ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་།རྒྱལ་ཁབ་ཀྱི་ཀྲུའུ་ཞི།ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞིས་ཅིན་ཕིང་གིས་ཚེས་17ཉིན་པེ་ཅིང་དུ་མཁའ་དམག་གི་ཏང་གི་འཐུས་མི་ཚོགས་ཆེན་ཐེངས་བཅུ་གཉིས་པའི་འཐུས་མིར་མཇལ་འཕྲད་གནང་ཞིང་།ཏང་ཀྲུང་དབྱང་དང་ཀྲུང་དབྱང་དམག་ཨུད་ཀྱི་ཚབ་ཞུས་ནས་མཁའ་དམག་གི་ཏང་གི་འཐུས་མི་ཚོགས་ཆེན་ཐེངས་བཅུ་གཉིས་པ་འཚོགས་པར་སྤྲོ་སེམས་འཁོལ་བའི་རྟེན་འབྲེལ་ཞུས་པ་དང་།འཐུས་མི་དང་མཁའ་དམག་གི་དཔོན་དམག་ཡོངས་ལ་ལྷག་བསམ་ཟོལ་མེད་ཀྱི་འཚམས་འདྲི་གནང་བ་རེད།
    སྔ་དྲོའི་ཆུ་ཚོད་9པ་ཡོལ་ཙམ་ལ་ཞིས་ཅིན་ཕིང་མི་དམངས་ཚོགས་ཁང་ཆེ་མོའི་ཚོམས་ཆེན་བྱང་མར་ཕེབས་སྐབས་ཚོགས་ར་ཡོངས་སུ་སྤྲོ་སེམས་འཁོལ་བའི་ཐལ་མོའི་རྡེབ་སྒྲ་གྲགས།ཞིས་ཅིན་ཕིང་དང་འཐུས་མི་ཚོ་བྱམས་བརྩེའི་ངང་ཕྱག་བཏང་བ་དང་འབྲེལ་དྲན་རྟེན་སྐུ་པར་བསྐྱོན་རྗེས་གསུང་བཤད་གལ་ཆེན་གནང་ཞིང་།ཁོང་གིས་ད་ཐེངས་མཁའ་དམག་གི་ཏང་གི་འཐུས་མི་ཚོགས་ཆེན་ཐོག་འདས་ཟིན་པའི་ལོ་ལྔའི་ལས་དོན་ལ་ཕྱོགས་སྡོམ་དང་འབྱུང་འགྱུར་ལོ་ལྔའི་ལས་འགན་བཀོད་སྒྲིག་བྱས་ཡོད།ཁྱེད་ཚོར་ཐོབ་པའི་གྲུབ་འབྲས་དང་ཡར་རྒྱས་ལ་ང་དགའ་ཚོར་ཧ་ཅང་ཆེན་པོ་བྱུང་ལ་མཁའ་དམག་གི་འབྱུང་འགྱུར་འཕེལ་རྒྱས་ལ་ཡིད་ཆེས་ཆེན་པོ་ཡོད།ད་ཆ་དམིགས་ཚད་ཁ་གསལ་དང་ལས་འགན་བཀོད་སྒྲིག་བྱས་ཟིན་པས་འགག་རྩ་ནི་དོན་འཁྱོལ་བྱ་རྒྱུར་ཐུག་ཡོད།ཚང་མས་གཅུས་གཟེར་གྱི་སྙིང་སྟོབས་དར་སྤེལ་བཏང་སྟེ་བབ་བསྟུན་འཕྲལ་སྒྲུབ་དང་དངོས་འཛིན་དངོས་སྒྲུབ་བྱས་ནས་འཐབ་ཇུས་ཀྱི་བཀོད་སྒྲིག་མངོན་འགྱུར་ཧུར་ཐག་ཡོང་བ་བྱེད་དགོས་ཞེས་གསུངས་པ་རེད།
    ཞིས་ཅིན་ཕིང་གིས་བར་སྣང་དང་མཁའ་དབྱིངས་གཞི་གཅིག་ཏུ་སྦྲེལ་བ་དང་རྒོལ་སྲུང་གཅིག་ལྕོགས་ཀྱི་མི་དམངས་མཁའ་དམག་སྟོབས་ཆེན་ཞིག་བསྐྲུན་རྒྱུ་ནི་དུས་རབས་ཀྱིས་མཁའ་དམག་ལ་དཀྲིས་པའི་ལས་འགན་གལ་ཆེན་ཞིག་དང་དུས་བབ་གསར་པའི་འོག་རྒྱལ་ཁབ་ཀྱི་བདག་དབང་དང་།བདེ་འཇགས།འཕེལ་རྒྱས་ཀྱི་ཁེ་ཕན་བཅས་སྲུང་སྐྱོང་བྱེད་པའི་ལྡོག་མེད་ཀྱི་བླང་བྱ་ཞིག་ཡིན།ཏང་གི་འགོ་ཁྲིད་ལ་ཤུགས་སྣོན་རྒྱག་རྒྱུ་ནི་རྔམ་བརྗིད་ལྡན་པའི་ལས་འགན་དེ་ལེགས་གྲུབ་བྱེད་པའི་རྩ་བའི་འགན་ལེན་ཡིན།མཁའ་དམག་ཏང་ཨུད་ཀྱིས་ཏང་ཀྲུང་དབྱང་དང་ཀྲུང་དབྱང་དམག་ཨུད་ཀྱི་བླང་བྱར་གཞིགས་ནས་མཁའ་དམག་གི་ཏང་འཛུགས་སྐྱོང་ལ་དམ་འཛིན་ཡག་པོ་བྱེད་དགོས།ཏང་གིས་ཏང་ལ་དོ་དམ་དང་ཏང་ནན་པོ་སྐྱོང་རྒྱུ་མཐའ་འཁྱོངས་ཀྱིས་ཏང་གིས་དམག་དཔུང་ལ་འགོ་ཁྲིད་གཙང་བཙན་བྱེད་པའི་དམག་མིའི་བླ་སྲོག་བརྟན་དུ་གཏོང་བའི་ཐད་གཙོ་གནད་ཐོག་ཤུགས་རྒྱག་པ་དང་།ཕུགས་བསམ་དང་དད་སེམས་བརྟན་དུ་གཏོང་བའི་ཐད་ཤུགས་རྒྱག་པ།དམག་འཐབ་ཀྱི་སྙིང་སྟོབས་གསོ་སྐྱོང་དང་འཐབ་ནུས་ཆེ་རུ་གཏོང་བའི་ཐད་ཤུགས་རྒྱག་པ།ཏང་རྩ་འཛུགས་སྟོབས་ཆེར་གཏོང་བའི་ཐད་ཤུགས་རྒྱག་པ།སྤྱོད་ཚུལ་ལེགས་སུ་དང་སྲོལ་བཟང་དར་སྤེལ་གཏོང་བའི་ཐད་ཤུགས་རྒྱག་པ་བཅས་བྱས་ཏེ་དམག་དཔུང་སྟོབས་ཆེར་གཏོང་བའི་དམིགས་ཚད་མངོན་འགྱུར་ཡོང་ཆེད་བློས་འགེལ་ཆོག་པའི་འགན་ལེན་བྱེད་དགོས་པའི་ནན་བཤད་གནང་བ་རེད།