ཨ་མཆོད་དཔོན་གྱི་ལས་ཚན་རྣམས་ཀྱི་ས་ཁང་སློང་བ་རྣམས་མི་ཡོང་ཤོ་ལེན་གྱི་མི་སྣ་ལ་ཆས་ཁའི་ཤ་རྒྱུ་སྤྲད་པ་རྣམས་ཤོར་ཐོག་ཏུ་རྩིས་དགོས།  དེ་ཕྱིན་ལག་ཐོག་ཏུ་སྤྲོད་རྒྱུ་རྣམས་ལ་གསུམ་སྤྲོད།  སེམས་ཅན་ཆེ་ཆུང་ཅི་ཤོར་ཀྱང་ཁ་གྲངས་ཇག་པས་མནའ་བསྐྱལ་བ་རྣམས་ལ་སུམ་ཟུར་དུ་བྱས་ནས་གསུམ་གཅིག་ལ་ཁ་གཙང༌།  གསུམ་གཉིས་ལ་དབྱར་གཉིས།  གསུམ་ཟུར་ལ་བེ་ལུག་སྤྲོད་པ་དང༌།   ཇག་པའི་ཕྱོགས་ནས་ཀྱང་བར་པ་ཟེར།  མི་གང་འཆུག་བྱས་ནས་བར་ཟན་ཟེར།   ཤོར་ཆེ་ཆུང་ལ་དཔགས་པའི་ཟ་གང་ཐུབ་དང༌།  བྱ་འབབ་ས་གཉེར་ཟེར་དཔོན་ཚང་གི་ལས་ཚན་རྣམས་ལའང་སྟེར་དགོས།  རྟ་མིག་དམར་ལ་ཁ་དམར་ཟེར།  དཔོན་ཚང་གི་རྟ་རྫི་རྫི་ཆུ་ལ་སོགས་ཐམས་ཅད་ཚང་ནས་དེ་རྣམས་ཀྱིས་ཀྱང་འབྲེལ་གང་ཐུབ་བྱེད་པ་ཞིག་འདུག་ནའང་སྡེ་སྲིད་ཆོས་ཀྱི་རྒྱལ་པོ་འདི་ཉིད་ཀྱིས་མཐའ་འཁོབ་ཀྱང་ཁྲིམས་ལ་བཅུག་སྟེ།  གཞུང་གི་སྒེར་རུ་དེད་པ་ལ་ཤོ་གྲྭ་གྲྭ་རོག་རོག་ཏུ་བྱས་ནས་ངོ་ཡོད་ངོ་དང༌།  ངོ་མེད་སྐྱིན་ཚབ་སྒྲིག་དགོས་པ་ལ་བཟས་བཏུང་ཕུད་པའི་ལག་ཡོད་འདི་ལས་བྱུང་རེ།  ད་ལྟ་ལས་ཐོག་ན་ངོ་མ་འདི་ལས་ཡོད་རེ།   ངོ་མེད་རྣམས་ལ་ཚབ་ལོ་ངེས་མི་སྲིད་རེ།  སྟག་ལུང་མཆོད་སྒོ་དམར་པོའི་ཤར་སྒོ་ཇག་པས་བཀྲོགས།  དེའི་སྤྲོད་འཇལལ་དཔོན་ཚང་དམག་དཔོན་གྱི་གནང་ཕུད་ཀྱང་རྫོགས་དགོས།  བར་པ་དཔོན་ཚང་རང་གི་མི་བཟང་བསམ་པ་ཆེ་བ་གཉིས་སམ་གསུམ་ཤོར་ལྟོས་ཆེ་ཆུང་གི་ཐོག་མ་ནས་རྒྱས་ཆོད་དུ་མི་བར་པ་བཅུག་པ་དེ་ལ་བར་ཟན་འབྲི་གཡག་གྲུས།  ལུག་གཉིས་གསུམ་སོགས་ཀྱི་མཐོ་དམའ་ཤོར་འགངས་ཆེ་ཆུང་དང༌།  