ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ6པའི་ཚེས12ཉིན་འབྱོར་བའི་གཏམ་གསར། ད་ལོའི་ཟླ་བ6པའི་ཚེས14ཉིན་ནི་རང་རྒྱལ་གྱི་ཤུལ་བཞག་རིག་གནས་ཀྱི་ཉིན་མོ་ཡིན། གོང་ཚེས་ཉིན་ཞིང་ལས་པུའུ་ཡིས་ཚན་པ་གཉིས་པའི་གལ་ཆེའི་ཞིང་ལས་ཤུལ་བཞག་རིག་གནས་ཀྱི་མིང་ཐོ་ཁྱབ་བསྒྲགས་བྱས་པ་རེད།
    ཚན་པ་གཉིས་པའི་ཀྲུང་གོའི་གལ་ཆེའི་ཞིང་ལས་ཤུལ་བཞག་རིག་གནས་སུ་ཐན་ཅིན་པིང་ཧེ་ཚུའེ་ཚང་ཀུའུ་ཏུང་གི་ཁ་སུར་ལྡུམ་ར། ཧོ་པེ་ཁོན་ཁྲེན་གྱི་སྲོལ་རྒྱུན་ཆ་ར་ཕྲའུ་འདེབས་གསོའི་མ་ལག ཧོ་པེ་ཧྲེ་རྫོང་གི་སྐམ་ཞིང་སྐས་ཞིང་འདེབས་འཛུགས་མ་ལག ནང་སོག་ཨ་ལུའུ་ཨར་ཆིང་རྩྭ་ཐང་གི་རུ་སྤོས་མ་ལག ཀྲེན་ཅང་ཧང་ཀྲུའུ་ཞི་ཧུའུ་མཚེའུ་ལུང་ཅིན་ཇ་རིག་གནས་མ་ལག་སོགས་སྲོལ་རྒྱུན་གྱི་ཞིང་ལས་མ་ལག20ཚུད་པ་རེད།
    ཞིང་ལས་པུའུའི་ཏང་རྩ་འཛུགས་ཀྱི་གྲུབ་མི་དབྱང་ཧྲའོ་ཕིང་གིས་ཚེས12ཉིན་འཚོག་པའི་ཀྲུང་གོའི་གལ་ཆེ་བའི་ཞིང་ལས་ཤུལ་བཞག་རིག་གནས་མིང་ཐོ་ཁྱབ་བསྒྲགས་བྱེད་པའི་བྱེད་སྒོའི་ཐོག་སྟོན་རྒྱུར། ཀྲུང་ཧྭ་མི་རིགས་དེ་ཡུན་རིང་གི་འཚོ་གནས་འཕེལ་རྒྱས་ཀྱི་ཁྲོད། རིགས་མང་བ་དང་ཁྱད་ཆོས་མངོན་གསལ། དཔལ་འབྱོར་དང་སྐྱེ་ཁམས་ཀྱི་རིན་ཐང་ཚད་མཐོན་པོར་གཅིག་འགྱུར་ཡོང་བའི་སྲོལ་རྒྱུན་ཞིང་ལས་ཀྱི་ཐོན་སྐྱེད་མ་ལག་གསར་དུ་བསྐྲུན་ནས་ཞིང་ལས་འཕེལ་རྒྱས་ལ་སྐུལ་འདེད་བཏང་ཞིང་། འབངས་མིའི་འཚོ་གནས་ལ་འགན་སྲུང་བྱས་ཏེ་དུས་ཡུན་རིང་ཅིང་འོད་སྟོང་འཕྲོ་བའི་ཀྲུང་ཧྭའི་དཔལ་ཡོན་གསར་དུ་བསྐྲུན་པས། དེ་ནི་ཀྲུང་ཧྭ་མི་རིགས་ཀྱིས་སྲུང་སྐྱོང་དང་རྒྱུན་འཛིན་གཟབ་ནན་བྱེད་དགོས་པའི་ཞིང་ལས་ཤུལ་བཞག་གི་རིག་གནས་ཤིག་ཡིན་པ། མ་འོངས་པར་གལ་ཆེའི་ཞིང་ལས་ཤུལ་བཞག་རིག་གནས་སྔོག་འདོན་དང་སྲུང་སྐྱོང་བྱེད་ཤུགས་ཆེ་རུ་གཏང་རྒྱུ་ཡིན་པ་མ་ཚད། ད་རུང་ཚན་པ་གསུམ་པའི་གལ་ཆེའི་ཞིང་ལས་ཤུལ་བཞག་རིག་གནས་སྔོག་འདོན་བྱ་རྒྱུའི་ལས་འགོ་ཚུགས་རྒྱུ་ཡིན་པ་རེད།