ཞིན་ཧྭ་གསར་འགྱུར་ཁང་པེ་ཅིང་ནས་ཟླ12ཚེས22ཉིན་འབྱོར་བའི་གཏམ་གསར།ཉེ་དུས་ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས《དུས་བབ་གསར་པའི་འོག་མི་རིགས་ལས་དོན་ལ་ཤུགས་སྣོན་དང་ལེགས་སུ་གཏོང་རྒྱུའི་སྐོར་གྱི་བསམ་འཆར》པར་འགྲེམས་བྱས་ཏེ་ཀྲུང་གོའི་ཁྱད་ཆོས་ཀྱི་མི་རིགས་གནད་དོན་ཐག་གཅོད་བྱེད་པའི་ཡང་དག་པའི་ལམ་བུའི་ཐོག་བློ་བརྟན་འགྱུར་མེད་ངང་བསྐྱོད་རྒྱུ་དང་།དམངས་འཚོ་ལེགས་སུ་གཏོང་རྒྱུར་དམིགས་ནས་མི་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་འགྲོ་རྒྱུར་སྐུལ་འདེད་གཏོང་རྒྱུ།མི་རིགས་ཁག་སྤེལ་རེས་འགྲོ་འོང་དང་མཉམ་འདྲེས་ཡོང་རྒྱུར་སྐུལ་འདེད་གཏོང་རྒྱུ།མི་རིགས་ཁག་ཐུན་མོང་ལ་དབང་བའི་བསམ་པའི་ཁྱིམ་གཞིས་འཛུགས་སྐྱོང་།མི་རིགས་ལས་དོན་ལ་ཁྲིམས་ལྟར་དོ་དམ་བྱེད་པའི་འཇོན་ཐང་ཆེ་རུ་གཏོང་རྒྱུ།ཏང་གིས་མི་རིགས་ལས་དོན་ལ་འགོ་ཁྲིད་བྱ་རྒྱུར་ཤུགས་སྣོན་རྒྱག་རྒྱུ་སོགས་ཕྱོགས་དྲུག་གི་ཐད་ནས་བསམ་འཆར་ཁག25བཏོན་ཡོད་ཅིང་།དེའི་དམིགས་ཡུལ་ནི་དུས་བབ་གསར་པའི་འོག་མི་རིགས་ལས་དོན་ལ་ཤུགས་སྣོན་དང་ལེགས་སུ་ཏན་ཏིག་གཏོང་རྒྱུ་དང་།རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་དེ་འབྱོར་འབྲིང་སྤྱི་ཚོགས་སྒོ་ཀུན་ནས་སྐྲུན་ཐུབ་རྒྱུར་ཐུན་མོང་དུ་སྐུལ་འདེད་གཏོང་བ་དང་།ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་ཧུར་ཐག་བྱ་ཆེད་རེད།
《བསམ་འཆར》ནང་བསྟན་དོན།རང་རྒྱལ་གྱི་གཅིག་གྱུར་དང་མི་རིགས་མང་བའི་རྒྱལ་ཁབ་ཀྱི་གཞི་རྩའི་རྒྱལ་ཁབ་ཀྱི་གནས་ཚུལ་ལ་ངོས་འཛིན་གཏིང་ཟབ་བྱེད་དགོས།རང་རྒྱལ་ནི་རྒྱལ་ཡོངས་མི་རིགས་ཁག་གི་མི་དམངས་ཚོས་ཐུན་མོང་དུ་བསྐྲུན་པའི་རྒྱལ་ཁབ་ཅིག་ཡིན་པ་དང་དུས་ཡུན་རིང་པོའི་ལོ་རྒྱུས་ཀྱི་འཕེལ་རིམ་ནང་མི་རིགས་ཁག་ཐུན་མོང་དུ་མེས་རྒྱལ་གྱི་ཡངས་ཤིང་རྒྱ་ཆེ་བའི་མངའ་ཁོངས་གསར་སྤེལ་དང་འོད་སྟོང་འཕྲོ་བའི་ཀྲུང་ཧྭ་རིག་གནས་ཐུན་མོང་དུ་བཏོད་དེ་ཐུན་མོང་དུ་མཐུན་སྒྲིལ་འབད་འཐབ་དང་ཐུན