གཙང་པ་རྒྱལ་པོའི་དུས་རབས།

ཐུན་བསྟན་ཕུན་ཚོགས།    ཁམས་པའི་ཉིན་རེའི་ཚགས་པར་ལས་དྲངས།    2010-10-14

གསུམ་པ་རྒྱལ་པོ་མེ་ལོང་གདོང་གི་ཞལ་ལྕེའམ་སྣེ་མོ་ལས་འཛིན་གྱི་ཞལ་ལྕེ་ནི།   རྒྱལ་པོའི་ལུང་གིས་སྣེ་མོར་བསྐོས་པ་རྣམས་ཀྱིས་རང་འདོད་ཁོ་ནའི་སྐྱོན་སྤངས་གཞུང་དོན་གཙོ་བོར་བྱས་ཏེ།  སྡེ་སྲིད་ཀྱི་སྐུ་རིམ་དང་ཆོས་རྒྱལ་གྱི་རྣམ་ཐར་གྱི་འཕྲིན་ལས་བསྒྲུབ་པ་ལ་དམིགས་པའི་སངས་རྒྱས་ཀྱི་བསྟན་པའི་ཞབས་ཏོག་གཙོ་བོར་བྱས།  ཆོས་ཕྱོགས་ཀྱི་ཞྭ་རིགས་དང་གྲུབ་མཐའ་མི་བསྒྱུརདུས་ཆེན་གྱི་ཟླ་བ་ལྔ་ལ་རི་རྒྱ་ཀླུང་རྒྱ་བསྡོམས་པ།  གཉེར་ཚང་ལ་དཀར་སྡོར་བྱེད་པ།   སྐུ་གསུང་ཐུགས་ཀྱི་རྟེན་གཞི་གསོ།  ལམ་འཕྲང་འཆོས་པ།   སོག་ཟློག་ལ་དམིགས་པའི་སྤྲེ་ཟླ་བའི་ཚེས་བཅུ་ལ་ཡུལ་ཚན་སོ་སོར་སྐྲ་ཐོགས་གསོལ་འདེབས་བྱེད་བཅུག་པགཉེར་ཚང་དུ་ཚེས་བཅུ་ཆག་མེད་འཇུག་པ།  འཕྲལ་ཆས་ཀྱི་གཉེར་འོག་ལ་ཐེལ་གཏོང་མ་གཏོགས་རྫོང་དཔོན་གྱིས་གཏན་ཚིགས་མི་སྟེར།  ཏཱའི་སི་ཏུའི་བཀའ་ཆེམས་ལས།   རྫོང་དཔོན་གྱི་ཞིབ་ཆེན་ནས་མི་ཟ།   སྒེར་གྱི་བུན་ཆག་འབྲེལ་གཞུང་ཁུངས་སུ་ཡོད་པ་རྣམས་ལ་སྒེར་གྱི་ཟ་འདེད་གཏོང་མ་འཇུགསྡེ་གཟར་ཡུལ་འཁྱོམས་ཀྱིས་རེ་གཉིས་འཐོར་སྐྱོན་དུ་འགྲོ་རིགས་མ་གཏོགས་ཤེ་བམ་མི་སྟེར།   བུན་རྙིང་ལོ་སྐོར་དུ་ལོན་པ་ལ་དངོས་གཅིག་བེད་གཅིག་འགྲིག་ན་དེ་ལྷག་ལ་སྤྲོད་ཤེས་ལེན་ཤེས་གཅོད་རྒྱ་བྱེད་པ་མ་གཏོགས་རྩིས་གྲུབ་བྱེད་མི་འཇུགཆ་ཞབས་དང་ལྷོ་ཟན་བར་ཁ་ལྟས་ཁྱབ་པའི་ཧོར་འདྲ་མི་སྡེའི་ཁྱད་པར་ཧང་ཟོམ་དུ་མ་སོང་བར་བྱེད་ཅིང༌།  ཁྲིམས་ཀྱི་སར་བློ་སོར་བཞག་ཕྱོགས་ཆ་ཉེ་རིང་མེད་པས་བདེན་རྫུན་ཤན་ཕྱེད་པའི་ཁྲིམས་འགལ་ལ་སྙིང་སྟོབས་ཀྱིས་བརྡར་འདེད།  ཁྲིམས་མཐུན་བྱམས་བརྩེ་སྐྱོང་བ།   ཕྱི་ནང་གི་སར་ཁ་མཆུ་སྦྱོར་བ་དང་འཚོལ་བ་མི་བྱ།   ཁྲིམས་སར་ཞུ་འབོད་བྱུང་བ་རྣམས་ལ་ལེ་བར་མི་འཇོག་པར་སྦྱངས་བཤད་ཕན་ཚུན་བློ་ཁ་རྫོགས་ཐབས་བྱེད་པ་མ་གཏོགས་དབང་ལྟག་ཁུར་མི་བྱེད།  རང་ཁྲིམས་སར་བསྡད་རིང་རང་གི་ཉེ་བ་དང་དགྲ་ཕྱོགས་ལ་འདིའི་སྐབས་ཉེ་འགྱངས་མི་བྱེད།  མདོར་ན་མི་ཤེས་གོང་ཕུད་ཀྱི་ཕྱོགས་སུ་མ་ལྷུང་བ་དང་དཔོན་ཁུངས་ཀྱི་བྱ་བ་ཆེ་ཆུང་གང་ལའང་འཇིག་རྟེན་དུ་གྲགས་པའི་ཐོག་ནས་མིག་ལྟོས་ཡར་ལྟོས་བྱས་པའི་ལ་ཡོགས་མི་འགོ་བ་ཞིག་བྱེད་དགོས་པ་ཡིན་ནོ། 
