དྲུག་པ་ནག་ཆེན་ཁྲག་སྦྱོར་གྱི་ཞལ་ལྕེ་ནི།   མཚམས་མེད་ལྔའི་ལས་བྱས་པ་དང༌།    བླ་མ་དགེ་འདུན།    རྒྱལ་པོའི་ཕྱག་རྫས་ལ་འབགས་པ།   དཔོན་ཁུངས་སུ་ཞབས་འདྲེན་ཚབས་ཆེན་ཞུས་པ།    དུག་སྦྱོར་གཏོང་བྱས་པ།   འཕུང་གཡོ་འཕྲུལ།   སྦྱོར་དངོས་རྗེས་གསུམ་གྱི་སྒོ་ནས་མི་བསད་རྟ་ཁྱེར་བྱས་པ།    དུས་བདེ་ས་འཇམ་གྱི་ཁྲིམས་ཞོད་འཇགས་སྐབས་ཨར་ཇག་བརྡུང་འཇོམས་གོ་གྱོན་མཚོན་ཐོགས་གྲ་སྒྲིགའབངས་ཀྱི་གྱེན་ལོགམདོར་ན་མིག་ལྟོས་ལ་གནོད་པའི་ཁྲིམས་འགལ་གྱི་བྱ་བ་བྱས་པར་ལུས་སྟེང་མིག་འདོན།    སྒྱིད་འབྲེགལྕེ་གཅོད།   ལག་འབྲེགགཡང་བསྐྱུར།    དམར་གསོད་སོགས་བྱེད་པར་དཔགས་པའི་ལུས་སྟེང་འགེལ་ལུགས་ཕྱིས་འདོམས་ཆེ་བ་ཞིག་དགོས་པ་ཡིན།    མི་མཉམ་པས་ལས་སློག་པ་ལ་གཏེ་པོ་ཆུ་ལ་བསྐྱུར་པའོ། 
         བདུན་པ་དྲན་འཛིན་ཆད་ལས་ཀྱི་ཞལ་ལྕེ་ནི།   ལུས་སྟེང་དུ་རྩད་གཅོད་མིན་པའི་ཁྲིམས་དང་འགལ་བ་རྣམས་ལ་ཕྱིས་འདོམས་སེམས་ཀྱི་དྲན་འཛིན་གཏོང་དགོས་ཏེ།  ཉེས་ཆད་ཅེས་ཆད་པ་མིང་དུ་བཏགས་པའི་ཁྲིམས་སར་བསྒྲུབ་དགོས་པ་འདི་ལ།  སྤྱིར་གྱི་ནི་དེ་ལ་དཔགས་པའི་ཉེས་བྱས་ཆེ་ཆུང་གི་གསེར་སིལ་མ་སྲང་གྲངས་སུ་བྱེད་པ་དང༌།  སྨར་གསེར་ཕྱེད་མའི་སྲང་གྲངས་སུ་བྱེད་པ་དང༌།   སྨར་ཞོའི་གྲངས་སུ་བྱེད་པ་སོགས་འདུག་པར།  ཉེས་བྱས་ཆེ་བའི་མི་དཔུང་གྲགས་སྡེབས་ཀྱིས་མི་བསད་པ་དང༌།  འཁོན་འཛིན་གཏེས་ལེན་གྱིས་ཇག་རྒྱབ་པ།    ངན་པ་གྲ་སྒྲིག་སོགས་ཁྲིམས་སར་དགོངས་འཕོག་ཆེ་བ་རྣམས་ལ་གསེར་སིལ་མ་སྲང་བརྒྱད་ཅུ་ནས་བཅོ་ལྔའི་བར་ཉེས་པ་ཆེ་ཆུང་དང་བསྟུན་ནས་གཏོང་བ་དང༌།  དེ་བས་ཅུང་ཉེས་པ་ཆུང་བ་བྱུར་ཆགས་ཐུག་པའི་མི་བསད།    ལྟོགས་ཧྲལ་གྱིས་རྐུན་ཇག་སོགས་རིགས་དེས་མཚུངས་པ་རྣམས་ལ།    སྨར་གསེར་ཕྱེད་མའི་སྲང་གསུམ་ཇི་ལྟར་སྐབས་དང་མཚུངས་པ་བྱེད།    ཡང་ཕྲན་བུའི་སྤང་བླང་འཛོལ་བའི་དྲན་འཛིན་མར་ཞོ་དོ་གསུམ་རྣམས་ཇི་ལྟར་འོས་པ་གཏོང་དགོས་ཤིང༌།    དེ་ལ་གསེར་སིལ་མའི་ལྕི་བ་རྣམས་ལ་གསེར་རྐྱང་དུ་མ་གཏོགས་སྤུས་ཆ་མི་འབུལ།    གསེར་རྐྱང་སྲང་གང་ལ་མགོར་ཞོ་སེ་བ་ཉི་ཤུ་རྩ་བཞི་མའི་ཞོ་བརྒྱད་ལ་སྲང་གང༌།    མཛོ་གཡག་སོགས་སྤུས་གང་གཙང་ལ་རིན་གྱིས་ཁུངས་གཅོད་པ་གནང་ཞིང༌།   