་མོང་དུ་དར་རྒྱས་གོང་འཕེལ་གཏོང་བའི་ཀྲུང་ཧྭ་མི་རིགས་སྣ་མང་གཞི་གཅིག་གི་རྣམ་པ་ཞིག་ཆགས་ཡོད།ཀྲུང་གོའི་ཁྱད་ཆོས་ཀྱི་མི་རིགས་ཀྱི་གནད་དོན་ཐག་གཅོད་བྱེད་པའི་ཡང་དག་པའི་ལམ་བུའི་གཞི་རྩའི་ནང་དོན་ལ་ཁྱོན་ཡོངས་ནས་གོ་བ་ལེན་པར་ངེས་པར་དུ་གཤམ་གསལ་གྱི་གཞི་རྩའི་བླང་བྱ་ལ་གདེང་ཚོད་ནན་པོ་བྱེད་དགོས་པ་སྟེ།ཏང་གི་འགོ་ཁྲིད་རྒྱུན་འཁྱོངས་དང་།ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ལམ་བུ་རྒྱུན་འཁྱོངས།མེས་རྒྱལ་གཅིག་གྱུར་སྲུང་སྐྱོང་རྒྱུན་འཁྱོངས།མི་རིགས་ཁག་ཚང་མ་འདྲ་མཉམ་ཡིན་པ་རྒྱུན་འཁྱོངས།མི་རིགས་ས་ཁོངས་རང་སྐྱོང་ལམ་ལུགས་རྒྱུན་འཁྱོངས་དང་འཐུས་ཚང་དུ་གཏོང་བ།མི་རིགས་ཁག་ཐུན་མོང་དུ་མཐུན་སྒྲིལ་འབད་འཐབ་དང་ཐུན་མོང་དུ་དར་རྒྱས་གོང་འཕེལ་ཡོང་རྒྱུ་རྒྱུན་འཁྱོངས།ཀྲུང་ཧྭ་མི་རིགས་ཀྱི་ཐུན་མོང་སྒྲིག་གཞིའི་རྨང་གཞི་བརྟན་དུ་གཏོང་རྒྱུ་རྒྱུན་འཁྱོངས།ཁྲིམས་ལྟར་རྒྱལ་སྐྱོང་རྒྱུན་འཁྱོངས་བཅས་བྱེད་དགོས།མིག་སྔར་རང་རྒྱལ་གྱི་མི་རིགས་ལས་དོན་གྱི་དུས་མཚམས་རང་བཞིན་གྱི་ཁྱད་ཆོས་གནད་ལ་འཁེལ་བའི་སྒོ་ནས་གདེང་ཚོད་བྱེད་དགོས་པ་དེའི་ནང་བཅོས་བསྒྱུར་སྒོ་དབྱེ་དང་སྤྱི་ཚོགས་རིང་ལུགས་ཀྱི་ཁྲོམ་རའི་དཔལ་འབྱོར་ལས་བྱུང་བའི་གོ་སྐབས་དང་འགྲན་སློང་མཉམ་གནས་ཡིན་པ་དང་།གྲངས་ཉུང་མི་རིགས་དང་མི་རིགས་ས་ཁུལ་གྱི་ཁྲོམ་རའི་དཔལ་འབྱོར་འགོ་འཛུགས་ཕྱི་བ་དང་འགྲན་རྩོད་ནུས་པ་ཞན་ཙམ་ཡོད་པ་དང་།མི་རིགས་ས་ཁུལ་གྱི་དཔལ་འབྱོར་མགྱོགས་མྱུར་འཕེལ་རྒྱས་འགྲོ་བའི་དུས་བབ་དང་འཕེལ་རྒྱས་ཀྱི་ཆུ་ཚད་དམའ་བོ་མཉམ་གནས་ཡིན་ཞིང་།སྤྱི་ཡོངས་ནས་བལྟས་ཚེ་ཤར་རྒྱུད་ས་ཁུལ་གྱི་འཕེལ་རྒྱས་དང་བལྟོས་མེད་ཀྱི་ཧེ་བག་ཆེ་ཙམ་དང་མི་རིགས་ས་ཁུལ་བར་འཕེལ་རྒྱས་ཀྱི་ཧེ་བག་ཆེ་བའི་གནད་དོན་མངོན་གསལ་དོད་པ།རྒྱལ་ཁབ་ཀྱིས་མི་རིགས་ས་ཁུལ་ལ་རྒྱབ་སྐྱོར་བྱེད་ཤུགས་རྒྱུན་མཐུད་ངང་ཆེ་རུ་འགྲོ་བཞིན་པ་དང་མི་རིགས་ས་ཁུལ་གྱི་གཞི་རྩའི་སྤྱི་པའི་ཞབས་ཞུའི་ནུས་པ་འཛུགས་སྐྱོང་སྔར་བཞིན་ཉམས་ཞན་མཉམ་གནས་ཡིན།ལོ་རྒྱུས་ཀྱི་བུ་ལོན་མང་ཙམ་ཡོད་པ་དང་མང་ཚོགས་ཁག་གཅིག་གི་ཐོན་སྐྱེད་དང་འཚོ་བའི་ཆ་རྐྱེན་ཅུང་རྗེས་ལུས་ཡིན།མི་རིགས་ཁག་འགྲོ་འོང་སྤེལ་རེས་དང་མཉམ་འདྲེས་བྱེད་ཚད་ཟབ་ཏུ་འགྲོ་བཞིན་པ་དང་མི་རིགས་ཀྱི་རྒྱུ་རྐྱེན་དང་འབྲེལ་བ་ཡོད་པའི་འགལ་ཟླ་དང་རྩོད་གཞི་མང་དུ་འགྲོ་བ་མཉམ་གནས་ཡིན།མི་རིགས་འབྲེལ་བར་ཤུགས་རྐྱེན་བཟོ་བའི་རྒྱུ་རྐྱེན་དེ་བས་རྙོག་འཛིང་ཆེན་པོ་ཡོད།མི་རིགས་ཁ་ཕྲལ་ལ་ངོ་རྒོལ་དང་།ཆོས་ལུགས་ཐལ་སྐྱོད།གཏུམ་སྤྱོད་འཇིགས་སྐུལ་བཅས་ལ་འཐབ་རྩོད་བྱེད་པའི་གྲུབ་འབྲས་མངོན་གསལ་དོད་པ་དང་ས་ཁུལ་ཆ་ཤས་སུ་གཏུམ་སྤྱོད་འཇིགས་སྐུལ་གྱི་བྱེད་སྤྱོད་ཐོན་མང་བ་མཉམ་གནས་སོགས་ཚུད་ཡོད་པ་རེད།དུས་བབ་གསར་པའི་འོག་གི་མི་རིགས་ལས་དོན་གྱི་ཁྲིད་སྟོན་བསམ་བློ་སྔར་བས་ཁ་གསལ་ཡོང་བ་བྱས་ཏེ་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་ཐུན་མོང་དུ་མངོན་འགྱུར་ཡོང་ཆེད་འབད་འཐབ་ཧུར་ཐག་བྱེད་དགོས།
《བསམ་འཆར》ནང་བསྟན་དོན།མི་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གཞི་རྩའི་བསམ་ཕྱོགས་ཁ་གསལ་ཡོང་བ་བྱས་ཏེ་འབྱོར་འབྲིང་སྤྱི་ཚོགས་སྒོ་ཀུན་ནས་སྐྲུན་ཐུབ་པའི་དམིགས་ཚད་ལ་དམ་པོར་དམིགས་པ་དང་ནུབ་རྒྱུད་ཐོན་འབྱེད་ཆེ་མོའི་འཐབ་ཇུས་ལག་བསྟར་གཏིང་ཟབ་བྱས་ཏེ་གཞི་རྩའི་སྤྱི་པའི་ཞབས་ཞུའི་ཆུ་ཚད་མཐོ་རུ་གཏོང་བ་དང་དམངས་འཚོ་ལེགས་སུ་གཏོང་རྒྱུ་ལས་འགན་ཨང་དང་པོར་བརྩི་བ་དང་།དབུལ་སྐྱོར་འགག་སྒྲོལ་གཙོ་གནད་དུ་བྱེད་པ།སློབ་གསོ་དང་།ལས་ཞུགས།ཐོན་ལས་ཀྱི་གྲུབ་ཆ་ལེགས་སྒྲིགརྨང་གཞིའི་སྒྲིག་བཀོད་འཛུགས་སྐྲུན།སྣོད་བཅུད་ཁོར་ཡུག་སྲུང་སྐྱོང་བཅས་ཤུགས་རྒྱག་གཞིར་བྱེད་པ།ཁྲོམ་རའི་རྒྱུ་རྐྱེན་གཙོ་བོ་འཁོར་སྐྱོད་ལ་སྐུལ་འདེད་དང་མི་རིགས་ཁག་འགྲོ་འོང་སྤེལ་རེས་དང་མཉམ་འདྲེས་སྦྲེལ་མཐུད་ལ་ཤུགས་སྣོན་རྒྱག་རྒྱུ་དེ་ཐབས་ལམ་དུ་བྱེད་པ་བཅས་བྱས་ནས་འཕེལ་རྒྱས་དེ་ས་ཁོངས་རང་བཞིན་གྱི་ཐུན་མོང་གི་གནད་དོན་ཐག་གཅོད་དང་།མི་