ཀྲུང་གོའི་བོད་ཀྱི་དྲ་བའི་འཕྲིན།ཚེས་ཉེར་བདུན་ཉིན།བོད་རང་སྐྱོང་ལྗོངས་མི་དམངས་སྲིད་གཞུང་དང་མཚོ་བོད་ལྕགས་ལམ་ཀུང་སི་གཉིས་ཀྱིས་ལྷ་ས་ནས་བཞུགས་མོལ་ཚོགས་འདུ་འཚོགས་ཏེ།བོད་ལྗོངས་ཀྱི་ལྕགས་ལམ་འཛུགས་སྐྲུན་དང་ལྕགས་ལམ་སྐྱེལ་འདྲེན་མགྱོགས་པོ་གོང་དུ་སྤེལ་བར་སྐུལ་འདེད་བྱེད་པ་ལ་སོགས་པའི་སྐོར་ནས་བགྲོ་གླེང་ཟབ་མོ་གནང་ནས་གཅིག་མཐུན་གྱི་བསམ་བློ་གྲུབ་པ་རེད།བོད་རང་སྐྱོང་ལྗོངས་ཏང་ཨུ་ཧྲུའུ་ཅི་གཞོན་པའམ།རང་སྐྱོང་ལྗོངས་ཀྱི་ཀྲུའུ་ཞི་བློ་བཟང་རྒྱལ་མཚན་གྱིས།ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐུགས་ཁུར་ཟབ་མོ་དང་།རྒྱལ་ཁབ་ཀྱི་འབྲེལ་ཡོད་སྡེ་ཁག་དང་།ལྷག་པར་དུ་ཀྲུང་གོའི་ལྕགས་ལམ་སྤྱི་ཁྱབ་ཀུང་སིས་རྒྱབ་སྐྱོར་ཆེན་པོ་དང་།སྐབས་རེ་རེའི་རང་སྐྱོང་ལྗོངས་ཏང་ཨུའམ་སྲིད་གཞུང་གིས་གཙུགས་མཐོང་དང་སྣེ་ཁྲིད་བརྟན་པོ།རྒྱ་ཆེ་བའི་ལྕགས་ལམ་འཛུགས་སྐྲུན་མཁན་གྱིས་གཅིག་གྱུར་འབད་བརྩོན་བཅས་ལ་བརྟེན་ནས་བོད་ལྗོངས་ཀྱི་ལྕགས་ལམ་དེ་མེད་པ་ནས་ཡོད་པ་དང་།ཡོད་པ་ནས་མགྱོགས་པོར་འཕེལ་རྒྱས་བྱུང་སྟེ།བོད་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གོམ་སྟབས་ཇེ་མགྱོགས་ཇེ་ལེགས་བཏང་བས།མི་རིགས་ཁག་གི་མང་ཚོགས་ཀྱིས་ལྕགས་ལམ་གྱིས་བསྐྲུན་པའི་གོ་སྐབས་དང་འགྱུར་ལྡོག་གསར་བ་དོན་དངོས་ཐོག་ཉམས་སུ་མྱོང་ཐུབ་པ་བྱུང་བ་དང་།བོད་ལྗོངས་ཀྱི་མཆོང་སྐྱོད་རང་བཞིན་གྱི་འཕེལ་རྒྱས་དང་སྤྱི་ཚོགས་ཡུན་རིང་བརྟན་འཇགས་ཐད་ལའང་ནུས་པ་གལ་ཆེན་བཏོན་ཡོད་ཅེས་གསུངས།
