ཉེ་ལམ།སྐབས་བཅུ་དྲུག་པའི་ཀྲུང་གོའི་ཚན་རིག་ལག་རྩལ་མཐུན་ཚོགས་ཀྲུང་གོའི་བོད་ལུགས་གསོ་རིག་སྨན་རྫས་དང་ནུབ་རྒྱུད་མི་རིགས་གསོ་རིག་འཕེལ་རྒྱས་གླེང་སྟེགས་དེ་ཡུན་ནན་སེམས་ཀྱི་ཉི་ཟླ་རུ་གཟབ་རྒྱས་ངང་བསྡུས་པ་རེད།
    རྒྱལ་ཁབ་ཀྲུང་སྨན་དོ་དམ་ཅུས་ཀྱི་སི་ཀྲང་ལུའུ་ཅན་ཝེ་དང་ཞིང་ཆེན་འཕྲོད་བསྟེན་ཐིང་གི་ཐིང་ཀྲང་གཞོན་པའམ་ཞིང་ཆེན་ཚན་རིག་ལག་རྩལ་མཐུན་ཚོགས་ཀྱི་ཀྲུའུ་ཞི་གཞོན་པ་ཀྲེན་ཅིན།ཡུན་ནན་ཀྲུང་ལུགས་སློབ་གྲྭའི་སློབ་གཙོ་གཞོན་པ་ལི་དབྱིན་བཅས་ཐེངས་འདིའི་གླེང་སྟེགས་ཀྱི་འགོ་ཚུགས་མཛད་སྒོར་ཞུགས་པ་དང་གསུང་བཤད་གནང་བ་རེད།ཁུལ་ཨུའི་རྒྱུན་ཨུ་དང་ཁུལ་ཨུའི་དྲིལ་བསྒྲགས་པུའུ་ཡི་པུའུ་ཀྲང་ལུང་ཡུང་མིང་གིས་ཤིས་ཚིག་གསུང་བ་དང་།ཁུལ་མི་དམངས་སྲིད་གཞུང་གི་ཁུལ་དཔོན་གཞོན་པ་སུང་ཐའོ་ཡིས་གླེང་སྟེགས་གཙོ་སྐྱོང་གནང་བ་རེད།
    ཝུའུ་ཅན་ཝེ་ཡིས་མི་རིགས་ཀྱི་གསོ་རིག་ནི་རང་རྒྱལ་གྱི་ཀྲུང་སྨན་གྱིས་ཚབ་བྱས་པའི་སྲོལ་རྒྱུན་གསོ་རིག་དང་ཕུལ་དུ་བྱུང་བའི་མི་རིགས་རིག་གནས་ཀྱི་གྲུབ་ཆ་གཙོ་བོ་ཡིན་པ་དང་།ཀྲུང་གོའི་ཁྱད་ལྡན་འཕྲོད་བསྟེན་ལས་དོན་གྱི་གྲུབ་ཆ་ཡང་ཡིན།ཉེ་བའི་ལོ་འགའི་རིང་།རིམ་པ་སོ་སོའི་ས་ཁུལ་གྱི་ཏང་ཨུ་དང་སྲིད་གཞུང་གིས་སྔར་ལས་ལྷག་པའི་སྒོ་ནས་མི་རིགས་གསོ་རིག་གི་ལས་ཀར་ཤུགས་བསྣན་པ་དང་།མི་རིགས་གསོ་རིག་འཕེལ་རྒྱས་ཀྱི་རོགས་སྐྱོར་སྲིད་ཇུས་དང་ལས་ཀའི་འཆར་གཞི་རབ་དང་རིམ་པ་གཏན་འབེབས་དང་ལག་བསྟར་བྱས་པས་མངོན་གསལ་གྱི་ཕན་འབྲས་ཐོབ་ཡོད་ཅེས་གསུངས་པ་རེད།ཁོས་ད་དུང་བདེ་ཆེན་ནི་ཡུན་ནན་ཞིང་ཆེན་གྱི་བོད་རིགས་རང་སྐྱོང་ཁུལ་ཁོ་ན་ཡིན་ལ།ཡུན་ནན་ཞིང་ཨུ་དང་ཞིང་ཆེན་སྲིད་གཞུང་གིས་ཀྲུང་སྨན་དང་མི་རིགས་གསོ་རིག་ལས་དོན་གྱི་འཕེལ་རྒྱས་ལ་གལ་ཆེའི་གཙིགས་འཛིན་བྱས་ནས།༼ཡུན་ནན་ཞིང་ཆེན་མི་དམངས་སྲིད་གཞུང་གིས་ཀྲུང་སྨན་ལས་དོན་གྱི་འཕེལ་རྒྱས་ལ་རོགས་སྐྱོར་དང་སྐུལ་འདེད་གཏོང་བའི་འབྲེལ་ཡོད་ཀྱི་ལག་བསྟར་བསམ་འཆར༽སོགས་ཀྲུང་སྨན་དང་མི་རིགས་གསོ་རིག་འཕེལ་རྒྱས་རོགས་སྐྱོར་སྲིད་ཇུས་རབ་དང་རིམ་པ་ལག་བསྟར་བྱས་པ།མི་རིགས་སྨན་བཅོས་དང་ལུས་ཁམས་བདེ་སྲུང་།སློབ་གསོ།ཚན་རིག་ཞིབ་འཇུག   