དམངས་ཀྱི་བདེ་རྩ་ཆེ་རུ་གཏོང་བ།མི་རིགས་མཐུན་སྒྲིལ་ལ་སྐུལ་འདེད་གཏོང་བ་བཅས་ཀྱི་ཐོག་དོན་འཁྱོལ་བྱེད་པ་དང་།མི་རིགས་ཁག་འཆམ་མཐུན་མཉམ་གནས་དང་།ཕྱར་བ་གྲུ་འདེགས།ཞི་མཐུན་འཕེལ་རྒྱས་བཅས་ཡོང་རྒྱུར་སྐུལ་འདེད་བཏང་སྟེ་ཀྲུང་གོའི་ཁྱད་ཆོས་དང་མི་རིགས་ས་ཁུལ་གྱི་དམིགས་བསལ་ཁྱད་ཆོས་ལྡན་པའི་ཚན་རིག་དང་མཐུན་པའི་འཕེལ་རྒྱས་ཀྱི་ལམ་བུའི་ཐོག་སྐྱོད་དགོས།ཁྱད་པར་ཡོད་པའི་རྒྱབ་སྐྱོར་སྲིད་ཇུས་འཐུས་ཚང་དུ་གཏོང་བ་དང་སྤྱིར་བཏང་རང་བཞིན་གྱི་ནོར་སྲིད་སྤོ་སྒྱུར་གཏོང་སྤྲོད་འཕར་བའི་ལམ་སྲོལ་སྔར་བས་འཐུས་ཚང་དུ་བཏང་ནས་མི་རིགས་ས་ཁུལ་དུ་སྔོན་ལ་ཐོན་ཁུངས་རིན་དོད་ཡོད་པའི་ངང་བེད་སྤྱོད་བྱེད་པའི་ལམ་ལུགས་དང་སྣོད་བཅུད་ཁ་གསབ་ལམ་ལུགས་ལག་བསྟར་བྱེད་པ་དང་།སྲིད་ཇུས་རང་བཞིན་གྱི་དངུལ་རྩའི་ནུས་པ་འདོན་སྤེལ་གང་ལེགས་བྱེད་པ།དངུལ་ཁང་དང་།དངུལ་འཛིན།འགན་བཅོལ་བཅས་ཀྱིས་མི་རིགས་ས་ཁུལ་དུ་རྒྱབ་སྐྱོར་བྱེད་ཤུགས་ཆེ་རུ་གཏོང་བ་བཅས་བྱས་ཐོག་མི་རིགས་ས་ཁུལ་དུ་རྒྱབ་སྐྱོར་བྱེད་པར་དར་གོས་ལམ་བུའི་དཔལ་འབྱོར་ཁུལ་དང་དུས་རབས21གི་མཚོ་ཐོག་དར་གོས་ལམ་བུ་འཛུགས་རྒྱུ་གོ་སྐབས་སུ་བྱས་ཏེ་འགག་སྒོ་འཛུགས་སྐྲུན་དང་རྨང་གཞིའི་སྒྲིག་ཆས་ཕན་ཚུན་སྦྲེལ་མཐུད་སོགས་ཀྱི་ཐད་རྒྱབ་སྐྱོར་བྱེད་པ་དང་།ཁ་གཏད་རོགས་སྐྱོར་གྱི་ལས་ཀའི་ལམ་སྲོལ་འཐུས་ཚང་དུ་གཏོང་བ།གཞི་རིམ་དང་ལྷག་པར་དུ་ཞིང་འབྲོག་ཁུལ་དུ་གཙོ་གནད་ཐོག་གཟིགས་སྐྱོང་བྱེད་པ།ལོ་ལྔའི་འཆར་གཞི་བཅུ་གསུམ་པའི་འཆར་འགོད་བཟོ་བ་དང་ཟུང་འབྲེལ་བཅས་བྱས་ཏེ་རྒྱལ་ཁབ་ཀྱིས་མི་འབོར་ཅུང་ཉུང་བའི་མི་རིགས་ལ་རྒྱབ་སྐྱོར་བྱེད་པའི་འཕེལ་རྒྱས་འཆར་འགོད་དང་།མཐའ་དར་དམངས་ཕྱུག་གི་བྱ་སྤྱོད་འཆར་འགོད།གྲངས་ཉུང་མི་རིགས་ཀྱི་བྱ་གཞག་འཆར་འགོད་བཅས་མུ་མཐུད་བཟོ་བ་དང་ལག་བསྟར་བྱེད་དགོས།སློབ་གསོའི་བྱ་གཞག་སྔོན་ལ་འཕེལ་རྒྱས་གཏོང་རྒྱུར་རྒྱབ་སྐྱོར་བྱས་ཏེ་འོས་འགན་སློབ་གསོ་དང་ལས་རིགས་སློབ་གསོ་དེ་གལ་ཆེའི་ནང་གི་འགངས་ཆེར་བརྩི་དགོས།བྱེད་ཐབས་སྣ་མང་མཉམ་སྤྱོད་ཀྱིས་ལས་ཞུགས་རྒྱ་ཆེར་གཏོང་བ་དང་།ཞིང་འབྲོག་ལས་དང་ཞིང་འབྲོག་ཐོན་རྫས་ལས་སྣོན་ལས་རིགས་འཕེལ་རྒྱས་འགྲོ་རྒྱུར་རྒྱབ་སྐྱོར་བྱེད་པ།ཞིང་འབྲོག་པའི་ཆེད་ལས་མཉམ་ལས་རྩ་འཛུགས་འཕེལ་རྒྱས་འགྲོ་རྒྱུར་སྐུལ་ལྕག་བཅས་བྱས་ཏེ་ཞིང་འབྲོག་པ་ལས་ཞུགས་དང་འབབ་འཕར་རྒྱུན་མཐུད་དང་བརྟན་པོ་ཡོང་རྒྱུར་སྐུལ་འདེད་གཏོང་དགོས།ཐོན་ལས་ཀྱི་གྲུབ་ཆ་མགྱོ གས་མྱུར་ལེགས་སྒྲིག་བྱས་ནས་དེང་རབས་ཞིང་འབྲོག་ལས་དང་།མི་རིགས་ལག་ཤེས་བཟོ་ལས།ཡུལ་སྐོར་ལས་རིགས་སོགས་ཁྱད་ཆོས་ལྡན་པའི་ཐོན་ལས་འཕེལ་རྒྱས་ཤུགས་ཆེན་བཏང་སྟེ་མི་རིགས་ཀྱི་སྤུས་རྟགས་སྐྱེད་སྲིང་དང་།ཁེ་ལས་ཀྱི་སྤུས་ཚད་དང་དོ་དམ་ཆུ་ཚད་མཐོ་རུ་ཧུར་ཐག་གཏོང་དགོས།རྨང་གཞིའི་སྒྲིག་ཆས་འཛུགས་སྐྲུན་དང་གྲོང་ཁྱེར་དང་གྲོང་རྡལ་ཅན་གྱི་འཕེལ་རིམ་ལ་སྐུལ་འདེད་བཏང་ནས་འགྲིམ་འགྲུལ་དང་།ཆུ་བེད།ཆ་འཕྲིན།ནུས་རྒྱུ།ཚན་རྩལ།ཁོར་ཡུག་སྲུང་སྐྱོང་།གནོད་འཚེ་སྔོན་འགོག་དང་ཆུང་གཏོང་སོགས་ཀྱི་རྣམ་གྲངས་མགྱོ གས་མྱུར་འཛུགས་སྐྲུན་བྱེད་དགོས།སྟོབས་ཤུགས་གཅིག་སྒྲིལ་གྱིས་དབུལ་སྐྱོར་འགག་སྒྲོལ་བྱེད་པ་དང་།མི་རིགས་དང་ས་ཁོངས་ཕན་ཚུན་སྤྱི་འདོམས་བྱ་རྒྱུ་རྒྱུན་འཁྱོངས་བྱེད་པ།གནད་སྨིན་དབུལ་སྐྱོར་ལས་དོན་གྱི་ནང་རྐྱེན་འཛུགས་པ།ཁྱད་ཆོས་ལྡན་པའི་ལེགས་ཆའི་ཐོན་ལས་འཕེལ་རྒྱས་ཧུར་ཐག་གཏོང་བ་བཅས་བྱས་ཏེ་རང་ངོས་འཕེལ་རྒྱས་གཏོང་ནུས་ཆེ་རུ་གཏོང་དགོས།
《བསམ་འཆར》ནང་ནན་བཤད་བྱས་དོན།ཕན་ཚུན་མཐུད་འཇུག་རྣམ་པའི་སྤྱི་ཚོགས་ཀྱི་གྲུབ་ཆ་དང་སྡེ་ཁུལ་གྱི་ཁོར་ཡུག་འཛུགས་རྒྱུར་སྐུལ་འདེད་བཏང་ནས་མི་རིགས་ཁག་གི་མང་ཚོགས་ཕན་ཚུན་རྒྱུས་མངའ་དང་།ཕན་ཚུན་བརྩི་འཇོགཕན་ཚུན་བསྟུན་མཁས།ཕན་ཚུན་དད་མོས།ཕན་ཚུན་སློབ་སྦྱོང་།ཕན་ཚུན་རོགས་རམ་བཅས་བྱ་རྒྱུར་སྐུལ་འདེད་གཏོང་དགོས།མི་རིགས་མཐུན་སྒྲིལ་ཡར་ཐོན་གཏོད་པའི་བྱེད་སྒོ་ཁྱོན་ཡོངས་དང་།གཏིང་ཟབ།རྒྱུན་མཐུད་བཅས་ཀྱི་སྒོ་ནས་སྤེལ་ཏེ་དུས་རྒྱུན་ནས་མཐོང་ཆེན་དང་།སྙིང་གཏམ་ཤོད་རེས་ལ་མཐོང་ཆེན།བྱ་སྤྱོད་སྤེལ་རྒྱུར་མཐོང་ཆེན།གཞི་རིམ་ལ་མཐོང་ཆེན་བཅས་རྒྱུན་འཁྱོངས་དང་།སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་ཅན་དང་།དངོས་ཚན་ཅན།སྤྱི་དམངས་ཅན་བཅས་ལ་མཐོང་ཆེན།མི་རིགས་མཐུན་སྒྲིལ་ཡར་ཐོན་གཏོད་པའི་བརྗོད་བྱ་གཙོ་བོ་མངོན་གསལ་དོད་པོ་ཡོང་བ།མི་རིགས་མཐུན་སྒྲིལ་ཡར་ཐོན་གཏོད་པའི་རྣམ་པ་ཕུན་སུམ་ཚོགས་སུ་གཏོང་བ།མི་རིགས་མཐུན་སྒྲིལ་ཡར་ཐོན་གཏོད་པའི་ནང་ཞུགས་ཁྱོན་ཆེ་རུ་གཏོང་བ།རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་སློབ་གསོའི་རྟེན་གཞི་འཛུགས་རྒྱུར་ཤུགས་སྣོན་རྒྱག་པ།ཀྲུང་དབྱང་དང་ས་གནས་ཀྱི་གསར་འགྱུར་སྨྱན་སྦྱོར་གཙོ་བོས་མི་རིགས་མཐུན་སྒྲིལ་མུ་མཐུད་དྲིལ་བསྒྲགས་བྱེད་པ་བཅས་བྱས་ཏེ་ཉམས་མྱོང་ཁྱབ་གདལ་དང་།དཔེ་མཚོན་འཛུགས་པ།རྣམ་པ་ཟབ་མོ་གཏོད་པ་བཅས་བྱེད་དགོས།རྒྱལ་ཁབ་ཀྱི་སྤྱི་སྤྱོད་སྐད་ཡིག་གི་སློབ་གསོ་བློ་བརྟན་འགྱུར་མེད་ཀྱི་སྒོ་ནས་ཁྱབ་གདལ་བཏང་སྟེ་རྒྱལ་ཁབ་ཀྱི་སྤྱི་སྤྱོད་སྐད་ཡིག་གི་སློབ་ཚན་ཁྱོན་ཡོངས་ནས་བཀོད་སྒྲིག་བྱེད་པ་དང་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཁྱོན་ཡོངས་ནས་ཁྱབ་གདལ་བཏང་སྟེ་གྲངས་ཉུང་མི་རིགས་ཀྱི་སློབ་མས་རྒྱལ་ཁབ་ཀྱི་སྤྱི་སྤྱོད་སྐད་ཡིག་གཞི་རྩའི་ཆ་ནས་ཁོང་དུ་ཆུད་པ་དང་བེད་སྤྱོད་ཐུབ་པར་འགན་ལེན་བྱེད་དགོས།དེ་དང་ཆབས་ཅིག་གྲངས་ཉུང་མི་རིགས་ཀྱིས་རང་མི་རིགས་ཀྱི་སྐད་ཡིག་སྤྱད་དེ་སློབ་གསོ་དང་ལེན་བྱེད་པའི་དབང་ཆར་བརྩི་བཀུར་དང་འགན་ལེན་བྱས་ནས་གྲངས་ཉུང་མི་རིགས་ཀྱི་སྐད་ཡིག་སློབ་གསོའི་ཆུ་ཚད་རྒྱུན་ཆད་མེད་པར་མཐོ་རུ་གཏོང་དགོས།དགོས་མཁོ་ཡོད་པའི་མི་རིགས་ས་ཁུལ་དུ་སློབ་ཞུགས་གོང་གི་སྐད་གཉིས་སློབ་གསོར་ཤུགས་སྣོན་བརྒྱབ་ནས་སྐུལ་ལྕག་སྲིད་ཇུས་བཟོས་ཏེ་དགེ་རྒན་གྱི་ཁ་གཏད་རོགས་སྐྱོར་བྱེད་ཤུགས་ཆེ་རུ་གཏོང་བ་དང་།སྐད་གཉིས་དགེ་རྒན་བསྡུ་བའི་ལས་དོན་ཡག་པོ་སྒྲུབ་པ།སྐད་གཉིས་སློབ་ཁྲིད་ཀྱི་དགེ་རྒན་གསོ་སྐྱོང་དང་གསོ་སྦྱོང་།སློབ་ཁྲིད་ཞིབ་འཇུགབསླབ་གཞི་གསར་སྤེལ་དང་དཔེ་སྐྲུན་སོགས་ལ་རྒྱབ་སྐྱོར་བཅས་བྱས་ཏེ་མི་རིགས་ཀྱི་སྐད་ཡིག་དང་རྒྱ་ཡིག་གཉིས་ཀ་ཤེས་པའི་ཤེས་ལྡན་མི་སྣ་གསོ་སྐྱོང་བྱ་རྒྱུར་སྣང་ཆེན་བྱེད་པ་དང་།གྲངས་ཉུང་མི་རིགས་ལས་བྱེད་པས་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཁོང་དུ་ཆུད་ནུས་ཆེ་རུ་གཏོང་དགོས་ལ་མི་རིགས་ས་ཁུལ་དུ་ལས་ཀ་བྱེད་མཁན་རྒྱ་རིགས་ལས་བྱེད་པས་གྲངས་ཉུང་མི་རིགས་ཀྱི་སྐད་ཡིག་སློབ་སྦྱོང་དང་ཁོང་དུ་ཆུད་པ་བྱེད་དགོས།
《བསམ་འཆར》ནང་བླང་བྱ་བཏོན་དོན།ཀྲུང་ཧྭ་མི་རིགས་ཀྱི་ཐུན་མོང་ཚོགས་པའི་འདུ་ཤེས་སྐྱེད་སྲིང་ཧུར་ཐག་བྱེད་པ་དང་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་ཀྲུང་གོ་ནི་རྒྱལ་ཡོངས་མི་རིགས་ཁག་གི་མི་དམངས་ཚོས་ཐུན་མོང་དུ་བསྐྲུན་པའི་རྒྱལ་ཁབ་ཅིག་ཡིན་པ་དང་།ཀྲུང་ཧྭའི་རིག་གནས་ནི་མི་རིགས56གི་རིག་གནས་ཚུད་པའི་རིག་གནས་ཤིག་ཡིན།ཀྲུང་ཧྭ་ཡི་དཔལ་ཡོན་ནི་མི་རིགས་ཁག་གིས་ཐུན་མོང་དུ་བཏོད་པའི་དཔལ་ཡོན་ཞིག་ཡིན་པ།ཀྲུང་ཧྭ་མི་རིགས་ནི་མི་རིགས་ཁག་ཐུན་མོང་ལ་དབང་བའི་ཁྱིམ་ཚང་ཆེ་མོ་ཞིག་ཡིན་པ་བཅས་ལ་ངོས་འཛིན་གཏིང་ཟབ་ཐུབ་རྒྱུར་ཁྲིད་སྟོན་བྱས་ནས་མི་རིགས་ཁག་འོ་ཆུ་འདྲེས་པ་ལྟར་བརྩེ་དུང་ཟབ་པ་དང་།སོ་མཆུ་ལྟར་གཅིག་ལ་གཅིག་བརྟེན་ཡིན་པ།བདེ་སྡུག་མཉམ་མྱོང་།ཁྲེལ་གྲགས་མཉམ་ཁུར་བཅས་ཀྱི་ལྟ་བ་བརྟན་པོ་འཛུགས་དགོས།གྲངས་ཉུང་མི་རིགས་ཀྱི་རིག་གནས་བྱ་གཞག་འཕེལ་རྒྱས་གཏོང་བར་སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས་ཁྲིད་སྟོན་དུ་བྱ་རྒྱུ་རྒྱུན་འཁྱོངས་ཀྱིས་མི་རིགས་ཁག་གི་རིག་གནས་མཉམ་འདྲེས་དང་གསར་གཏོད་ལ་སྐུལ་འདེད་གཏོང་བ་དང་གྲངས་ཉུང་མི་རིགས་ཀྱི་ཕུལ་བྱུང་སྲོལ་རྒྱུན་རིག་གནས་ལ་བརྩི་བཀུར་དང་།རྒྱུན་འཛིན།དར་སྤེལ་བཅས་བྱ་རྒྱུ་དེ་མི་རིགས་ཁག་གིས་མཉམ་སྤྱོད་བྱེད་པའི་ཀྲུང་ཧྭ་རིག་གནས་རྒྱུན་འཛིན་དང་འཛུགས་སྐྱོང་བྱ་རྒྱུ་དང་ཟུང་འབྲེལ་དམ་ཟབ་བྱེད་དགོས།