བློ་བཟང་རྒྱལ་མཚན་གྱིས།བོད་ལྗོངས་ཀྱི་ལྕགས་ལམ་འཛུགས་སྐྲུན་ཇེ་མགྱོགས་སུ་གཏོང་བ་ནི་ཀྲུང་དབྱང་གིས་གཏན་འཁེལ་བྱས་པའི་ངོས་གཉིས་གནས་བཞིའི་འཐབ་ཇུས་ལག་བསྟར་དོན་འཁྱོལ་བྱེད་པའི་ནང་དོན་ཡིན་ཞིང་།རྒྱལ་ཁབ་ཀྱིས་མཐའ་མཚམས་མི་རིགས་ས་ཁུལ་གྱི་སྣ་མང་འགྲིམ་འགྲུལ་མ་ལག་འཛུགས་སྐྲུན་ལ་སྐུལ་འདེད་གཏོང་བའི་ནང་དོན་གལ་ཆེན་ཞིག་དང་།བོད་ལྗོངས་མཆོང་སྐྱོད་ངང་འཕེལ་རྒྱས་དང་སྤྱི་ཚོགས་ཡུན་རིང་བརྟན་འཇགས་མངོན་འགྱུར་བྱེད་པའི་དགོས་ངེས་ཀྱི་བླང་བྱ་ཡིན་ལ།བོད་ལྗོངས་དང་རྒྱལ་ཡོངས་ཀྱི་ས་གནས་ཁག་གཅིག་གྱུར་ཐོག་འབྱོར་འབྲིང་སྤྱི་ཚོགས་ལ་སྙེག་པའི་འགན་ལེན་གལ་ཆེན་ཞིག་ཀྱང་ཡིན་པར་བརྟེན།ལྗོངས་ཡོངས་ཀྱི་མི་རིགས་ཁག་གི་མི་དམངས་ཀྱི་རེ་བ་མངོན་འགྱུར་བྱེད་པ་དང་རྨང་གཞི་བརྟན་པོ་ཡོང་བ།ཡུན་རིང་གི་ཁེ་ཕན་བསྐྲུན་པ་བཅས་ལ་དོན་སྙིང་གལ་ཆེན་ལྡན།ད་ལྟ་བོད་ལྗོངས་ཀྱི་ལྕགས་ལམ་འཛུགས་སྐྲུན་ནི་སྐུལ་འདེད་གཏིང་ཟབ་གཏོང་བའི་གལ་ཆེའི་དུས་རིམ་དུ་འཁེལ་ཡོད་པ་མ་ཟད།རྒྱལ་ཁབ་ཀྱིས་དཀྱིལ་དབུས་དང་ཤར་ཕྱོགས་ས་ཁུལ་གྱི་ལྕགས་ལམ་འཛུགས་སྐྲུན་ཇེ་མགྱོགས་གཏོང་བའི་གོ་སྐབས་བཟང་པོ་དང་།བོད་ལྗོངས་ཀྱི་ལྕགས་ལམ་འཛུགས་སྐྲུན་ཇེ་མགྱོགས་གཏོང་བའི་དུས་སྐབས་དང་འཁེལ་ཡོད་པས།མཚོ་བོད་ལྕགས་ལམ་ཀུང་སིས་སྔར་བཞིན་བོད་ལྗོངས་ཀྱི་ལྕགས་ལམ་འཛུགས་སྐྲུན་དང་འཁོར་སྐྱོད་ལ་ཐུགས་ཁུར་དང་རྒྱབ་སྐྱོར་བྱས་ནས།སྤྱི་ཚོགས་ཀྱི་འགན་འཁྲི་འཁུར་དུ་འཁྱེར་ནས་ལས་ཞུགས་ལ་སྐུལ་འདེད་གཏོང་བ་དང་།ལྷག་པར་རང་སྐྱོང་ལྗོངས་དང་མཉམ་འབྲེལ་བྱས་ཏེ།རྒྱལ་ཁབ་ཀྱི་འབྲེལ་ཡོད་སྡེ་ཁག་དང་མཐུན་འབྲེལ་བྱས་ཁར།མཉམ་གཅིག་ཏུ་བོད་ལྗོངས་ཀྱི་ལྕགས་ལམ་ལས་རིགས་མགྱོགས་པོར་འཕེལ་རྒྱས་གཏོང་ཐུབ་པར་རེ་བ་ཡོད་ཅེས་བསྟན།