ཐོན་ལས།རིག་གནས་སོགས་ཀྱི་ཐད་ཕན་ནུས་མངོན་གསལ་དོད་པོ་ཐོབ་ཡོད་ཅེས་གསུངས་པ་རེད།
    ཀྲེན་ཅིན་གྱིས་ཉེ་བའི་ལོ་འགའི་རིང་།རྒྱལ་ཁབ་དང་ཞིང་ཨུ།ཞིང་ཆེན་སྲིད་གཞུང་གིས་ཀྲུང་སྨན་དང་མི་རིགས་གསོ་རིག་ལས་དོན་གྱི་འཕེལ་རྒྱས་ལ་གལ་ཆེའི་གཙིགས་འཛིན་དང་རྒྱབ་སྐྱོར་བྱས་པ་རེད།ཀྲུང་གོའི་ཚན་རིག་ལག་རྩལ་མཐུན་ཚོགས་འདི་ལྟ་བུའི་རྒྱལ་ཁབ་རིམ་པའི་སྟེགས་བུ་དང་ཐེངས་འདིའི་གླེང་སྟེགས་བསྡུས་པ་བརྒྱུད་ནས།ཁྱད་ཆོས་ཤིན་ཏུ་ལྡན་པའི“བོད་ལུགས་གསོ་རིག་སྨན་རྫས་དང་ནུབ་རྒྱུད་མི་རིགས་གསོ་རིག་འཕེལ་རྒྱས་ཀྱི་རིག་གཞུང་སྤུས་རྟགས”བསྐྲུན་ནས།ཀྲུང་སྨན་དང་མི་རིགས་གསོ་རིག་ལས་ཀ་སྒྲུབ་མཁན་གྱི་ལས་ཀའི་བརྩེ་སེམས་དང་བརྩོན་སེམས་ལ་སྐུལ་མ་བཏང་སྟེ།ཀྲུང་སྨན་དང་མི་རིགས་གསོ་རིག་ལས་དོན་གྱི་འཕེལ་རྒྱས་ལ་འཇོན་ཐང་ཅན་གྱི་རྒྱབ་སྐྱོར་དང་ཤེས་རིག་གི་རྒྱབ་སྐྱོར་འདོན་དགོས་པའི་བླང་བྱ་བཏོན་པ་རེད།
   ལི་དབྱིན་གྱིས་ཉེ་བའི་ལོ་འགའི་རིང་།ཡུན་ནན་ཀྲུང་སྨན་སློབ་གྲྭས་མི་རིགས་དམངས་ཁྲོད་གསོ་རིག་གི་ཞིབ་འཇུག་ཐད་གྲུབ་འབྲས་མངོན་གསལ་ཐོབ་པ་དང་།ཐེངས་འདིའི་གླེང་སྟེགས་ཁྲོད་བརྗེ་རེས་བྱེད་པ་བརྒྱུད་མུ་མཐུད་དུ་ནུབ་རྒྱུད་མི་རིགས་སོ་སོའི་གསོ་རིག་སློབ་གསོའི་ཚན་རིག་ཞིབ་འཇུག་གི་སྒྲིག་གཞི་དང་བོད་ཀྱི་གསོ་རིག་དང་མི་རིགས་གསོ་རིག་གི་ལས་ཀ་སྒྲུབ་མཁན་གྱི་མཉམ་འབྲེལ་ལ་ཤུགས་བསྣན་ནས།མི་རིགས་གསོ་རིག་གི་འཕེལ་རྒྱས་ལ་མུ་མཐུད་དུ་སྐུལ་འདེད་དང་།མི་རིགས་སོ་སོའི་མི་དམངས་ཀྱི་བདེ་ཐང་ལས་དོན་གྱི་འཕེལ་རྒྱས་ལ་བྱས་རྗེས་འཇོག་པར་བརྩོན་ལེན་བྱེད་རྒྱུ་ཡིན་ཞེས་གསུངས་བ་རེད།