          བཞི་པ་ཞུ་བཞེས་བདེན་རྫུན་གྱི་ཞལ་ལྕེ་ནི།   དང་པོར་སྨོས་པའི་སྤང་བླང་དང་ལྡན་པའི་ཐོག་མར་མི་དོད་སྙོམས་ངོས་བཤེར་བ་དང༌།  དོད་མི་སྙོམས་ན་གདོང་བཤེར་མི་བྱེད་པར་བསྐོར་སྦྱངས་གཏོང་བ་སོགས་བློ་ཁ་རྫོགས་ཐབས་སུ་འགྲོ་བ་སྤྱིར་གྱིས་ཀྱང་བྱེད་དགོས་ཤིང་ལྷག་པར་སྐྱིད་ཤོད་ཁུལ་འདི་ལ་ཁྲིམས་འཆོར་བའི་ཁྱིམ་མཚེས་སོགས་རང་རང་དོན་གྱི་འཁོན་བཟུང་ནས་ཁྲིམས་སར་ཉེ་བརྒྱུད་རིང་བརྒྱུད་ཀྱི་ཆད་པ་ཆད་ལེན་ཞུ་རེས་བྱེད་པ་ཞིག་གིས་རང་སྡུག་རང་མྱོང་མྱོང་བ་གཅིག་འདུག་ནའང༌།  ད་ནས་བཟུང་ཆད་པ་ཞུ་མི་རྣམས་ལ་སྔ་འགྲོས་ཐལ་ཆ་མི་བྱེད།  བཤེར་འབོད་བདེན་རྫུན་བརྟགས་པའི་ཆད་པ་ཐོབ་ངེས་ན་དེ་ཐོག་ཏུ་གཏོང་བ་གཞིར་བཅས་ཤིང་གཡོ་ཞུས་ཡིན་ན་ཞུ་མཁན་གྱི་ཐོག་ཏུ་ཆད་པ་དེ་ཁ་སློགཡང་ཧམ་རེས་བྱུང་ན་ཆད་པ་སྦུས་སུ་བཞག་པའི་འཁྲུ་དག་གི་ཡོ་གལ་བྱེད།  གཉིས་ཀས་དག་པ་མ་འཁོལ་ན་ཆད་པ་རེའི་ཕྱེད་ཁྱེར་ནག་ཆེ་ཆུང་ལ་དཔགས་པའི་འགེལ།   ཁ་མཆུ་ཁྲིམས་སར་ཐལ་བའི་སླར་ནང་བསྡུམས་བྱེད་ན་ཉེས་པའི་ཁྲིམས་འདེགས་ཀྱི་ཕྱེད་དང་ཞུ་འགེགས་འོས་འགབ་ཁྲིམས་སར་ཕུལ་ནས་ཟློས་པ་ནང་འཇགས་སུ་བསྡུམས་འཇུག་གོ། 
        ལྔ་པ་བཟུང་བཀྱིགས་ཁྲིམས་རའི་ཞལ་ལྕེ་ནི།   ཁྲིམས་འགལ་གྱི་རིགས་ལ་ཐོག་མར་བཟུང་བཀྱིགས་བབ་ཐོག་ཏུ་འདུག་ཅིང༌།  དམིགས་བསལ་ཕོ་བྲང་འོག་ཏུ་གྲི་འདོན་རྒྱ་འདྲེ་བྱས་པར་བཟུང་བཀྱིགས།  ལྟོགས་ཧྲལ་རྐུན་མ་བྱས་པར་བཟུང་བཀྱིགས།  མགོ་མི་རང་ཤེད་བྱས་པར་བཟུང་བཀྱིགས།  བློ་ངན་གྲོས་མཚང་འབྲུ་བ་ལ་བཟུང་བཀྱིགས།   མི་མཉམ་པའི་ཁ་ངན་སློག་པར་བཟུང་བཀྱིགས།  ཉེས་པ་ཆེ་བ་ལ་སྡིག་བཀྱིགས་དམ་ཕྲུག་གིས་མནན་ནས་ཨན་གཏད་ལྕི་ས་སྤྲོད།  དེ་ནས་ཁྲག་སྦྱོར་ཐོབ་པ་རྣམས་ལ་ཁྲིམས་ཡིག་བསྒྲགས་ནས་རྔམས་ཟིལ་ཆེ་བའི་མི་ཁྲིམས་གཅོད།   དེ་ཁར་དཔགས་པ་ལ་དྲག་ཞན་གྱི་སྲོག་རིན་བཞེས་པ།  སྐུ་ངོར་གཏོང་བ་ཆས་གོད་གཅོད་པ་སོགས་ཇི་ལྟར་སྐབས་དང་མཚུངས་པར་བྱེད་དོ། 
  • ལེ་ཚན་སྔོན་མ།:གཙང་པ་རྒྱལ་པོའི་དུས་རབས།
  • ལེ་ཚན་རྗེས་མ།:གནས་སྐབས་མེད།