བར་པ་འཁུར་ཆེ་ཆུང་གི་སྟེང་ལུགས་བྱེད།   ལས་ཚན་རྣམས་ཀྱིས་སློང་ན་ལུག་རེ་གཉིས་གསུམ་བཞི་གང་འོས་སྟེར་དགོས།  ཤོར་འདོན་པ་དཔོན་ཚང་རང་གི་སྦྲའི་མདུན་དུ་འབབ་པ་མ་གཏོགས་ལྟག་ཏུ་འབབ་ན་རྣམ་རྟོག་བྱེད།  ཆས་དཔོན་ཚང་རང་གིས་ཀྱང་སྟེར།  ཤོར་པས་ཀྱང་འདེགས་དགོས།   ཤོར་འདོན་གྱི་མི་སྣ་ལ་བཅུ་ཁ།  དཔོན་ཆུང་གི་སྟོན་མོ་ལ་ཤ་མཚང་ར་བྱུང་ཡང་ཁྱེར་ཆོགམི་བཟང་སྒེར་མགྲོན་གྱི་སྟོན་མོ་ལ་ཤ་མཚང་ར་བྱུང་ན་ཟོས།  ལྷག་ཡོན་བདག་ལ་ཕན་སྟེར།   རུ་པ་འདེགས་འགྲིམས་ལ་མཚེར་དུ་བསྡད་ན་རྣམ་རྟོག་བྱེད་པས་མཉམ་པོས་འགྲིམས།   གཞུང་དུ་ཉེས་ཆད་སྟོད་པས་གཡག་གྲུས་པོའི་ཁ་གྲངས་དང༌།  སྨད་པས་ཇག་པའི་རྟ་འབུལ་བ་འདི།  ཕྱིས་དཔོན་པོའི་མཚན་དོན་གྱི་ཧོར་ཁྲིམས་ལ་ཆུག་སྟེ་སྲོལ་དོད་པ་ཡིན་ཞིང༌།  གཞུང་ནས་དོ་དམ་གནང་བའི་ཤོར་ལ་གཞན་མ་གོང་དང་འདྲ་བ།  གཞུང་དུ་ཆད་པ་མི་ཡོང༌།  གནང་ཕུད་ཆ་ཕྱེད་དུ་སློག་པ་དང་གསུམ་སྤྲོད་དུ་སློག་པ་གཞུང་གི་དགོངས་པ་དང་བསྟུན།  མནའ་མདའ་གྲི་མདུང་ཚོམས་ལྷ་རྟེན་གྱི་འོག་ཏུ་འཛུལ་བས་འཐུས་པ་སོགས་ཀྱི་སྲོལ་ཡོད་དོ།  །  དེས་རིགས་མཚོན་པའི་བྱ་བ་ཆེ་ཆུང་གང་ཡང་ཟློས་པ་རྣམས་ལ་ཁྲིམས་པ་བར་མི་སུས་ཀྱང་ཕྱོགས་ལྷུང་མེད་པའི་མི་ཤེས་གོང་ཕུད་དཀོན་མཆོག་དཔང་དུ་བཙུགས་ནས་དྲང་པོའི་རྒྱབ་སྐྱོར།  གཡོ་ཅན་རྣམས་ལ་ཟོན་སྒྲིམས།   སྤྲ་འཆལ་གྱི་ཚོད་ཟིན།   ཉེས་པའི་མཚང་འབྲུ།  མ་ཉེས་པ་ཟོལ་གྱིས་བསྐྱངས་ནས་བདེན་ཐོག་ཏུ་འཁྱོལ་བ་ཞིག་བྱས་ནས་མི་སྣ་མོར་སླེབས་པ་རྣམས་ཀྱི་ཞབས་ཏོག་ཏུ་འགྱུར་ཞིང༌།  