ཝང་ཀྲུང་དབྱི་ཡིས་བོད་རང་སྐྱོང་ལྗོངས་ཏང་ཨུའམ་སྲིད་གཞུང་གིས་དུས་ཡུན་རིང་བོར་མཚོ་བོད་ལྕགས་ལམ་ཀུང་སིར་ཐུགས་ཁུར་དང་རྒྱབ་སྐྱོར་བྱས་པར་བཀའ་དྲིན་ཆེ་ཞུས་པ་མ་ཟད།ཀུང་སི་དེའི་བདེ་འཇགས་ཐོན་སྐྱེད་དང་སྐྱེལ་འདྲེན་ཞབས་ཞུ།ལྕགས་ལམ་འཛུགས་སྐྲུན་སོགས་སྐོར་གྱི་ལས་དོན་སྤེལ་བའི་གནས་ཚུལ་ངོ་སྤྲོད་བྱས།ཁོང་གིས།བོད་ལྗོངས་མཆོང་སྐྱོད་ངང་འཕེལ་རྒྱས་དང་ཡུན་རིང་བརྟན་འཇགས་ཡོང་བར་ཞབས་ཞུ་བསྒྲུབ་རྒྱུ་ནི།མཚོ་བོད་ལྕགས་ལམ་ཀུང་སིའི་ལས་འགན་གཙོ་བོ་ཡིན།ཀུང་སིས་རང་སྐྱོང་ལྗོངས་ཏང་ཨུའམ་སྲིད་གཞུང་དང་།ལྕགས་ལམ་སྤྱི་ཁྱབ་ཀུང་སིའི་བཀོད་སྒྲིག་བླང་བྱ་ལག་ལེན་དོན་འཁྱོར་བྱས་ཏེ།ལྕགས་ལམ་རྣམ་གྲངས་གལ་ཆེན་འཛུགས་སྐྲུན་ནུས་ཚད་ཇེ་ཆེར་དང་འཛམ་གླིང་གི་ཆེས་ཕུལ་དུ་བྱུང་བའི་མཐོ་སྒང་ལྕགས་ལམ་བཀོལ་སྤྱོད་ཡག་པོ་བྱས་ཏེ།བོད་ལྗོངས་ཀྱི་དཔལ་འབྱོར་འཕེལ་རྒྱས་དང་སྤྱི་ཚོགས་བརྟན་འཇགས།དམངས་འཚོ་ལེགས་བསྒྱུར།སྐྱེ་ཁམས་ལེགས་བསྒྱུར་བཅས་ཀྱི་ཐད་ལ་ཞབས་ཞུ་སྔར་ལས་ལེགས་པོ་བསྒྲུབ་སྟེ་བྱས་རྗེས་ཆེན་པོ་འཇོག་འདོད་ཅེས་བསྟན་པ་རེད།
བཞུགས་མོལ་གྲོས་ཚོགས་སྟེང་དུ།ཕྱོགས་གཉིས་ཀྱིས་བསམ་འཆར་གཅིག་མཐུན་ཁག་ལྔ་བྱུང་།གཅིག་ནི་ལམ་རྒྱུད་ཕྱོགས་གཉིས་ལ་དོ་དམ་གཟབ་ནན་བྱེད་པ་དང་།བདེ་འཇགས་ཐོན་སྐྱེད་མཐའ་ཐིག་བརྟན་སྲུང་བྱེད་པ།ལྕགས་ལམ་བདེ་འཇགས་སྲུང་ཐིག་བརྟན་འཛུགས་བཅས་བྱས་ནས།མཚོ་བོད་ལྕགས་ལམ་གྱི་ལམ་རྒྱུད་སོ་སོ་བདེ་འཇགས་ཚོད་འཛིན་གྱི་ཁྱབ་ཁོངས་སུ་བཅུག།གཉིས་ནས་སྐྱེལ་འདྲེན་ནུས་ཤུགས་དང་རྩ་འཛུགས་མཐུན་སྒྲིག་ལ་ཤུགས་བསྣན།གསུམ་ནས་ནུས་ཤུགས་ཡོད་རྒུས་ལྷ་ས་ནས་གཞིས་ཀ་རྩེ་བར་གྱི་སྐྱེལ་འདྲེན་གྲ་སྒྲིག་ལེགས་པོ་བྱེད་དགོས།བཞི་ནས་རྣམ་གྲངས་ཀྱི་སྔོན་འགྲོའི་ལས་དོན་ལེགས་པོ་གཉེར་དགོས།ལྔ་ནས་ས་ཁུལ་གཞན་དག་བར་གྱི་ལྕགས་ལམ་ལམ་ཐིག་འཛུགས་སྐྲུན་གྱི་སྔོན་འགྲོའི་ལས་ཀ་ཡག་པོ་བསྒྲུབས་ནས།ལོ་ལྔ་ཚན་བཅུ་གསུམ་རིང་གི་ལྕགས་ལམ་རྣམ་གྲངས་གསར་བ་འཛུགས་སྐྲུན་བྱེད་དགོས་པ་བཅས་རེད།  །