ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ལོ་ངོ་སྟོང་གི་ལོ་རྒྱུས་ལྡན་པའི་བོད་ཡིག་གནའ་གཞུང“ཕུ་རིའི་ཡིག་ཚངས”དཀར་ཆག་སྒྲིག་བཟོ་དང་།ལེགས་སྒྲིགགློག་རྡུལ་ཐོག་ནས་ཡིག་ཚགས་ནང་ཕབ་འཇུག་བཅས་ཀྱི་ལས་དོན་ལེགས་གྲུབ་རགས་ཙམ་ཟིན་ནས་མིག་སྔར་གློག་རྡུལ་པར་གཞི་བཟོས་ཟིན་པ་དང་འབྲེལ་འཛམ་གླིང་ཐོག་ཐེངས་དང་པོར་ཡོངས་བསྒྲགས་བྱས་ཤིང་།དེས་རྒྱལ་ཁབ་ཕྱི་ནང་གིས་བོད་རིག་པ་ཞིབ་འཇུག་བྱ་རྒྱུར་རྩ་ཆེའི་མིག་མཐོང་ལག་ཟིན་གྱི་དཔྱད་གཞིའི་ཡིག་རིགས་མཁོ་འདོན་བྱ་རྒྱུ་ཡིན་པ་རེད།

    གསར་འགོད་པས་བོད་ལྗོངས་སློབ་ཆེན་ནས་ཤེས་རྟོགས་བྱས་པར་གཞིགས་ན།“ཕུ་རིའི་ཡིག་ཚངས”དེ་2002ལོར་བོད་ལྗོངས་གཞིས་རྩེ་ས་ཁུལ་གཉའ་ནང་རྫོང་ཕུ་རི་གྲོང་ཚོ་ནས་རྙེད་པ་དང་ཏུན་ཧོང་གི་ཡིག་ཚགས་རྗེས་སུ་གསར་དུ་རྙེད་པའི་ལོ་རྒྱུས་ཡུན་རིང་ཤོས་དང་ཉར་ཚགས་བྱེད་མང་ཤོས་ཀྱི་གནའ་གཞུང་ཡིག་ཚགས་ཤིག་ཡིན་པ་དང་།ཁྱོན་རིགས་150ལྷག་ཙམ་དང་ཤོག་ལྷེ་12000ཙམ་ཡོད་པ་དང་དེ་སྤྱི་ལོའི་དུས་རབས་10པའི་ནང་བྱུང་བ་ཞིག་རེད།

    བོད་ལྗོངས་སློབ་ཆེན་བོད་རིག་པ་དཔེ་མཛོད་ཁང་གི་ཞིབ་འཇུག་པ་ཤེས་རབ་བཟང་པོས་ངོ་སྤྲོད་བྱས་པར་གཞིགས་ན།“ཕུ་རིའི་ཡིག་ཚངས”ཀྱི་ནང་དོན་ཕུན་སུམ་ཚོགས་ལ་ཞིབ་ཚགས་པ་དང་དེའི་ནང་གསང་སྔགས་ཀྱི་ཆོ་ག་དང་ནང་བསྟན་ཆོས་ལུགས་ཀྱི་བསྟན་བཅོས་དང་།སྙན་རྩོམ་དང་ཚིག་ལྷུགམི་སྣའི་རྣམ་ཐར་སོགས་ཚུད་པ་དང་བོད་མི་རིགས་ཀྱི་སྐད་ཡིག་དང་།ཡུལ་སྲོལ་གོམས་གཤིས།ཆོས་ལུགས་དད་མོས་སོགས་ཕྱོགས་གང་ས་ཅི་ཐད་ཀྱི་རྩ་ཆེའི་མིག་མཐོང་ལག་ཟིན་གྱི་དཔྱད་གཞིའི་ཡིག་རིགས་ཉར་ཚགས་བྱས་ཡོད་པས་དེའི་རིག་གཞུང་ཞིབ་འཇུག་གི་རིན་ཐང་ཏུན་ཧོང་ཡིག་ཚགས་ལ་འགྲན་ཐུབ་པ་ཞིག་ཡོད།མིག་སྔར་བོད་ལྗོངས་སློབ་ཆེན་གྱིས“ཕུ་རིའི་ཡིག་ཚངས”ཀྱི་པར་སློག་དེབ་ཡོངས་བསྒྲགས་སུ་དཔེ་སྐྲུན་བྱེད་པའི་ལས་དོན་ཧུར་ཐག་ངང་སྤེལ་བཞིན་ཡོད་པ་རེད།

    ཤེས་རྟོགས་བྱུང་བར་གཞིགས་ན།ཀྲུང་གོས་བོད་ཡིག་གནའ་གཞུང་ཞིབ་འཇུག་གི་རྣམ་གྲངས་འགོ་བཙུགས་མ་ཐག་པའི་དུས་མཚམས་སུ་གནས་ཡོད་པ་དང་བོད་ཡིག་གི་གནའ་གཞུང་དཔྱད་གཞིའི་ཡིག་རིགས་དཀོན་པ་དེ་དཀའ་གནད་ཆེ་ཤོས་ཡིན་ཞིང་།2007ལོར“ཕུ་རིའི་ཡིག་ཚངས”བོད་ལྗོངས་སློབ་ཆེན་དཔེ་མཛོད་ཁང་གིས་ཉར་ཚགས་བྱས་རྗེས་ནང་དོན་ཁ་ཐོར་ཡིན་པ་དེར་ཤོག་ལྷེའི་རིང་ཚད་དང་།པར་རྣམ།ཡིག་གཟུགས་ཁྱད་ཆོས་སོགས་ལ་གཞིགས་ནས་རིགས་དབྱེ་སྟེ་ཡིག་ཚགས་བཟོས་པ་དང་དཀར་ཆག་སྒྲིག་པ་དང་འབྲེལ་དེར་བསྐྱར་སྐྱེས་རང་བཞིན་ལྡན་པའི་ངང་སྲུང་སྐྱོང་བྱས་པ་དང་།རིགས་གཅིག་མཁས་ཅན་སྒྲིག་འཛུགས་བྱས་ཏེ་འབྲེལ་ཡོད་རིག་གཞུང་ཞིབ་འཇུག་ལས་དོན་སྤེལ་ཡོད་པ་རེད།

    བོད་ལྗོངས་སློབ་ཆེན་གནའ་བོའི་ཡིག་རིགས་ཞིབ་འཇུག་རིགས་གཅིག་མཁས་ཅན་སྒྲོལ་དཀར་གྱིས“ཕུ་རིའི་ཡིག་ཚངས”ཀྱིས་དུས་རབས་བཅུ་བཞི་པའི་གོང་གི་བོད་ཡིག་བརྡ་སྤྲོད་གྲུབ་ཆ་འཕེལ་འགྱུར་དང་།རྩོམ་སྲོལ་འཕེལ་འགྱུར།ཡིག་གཟུགས་འཕེལ་འགྱུར་བཅས་ཀྱི་ཐད་ཞིབ་འཇུག་བྱ་རྒྱུར་གལ་ཆེའི་གཞི་འཛིན་ས་མཁོ་འདོན་བྱས་ཡོད་པ་དང་།དེའི་ནང་བོད་ཀྱི་སྔ་དུས་གསང་སྔགས་ཆོ་ག་དང་མཚོན་རྟགས་དཔེ་རིས་མང་པོ་བཀོད་པ་དེས་བོད་བརྒྱུད་ནང་བསྟན་གྱི་རིག་གནས་འབྱུང་ཁུངས་དང་།འཕེལ་འགྱུར།གོང་འཕེལ་བཅས་ཀྱི་ཐད་ཞིབ་འཇུག་བྱ་རྒྱུར་མིག་མཐོང་ལག་ཟིན་གྱི་དཔྱད་གཞིའི་ཡིག་རིགས་མཁོ་འདོན་བྱས་ཡོད་པ་རེད།