    ལུང་ཡུང་མིང་གིས་ཤིས་ཚིག་གསུང་བའི་སྐབས་སུ་བོད་ཀྱི་གསོ་རིག་ནང་དུ་ཚུད་པའི་མི་རིགས་གསོ་རིག་ནི་ཀྲུང་ཧྭ་མི་རིགས་སྲོལ་རྒྱུན་གསོ་རིག་གི་གལ་ཆེའི་གྲུབ་ཆ་ཞིག་ཡིན་པ་དང་།ཐེངས་འདིའི་གླེང་སྟེགས་བསྡུས་པ་བརྒྱུད་དེ།རང་ཁུལ་བོད་ཀྱི་གསོ་རིག་འཕེལ་རྒྱས་ཀྱི་ཁ་ཕྱོགས་དང་གནད་ས་སྔར་ལས་ལྷག་པའི་སྒོ་ནས་གསལ་བར་བྱེད་པ་དང་།རང་ཁུལ་བོད་ཀྱི་གསོ་རིག་གི་སྲོལ་རྒྱུན་གསར་འབྱེད་དང་རྒྱུན་མཐུད་འཕེལ་རྒྱས་ལ་སྐུལ་འདེད་གཏོང་བར་ཕན་ལ།བདེ་ཆེན་གྱིས“སྐྱེ་ཁམས་ལ་བརྟེན་ནས་ཁུལ་འཛུགས་པའི”འཐབ་ཇུས་ལག་བསྟར་བྱེད་པར་སྐུལ་འདེད་གཏོང་བར་ཕན་པ་རེད།རང་ཁུལ་གྱིས་ཐེངས་འདིའི་གླེང་སྟེགས་ཀྱི་གོ་སྐབས་བརྒྱུད་ནས།ཚན་རྩལ་ཐོན་ཁུངས་བསྡུ་ལེན་དང་གྲགས་ཅན་མི་སྣའི་བསམ་འཆར་བརྗེ་རེས་སོགས་བྱས་ནས།རང་ཁུལ་བོད་ཀྱི་གསོ་རིག་ལས་དོན་ལ་གར་སྟེགས་གསར་བ་དང་འཕེལ་རྒྱས་གསར་བ་མངོན་འགྱུར་བྱུང་བར་བརྩོན་ལེན་བྱེད་རྒྱུ་ཡིན་ཞེས་གསུངས་པ་རེད།
    འགོ་ཚུགས་མཛད་སྒོ་མཇུག་གྲིལ་རྗེས་ཆེད་གདན་སྙན་ཞུའི་ཚོགས་འདུ་འཚོགས་པ་རེད།རྒྱལ་ཁབ་ཀྲུང་སྨན་དོ་དམ་ཅུས་ཀྱི་ཅུས་ཀྲང་གཞོན་པ།དགེ་རྒན་ཆེན་མོ་ཀྲུའུ་ཀུའོ་པུན་དང་ཀྲུང་གོའི་ཚན་རིག་གླིང་ནུབ་བྱང་མཐོ་སྒང་སྐྱེ་དངོས་ཞིབ་འཇུག་སུའོ་ཡི་སུའོ་ཀྲང་ཝེ་ལི་ཞིན།བོད་ལྗོངས་གསོ་རིག་སློབ་གླིང་གི་སློབ་གཙོ་གཞོན་པ་དང་དགེ་རྒན་ཆེན་མོ།འབུམ་རམས་པའི་སློབ་དཔོན་མིག་དམར་སོགས་གདན་ཞུ་བྱས་ཡོད་པ་རེད།
    གླེང་སྟེགས་ཀྱི་འགོ་ཚུགས་མཛད་སྒོར་ཞུགས་པའི་འགོ་ཁྲིད་ད་དུང་བོད་རང་སྐྱོང་ལྗོངས་ཚན་རིག་ལག་རྩལ་མཐུན་ཚོགས་ཀྱི་ཀྲུང་ཞི་གཞོན་པ་ཕོ་ལུང་དང་ཡུན་ནན་ཞིང་ཆེན་སྨན་རྫས་ཞིབ་འཇུག་སུའོ་ཡི་སུའོ་ཀྲང་ཀྲུའུ་ཀྲའོ་ཡུན།ཁུལ་སྲིད་གྲོས་ཀྱི་ཀྲུའུ་ཞི་གཞོན་པ་ཧོ་ལི་ཕིན།དེ་མིན་འབྲེལ་ཡོད་ཞིང་ཆེན་གྱི་ཚན་རིག་ལག་རྩལ་ཞིབ་འཇུག་ལས་ཁུངས་དང་།སྨན་བཅོས།སློབ་གསོ།སྨན་སྦྱོར་ཁེ་ལས་སོགས་ཀྱི་མི་རིགས་སྨན་རྫས་དང་བོད་ལུགས་གསོ་རིག་སྨན་རྫས་ཀྱི་ཆེད་མཁས་མི200ལྷག་ཞུགས་ཡོད་པ་རེད།