་ཁུལ་བོད་ཀྱི་རིག་གནས་ཐོན་ལས་གསར་སྐྲུན་གླིང་ལ་སྤྱིའི་མ་དངུལ་སྒོར་དུང་ཕྱུར3.8བཏང་ཞིང་། བཟོ་སྐྲུན་རྒྱ་ཁྱོན་ལ་མུས་གྲུ་བཞི་མ་ཁྲི10ལྷག་ཡོད། བཟོ་སྐྲུན་གཙོ་བོ་ལ་མཚོ་ལྷོ་ཁུལ་བོད་ཀྱི་རིག་གནས་དངོས་མང་བཤམ་སྟོན་ཁང་དང་ལྟེ་གནས་ཐང་ཆེན། སྐར་མ་རིམ་པའི་མགྲོན་ཁང་བཅས་དང་། དེའི་ཁོངས་གཏོགས་ཀྱི་བཟོ་བཀོད་ལ་ཆོས་ལུགས་སྒྱུ་རྩལ་ཁང་དང་དེང་རབས་ཚོང་དོན་གཞུང་སྒྲུབ་ཁང་། མགྲོན་ཁང་རྣམ་པ་ཅན་གྱི་སྤྱི་ཤག ཕྱོགས་བསྡུས་ཚོང་ར་ཆེན་མོ་ཤམ་བྷ་ལ་ཚོང་ལས་ཐང་ཆེན་དང་བྱེད་ནུས་སྣ་མང་ཅན་གྱི་ཚོང་ལས་ཐོག་ཁང་བཅས་ཡོད།

ཐོན་ལས་གསར་སྐྲུན་གླིང་འདིའི་བྱེད་ནུས་ལ་ཚན་རྩལ་དང་རིག་གནས། ཚོང་ལས། རོལ་རྩེད་བཅས་གཙོར་བཟུང་སྟེ། དམིགས་ཡུལ་ནི་རིག་གནས་དང་ཚོང་དོན་བརྗེ་རེས་བྱེད་པ་བརྒྱུད། སྣ་མང་རང་བཞིན་གྱི་བོད་ཀྱི་རིག་གནས་མངོན་པར་མཚོན་ནས་མཚོ་ལྷོ་ཁུལ་གྱི་གནས་སྐོར་ལས་རིགས་ལ་ཐོལ་བརྒལ་རང་བཞིན་གྱི་འཕེལ་རྒྱས་སུ་འགྲོ་བར་ཞབས་ཞུའི་སྟེགས་བུ་ཞིག་བསྐྲུན་ཡོད།  །