སྒྲུང་གཏམ《མ་ཎི་རྡོ་འབུམ་ལྷིང་འཇགས་ཀྱིས་འཁྲོལ་བ》ཞེས་པའི་དཔྱད་གླེང་ཚོགས་འདུ་བསྡུས།

      སྤྱི་ཟླ6པའི་ཚེས26ཉིན་གྱི་ཞོགས་པའི་དུས་ཚོད9:00སྟེང་། མཚོ་སྔོན་ཞིང་ཆེན་རྩོམ་རིག་མཐུན་ཚོགས་དང་པེ་ཅིང་ཧི་མ་ལ་ཡ་གློག་བརྙན་རིག་གནས་བརྒྱུད་སྒྲོག་ཚད་ཡོད་ཀུང་ཟི་གཉིས་ཀྱིས་མཉམ་དུ་གཙོ་སྒྲུབ་གནང་བའི་བོད་ཀྱི་གློག་བརྙན་འཁྲབ་ཁྲིད་པ་དང་འཁྲབ་གཞུང་རྩོམ་པ་པོ། སྐད་གཉིས་རྩོམ་པ་པོ། སྐད་གཉིས་ལོ་ཙཱ་བ། པདྨ་ཚེ་བརྟན་ལགས་ཀྱི་རྒྱ་འགྱུར་སྒྲུང་གཏམ《མ་ཎི་རྡོ་འབུམ་ལྷིང་འཇགས་ཀྱིས་འཁྲོལ་བ》ཞེས་པའི་དཔྱད་གླེང་ཚོགས་འདུ་དེ་གནའ་མཁར་ཟི་ལིང་ནས་གཟབ་རྒྱས་ངང་བསྡུས།

      ཐེངས་འདིའི་ཚོགས་འདུ་ལ་ཞིང་ཆེན་རྩོམ་རིག་མཉམ་འབྲེལ་མཐུན་ཚོགས་ཀྱི་འགོ་ཁྲིད་དང་། ཞིང་ཆེན་ནང་ཁུལ་གྱི་དཔྱད་འཇོག་པ། མཚོ་སྔོན་མི་རིགས་སློབ་ཆེན་གྱི་ཞིབ་འཇུག་སློབ་མ། ཟི་ལིང་ན་ཡོད་པའི་གསར་ལམ་ལས་རིགས་ཁག མཚོ་སྔོན་རྩོམ་རིག་མཐུན་ཚོགས་ཀྱི་ལས་མི་སོགས་ཟབ་ཞུགས་བྱས་འདུག་ལ། དེ་མིན་ས་ཕྱོགས་མི་འདྲ་བ། མི་རིགས་མི་གཅིག་པ། ལས་ཁུངས་དང་ལས་རིགས་མི་འདྲ་བ་སོ་སོ་ནས་ཕེབས་པའི་སྐུ་མགྲོན70ལྷག་འདུས་འདུག 
      ཚོགས་འདུ་མགོ་བརྩམས་པ་དང་མཉམ་དུ། མཚོ་སྔོན་ཞིང་ཆེན་རྩོམ་རིག་མཉམ་འབྲེལ་མཐུན་ཚོགས་ཀྱི་ཚོགས་མིའམ་ཞིང་ཆེན་རྩོམ་རིག་མཐུན་ཚོགས་ཀྱི་ཀྲུའུ་ཞི་མེ་སྒྲོན་དང་། ཞིང་ཆེན་རྩོམ་རིག་མཉམ་འབྲེལ་ཚོགས་པའི་ཧྲུའུ་ཅུའམ་ཀྲུའུ་ཞི་པཎ་གོ་སོགས་ཀྱིས་ཚོགས་འདུ་ལ་མགོ་འཛིན་མཛད་ཅིང་། སྔ་གཞུག་ཏུ་པདྨ་ཚེ་བརྟན་དང་པདྨ་ཚེ་བརྟན་གྱི་བརྩམས་ཆོས་དང་འབྲེལ་ནས་གཏམ་བཤད་གནང་། དེ་དང་མཉམ་དུ་དཔྱད་གླེང་པ་ཉིན་ཞའོ་ལིན་དང་ཧོང་ཀྲི་གང་། དེ་མིན་བཀྲ་ཤིས་ཚེ་རིང་། ལུང་རིན་ཆེན་སོགས་དཔྱད་གླེང་པ15ལྷག་གིས་ཟུར་མི་འདྲ་བ་དང་གཏིང་ཟབ་པའི་སྒོ་ནས་དཔྱད་གླེང་སྣ་མང་སྤེལ།