ཞིན་ཧྭ་གསར་འགྱུར་ཁང་ལྷ་ས་ནས་ཟླ་བ6པའི་ཚེས18ཉིན་འབྱོར་བའི་གཏམ་གསར། ལོ་སྟོང་ཕྲག་གི་ལོ་རྒྱུས་ཡོད་པའི་བོད་ཡིག་གནའ་རྩོམ་ཕུ་རིའི་ཚད་ལྡན་ཡིག་ཆའི་དཀར་ཆག་སྒྲིག་པ་དང་ལེགས་སྒྲིག  གློག་རྡུལ་ཕབ་འཇུག་བྱས་ཏེ་ཡིག་ཚགས་སུ་འཇོག་པའི་ལས་ཀ་བཅས་ཧ་ལམ་གྲུབ་ཅིང་། མིག་སྔར་གློག་རྡུལ་གྱི་དེབ་གྲུབ་པ་མ་ཚད་འཛམ་གླིང་ལ་ཐོག་མར་ཡོངས་བསྒྲགས་བྱ་རྒྱུ་རེད།
     ཤེས་རྟོགས་བྱུང་བར་གཞིགས་ན། ཕུ་རིའི་ཚད་ལྡན་ཡིག་ཆ་དེ2002ལོར་བོད་ལྗོངས་གཞིས་ཀ་རྩེ་ས་ཁུལ་གྱི་གཉའ་ལམ་རྫོང་ཕུ་རི་གྲོང་སྡེའི་ས་འོག་ནས་ཐོན། དེ་ནི་ཏུན་ཧོང་བཀའ་ཐང་རྗེས་ཀྱི་ཀྲུང་གོས་རྙེད་པའི་ལོ་རབས་ཆེས་རིང་བ་དང་ཉར་འབོར་ཆེས་མང་བའི་བོད་ཡིག་གནའ་རྩོམ་ཚད་ལྡན་ཡིག་ཆ་ཞིག་ཡིན། ཁྱོན་བསྡོམས་སྣ་ཁ150ལྷག་ཡོད་པ་དང་ཤོག་གྲངས12000ལ་ཉེ་བ་ཡོད། ལོ་རབས་བདས་ན་སྤྱི་ལོ་དུས་རབས10ལ་གྲུབ་པ་ཞིག་རེད།
     ངོ་སྤྲོད་བྱས་པར་གཞིགས་ན།ཕུ་རིའི་ཚད་ལྡན་ཡིག་ཆའི་བརྗོད་བྱ་ཕུན་སུམ་ཚོགས་པ་དང་ཞིབ་ཅིང་བདེན་པ་ཡིན་ཞིང་། དེའི་ནང་གསང་སྔགས་ཀྱི་ཆོ་ག་དང་སངས་རྒྱས་ཆོས་ལུགས་ཀྱི་བསྟན་བཅོས་དང་སྙན་ངག   མི་སྣའི་རྣམ་ཐར་སོགས་ཚུད་ཡོད། བོད་ཀྱི་སྐད་ཡིག་དང་སྲོལ་རྒྱུན་གོམས་གཤིས། ཆོས་ལུགས་དད་པ་སོགས་ཕྱོགས་མང་པོའི་ཐད་ཀྱི་རིན་ཐང་ཆེ་བའི་གདོད་མའི་ཡིག་ཆ་ཉར་ཚགས་བྱེད་འདུག   དེ་ལ་རིག་གཞུང་ཞིབ་འཇུག་བྱ་རྒྱུའི་རིན་ཐང་དེ་ཏུན་ཧོང་བཀའ་ཐང་དང་འདྲ་བ་རེད།
    བོད་ཀྱི་གནའ་བོའི་ཚད་ལྡན་ཡིག་ཆ་ཞིབ་འཇུག་བྱེད་མཁན་ཆེད་རམས་པ་སྒྲོལ་དཀར་གྱིས་བཤད་རྒྱུར། ཕུ་རིའི་ཚད་ལྡན་ཡིག་ཆ་དེས་དུས་རབས་བཅུ་བཞི་པའི་སྔོན་གྱི་བོད་ཀྱི་བརྡ་སྤྲོད་གྲུབ་ཚུལ་གྱི་འཕོ་འགྱུར་དང་རྩོམ་འགྲོས་གྱི་འཕེལ་རྒྱས། ཡིག་གཟུགས་རིམ་འགྱུར་བཅས་ལ་གཞི་འཛིན་ས་གལ་ཆེན་མཁོ་འདོན་བྱས་ཡོད། དེའི་ནང་བོད་ཀྱི་དུས་སྔ་མའི་གསང་སྔགས་ཆོ་ག་དང་རི་མོ་མཚོན་བྱེད་ཀྱི་བརྡ་རྟགས་འབོར་ཆེན་ཐོ་འགོད་བྱས། དེས་བོད་བརྒྱུད་ནང་བསྟན་གྱི་རིག་གནས་འབྱུང་ཁུངས་དང་འགྱུར་བ། འཕེལ་རྒྱས་བཅས་ཞིབ་འཇུག་བྱེད་པར་གདོད་མའི་དངོས་པོའི་དཔྱད་གཞི་མཁོ་འདོན་བྱས་པ་རེད།