ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ6པའི་ཚེས8ཉིན་འབྱོར་བའི་གཏམ་གསར། འགག་སྒོའི་སྤྱི་ཁྱབ་ལས་ཁུངས་ཀྱིས་གོང་ཚེས་ཉིན་ཁྱབ་བསྒྲགས་བྱས་པའི་གཞི་གྲངས་ལ་གཞིགས་ན།ད་ལོའི་སྔོན་གྱི་ཟླ་བ5ཡི་རིང་། རང་རྒྱལ་དང་ཨེ་ཤ་ཡ་ཤར་ལྷོའི་མནའ་འབྲེལ་རྒྱལ་ཁབ་བར་གྱི་ཕྱོགས་གཉིས་ཀྱི་ཚོང་དོན་བྱས་པའི་སྤྱིའི་རིན་ཐང་དེ་མི་དམངས་དངུལ་ཤོག་དུང་ཕྱུར1.12ཡིན་པས་ན་ལོའི་དུས་མཉམ་ལས་བརྒྱ་ཆ1.2འཕར་ཞིང་། དེའི་ནང་ཕྱིར་གཏོང་བྱས་པའི་སྒོར་དུང་ཕྱུར6210.1ཡིན་པས་བརྒྱ་ཆ4.1འཕར་བ། ཕྱིར་གཏོང་ནང་འདྲེན་དང་ཕྱིར་གཏོང་འཕར་ཚད་དེ་རྒྱལ་ཡོངས་ཀྱི་ཕྱི་ཕྱོགས་ཉོ་འཚོང་སྤྱི་ཁོག་གི་ཆུ་ཚད་ཀྱི་དུས་མཉམ་ལས་ཆ་སྙོམས་མཐོ་བ་རེད།
    ཚོང་དོན་གྲངས་གཞི་ལས་མཚོན་པར། མིག་སྔར་ཀྲུང་གོ་ནི་ཨེ་ཤ་ཡ་ཤར་ལྷོའི་མནའ་འབྲེལ་རྒྱལ་ཁབ་ཀྱི་ཚོང་དོན་རོགས་པ་ཆེས་ཆེ་བ་དེ་ཡིན་ཞིང་། ཨེ་ཤ་ཡ་ཤར་ལྷོའི་མནའ་འབྲེལ་རྒྱལ་ཁབ་ནི་ཀྲུང་གོའི་ཚོང་དོན་རོགས་པ་ཆེན་པོ་ཨང་གསུམ་པ་དང་ཨང་བཞི་པའི་ཕྱིར་གཏོང་ཁྲོམ་ར། ཨང་གཉིས་པའི་ནང་འདྲེན་ཡོངས་ཁུངས་བཅས་ཡིན་པ་རེད།ཀྲུང་གོའི་ཕྱོགས་ཀྱིས་སྡོམ་རྩིས་བྱས་པར་གཞིགས་ན། 2013ལོའི་ལོ་མཇུག་གི་བར་དུ། ཀྲུང་གོ་དང་ཨེ་ཤ་ཡ་ཤར་ལྷོའི་མནའ་འབྲེལ་རྒྱལ་ཁབ་ཕྱོགས་གཉིས་ཀྱིས་མ་དངུལ་གཏོང་འཇོག་བྱས་ཚད་ཨ་སྒོར་ཁྱོན་བསྡོམས་དུང་ཕྱུར1147.8ལ་ཟིན། ཀྲུང་གོའི་ཁེ་ལས་ཀྱིས་ཨེ་ཤ་ཡ་ཤར་ལྷོའི་མནའ་འབྲེལ་རྒྱལ་ཁབ་ལ་དངུལ་ལོར་མིན་པའི་གཏོང་འཇོག་བྱས་པ་དེ་སྡོམ་རྩིས་བྱས་ན་ཨ་སྒོར293.4ཡོད་པ་དང་། དེའི་ནང2013ལོར་གསར་དུ་བསྣན་པའི་ཐད་ཀར་གཏོང་འཇོག་བྱས་པའི་ཨ་སྒོར57.4ཡོད་པས་ན་ལོའི་དུས་མཉམ་ལས་བརྒྱ་ཆ29.8འཕར་ཡོད། ཨེ་ཤ་ཡ་ཤར་ལྷོའི་མནའ་འབྲེལ་རྒྱལ་ཁབ་ཀྱིས་རིམ་བསགས་ཀྱིས་ཀྲུང་གོར་དངོས་པོ་གཏོང་འཇོག་བྱས་པའི་ཨ་སྒོར་དུང་ཕྱུར854.4ཡིན་པས་ཀྲུང་གོས་ཕྱི་རྒྱལ་གྱི་མ་དངུལ་འགུག་ཚད་ཀྱི་བརྒྱ་ཆ6ལ་ཟིན། དེའི་ནང2013ལོར་གསར་དུ་བསྣན་པའི་ཐད་ཀར་གཏོང་འཇོག་ཨ་སྒོར་དུང་ཕྱུར83.5ཡིན་པས་བརྒྱ་ཆ18འཕར་བ་རེད།