ཞིན་ཧྭ་གསར་འགྱུར་ཁང་པེ་ཅིན་ནས་འབྱོར་བའི་གཏམ་གསར།ཟླ་བ5པའི་ཚེས26ཉིན་རྒྱལ་སྲིད་སྤྱི་ཁྱབ་ཁང་གི་དབུལ་སྐྱོར་གསར་སྦོལ་འགོ་ཁྲིད་ཚོ་ཆུང་གཞུང་ལས་ཁང་གིས་གཞུང་ཕྱོགས་དྲྭ་ཚུགས་ནས《དབུལ་སྐྱོར་ཞིབ་དག་བྱེད་པའི་ལས་ཀའི་ནང་རྐྱེན་གྱི་ལག་བསྟར་འཆར་འགོད་འཛུགས་རྒྱུ》ཞེས་སྤྱི་བསྒྲགས་བྱས་ཏེ་བསྟན་དོན་།དབུལ་པོའི་ཁྱིམ་ཚང་དང་དབུལ་པོའི་གྲོང་སྡེར་དབྱེ་འབྱེད་ཞིབ་དག་དང་རོགས་སྐྱོར་ཞིབ་དག།དོ་དམ་ཞིབ་དག།དཔྱད་ཞིབ་ཞིབ་དག་བཅས་བྱས་པར་བརྒྱུད་ནས་རིགས་སོ་སོའི་དབུལ་སྐྱོར་ཐོན་ཁུངས་བཀོད་སྒྲིག་བཟང་སྒྲུག་བྱེད་པར་སྣེ་ཁྲིད་བྱས་ནས་དབུལ་སྐྱོར་བྱེད་ཁྱོན་གྲོང་སྡེ་དང་དུད་ཚང་ཡོངས་ལ་ཁྱབ་པར་བྱས་ཤིང་།རིམ་བཞིན་དབུལ་སྐྱོར་ཞིབ་དག་ལས་ཀའི་ཡུན་རིང་ཕན་ཐོབ་ནང་རྐྱེན་འཛུགས་སྐྱོང་བྱ་རྒྱུ་ཡིན་པ་རེད།
    འཆར་འགོད་དུ་བླང་བྱ་འདོན་རྒྱུར།ཞིང་ཆེན་དང་ལྗོངས།གྲོང་ཁྱེར་ཁག་གིས་ལས་བྱེད་པ་གྲོང་གསེབ་ཏུ་བསྡད་ནས་ལས་ཀ་སྒྲུབ་པའི་ལམ་ལུགས་ཁྱབ་གདལ་བྱས་ཏེ་དབུལ་པོའི་གྲོང་སྡེ་སོ་སོར་རོགས་སྐྱོར་བྱེད་པའི་ལས་སྒྲུབ་རུ་ཁག་ཞིག་ཡོད་དགོས་པ་དང་དབུལ་པོའི་དུད་ཚང་ཡོངས་ལ་རོགས་སྐྱོར་འགན་ཁུར་བྱེད་མཁན་ཡོད་དགོས་པས་མ་ཚད།གྲོང་སྡེར་བསྡད་ནས་རོགས་སྐྱོར་བྱེད་པའི་ལས་སྒྲུབ་རུ་ཁག་དང་དབུལ་པོའི་དུད་ཚང་ལ་རོགས་སྐྱོར་འགན་ཁུར་བྱེད་མཁན་གྱི་གཞི་གྲངས་ཀྱི་མཛོད་ཁང་འཛུགས་དགོས།ཡུལ་བབ་དང་བསྟུན་པ་དང་རིགས་བགོས་ཏེ་མཛུབ་སྟོན་བྱེད་པ།གལ་ཆེ་བ་མངོན་གསལ་དོད་པོ་བྱེད་པ།ཕན་འབྲས་ལ་དོ་སྣང་བྱེད་པ་བཅས་ཀྱི་རྩ་དོན་རྒྱུན་འཁྱོངས་བྱས་ནས་དབུལ་སྐྱོར་གསར་སྦོལ་གྱི་ཁྱད་རྟགས་རྣམ་གྲངས་གསོ་སྐྱོང་བྱེད་པའི་དུས་མཚུངས་སུ།མུ་མཐུད་ནས་གྲོང་སྡེ་ཧྲིལ་པོ་འཕེལ་རྒྱས་ཡོང་བར་སྐུལ་འདེད་གཏོང་བ་དང་།ཕན་ཚུན་ཕན་སྒྲུབ་མ་དངུལ་སྤྲོད་པ།ཐོན་ལས་ཀྱིས་དབུལ་སྐྱོར་བྱེད་པ།ཚན་རྩལ་གྱིས་དབུལ་སྐྱོར་བྱེད་པ་སོགས་ཆེད་གཉེར་རྣམ་གྲངས་ཀྱི་དབུལ་སྐྱོར་ལས་ཀ་ལེགས་པོ་སྒྲུབ་དགོས།