སྐབས་དང་པོའི་ཀྲུང་གོའི་སྤུས་ཚད་འཕེལ་རྒྱས་གླེང་སྟེགས་ཚེས་ཉེར་ལྔ་ཉིན་པེ་ཅིན་ནས་ཚོགས་པ་དང་། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཝང་ཆི་ཧྲན་གླེང་སྟེགས་ཚོགས་འདུར་ཞུགས་ནས་ཤིས་ཚིག་ཕུལ། ཁོས་བཤད་རྒྱུར། «སྤུས་ཚད་འཕེལ་རྒྱས་རྩ་གནད»ནན་ཏན་སྒོས་ལག་བསྟར་དང་དངོས་འབེབས་བཟང་བོ་བྱས་ནས་སྤུས་ཚད་ལེགས་པའི་སྟོབས་ལྡན་རྒྱལ་ཁབ་མྱུར་དུ་འཛུགས་སྐྲུན་བྱེད་དགོས་ཟེར།
ཝང་ཆི་ཧྲན་གྱིས་བཤད་རྒྱུར། སྤུས་ཚད་ཆུ་ཚད་ཕྱོགས་ཡོངས་ནས་ཇེ་མཐོར་གཏོང་རྒྱུ་དེ་ཁེ་ལས་དང་ཐོན་རྫས་ཀྱི་འགྲན་རྩོད་ནུས་ཤུགས་ཇེ་ཆེར་གཏོང་བ་དང་། མི་དམངས་མང་ཚོགས་ཀྱི་རྩ་བའི་ཁེ་ཕན། དཔལ་འབྱོར་དང་སྤྱི་ཚོགས་བཟང་ཞིང་མགྱོགས་པའི་སྒོ་ནས་འཕེལ་རྒྱས་སུ་གཏོང་བ་བཅས་ལ་འབྲེལ་བ་ཡོད། དེང་སྐབས་རང་རྒྱལ་འབྱོར་འབྲིང་སྤྱི་ཚོགས་ཕྱོགས་ཡོངས་ནས་འཛུགས་སྐྲུན་བྱེད་པའི་གནད་འགག་གི་དུས་སྐབས་སུ་གནས་ཡོད་པས། སྤུས་ཚད་བྱ་བ་སྔར་ལས་བཟང་བོར་བསྒྲུབ་དགོས། ད་ལོའི་ཟླ་གཉིས་པར་རྒྱལ་སྲིད་སྤྱི་ཁྱབ་ཁང་གིས«སྤུས་ཚད་འཕེལ་རྒྱས་རྩ་གནད»འགྲེམ་སྤེལ་བྱས་པ་ནི་ཕྱིན་ཆད་ཀྱི་དུས་སྐབས་ཤིག་གི་སྤུས་ཚད་བྱ་བར་མཛུབ་སྟོན་བྱེད་པའི་རྩ་གནད་རང་བཞིན་གྱི་ཡིག་ཆ་ཞིག་ཡིན་པས། «སྤུས་ཚད་འཕེལ་རྒྱས་རྩ་གནད»ལས་བཏོན་པའི་བྱེད་ཕྱོགས་དང་དམིགས་འབེན། ལས་འགན་བཅས་ལ་དམིགས་ནས་དངོས་འབེབས་བྱ་བ་བཟང་བོ་བསྒྲུབ་དགོས་ཟེར།