ཀྲུང་གོ་བོད་ཀྱི་དྲ་བའི་འཕྲིན། ཉེ་ལམ། 2014ལོ་ནས2015ལོའི་བོད་རྒྱ་སྐད་གཉིས་བསླབ་དེབ་དཔེ་སྐྲུན་གྱི་གན་རྒྱ་འཇོག་པའི་མཛད་སྒོ་དེ་མཚོ་སྔོན་དགེ་ཐོན་སློབ་ཆེན་དུ་བསྡུས་ཤིང་། རྒྱལ་ཁབ་མི་རིགས་དཔེ་སྐྲུན་ཁང་དང་། མཚོ་སྔོན་ཞིང་ཆེན་སློབ་གསོ་ཐིན་མི་རིགས་སློབ་གསོ་ཁྲུའུ། མཚོ་སྔོན་དགེ་ཐོན་སློབ་ཆེན་གྱི་འགན་ཁུར་མི་སྣ་བཅས་ཐེངས་འདིའི་མཛད་སྒོར་ཞུགས།

    ཉེ་བའི་ལོ་འདི་འགའི་རིང་ལ། མཚོ་སྔོན་ཞིང་ཆེན་སློབ་གསོ་ཐིན་གྱིས་སྐད་གཉིས་བསླབ་དེབ་འཛུགས་སྐྲུན་ཐད་དོ་སྣང་ཆེན་པོ་བྱས་པ་དང་། མ་དངུལ་སྒོར་ས་ཡ་གཉིས་དང་འབུམ་ལྔ་ལྷག་བཏང་ནས་མཚོ་སྔོན་དགེ་ཐོན་སློབ་ཆེན་མི་རིགས་དགེ་ཐོན་སློབ་གླིང་གི་དགེ་རྒན་ཚོ་གཙོ་བྱས་ཏེ་སྐད་གཉིས་བསླབ་དེབ་དྲུག་ཅུ་ལྷག་རྩོམ་སྒྲིག་དང་ཡིག་སྒྱུར་བྱས་ནས་དཔེ་སྐྲུན་བྱེད་པ་དང་། དེ་སྔར་དཔེ་སྐྲུན་བྱས་པའི་བསླབ་དེབ་བཅོ་བརྒྱད་ཀྱི་རྨང་གཞིའི་སྟེང2014ལོ་ནས2015ལོའི་བར་བོད་རྒྱ་སྐད་གཉིས་བསླབ་དེབ་བཞི་ཅུ་ཞེ་གཉིས་ལྷག་རྩོམ་སྒྲིག་དཔེ་སྐྲུན་བྱེད་པའི་འཆར་གཞི་འཐེན་ཡོད།