དེ་ལ་སྨར་གྱི་རིན་རྒྱབ་ཀྱི་ཟི་ཁུངས་ནས་སུ་འབེབས་པ་དང༌།   མགུར་ཞོ་རེ་ལ་སེ་བ་ཉི་ཤུ་རྩ་བཞི་མའི་དབང་དུ་བྱས་ནས་སེ་བ་རེར་གཙང་བྲེ་ཚད་ཀྱི་ནས་ཁལ་རེ་རྩིས་པའི་ཞོ་གང་ལ་ནས་ཁལ་ཉི་ཤུ་རྩ་བཞི་ཐོབ་པ་རིན་རྒྱབ་ཏུ་འབེབས་པ་དང༌།  མཁར་རུའི་སེ་ཁལ་མཛད་པ་དང༌།   ཚོང་འདུས་ཀྱི་གསེར་རིན་ལག་ཡོད་གང་འདུག་ལ་ཆ་འཇོག་པ་སོགས་གནང་སྲོལ་འདུག་ཅིང་སྨར་གསེར་ཕྱེད་མ་སྤུས་གཙང་བ་ཞེས་པ་དང༌།  སྲེལ་ཉན་བཀོལ་ཉན་གྱི་དངོས་པོ་ལ་རིན་རྒྱག་གསུམ་ཚད་འབྲིང་དུ་ཞབས་པ་མཛད་སྲོལ་ཡོད་ཅིང༌།  སྨར་གསེར་ཕྱེད་མའི་སྲང་གང་ལ་གསེར་ཞོ་བཞི།    སྨར་ཞོ་བཞི།    སྨར་ཞོ་ལ་གཙང་བྲེ་ཚད་ཀྱི་ཁལ་བརྒྱད།   གསེར་ཞོ་དེ་ལྡབ་འཕར་པའི་ཁལ་བཅུ་དྲུག  རྩེ་བྲེ་ཚད་ཀྱིས་བྱེད་པའི་སྲོལ་དང༌།   ཡང་མཁར་རུའི་ཁལ་དྲུག་ལ་སྨར་ཞོ།   བཅུ་གཉིས་ལ་གསེར་ཞུ།  དབུས་ལ་གསེར་བྲེའི་བཞི་ཞོ་དང་གསུམ་ཞོ་སོགས་རྣམ་གྲངས་ཤིན་ཏུ་མང་བ་འདུག་པ་ཞོའི་ཚད་ནི།  ཚལ་པའི་ཁྲིམས་ཡིག་རྣམས་སུ་ཞོ་བཟང་ངན་འབྲིང་གསུམ་དུ་བྱས་པའི་མཛོ་རྟ་དྲེལ་རྒྱབ་ལོངས་པ་བཟང་ཞོ་དང༌།    བོང་བུའི་ཕོ་རྒྱགས་ཚད་ཀྱི་རྒྱབ་ལོངས་པ་འབྲིང་ཞོ།  བོང་མོ་གླང་ཆུང་གི་རྒྱབ་ལ་ངན་ཞོ་བྱེད་པ་སོགས་འདུག་པ་ཐམས་ཅད་དུ་མཁར་རུའི་དྲུག་ཞོ་ནི་ཚད་པ་ཤེས་བཞིན།    ནས་སུ་ཕབ་ན་བརྒྱད་ཞོའི་སྨར་གསེར་གྱི་སྲང་གང་ལ་ནས་ཁལ་དགུ་བཅུ་གོ་དྲུགམཁར་རུའི་དྲུག་ཞོ་ལ་བདུན་ཅུ་དོན་གཉིས་ཐོབ་པར་སྤོས་ཆའི་ཐོག་ཏུ་འཆར་ཆེན་ཕབ་ན།  སྔོན་གྱི་ཆོས་རྒྱལ་རྣམས་དང༌།   ཚལ་པའི་དུས་ཀྱི་སྐབས་སྨར་གསེར་ཕྱེད་མའི་སྲང་གང་གི་ཆད་འགྲོས་ལབརྒྱད་སྟོང་སྐྱ་པོད་དམ།   གསེར་ཆོས་རྡོར་གཅོད་བཞེང་དུ་འཇུག་པ་སོགས་ཀྱི་རྒྱུན་བཟང་པོ་ཡོད་འདུག་ཅིང༌།  ཕྱིས་ཇ་རྔ་ཧང་སྦབ་རྩེ་རེ་ལ་སྨར་གསེར་གྱི་སྲང་གང་རྩི་བ་དང༌།    གཡག་གྲུས་ཕོ་རེར་གསེར་ཞོ་རེ།     སྨན་རྩེ་ཁ་དོ་ལ་སྨར་ཞོ་རེ།   མདོ་དར་ཁ་བཞི་ལ་སྨར་ཞོ་རེ་དང༌།    ཡུལ་གྱི་ཆུ་བགོ་འགྲེམས་སོགས་འགལ་ཆ་ལ།   གཉེར་ཚང་གི་ཆད་འགྲོས་ཐང་ཐུང་རྣམས་ལ།    མར་ཆད་ཀྱི་མར་ཞོ་རེ་ལ་དོ་སྐོར་གྱི་དབང་དུ་བྱས་པའི་སྨར་དུ་ལེན་ན་ཁལ་དྲུག མར་རྐྱང་དུ་ལེན་ན་མར་ཁལ་གསུམ་རྣམས་ཡིན་ཅིང༌།