《བསམ་འཆར》ནང་བསྟན་དོན།མི་རིགས་ལས་དོན་གྱི་བཅའ་ཁྲིམས་དང་ཁྲིམས་སྲོལ་འཛུགས་སྐྱོང་ལ་ཤུགས་སྣོན་བརྒྱབ་ནས་མི་རིགས་ས་ཁོངས་རང་སྐྱོང་བཅའ་ཁྲིམས་ལག་བསྟར་དོན་འཁྱོལ་ནན་ཏན་དང་མི་རིགས་ལས་དོན་དང་འབྲེལ་བ་ཡོད་པའི་ཁྲིམས་སྲོལ་དང་སྲོལ་ཡིག་བཟོ་བཅོས་དང་འཐུས་ཚང་དུ་གཏོང་དགོས།གྲོང་ཁྱེར་དང་ཁ་ཐོར་དུ་གནས་པའི་ས་ཁུལ་གྱི་མི་རིགས་ལས་དོན་ཡག་པོ་སྒྲུབ་པ་དང་།གྲངས་ཉུང་མི་རིགས་ཀྱི་མི་འབོར་ཆ་འཕྲིན་ཐོན་ཁུངས་བསྡུ་སྒྲིལ་བྱ་རྒྱུར་ཤུགས་སྣོན་རྒྱག་པ།ཞབས་ཞུ་དང་དོ་དམ་ཆ་འཕྲིན་ཅན་གྱི་ལས་སྟེགས་འཛུགས་པ།ལས་ཀའི་ནང་རྐྱེན་འཐུས་སྒོ་ཚང་དུ་གཏོང་བ་བཅས་བྱས་ཏེ་གྲོང་ཁྱེར་དང་ཁ་ཐོར་དུ་གནས་པའི་ས་ཁུལ་གྱི་མི་རིགས་ལས་དོན་ལམ་ལུགས་ཅན་དང་།ཚད་ལྡན་ཅན།ཞིབ་ཚགས་ཅན་བཅས་སུ་འགྱུར་རྒྱུར་སྐུལ་འདེད་གཏོང་དགོས།མི་རིགས་ཀྱི་རྒྱུ་རྐྱེན་དང་འབྲེལ་བ་ཡོད་པའི་གནད་དོན་ཁྲིམས་ལྟར་ཐག་གཅོད་བྱེད་མཁས་པོ་བྱས་ནས་བཅའ་ཁྲིམས་ཀྱི་ཁྱབ་ཁོངས་དང་ཁྲིམས་སྐྱོང་གི་ལམ་སྲོལ་ཐོག་ནས་མི་རིགས་ཀྱི་རྒྱུ་རྐྱེན་དང་འབྲེལ་བ་ཡོད་པའི་གནད་དོན་ཐག་གཅོད་བྱ་རྒྱུ་རྒྱུན་འཁྱོངས་བྱེད་དགོས་པ་ལས་གྲངས་ཉུང་མི་རིགས་མང་ཚོགས་ཀྱི་དམངས་དོན་ཉེས་དོན་དང་འབྲེལ་བའི་གནད་དོན་མི་རིགས་ཀྱི་གནད་དོན་ལ་བརྩི་མི་རུང་བ་དང་མི་རིགས་ས་ཁུལ་དུ་ཐོན་པའི་སྤྱིར་བཏང་གི་འགལ་ཟླ་དང་རྩོད་གཞི་དེ་སྟབས་བདེ་པོའི་ངང་མི་རིགས་ཀྱི་གནད་དོན་ལ་བརྩི་མི་རུང་།
《བསམ་འཆར》ནང་གསལ་པོ་བཏོན་དོན།མི་རིགས་ལས་དོན་གྱི་འགོ་ཁྲིད་སྒྲིག་སྲོལ་དང་ལས་ཀའི་ལམ་སྲོལ་འཐུས་སྒོ་ཚང་དུ་གཏོང་དགོས།ལས་བྱེད་པའི་དཔུང་ཁག་འཛུགས་སྐྱོང་ལ་ཤུགས་སྣོན་བརྒྱབ་ནས་གྲངས་ཉུང་མི་རིགས་ཀྱི་ལས་བྱེད་པ་གསོ་སྐྱོང་ཤུགས་ཆེན་དང་།བློ་ཁོག་ཆེན་པོས་འདེམས་བསྐོ།ཡིད་ཆེས་གང་ལེགས།བློ་རྒྱ་ཆེན་པོས་བེད་སྤྱོད་བཅས་བྱེད་པ་དང་།མི་རིགས་ས་ཁུལ་དུ་ཡུན་རིང་ལས་ཀ་བྱེད་མཁན་རྒྱ་རིགས་ལས་བྱེད་པ་གསོ་སྐྱོང་བྱས་ནས་ལས་བྱེད་དཔུང་ཁག་གི་གྲུབ་ཆ་ལུགས་མཐུན་ཡོང་རྒྱུ་འགན་ལེན་བྱེད་དགོས།