ཞིན་ཧྭ་གསར་འགྱུར་ཁང་པེ་ཅིན་ནས་ཉེ་ཆར་འབྱོར་བའི་གཏམ་གསར། ཉེ་དུས་འཚོགས་པའི་རྒྱལ་ཡོངས་བཟོ་ཚོང་སྲིད་འཛིན་དོ་དམ་ལས་ཀའི་གྲོས་ཚོགས་ཐོག་རྒྱལ་ཁབ་བཟོ་ཚོང་སྲིད་འཛིན་དོ་དམ་སྤྱི་ཁྱབ་ཅུས་ཀྱིས2015ལོའི་ཁྲོམ་རར་ལྟ་སྐུལ་དོ་དམ་བྱ་རྒྱུའི་གཙོ་གནད་གཏན་འཁེལ་བྱས་ཤིང་། ས་གནས་ཁག་ལ་ཏན་ཏིག་གིས་ལས་འགན་བསྒྲུབས་ཏེ་ཚད་དང་ལྡན་ཞིང་གོ་རིམ་ལྡན་པའི་ཁྲོམ་རའི་འགྲན་རྩོད་རིམ་པ་བསྐྲུན་གང་ཐུབ་བྱ་དགོས་པའི་བླང་བྱ་བཏོན།
    ཡིད་ཆེས་ལྟ་སྐུལ་དོ་དམ་གྱི་ཐད་ལ་བཟོ་ཚོང་སྡེ་ཁག་གིས་ནན་ཏིག་གིས་ཁེ་ལས་ཀྱི་བརྡ་འཕྲིན་སྤྱི་བསྒྲགས་དང་བདག་གཉེར་བྱེད་སྟངས་རྒྱུན་ལྡན་མིན་པའི་གྲགས་ཅན་ཟིན་ཐོ། ཁྲིམས་འགལ་ཚབས་ཆེན་བྱེད་པའི་ཁེ་ལས་ཀྱི་མིང་ཐོ་སྤྱི་བསྒྲགས་བྱ་རྒྱུ་སོགས་ཀྱི་ལམ་ལུགས་དོན་འཁྱོལ་བྱ་རྒྱུ། སྲིད་གཞུང་གིས་ཉོ་སྒྲུག་དང་ལས་གྲྭའི་སུས་འཇོན་དེས་འགུག་དང་སུས་འཇོན་དེས་ལེན། རྒྱལ་དབང་ས་ཞིང་ནང་བཤུག་གཏོང་བ་སོགས་ཀྱི་ལས་ཀའི་ནང་དང་། བདག་གཉེར་བྱེད་སྟངས་རྒྱུན་ལྡན་མིན་པའི་གྲགས་ཅན་ཟིན་ཐོ་ཡང་ན་ཁྲིམས་འགལ་ཚབས་ཆེན་བྱེད་པའི་ཁེ་ལས་ཀྱི་མིང་ཐོར་འཇུག་པའི་ཁེ་ལས་ལ་བཅའ་ཁྲིམས་ལྟར་ཚོད་འཛིན་བྱེད་པའམ་ཁྲོམ་རུར་འདོན་མི་ཆོག་པ་བྱས་ཏེ་ཕྱོགས་གཅིག་ལ་ལུགས་འགལ་བྱས་ན་ཕྱོགས་མང་པོར་ཚོད་འཛིན་ཐེབས་པ་མངོན་འགྱུར་བྱ་རྒྱུ་ཡིན་པ་རེད།
    སྒེར་སྡོམ་ལ་རྒོལ་བ་དང་ཚུལ་མིན་ལ་རྒོལ་བའི་འགྲན་རྩོད་ཐད་བཟོ་ཚོང་སྡེ་ཁག་གིས་སྒེར་སྡོམ་གྱི་གན་རྒྱ་དང་ཁྲོམ་རའི་བཀོལ་སྤྱོད་གོ་གནས་གང་རུང་སྤྱོད་པའི་བྱ་སྤྱོད་ལ་ཁྲིམས་འཛིན་བྱེད་ཤུགས་ཆེ་རུ་གཏང་རྒྱུ་དང་། སྤྱི་དབང་ཁེ་ལས་ཀྱིས་འགྲན་རྩོད་ལ་ཚོད་འཛིན་བྱེད་པའི་བྱ་སྤྱོད་ལ་ཤུགས་ཆེན་པོར་ཞིབ་བཤེར་དང་ཐག་གཅོད་བྱ་རྒྱུ། སྨན་བཅོས་དང་འཕྲུལ་ཆས་སོགས་མངའ་ཁོངས་གཙོ་གནད་བྱས་ཏེ་ཚོང་ལས་ཀྱི་གསང་བར་བཙན་གནོད་བྱེད་པའི་བྱ་སྤྱོད་ལ་ཞིབ་བཤེར་དང་ཐག་གཅོད་བྱ་རྒྱུ། གན་རྒྱར་ལྟ་སྐུལ་དོ་དམ་བྱེད་ཤུགས་ཆེ་རུ་བཏང་ནས་ལས་རིགས་འགའི་བཙན་བདག་དོན་ཚན་ལ་ཚོད་འཛིན་ཡང་ཡང་བཏང་ནའང་མི་འཇོག་པའི་གནད་དོན་ལ་དམིགས་ནས་བཅོས་སྐྱོང་བྱེད་ཤུགས་ཆེ་རུ་གཏང་རྒྱུ་རེད།
    དྲ་བའི་ཁྲོམ་རར་ལྟ་སྐུལ་དོ་དམ་བྱ་རྒྱུའི་ཐད། བཟོ་ལས་སྡེ་ཁག་གིས་དྲ་བ་བེད་སྤྱད་ནས་ཚོང་ཟོག་རྫུན་མ་བཙོང་བ་དང་རྒྱུད་འཚོང་། འགྲེམ་བརྡ་རྫུན་མ་བྱས་པ་སོགས་ཀྱི་ཁྲིམས་འགལ་བྱ་སྤྱོད་ལ་ཞིབ་བཤེར་ཐག་གཅོད་ནན་པོ་བྱ་རྒྱུ་ཡིན་པས་མ་ཚད། ད་རུང་བཅའ་ཁྲིམས་ལྟར་ཁྲིམས་དང་མི་མཐུན་པའི་གཙོ་གནད་དྲ་བའི་འགན་འཁྲི་བདའ་འདེད་བྱ་རྒྱུ་རེད།
    ཚོང་རྟགས་ཆེད་སྤྱོད་ཀྱི་དབང་ཆར་སྲུང་སྐྱོང་བྱ་རྒྱུའི་ཐད། བཟོ་ཚོང་སྡེ་ཁག་གིས་མིང་གྲགས་ཡོད་པའི་ཚོང་རྟགས་དང་ས་ཁམས་མཚོན་རྟགས། ཕྱིར་འབྲེལ་ཚོང་རྟགས་བཅས་གཙོ་གནད་དུ་བཟུང་ནས་མཚོན་རྟགས་གང་རུང་དུ་རྫུ་མར་བཟོས་ནས་སྤྱོད་པ་བཅས་ཀྱི་བྱ་སྤྱོད་ལ་ཞིབ་བཤེར་དང་ཐག་གཅོད་བྱ་རྒྱུ་རེད།།