རང་གི་དགེ་བ་ཅི་བྱས་པ་ལས་ཚོགས་ཆེ་བར་མི་རྣམས་ཀྱི་འདི་བཞིན་སྤང་བླང་བྱས་ན་རང་མི་གྲལ་དུ་ཆུག་ཅིང༌།   སྤྱི་ཁ་བྱམས་པ།   མི་ཐལ་མ་ཞིག་ཡིན་ཀྱང་སྤྱི་དཔོན་དུ་དེ་ཁའི་དགེ་བ་དང༌།  བསོད་ནམས་ཀྱི་རང་བཞིན་ལྷུན་གྲུབ་ཏུ་འགྱུར་བ་སོགས་དཔེར་ན་མང་བཀུར་རྒྱལ་པོའི་རྣམ་ཐར་གྱིས་ཤེས་པར་བྱའོ།  ། 
ཞེས་པ་གཙང་པ་རྒྱལ་པོས་སྲིད་སྐྱོང་བའི་སྐབས་སུ་གཏན་འབེབས་བྱས་པའི་ཁྲིམས་ཡིག་ནང་དུ་གཏན་འབེབས་མ་བྱས་པ་དང༌།  གསལ་བཤད་མ་བྱས་པའི་རིགས་ལ་གསར་དུ་གཏན་འབེབས་དང་རྒྱས་བཤད་བྱས་པའི་སྐོར་རྣམས་ཡིན།   ཁོང་གིས་གཏན་འབེབས་བྱས་པའི་ཁྲིམས་ཡིག་གི་ནང་དོན་འདི་དག་ལ་བརྟགས་ན་སྐབས་དེར་ཁོང་ལ་སྲིད་དོན་སྐྱོང་བའི་ཐུགས་རིག་དང༌།  ཉམས་མྱོང་ཕུན་སུམ་ཚོགས་པོ་ཞིག་ཡོད་པར་མ་ཟད།  ཁྲིམས་ཡིག་ཞལ་ལྕེ་དང་པོ་དཔའ་བོ་སྟག་གི་ཞལ་ལྕེ་གཏན་འབེབས་བྱས་ཚུལ་ལ་བརྟགས་ན་དམག་དོན་ལ་ཧ་ཅང་དང་དོད་གནང་ཡོད་དེ་ཆོས་རྒྱལ་སྲོང་བཙན་སྒམ་པོའི་སྐབས་ཀྱི་དམག་གི་སྒྲིག་འཛུགས་ལྟ་བུ་ཞིག་མཛད་རྒྱུའི་ཐུགས་བཞེད་གནང་ཡོད་ཀྱང༌།  ཕྱི་ནང་གི་རྐྱེན་སྣ་ཚོགས་པའི་དབང་གིས་ཐུགས་བཞེད་ཇི་བཞིན་མ་འགྲུབ་པར་མངོན།  དེང་དུས་ལོ་རྒྱུས་སྨྲ་བ་ཁ་ཅིག་གིས་གཙང་པ་རྒྱལ་པོ་ནི་ཕྱི་ནང་གི་རིག་པའི་གནས་ལ་སྦྱངས་པ་དམན་པ་དང༌།  ཆབ་སྲིད་ཀྱི་མྱོང་བ་ཤིན་ཏུ་ཞན་པ།  དྲག་རྩུབ་ཆེན་པོས་འཐབ་རྩོད་ཀྱི་མདུང་རྩེ་དགེ་ལུགས་པ་ལ་གཏད་པ།  དགེ་ལུགས་པའི་ཆོས་ལུགས་རྩ་མེད་གཏོང་བའི་ཆེད་དུ་དགེ་ལུགས་པའི་གྲྭ་པ་དམར་གསོད་བཏང་བ།  བཙན་ཤེད་ཀྱིས་གྲུབ་མཐའ་བསྒྱུར་བཅུག་པ།