རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕེན་གྱིས་ཟླ་ལྔ་བའི་ཚེས་བཅུ་དགུ་ཉིན་ཧྲང་ཧེ་ནས་མོང་གོལ་རྒྱལ་ཁབ་ཀྱི་ཙུང་ཐུང་ཨིག་ལི་པེ་ཀི་ཏའོ་ཨར་ཅི་ལ་མཇལ་འཕྲད་གནང་།
ཞི་ཅིན་ཕེན་གྱིས་གསུངས་རྒྱུར།ཀྲུང་གོ་དང་མོང་གོལ་གཉིས་ནི་རི་ཆུ་འབྲེལ་བའི་མཛའ་མཐུན་ཁྱིམ་མཚེས་ཡིན་པ་དང་།རྒྱལ་ཁབ་གཉིས་བར་ཁྱིམ་མཚེས་བཟང་བོ་དང་གྲོགས་པོ་བཟང་བོའི་འབྲེལ་བ་བཙུགས་ཡོད་པར་མ་ཟད།ཕ་རོལ་ཕྱོགས་ཀྱི་ཁེ་ཕན་གཙོ་བོ་དང་དོ་སྣང་བྱེད་བཞིན་པའི་གནད་དོན་གལ་ཆེན་ཐད་ནས་ཕན་ཚུན་ལ་རོགས་སྐྱོར་བྱེད་བཞིན་ཡོད།ཀྲུང་གོ་ཕྱོགས་ཀྱིས་མོང་གོལ་རྒྱལ་ཁབ་ཀྱི་བདག་དབང་དང་བདེ་འཇགས།མངའ་ཁོངས་ཆ་ཚང་བཅས་ལ་བརྩི་འཇོག་བྱེད་པ་དང།མོལ་གོལ་གྱིས་གདམ་གསེས་བྱས་པའི་རྒྱལ་ཁབ་རང་གི་གནས་ཚུལ་དང་མཐུན་པའི་འཕེལ་རྒྱས་བགྲོད་ལམ་ལ་བརྩི་འཇོག་བྱེད་བཞིན་ཡོད།ད་ལོ་ནི་རྒྱལ་ཁབ་གཉིས་བར་འབྲེལ་བ་བཙུགས་ནས་ལོ་འཁོར་རེ་ལྔ་ལོན་པ་དང་ཀྲུང་གོ་དང་མོང་གོལ་གཉིས་ཀྱི་མཛའ་མཐུན་བརྗེ་རེས་ལོ་ཡིན་པས།ཕྱོགས་གཉིས་ཀྱིས་རྗེས་དྲན་བྱ་འགུལ་རྒྱ་ཆེན་པོ་སྤེལ་ནས།རྒྱལ་ཁབ་གཉིས་དང་རྒྱལ་ཁབ་གཉིས་ཀྱི་མི་དམངས་ཁྲོད་ཤན་ཤུགས་དྲག་པོ་ཐེབས་ལ།རྒྱལ་ཁབ་གཉིས་ཀྱི་འབྲེལ་བ་སྔར་ལས་འཕེལ་རྒྱས་སུ་བཏང་ཡོད་ཟེར།
ཨིག་ལི་པེ་ཀི་ཏའོ་ཨར་ཅི་ཡིས་བཤད་རྒྱུར།མོང་གོལ་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་མོང་གོལ་དང་ཀྲུང་གོའི་བར་གྱི་འབྲེལ་བ་དེ་ས་ཁུལ་རང་གི་རྒྱལ་ཁབ་བར་གྱི་འབྲེལ་བའི་མིག་དཔེར་བསྒྱུར་བར་འབད་བརྩོན་བྱེད་རྒྱུ་ཡིན་ལ།ཕྱོགས་གཉིས་བར་གྲོས་མཐུན་བྱུང་བའི་ཐུན་མོང་གི་ལྟ་བ་ལག་བསྟར་བཟང་བོ་བྱས་ནས།གཏེར་ཐོན་དང་གློག་ཤུགས།རྨང་གཞིའི་སྒྲིག་ཆས་འཛུགས་སྐྲུན་བཅས་ཕྱོགས་ཀྱི་མཉམ་ལས་ལ་ཤུགས་སྣོན་འདོད་ཡོད།མོང་གོལ་ཕྱོགས་ཀྱིས་རྒྱལ་སྤྱི་དང་ས་ཁུལ་གྱི་ལས་དོན་ཁྲོད་ཀྲུང་གོ་ཕྱོགས་དང་འབྲེལ་འདྲིས་དང་མཐུན་སྦྱོར་དམ་པོ་བྱེད་པར་རེ་བ་བྱེད་བཞིན་ཡོད་ལ།ཨེ་ཤ་ཡའི་ཕན་ཚུན་མཉམ་ལས་དང་ཡིད་ཆེས་བྱེད་ཐབས་གྲོས་ཚོགས་ཀྱི་ཧྲང་ཧེ་མཐོ་རིམ་གྲོས་ཚོགས་ལ་གྲུབ་འབྲས་ཐོབ་པར་རྒྱབ་སྐྱོར་བྱེད་འདོད་ཡོད་ཟེར།