ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ12པའི་ཚེས23ཉིན་འབྱོར་བའི་གཏམ་གསར།གོང་ཚེས་ཉིན་སྐབས་བཅུ་གཉིས་པའི་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་རྒྱུན་ལས་ཨུ་ཡོན་གྱི་གྲོས་ཚོགས་ཐེངས་བཅུ་གཉིས་པའི་ཐོག་རྒྱལ་སྲིད་སྤྱི་ཁྱབ་ཁང་གི་གྲོང་ཁྱེར་དང་གྲོང་གསེབ་ཀྱི་སྤྱི་ཚོགས་འགན་སྲུང་མ་ལག་འཛུགས་སྐྲུན་ལས་ཀར་སྐུལ་འདེད་གཏང་རྒྱུའི་སྐོར་གྱི་སྙན་སེང་ལ་གྲོས་ཞིབ་བྱས་ཡོད།  སྙན་སེང་ནང་བསྟན་དོན།  རང་རྒྱལ་གྱིས་ལས་ཁུངས་དང་དོན་ལས་སྡེ་ཚན་གྱི་རྒན་གསོ་ཉེན་འགོག་ལམ་ལུགས་བཅོས་བསྒྱུར་ལ་སྐུལ་འདེད་བཏང་སྟེ་གྲོང་རྡལ་གྱི་ལས་བཟོ་དང་གཅིག་གྱུར་ཡིན་པའི་རྒན་གསོ་ཉེན་འགོག་ལམ་ལུགས་འཛུགས་རྒྱུ་ཡིན་པ་རེད།
སྙན་སེང་ནང་བཤད་དོན།ཀྲུང་དབྱང་གི་བཀོད་སྒྲིག་ལྟར་འབྲེལ་ཡོད་སྡེ་ཁག་གིས་ཡོངས་ཁྱབ་ཏུ་བརྟག་དཔྱད་ཞིབ་འཇུག་དང་རིགས་པས་ཡང་ཡང་བསྒྲུབས་པར་བརྒྱུད།བཅོས་བསྒྱུར་བྱ་རྒྱུའི་འཆར་གཞི་བཟོ་འགོད་བྱས་ཡོད་པས་མ་ཚད།རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་དང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ལྷན་གྲོས་ཚོགས་ཐོག་གྲོས་ཞིབ་བྱས་ཏེ་གྲོས་འཆམས་བྱུང་བ་རེད།
བཅོས་བསྒྱུར་བྱ་རྒྱུའི་གཞི་རྩའི་བསམ་ཕྱོགས་ནི་གཅིག་གྱུར་གཅིག་དང་དུས་མཉམ་དུ་བསྒྲུབ་རྒྱུའི་བྱ་བ་ལྔ་ཡིན་པ་རེད།གཅིག་འགྱུར་གཅིག་ནི་ཏང་སྲིད་ལས་ཁུངས་དང་ལས་དོན་སྡེ་ཚན་ལ་ཁེ་ལས་དང་གཅིག་པ་ཡིན་པའི་གཞི་རྩའི་རྒན་གསོ་ཉེན་འགོག་ལམ་ལུགས་བཙུགས་ཏེ་སྡེ་ཚན་དང་མི་སྒེར་གྱིས་གྲོན་དངུལ་སྤྲོད་པ་དང་།ལས་འཁྱུར་ངལ་གསོའི་གྲོན་དངུལ་རྩིས་པ་དང་སྤྲོད་པའི་བྱེད་ཐབས་བཅོས་བསྒྱུར་བྱ་རྒྱུ།ལམ་ལུགས་དང་ནང་རྐྱེན་བཅོས་བསྒྱུར་བྱས་པའི་ཐོག་ནས་ལམ་ལུགས་སྣ་ཁ་གཉིས་ལག་ལེན་བསྟར་ནས་བཟོས་པའི་འགལ་བ་སེལ་རྒྱུ་ཡིན་པ་རེད།
དུས་མཉམ་དུ་བསྒྲུབ་རྒྱུའི་བྱ་བ་ལྔ་ནི་ལས་ཁུངས་དང་དོན་ལས་སྡེ་ཚན་ལ་དུས་མཉམ་དུ་བཅོས་བསྒྱུར་བྱ་རྒྱུ་དང་།ལས་བཟོའི་ལོ་ཕོགས་དང་གཞི་རྩའི་རྒན་གསོ་ཉེན་འགོག་ལམ་ལུགས་དུས་མཉམ་དུ་འཛུགས་རྒྱུ།རྒན་གསོའི་ཉེན་འགོག་ལམ་ལུགས་བཅོས་བསྒྱུར་དང་གླ་ཕོགས་ཀྱི་ལམ་ལུགས་འཐུས་ཚང་ཡོང་བར་དུས་མཉམ་དུ་སྐུལ་འདེད་གཏང་རྒྱུ།ཐོབ་ཐང་ལེགས་སྒྲིག་གི་ནང་རྐྱེན་དང་རྩིས་པ་དང་སྤྲོད་པའི་བྱེད་ཐབས་དུས་མཉམ་དུ་བཅོས་བསྒྱུར་བྱ་རྒྱུ།བཅོས་བསྒྱུར་དེ་རྒྱལ་ཡོངས་ཀྱི་ཁྱབ་ཁོངས་སུ་དུས་མཉམ་དུ་ལག་ལེན་བསྟར་རྒྱུ་བཅས་སོ།།
རང་རྒྱལ་གྱི་སྤྱི་ཚོགས་ཉེན་འགོག་མ་ལག་དེ་སྔོན་དུ་གྲོང་རྡལ་དུ་འཛུགས་པ་དང་རྗེས་སུ་ཞིང་སྡེར་བཙུགས་ནས་།མི་ཁག་བགོས་ཏེ་རིམ་བཞིན་སྐུལ་འདེད་གཏོང་བའི་བྱེད་ཐབས་སྤྱོད་དེ་ཞིང་སྡེར་སྤྱི་ཚོགས་ཉེན་འགོག་ལམ་ལུགས་ལག་ལེན་བསྟར་བའི་དུས་ཚོད་རིང་པོ་མི་དགོས་པར་མ་ཟད།ཉེན་འགོག་ལམ་ལུགས་ལ་རང་མོས་ཞུགས་པའི་སྲིད་ཇུས་ལག་བསྟར་བྱས་པས།མིག་སྔར་རྒྱལ་ཡོངས་སུ་ད་རུང་མི་དུང་ཕྱུར་གཅིག་ལྷག་གཞི་རྩའི་རྒན་གསོ་ཉེན་འགོག་ལམ་ལུགས་ནང་ཞུགས་མེད།དེའི་ནང་གཙོ་ཆེ་བ་ནི་སྤྱིར་དབང་མིན་པའི་དཔལ་འབྱོར་རྩ་འཛུགས་ཀྱི་ལས་བཟོ་དང་།གྲོང་རྡལ་གྱི་གང་ལ་དེ་འཚམ་གྱི་ལས་ཞུགས་མི་སྣ།ཞིང་པའི་གླ་པ་དང་ཞིང་སྡེའི་ཡུལ་མི་ཆ་ཤས་སོགས་ཡིན་པ་རེད།