ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་ཚེས་ཉེར་བརྒྱད་ཉིན་གྱི་ཕྱི་དྲོར་ཏའོ་ཡུས་ཐེ་རྒྱལ་མགྲོན་ཁང་ནས་འཛམ་གླིང་དཔལ་འབྱོར་གླེང་སྟེགས་ཀྱི་ཀྲུའུ་ཞི་ཧྲི་ཝ་པུའུ་ལ་མཇལ་འཕྲད་གནང་།ལིས་ཁི་ཆང་གིས་བསྟན་དོན།མིག་སྔར་འཛམ་གླིང་དཔལ་འབྱོར་གྱི་གནས་བབ་དེ་འདྲའི་རྒྱུན་ལྡན་ཞིག་མིན་ལ།དཔལ་འབྱོར་སླར་གསོ་དེ་གཏན་འཇགས་མིན་པའི་རྒྱུ་རྐྱེན་སྣ་ཚོགས་ལ་འཕྲད་ཡོད།འཕེལ་རྒྱས་ཆེ་བའི་དཔལ་འབྱོར་གྱི་ཕུང་བོ་དང་གསར་དར་དཔལ་འབྱོར་ཕུང་བོས་གཅིག་ལ་གཅིག་བརྟེན་གྱི་སྒོ་ནས་འཛམ་གླིང་དཔལ་འབྱོར་ཁྱབ་ཁོངས་ཀྱི་འགྲན་རྩོད་ཆེན་པོར་མཉམ་དུ་ཁ་གཏད་འཇལ་ནས་འཛམ་གླིང་གི་དཔལ་འབྱོར་སླར་གསོའི་གནས་བབ་སྲ་བརྟན་དུ་གཏོང་དགོས་ཟེར།ལིས་ཁི་ཆང་གིས་བསྟན་དོན།ཕྱིའི་ཁོར་ཡུག་གི་རྙོག་འཛིང་ཆེ་བའི་གནས་ཚུལ་འོག་ཏུ་ཀྲུང་གོའི་དཔལ་འབྱོར་འཁོར་བསྐྱོད་ཀྱི་སྤྱིའི་གནས་བབ་གཏན་འཇགས་ཡིན་ལ་གྲུབ་ཚུལ་ལེགས་སྒྲིག་ཐད་ལ་འགྱུར་ལྡོག་གསར་བ་འབྱུང་བཞིན་ཡོད།འདི་ལྟ་བུའི་གནོན་ཤུགས་ལ་ཁ་གཏད་ནས་ང་ཚོས་བརྟན་པོའི་ཁྲོད་དུ་འཕེལ་རྒྱས་བརྩོན་པ་དང་རང་འགུལ་གྱི་སྒོ་ནས་གཏན་འཇགས་འཕར་སྣོན་ལ་གཅིག་གྱུར་སྐུལ་འདེད་དང་བཅོས་བསྒྱུར་ལ་ཡར་སྐུལ།གྲུབ་ཚུལ་ལེགས་སྒྲིགདམངས་འཚོ་ལེགས་བཅོས་སོགས་བརྒྱུད་དེ་ནོར་སྲིད་སྲིད་ཇུས་དང་བདེ་ཐང་གི་དངུལ་ལོར་སྲིད་ཇུས་མུ་མཐུད་དུ་ལག་བསྟར་བྱས་ནས་སྲིད་ཇུས་མཐུན་སྦྱོར་ལ་ཤུགས་སྣོན་པ་དང་།འཕེལ་རྒྱས་ཀྱི་ཁོར་ཡུག་ལེགས་པོ་ཞིག་བསྐྲུན་ནས་མི་ཁྲི་ཁྲི་འབུམ་འབུམ་ཞིག་གི་བརྩོན་སེམས་ལ་སྐུལ་སློང་བྱས་ཏེ།ད་ལོའི་དཔལ་འབྱོར་སྤྱི་ཚོགས་འཕེལ་རྒྱས་ཀྱི་སྔོན་དཔག་དམིགས་འབེན་མངོན་འགྱུར་བྱེད་པར་འབད་བརྩོན་བྱེད་བཞིན་ཡོད།ཀྲུང་གོ་ཕྱོགས་ཀྱིས་འཛམ་གླིང་དཔལ་འབྱོར་གླེང་སྟེགས་བར་གྱི་མཉམ་ལས་རྒྱུན་འཁྱོངས་དམ་འཛིན་བྱེད་འདོད་ཡོད་པར་མ་ཟད།དཔལ་འབྱོར་གླེང་སྟེགས་ཀྱིས་མུ་མཐུད་དུ་རྒྱལ་སྤྱིའི་སྤྱི་ཚོགས་དང་ཀྲུང་གོའི་བར་ཕན་ཚུན་རྒྱུས་ལོན་བྱེད་པར་སྐུལ་འདེད་རང་བཞིན་གྱི་ནུས་པ་ཐོན་པར་རེ་བ་བྱེད་བཞིན་ཡོད་ཟེར།ཧྲི་ཝ་པུའུ་ཡིས་བསྟན་དོན།ཙུང་ལི་ལིས་ཁི་ཆང་གིས་ཅང་མ་འགོར་བའི་སྔོན་ལ་འཛམ་གླིང་དཔལ་འབྱོར་གླེང་སྟེགས་ཀྱི་ཨ་ཧྥེ་རི་ཁའི་མཐོ་རིམ་གྲོས་ཚོགས་སྟེང་མི་སེམས་འགུལ་བའི་གཏམ་བཤད་སྤེལ་བ་དེར་ཕྱོགས་སོ་སོས་གདེང་འཇོག་ཚད་མཐོན་པོ་བྱས་པར་མ་ཟད།དེས་ཨ་ཧྥེ་རི་ཁའི་མི་དམངས་ཀྱིས་འགྲན་རྩོད་ལ་ཁ་གཏད་འཇལ་བའི་ཡིད་ཆེས་སྔར་ལས་ཇེ་བརྟན་དུ་བཏང་།ཀྲུང་གོའི་བཅོས་བསྒྱུར་དང་འཕེལ་རྒྱས་དེ་འཛམ་གླིང་གི་དཔལ་འབྱོར་སླར་གསོ་དང་འཕར་སྣོན་ཐད་ལ་ཕན་པ་ཆེན་པོ་ཡོད་ལ།འཛམ་གླིང་དཔལ་འབྱོར་གླེང་སྟེགས་ཀྱིས་ཀྲུང་གོ་ཕྱོགས་ཀྱིས་རྒྱབ་སྐྱོར་བྱས་པར་བཀའ་དྲིན་ཆེ་ཞུས་པར་མ་ཟད།ཀྲུང་གོ་ཕྱོགས་དང་མཉམ་དུ་མཉམ་ལས་ལ་ཤུགས་སྣོན་དང་དབྱར་དུས་ཏ་ཨོ་སི་གླེང་སྟེགས་སོགས་བརྒྱུད་ནས་འཛམ་གླིང་གི་དཔལ་འབྱོར་ལེགས་བཅོས་དང་འཕེལ་རྒྱས་སུ་གཏོང་བའི་ཐད་ལ་ཧུར་བརྩོན་རང་བཞིན་གྱི་ནུས་པ་འདོན་འདོད་ཡོད་ཟེར།