ཉེ་སྔོན། གངས་ལྗོངས་ན་ཆུང་བྱིས་པའི་མུ་འབྲེལ་རིག་རྩལ་སྤྲོ་ཚོགས་ཆེན་མོ༼ ཁ་བའི་རྨི་ལམ ༽ཞེས་པ་མཚོ་ལྷོ་བོད་རིགས་རང་སྐྱོང་ཁུལ་ཁྲི་ཀ་རྫོང་གི་མ་ཎི་ཆུ་འཁོར་མདུན་ནས་ཕབ་སྐྲུན་ལེགས་འགྲུབ་བྱུང་།
         ཐེངས་འདིའི་དགོང་ཚོགས་ནི་མཚོ་ལྷོ་བོད་རིགས་རང་སྐྱོང་ཁུལ་ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་གཙོ་སྒྲུབ་བྱས་ཤིང་། ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་སློབ་མ་སྐོར་ཞིག་དང་ལོ་འདི་དག་གི་རིང་ལ་རིག་རྩལ་གར་སྟེགས་སྟེང་འབྲས་བུ་བླངས་ཡོད་པ་དང་སྒྱུ་རྩལ་གྱི་སྟེགས་བུའི་སྟེང་རང་ཉིད་ཀྱི་འཇོན་ཐང་མངོན་མེད་པའི་ཞིང་ཆེན་ཕྱི་ནང་གི་བོད་རིགས་ཀྱི་གླུ་བ་སྐད་གྲགས་ཅན་ཆུང་ཆུང་ཁ་ཤས་དགོང་ཚོགས་སུ་ཞུགས་ཡོད་པ་རེད། 
དགོང་ཚོགས་ལེ་ཚན་གྱི་རྣམ་པ་སྣ་ཚོགས་སུ་གྲུབ་པ་དང་། ནང་དོན་ཕུན་སུམ་ཚོགས་ལ། བོད་རིགས་དམངས་ཁྲོད་ཀྱི་དམངས་གླུ་ཕྱོགས་བསྡུས་བྱས་ཡོད་པ་ལས་གཞན། དེང་རབས་ཀྱི་གཞས་དང་། བོད་རིགས་ཀྱི་ཞབས་བྲོ། གར་ཆུང་། རྡུང་ལེན། དམངས་ཁྲོད་བྱིས་པའི་རོལ་རྩེད་སོགས་ལེ་ཚན་ཉི་ཤུ་ལྷག་ཡོད་པ་དང་། རིང་ཐུང་ལ་ཆུ་ཚོད་གཉིས་ལྷག་ཡོད། དགོང་ཚོགས་ཀྱིས་འཆམ་མཐུན་མཚོ་ལྷོ་བརྗོད་བྱ་རུ་བཟུང་བ་དང་། མི་རིགས་མཐུན་སྒྲིལ་ཡར་རྒྱས། མི་རིགས་སློབ་གསོའི་ལས་དོན་ཡར་རྒྱས་སུ་འགྲོ་བའི་རྒྱབ་ལྗོངས་འོག་དེང་སྐབས་ཀྱི་བོད་རིགས་ལོ་ཆུང་བྱིས་པ་བདེ་ཐང་ངང་འཚར་ལོངས་བྱུང་བ་དང་། མཐུན་སྒྲིལ་ཡར་ཐོན་གྱི་བསམ་བློ་མངོན་པ་རེད། དགོང་ཚོགས་ཀྱི་ལེ་ཚན་ཧྲིལ་བོར་འཁྲུགས་ཆ་དོད་པོ་ལྡན་པ་དང་། ཡུལ་དངོས་ཀྱི་ལྟད་མོ་བ་ཚོས་དགའ་བསུ་ཆེན་པོ་ཐོབ། མཚོ་ལྷོ་ཁུལ་དང་། ཁྲི་ཀ་རྫོང་གི་འགོ་ཁྲིད། ལས་བྱེད་མི་སྣ། སློབ་གྲྭའི་དགེ་སློབ་དང་ཁྱིམ་བདག་སོགས་མི་སྟོང་ཕྲག་ལྷག་གིས་དགོང་ཚོགས་ལ་གཟིགས་མྱོང་བྱས།

ཐེངས་འདིའི་དགོང་ཚོགས་བདེ་ལེགས་ངང་བསྒྲུབས་པ་དེས་མཚོ་སྔོན་ཞིང་ཆེན་རོང་འབྲོག་ཁུལ་གྱི་བྱིས་པའི་རིག་རྩལ་བྱ་འགུལ་ཕུན་སུམ་ཇེ་ཚོགས་སུ་གཏོང་བ་དང་། ན་ཆུང་བྱིས་པའི་རིག་རྩལ་གྱི་འཇོན་ཐང་མི་སྣ་གསོ་སྤེལ། ན་ཆུང་བྱིས་པའི་བདེ་ཐང་ལ་དོ་འཁུར་བྱེད་པ་དང་། བྱིས་པ་ཚོར་བརྙན་ཡོལ་སྟེང་ནས་འཇོན་ཐང་ངོམ་པའི་གོ་སྐབས་ཤིག་བྱིན་ནས་ན་ཆུང་བྱིས་པ་ཚོར་ཕན་ཚུན་བརྗེ་རེས་དང་སློབ་སྦྱོང་བྱེད་པའི་སྒྱུ་རྩལ་གྱི་སྟེགས་བུ་ཞིག་བསྐྲུན་པར་ཕན་ནུས་ཆེན་པོ་ཐོབ་ཡོད།

         ཐེངས་འདིའི་དགོང་ཚོགས་དེ་སྐབས་སྔོན་མ་དག་དང་བསྡུར་ན་མདོ་དབུས་ཁམས་གསུམ་གྱི་གླུ་གར་ཕྱོགས་གཅིག་ཏུ་བསྡུས་ནས་རེས་མོས་སྒོས་འཁྲབ་སྟོན་བགྱིས་ཡོད་པས་ནང་དོན་མང་བ་དང་ལེ་ཚན་གསར་བའི་ཁྱད་ཆོས་ལྡན། ཐེངས་འདིའི་དགོང་ཚོགས་ཀྱི་འོད་སྡེར་རྒྱ་ལོའི་ལོ་གསར་དང་བོད་ལོའི་ལོ་གསར་སྔོན་དུ་ཆེད་འཚོང་ཁང་སོགས་སུ་བཙོང་རྒྱུ་ཡོད་ཅིང་། རྒྱ་ལོའི་ལོ་གསར་དང་བོད་ལོའི་ལོ་གསར་སྐབས་སུ་མཚོ་སྔོན་བོད་སྐད་འཕྲིན་གྱི་ལམ་ནས་གཏོང་རྒྱུ་རེད།