ཤིན་ཧྭ་དྲ་བའི་བོད་ཡིག་འཕྲིན་ལམ་དུ་གནས་ཚུལ་འབྱོར་གསལ།དངོས་མིན་རིག་གནས་ཤུལ་བཞག་གི་རྒྱུན་འཛིན་པའི་དཔུང་ཁག་སྔར་བས་སྟོབས་ཆེར་གཏོང་བ་དང་དངོས་མིན་རིག་གནས་ཤུལ་བཞག་གི་རྣམ་གྲངས་རྒྱུན་འཛིན་དང་སྲུང་སྐྱོང་ནུས་ལྡན་བྱེད་པར་དཔེ་སྟོན་དང་སྐུལ་ཁྲིད་བྱ་ཆེད་བོད་རང་སྐྱོང་ལྗོངས་མི་དམངས་སྲིད་གཞུང་གིས་ཚེས14ཉིན་མི123ལ་རང་སྐྱོང་ལྗོངས་རིམ་པའི་དངོས་མིན་རིག་གནས་ཤུལ་བཞག་གི་རྒྱུན་འཛིན་པ་ཁག་གསུམ་པའི་མིང་བཏགས་ཤིང་།ད་བར་བོད་རང་སྐྱོང་ལྗོངས་རིམ་པའི་དངོས་མིན་རིག་གནས་ཤུལ་བཞག་གི་རྒྱུན་འཛིན་པ་ཁྱོན་བསྡོམས350ཡོད་པ་རེད།
    ཤེས་རྟོགས་བྱུང་བར་གཞིགས་ན།ད་ཐེངས་བདམས་ཐོན་བྱུང་བའི་དངོས་མིན་རིག་གནས་ཤུལ་བཞག་གི་རྒྱུན་འཛིན་པ་དེ་དག་སྒྱུ་རྩལ་གྱི་རིགས་མི་འདྲ་བ་ནས་ཡིན་པ་དེའི་ནང་གཙོ་བོ་དམངས་ཁྲོད་རྩོམ་རིག་དང་།སྲོལ་རྒྱུན་རོལ་དབྱངས།སྲོལ་རྒྱུན་ཞབས་བྲོ།སྲོལ་རྒྱུན་ཟློས་གར།གཞས་མ་གཏམ།སྲོལ་རྒྱུན་མཛེས་རྩལ།སྲོལ་རྒྱུན་སྨན་དང་སྨན་བཅོས་སོགས་ཚུད་ཡོད།བོད་རང་སྐྱོང་ལྗོངས་ཀྱི་དངོས་མིན་རིག་གནས་ཤུལ་བཞག་སྲུང་སྐྱོབ་ལྟེ་གནས་ཀྱི་འགན་འཁུར་བ་ངག་དབང་བསྟན་འཛིན་གྱིས་ལྷ་སའི་སྟོད་གཞས་རྒྱུན་འཛིན་པ་བཀྲ་ཤིས་ཚེ་རིང་དང་།བོད་སྨན་གྱི་སྨན་སྒྲུབ་ཆོ་གའི་རྒྱུན་འཛིན་པ་བསོད་ནམས་དངོས་གྲུབ།བོད་ཡིག་གི་ཡིག་གཟུགས་ལན་ཙཱའི་ཡིག་གཟུགས་ཀྱི་རྒྱུན་འཛིན་པ་འགྱུར་མེད་ཚུལ་ཁྲིམས།སྐྱོར་མོ་ལུང་གི་ལྷ་མོའི་རྒྱུན་འཛིན་པ་བློ་བཟང་སོགས་རང་སྐྱོང་ལྗོངས་རིམ་པའི་དངོས་མིན་རིག་གནས་ཤུལ་བཞག་གི་རྒྱུན་འཛིན་པར་གྱུར་བ་དེའི་ཐོག་ནས་ལོ་ངོ་སྟོང་ཕྲག་མང་པོའི་རིང་རྒྱུན་མཐུད་བྱས་པའི་བོད་མི་རིགས་ཀྱི་སྲོལ་རྒྱུན་རིག་གནས་དེ་སྲུང་སྐྱོབ་དང་རྒྱུན་འཛིན་ནུས་ལྡན་ཐུབ་རྒྱུ་ཡིན་པ་མཚོན་པ་རེད།
    གྲངས་གཞིའི་ཐོག་ནས་མཚོན་པར་གཞིགས་ན།མིག་སྔར་བོད་དུ་དངོས་མིན་རིག་གནས་ཤུལ་བཞག་གི་རྣམ་གྲངས800ཙམ་ཡོད་པ་དང་རྒྱུན་འཛིན་པ68རྒྱལ་ཁབ་རིམ་པའི་དངོས་མིན་རིག་གནས་ཤུལ་བཞག་རྣམ་གྲངས་ཀྱི་མཚོན་བྱེད་རང་བཞིན་གྱི་རྒྱུན་འཛིན་པར་གཏན་འཁེལ་བྱས་པ་དང་རྣམ་གྲངས323དང་རྒྱུན་འཛིན་པ350རང་སྐྱོང་ལྗོངས་རིམ་པའི་དཀར་ཆག་ནང་བཅུག་པ་རེད།
    ངོ་སྤྲོད་བྱས་པར་གཞིགས་ན།དངོས་མིན་རིག་གནས་ཤུལ་བཞག་དེ་དག་ཇི་སྲིད་བསྐལ་བརྒྱར་མི་ཉམས་པ་བྱ་ཆེད་མིག་སྔར་བོད་ཀྱིས་ད་དུང་རྒྱལ་ཁབ་རིམ་པའི་དངོས་མིན་རིག་གནས་ཤུལ་བཞག་རྒྱུན་འཛིན་པའི་མྱུར་སྐྱོབ་རང་བཞིན་གྱི་ཐོ་འགོད་ལས་དོན་སྤེལ་ནས་དངོས་མིན་རིག་གནས་ཤུལ་བཞག་གི་རྒྱུན་འཛིན་ཡག་པོ་ཡོང་བ་བྱ་རྒྱུ་རེད།