ཀྲུང་གུང་ཀྲུང་དབྱང་ཆབ་སྲིད་ཅུའུ་ཡིས་ཚེས་ཉེར་གསུམ་ཉིན་གྱི་ཕྱི་དྲོར་ཁྲིམས་ལྟར་རྒྱལ་ཁབ་སྐྱོང་བར་ཕྱོགས་ཡོངས་ནས་སྐུལ་འདེད་གཏོང་བའི་ཐུན་མོང་གི་སློབ་སྦྱོང་ཐེངས་བཞི་བ་བསྡུས། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་ཞི་ཅིན་ཕེན་གྱིས་ཐུན་མོང་གི་སློབ་སྦྱོང་ཐེངས་བཞི་བར་མགོ་འཛིན་མཛད་སྐབས། ང་ཚོས་ཏང་གི་ཚོགས་ཆེན་ཐེངས་བཅོ་བརྒྱད་པའི་དགོངས་དོན་ཕྱོགས་ཡོངས་ནས་ལག་བསྟར་དང་དངོས་འབེབས་བྱེད་པ་དང་། ཏིན་ཞའོ་ཕེན་གྱི་རིགས་པའི་གཞུང་ལུགས་དང་མཚོན་བྱེད་གསུམ་གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ་བཅས་མཛུབ་སྟོན་དུ་བཟུང་སྟེ་ཚན་རིག་ཁྲིམས་འཛུགས་དང་ཁྲིམས་སྐྱོང་ནན་མོ་བྱེད་པ་དང་། དྲང་བདེན་ཁྲིམས་འཛིན། དམངས་ཡོངས་ཀྱིས་ཁྲིམས་སྲུང་བཅས་བྱེད་པར་ཕྱོགས་ཡོངས་ནས་སྐུལ་འདེད་གཏོང་བ་དང་། ཁྲིམས་ལྟར་རྒྱལ་ཁབ་སྐྱོང་ཞིང་ཁྲིམས་ལྟར་སྲིད་སྐྱོང་བ་དང་། ཁྲིམས་ལྟར་སྲིད་འཛིན་པ་བཅས་རྒྱུན་འཁྱོངས་བྱེད་དགོས་པར་མ་ཟད། ཁྲིམས་སྐྱོང་རྒྱལ་ཁབ་དང་ཁྲིམས་སྐྱོང་སྲིད་གཞུང་། ཁྲིམས་སྐྱོང་སྤྱི་ཚོགས་བཅས་གཞི་གཅིག་ཏུ་འཛུགས་སྐྲུན་བྱེད་པ་རྒྱུན་འཁྱོངས་བྱས་ནས་ཁྲིམས་ལྟར་རྒྱལ་ཁབ་སྐྱོང་བའི་ཐད་ནས་རྣམ་པ་གསར་བ་གསར་སྐྲུན་བྱེད་དགོས་ཞེས་ནན་གྱིས་གསུངས།

རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་བཅའ་ཁྲིམས་བྱ་བའི་ཨུ་ཡོན་ལྷན་ཁང་གི་ཀྲུའུ་རིན་ལིས་ཧྲི་ཧྲི་དང་ཆེས་མཐོའི་མི་དམངས་ཁྲིམས་ཁང་གི་ཡོན་ཀྲང་གཞོན་པ་ཧྲིན་ཏི་ཡུང་། ཆེས་མཐོའི་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན་པོ་གཞོན་པ་ཧུའུ་ཙི་ཅོན། ཁྲིམས་འཛིན་པུའུ་ཀྲང་ཝུའུ་ཨེ་དབྱིན། རྒྱལ་སྲིད་སྤྱི་ཁྱབ་ཁང་ཁྲིམས་ལུགས་གཞུང་སྒྲུབ་ཁང་གི་ཀྲུའུ་རིན་སུང་ཏ་ཧན་བཅས་ཀྱིས་བྱ་བའི་དོན་དངོས་དང་འབྲེལ་ཏེ་གནད་དོན་དེའི་ཐད་ལ་བསམ་འཆར་བཏོན་པ་དང་། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་བློ་མཐུན་སོ་སོས་ཁོ་ཚོའི་འགྲེལ་བཤད་ལ་ཉན་པར་མ་ཟད། འབྲེལ་ཡོད་གནད་དོན་ཐད་ལ་གྲོས་བསྡུར་བྱས།

ཞི་ཅིན་ཕེན་གྱིས་ཐུན་མོང་གི་སློབ་སྦྱོང་ཐེངས་བཞི་བར་མགོ་འཛིན་མཛད་སྐབས་གསུངས་བཤད་གནང་། ཁོང་གིས་གསུངས་རྒྱུར། རང་རྒྱལ་དུ་རྩ་ཁྲིམས་ཀྱིས་ཕྱོགས་ཡོངས་ལ་བཀོད་འདོམས་བྱེད་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བཅའ་ཁྲིམས་མ་ལག་ཆགས་པ་དང་། ང་ཚོའི་རྒྱལ་ཁབ་དང་སྤྱི་ཚོགས་ཀྱི་འཚོ་བའི་ཁྲོད་དུ་བརྩི་སྲུང་བྱེད་པའི་བཅའ་ཁྲིམས་ཡོད་པ་མངོན་འགྱུར་བྱས་པ་དེ་ནི་ང་ཚོས་བླངས་པའི་གྲུབ་འབྲས་ཆེན་པོ་ཞིག་ཡིན། ལག་ལེན་ནི་བཅའ་ཁྲིམས་ཀྱི་རྨང་གཞི་ཡིན་ལ། བཅའ་ཁྲིམས་ནི་ལག་ལེན་དང་བསྟུན་ནས་འཕེལ་རྒྱས་སུ་སོང་བ་ཡིན། ཁྲིམས་འཛུགས་འཆར་འགོད་འཐུས་ཚང་དུ་གཏོང་བ་དང་ཁྲིམས་འཛུགས་ཀྱི་གནད་ཆེ་ས་འབུར་དུ་ཐོན་པར་བྱས་ནས། ཁྲིམས་འཛུགས་ཚན་རིག་ཅན་དང་དམངས་གཙོ་ཅན་གྱི་ཆུ་ཚད་ཇེ་མཐོར་གཏོང་བ་དང་། བཅའ་ཁྲིམས་ཀྱི་དམིགས་སའི་རང་བཞིན་དང་དུས་ཐོག་རང་བཞིན། གོ་རིམ་རང་བཞིན་བཅས་ཇེ་དྲག་ཏུ་གཏོང་དགོས། ཁྲིམས་འཛུགས་བྱ་བའི་ནང་རྐྱེན་དང་གོ་རིམ་འཐུས་ཚང་དུ་གཏོང་བ་དང་རྒྱ་ཆེའི་མང་ཚོགས་གོ་རིམ་ཡོད་པའི་སྒོ་ནས་དེའི་ཁྲོད་དུ་ཞུགས་དགོས་ལ། ཕྱོགས་སོ་སོའི་བསམ་འཆར་ལ་ཉན་པ་དང་། བཅའ་ཁྲིམས་ལས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་རེ་བ་གསལ་བོར་མཚོན་པར་བྱེད་པ་དང་སྔར་ལས་བཟང་བའི་སྒོ་ནས་ཁེ་ཕན་འབྲེལ་བ་མཐུན་སྦྱོར་བྱེད་དགོས་པར་མ་ཟད། ཁྲིམས་འཛུགས་ཀྱི་སྣེ་ཁྲིད་དང་སྐུལ་འདེད་ནུས་པ་འདོན་སྤེལ་བཟང་བོ་བྱེད་དགོས་ཟེར།

ཞི་ཅིན་ཕེན་གྱིས་གསུངས་རྒྱུར། རྩ་འཛུགས་དང་མི་སྒེར་གང་རུང་ངེས་པར་དུ་རྩ་ཁྲིམས་དང་བཅའ་ཁྲིམས་ཀྱི་ཁྱབ་ཁོངས་ལས་བརྒལ་མི་རུང་ཞིང་། སྤྱི་དམངས་དང་སྤྱི་ཚོགས་རྩ་འཛུགས་གང་རུང་དང་རྒྱལ་ཁབ་ལས་ཁུངས་བཅས་ཀྱིས་རྩ་ཁྲིམས་དང་བཅའ་ཁྲིམས་འགུལ་སྐྱོད་ཀྱི་ཚད་གཞིར་བཟུང་སྟེ་རྩ་ཁྲིམས་དང་བཅའ་ཁྲིམས་ལྟར་ཁེ་དབང་དང་དབང་ཆ། བྱེད་སྒོ་དང་འགན་འཁྲི་བཅས་ལག་བསྟར་བྱེད་དགོས། ཁྲིམས་ལུགས་དྲིལ་སྒྲོག་སློབ་གསོ་གཏིང་ཟབ་ཏུ་སྤེལ་བ་དང་སྤྱི་ཚོགས་ཡོངས་ཀྱིས་སྤྱི་ཚོགས་རིང་ལུགས་ཀྱི་ཁྲིམས་སྐྱོང་སྙིང་སྟོབས་དར་སྤེལ་བྱས་ཏེ། མི་དམངས་ཡོངས་ཀྱིས་བཅའ་ཁྲིམས་བརྩི་སྲུང་དང་གནད་དོན་བྱུང་ཚེ་བཅའ་ཁྲིམས་ལ་བརྟེན་ནས་ཐག་གཅོད་པར་སྣེ་ཁྲིད་བྱེད་པར་མ་ཟད། ཁྲིམས་སྲུང་གཟི་བརྗིད་ཡིན་པའི་སྣང་ཚུལ་བཟང་བོ་ཞིག་ཆགས་པར་བྱེད་དགོས། ཁྲིམས་ལུགས་སློབ་གསོ་དང་ཁྲིམས་སྐྱོང་ལག་ལེན་ཟུང་འབྲེལ་བྱེད་པ་རྒྱུན་འཁྱོངས་བྱས་ཏེ། ཁྲིམས་ལྟར་བཅོས་སྐྱོང་བྱེད་པའི་བྱ་འགུལ་གཏིང་ཟབ་ཏུ་སྤེལ་བ་དང་སྤྱི་ཚོགས་དོ་དམ་ཁྲིམས་སྐྱོང་ཅན་གྱི་ཆུ་ཚད་ཇེ་མཐོར་གཏོང་དགོས། ཁྲིམས་ལྟར་རྒྱལ་ཁབ་སྐྱོང་ཞིང་ཀུན་སྤྱོད་ལ་བརྟེན་ནས་རྒྱལ་ཁབ་སྐྱོང་བ་ཟུང་འབྲེལ་བྱེད་པ་རྒྱུན་འཁྱོངས་བྱས་ཏེ། ཁྲིམས་སྐྱོང་འཛུགས་སྐྲུན་དང་ཀུན་སྤྱོད་འཛུགས་སྐྲུན་ཟུང་འབྲེལ་དམ་པོ་བྱེད་པ་དང་། བཅའ་ཁྲིམས་དང་རང་གཅུན་ཟུང་འབྲེལ་དམ་པོ་བྱས་ནས། ཁྲིམས་དང་སྤྱོད་པས་ཕན་ཚུན་ལ་སྐུལ་འདེད་གཏོང་བའི་བྱ་བ་བཟང་བོར་སྒྲུབ་དགོས་ཟེར།

ཞི་ཅིན་ཕེན་གྱིས་ནན་གྱིས་བསྟན་དོན། ང་ཚོའི་ཏང་ནི་སྲིད་འཛིན་ཏང་ཡིན་པས། ཁྲིམས་ལྟར་སྲིད་འཛིན་པ་རྒྱུན་འཁྱོངས་བྱས་པ་དེས་ཁྲིམས་ལྟར་རྒྱལ་ཁབ་སྐྱོང་བར་ཕྱོགས་ཡོངས་ནས་སྐུལ་འདེད་གཏོང་བར་ནུས་པ་ཆེན་པོ་བཏོན། རིམ་པ་སོ་སོའི་ཏང་རྩ་འཛུགས་ཀྱིས་ངེས་པར་དུ་རྩ་ཁྲིམས་དང་བཅའ་ཁྲིམས་ཀྱི་ཁྱབ་ཁོངས་ནང་དུ་བྱ་འགུལ་སྤེལ་བ་རྒྱུན་འཁྱོངས་བྱེད་པ་དང་། རིམ་པ་སོ་སོའི་མགོ་ཁྲིད་ལས་བྱེད་པས་ཁྲིམས་ལྟར་དོན་དག་སྒྲུབ་པ་དང་བཅའ་ཁྲིམས་བརྩི་སྲུང་བྱེད་པར་སྣེ་ཁྲིད་བྱེད་དགོས་ལ། རིམ་པ་སོ་སོའི་རྩ་འཛུགས་སྡེ་ཁག་གིས་ཁྲིམས་ལྟར་དོན་དག་སྒྲུབ་མིན་དང་བཅའ་ཁྲིམས་བརྩི་སྲུང་བྱེད་མིན་དེ་ལས་བྱེད་པའི་བྱ་བར་དཔྱད་འཇོག་བྱེད་པའི་ཆ་རྐྱེན་གལ་ཆེན་ཞིག་ཏུ་བརྩི་དགོས་ཟེར།