ནང་ཚང་འབྲལ་བསྡུམས་ཟོག་ཐུལ་མ་འཆམས་པའི་བགོ་བཤའ་སོགས་ཕན་ཚུན་བདེན་པ་མེད་པའི་རང་ཤེད་ཅན་ལ་དབུས་ལུགས་ཀྱི་བགོས་ཕུད་ཀྱི་སུམ་ཟུར།  དཀྱུས་མ་འདྲ་བབ་ལ་ཕན་ཚུན་སྤྱི་ཐོག་ནས་བཅུ་ཁ་ལེན་པ་ཇི་ལྟར་འོས་པ་རང་ཤེད་ཆེ་ཆུང་གི་བབས་འབྲེལ་དང་མཚུངས་པ་བྱེད།   ནག་ཅན་བཟུང་བཀྱིགས་བྱས་པ་ལ་ཁོ་རའི་ལུས་འབྱར་གང་ཡོད་མི་སྣས་ལེན།   དགེ་སྟོང་གི་སྤྲོད་འཇལ་ལ་ཚོགས་ཆས་སོགས་ཐོབ་ཐང་འཆར་ཅན་ཕྲ་མ་ལྟར་ལེན་ཅིང་གཞན་མ་དབུས་ལུགས་ལ་བཅུ་ཁ་ལེན་པ་ལྟར་འདུག་ཀྱང༌།  འདི་འགབ་ཡུལ་ཆགས་པ་མི་འདུག་པས།    གཙང་ལུགས་ལ་ཕན་ཚུན་ནས་ཟོང་ཕུད་ཟོང་སྟན་ཟེར་བ་ཟོང་ཁྲ་གཉིས་ནས་སྤྲོད་མཁན་གྱི་ས་ནས་ཕུད།   ལེན་མཁན་གྱི་ས་ནས་གདན་ཕན་ཚུན་སྙོམས་པའི་བློ་ཚད་རེ་ལེན།    སྨར་སྤྲོད་དགོས་པ་རྣམས་ལ་སྤྲོད་མཁན་གྱི་ས་ནས་དྲས་ཤིང་བཅད་པ་རྣམས་དང༌།  ལེན་མཁན་གྱི་ས་ནས་ཁལ་ཤུལ་བྲེ་འབྲངས།    སྤྲོད་མཁན་གྱི་བྲེ་གདན་ཕྱར་བ་རྣམ་བཞི་མ་རེ།  པང་ཁེབས་གདན་འོས་རིགས།   དང་པོའི་ཁྲིམས་ཡིག་རྙིང་པ་རྣམས་ལ་འདུག་པས་མི་ཤ་གྲི་སྲི་མི་ལྡང་བའི་རྟེན་འབྲེལ་དུ་ལག་དམར་གྱིས་བསད་པའི་གྲི་ངོ་མ་དྲས་ཤིང་གི་ཚབ་ཏུ་སྤྲོད་པ་སོགས་སྲོལ་འཁྱུད་དུ་འདུག་པ་ལྟར་བྱེད།  ཁྲ་མ་དཀྱུས་མའི་ཞབས་འཇུག་ལ་སྦོམ་ཆེ་ཆུང་གི་ཚོགས་ཆས་ཁྲ་བཀོད་ལྟར་དང་རྐང་གླའི་དོད་དུ་སྤྲོད་འཇལ་ཡོད་ན་དེ་ཁའི་ཁལ་ཤུལ་བྲེ་འབྲེང་སྤྲོད་མཁན་ནས་ལེན་ཅིང༌།   འདི་ལ་སྤྱི་ས་ནས་ལེན་པ་དང་སོ་སོ་ནས་ལེན་པ་བབ་འབྲེལ་མཚུངས་པར་བྱེད།  དངོས་པོའི་སྤྲོད་ལེན་མེད་པའི་ས་ཆའི་རྩིས་སྤྲོད་དམ་ཁྲ་མ་ཞབས་སུ་འཇུག་པ་རྣམས་ལ་དཀར་ཡོལ་གྱིས་གཙོས་པའི་ལྔ་ཚན་ནམ་སུམ་ཚན།   ཇ་མགོ་བསྡུམས་ཀྱིས་གཙོས་པའི་བདུན་ཚན་དགུ་ཚན།  གོས་ཡུག་དར་ཡུག་རྟ་ཁྲབ་མཛོ་སོགས་རྣམ་གྲངས་དོན་རྩ་འགངས་ཆེ་ཆུང་ཇི་ལྟར་འོས་པ་བྱེད་ཅིང༌།   བཀའ་ཁྲའི་བབ་སྨྱུག་བཞི་ཟུར་གཅིག་གི་བབ་མགྲོན་གཉེར་རམ་ཡར་ཞུས་ཕྱི་ནང་གི་མི་སྣ་ལ་ཐོབ།  དེའི་བཞི་ཟུར་སྨྱུ་གུ་ཆུ་རིན་དྲུང་ཡིག་གིས་ཐོབ་པ་ཡིན་ནོ།  ། 
དགུ་པ་བསད་པ་སྟོང་གི་ཞལ་ལྕེ་དང༌།     བཅུ་པ་རྨས་པ་ཁྲག་གི་ཞལ་ལྕེ།   བཅུ་གཅིག་པ་བསྙོན་ཧམ་མནའ་དག་གི་ཞལ་ལྕེ།      བཅུ་གཉིས་པ་བརྐུས་པ་འཇལ་གྱི་ཞལ་ལྕེ།   བཅུ་གསུམ་པ་ཉེ་འབྲེལ་འབྲལ་སྡུམ་གྱི་ཞལ་ལྕེ།     བཅུ་བཞི་པ་བྱི་བྱས་བྱི་རིན་གྱི་ཞལ་ལྕེ།     བཅོ་ལྔ་པ་ནམ་ཕར་ཚུར་གྱི་ཞལ་ལྕེ་བཅས་ནི་《གཡུ་འབྲུག་སྒྲོག་པའི་ཞལ་ལྕེ་བཅོ་ལྔ་》དང་ནང་དོན་ཕལ་ཆེར་གཅིག་མཐུན་དུ་འདུག་པས་འདིར་ཡིག་ཚོགས་ལ་འཇིགས་ནས་མ་བཀོད།  འོན་ཀྱང་ཁྲིམས་ཡིག་འདིར་བཀོད་པ་ནི།   སྔ་མ་ལས་རྒྱས་བཤད་ཆེ་བར་འདུག་པས་ཞིབ་པར་འདོད་ན་འདིའི་མ་དཔེ་རང་ལ་བལྟ་བར་འཚལ། 
བཅུ་དྲུག་པ་ཀླ་ཀློ་མཐའ་འཁོབ་ཀྱི་ཞལ་ལྕེ་ནི།   ལྷོ་མོན་ཧོར་སོག་རྣམས་ལ་དར་ཞིང༌།   དེ་ཡང་ལྷོ་མོན་ཀླ་ཀློ་ཁོ་ནར་སོང་བས་གླེན་ཞིང་ལྐུགས་པས་ཁྲིམས་ཆེར་མི་དར་ཞིང༌།  བོད་དུ་མཁོ་ཡང་ཆུང་བ་འདུག་པས་སྟོང་གི་རྣམ་དབྱེ་ཙམ་ལས་གཞན་པ་འདིར་མ་བྲིས་ཤིང༌།  ཧོར་སོག་ནི་གེ་སར་དམག་གི་ཁྲིམས་དང༌།  རྒྱ་ནག་ཁྲིམས་ཀྱི་ལུགས་སོགས་ཤིན་ཏུ་དམ་ཞིང༌།  ཁྲིམས་ཀྱི་རྣམ་གྲངས་ཤིན་ཏུ་མང་བར་འདུག་ནའང་མཁོ་ཆེ་བ་རྣམས་འདིར་བྲིས་པ་ལ།   ཧོར་སོག་གི་ཁྲིམས་དམ་པ་གཅིག་ལ་ཨལ་ཕྱི་ཞེས་གཞུང་ཆེན་མོའི་མི་སྣ་གསེར་ཡིག་ལས།   སྣེ་ལ་ཤུ་སུ་སྤྲོད་ཅེས་རང་གཞན་གྱི་སྡེ་གང་དུ་སླེབས་ཀྱང་རྟ་འུལ་གང་དགོས་རྟ་ཁྱུ་ནས་འཛིན་ཆོག་པ་དང༌།  ཞག་ཕོབ་གྲུ་ཚུགས་གང་དུ་བབས་ཀྱང་བཞོན་མ་དང་འགེལ་པ་ཕུད་པའི་ནོར་དང༌།  ལུག་ཁྱུ་ནས་མི་ཉུང་གི་ཟ་ཚོད་བཟུང་ཆོག་ཅིང༌།   ནང་ཁྲོལ་མགོ་ལྤགས་མི་ཁྱེར།  ནང་འཐབ་བྱུང་ན་འཇོག་ཐབས་དང་གར་བ་ལ་ལྕག་སྐོར་འཐེན་འགེང༌།  རྟའི་ཁ་སྐོར་ཕར་ཤུར་ཚུར་ཤུར་བྱེད་པ་ཙམ་མ་གཏོགས་གྲི་མི་འདོན་མདའ་མི་རྒྱགགྲི་བཏོན་ན་ཡ་ལ་རྟ་འཕྲོགམདའ་བཏོན་ན་གཞུ་འཕྲོགབརྒྱབ་པ་སོང་ན་རྟ་ལེན།   རྨས་ན་རྟ་ཁྲབ་བླངས་ཏེ་ཁྲབ་དཔོན་གྱིས་ལོན།   རྟ་རྨས་མ་ལ་སྤྲོད།  བསད་པ་རྣམས་ལ་མོན་དུ་མི་འབྲིང་ལ་གཡུ་མིག་བརྒྱད་ཅུ་མ་ཟེར།  གཡུ་མིག་རེ་ལ་བ་གླང་རེ་ཐག་བྱས་ནས་བ་གླང་བརྒྱད་ཅུ་རེ་སྤྲོད་པ་སོགས་འདུག་ཅིང༌།  ཧོར་ལ་མཛོ་ཁལ་དྲུག་ཅུ་རེ་མི་འབྲིང་གི་སྟོང་བྱས་ནས།  མཛོ་ཁལ་རེ་ལ་འབྲིང་འབྲི་ཁལ་ཞེས་འབྲི་བཞོན་མ་རེ།  གཡག་འགེལ་པ་རེ་བྱེད་ཅིང་འདུགབོད་ཀྱི་སྨར་ཞོ་འབེབས་ཀྱི་ཚབ་ལ་གསུམ་སྤྲོད་དུ་བྱེད།  སྙིང་ནོན་གྱི་ཚབ་ལ་ལག་དམར་གྱི་བུ་མོ་གཉེན་བསྡེབས་ནས་ཆོད་ཡིག་ཀྱང་འདིས་གོ་ཆོད།  བརྐུས་པ་ལ་དཔོན་གྱི་རྟ་ཁེབས་བརྐུས་ན་རྟ་ལེན།   འདྲ་མཉམ་ལ་ནོར་ལུག་གང་འོས།  དེ་ལས་ཆེ་བའི་རྐུན་མ་ལ་ཁོལ་མ་ཁ་བཏགས་ཟེར།  ནོར་གང་ཡོད་ཀྱི་ཕྱེད་བླངས་ནས་དེའི་ཕྱེད་མ་དཔོན་གྱིས་ལེན།  ཕྱེད་ནོར་བདག་ལ་སྤྲོད།   ལོང་ཅན་རྭ་ཅན་གྱིས་བསད་པ་ལ་རུ་དམར་དགྲ་ལ་རྒྱུགས་པའི་སྐབས་སུ་རྒྱུགས་རྟ་ཞེས་རྟ་བཟང་བ་རྣམས་སྔོན་ལ་རྒྱུགས་ཏེ།  རང་རང་རྟའི་བཟང་ཁྱད་ཀྱི་གང་ལེན་པ་རང་རང་གིས་བདག  རྟ་མཉམ་མགྱོགས་བྱུང་ན་ལྕག་གང་སྔ་ཕྱིའི་རྟ་ལྕག་གང་སླེབས་ཀྱི་ལྷོགས་ན་བགོ་བཤའ།  དམག་ཐོག་ཏུ་རྒྱུགས་པའི་མི་ཟིན་ནས་བསད་པའི་དོན་ལ་དགྲ་དེ་རང་གི་རྟ་གོ་ཁྲབ་ལེན།  རི་དྭགས་པ་རྣམས་ཀྱིས་དོན་ལེན་ལུགས།   རྔ་མ་རྟ་ཕོའི་མགྱོགས་དར་ཡིན།   གཞུང་ཀོ་མི་ཕོའི་ཐོབ་དར་ཡིན།  ལྕེ་དྲན་དཔའ་བོའི་དཔའ་རྩལ་ཡིན།   འབྲོང་ལ་མདའ་སྔོན་ལ་དམར་ཙམ་སུས་ཐེབས་པ་དེས་དོན་དེ་རྣམས་ལེན་ནོ།   །  ཡང་དོན་ལྕི་བ་ལ་གཟུགས་བཞི་ལེན་པ།  རྐང་ཡ་ལག་ཡ་ལེན་པ་ཡང་འདུག་གོ།  རི་དྭགས་གཅིག་གིས་དེད་པའི་ཁ་རྩར་གཅིག་གིས་རྒྱུགས་ཏེ་བསད་ན་དེ་ལ་ཡ་ལ་ཆེན་པོ་བྱེད་དོ།  །  ཇག་གི་རིགས་ལ་དེ་སྔ་ཤོར་གྲྭ་གྲྭ་རོག་རོག་ཟེར་གཙང་བ་གཅིག་དང་གསུམ་སྤྲོད་ཟེར་འབྲིང་བ་གཅིག་དང༌།  ཕྱེད་ཤོར་ཟེར་ལོད་པ་སྤྲོད་ལུགས་གསུམ་འདུག་པས།   གཞུང་གི་སྒེར་རུ་དང་བྱང་རིགས་སྦྲ་ནག་འཛིན་མི་ལ་གསུམ་སྤྲོད་དང༌།  མོན་རོང་ཀླ་ཀློ་རྣམས་ལ་ཕྱེད་ཤོར་སྤྲོད་པའི་སྲོལ་བྱས་ཏེ།  དེ་ཡང་ཇག་པ་མནའ་སྐྱེལ་ཟེར།   ཇག་པ་རང་གི་འབྲོང་དཔོན་གྱིས་སྐལ་ཡིག་བརྒྱབ།   བཟས་པ་བཏུང་བ་དང་ལས་ལུས་ཕུད།  བགོ་ཁོངས་སུ་སེམས་ཅན་ཁ་གྲངས་འདི་བྱུང་ཞེས་གསུང་རབ་མགོ་ཐོག་ཏུ་བཞག་ནས་མནའ་སྐྱེལ།  དཔོན་གྱི་གནང་ཕུད་དང་ཇག་དཔོན་གྱི་གནང་ཕུད།