དེང་སང་ཁ་གཏམ་ལ་མར་གསེར་གྱི་སྲང་ཟེར་བ་འདུག་ཀྱང་ཚལ་པའི་ཁྲིམས་ཡིག་ཏུ་སྨར་གསེར་གྱི་སྲང་ཞེས་སྣང་བས་གསེར་ཤིན་ཏུ་སྨར་བ་ལ་ཆ་བཞགདེའི་འོག་སྨར་ཞོ་ཟོང་ཞོ་ཟེར་བའི་སྨར་ཞོ་དེ་ལ་ཆ་བཞག་པ་ཡིན་འདུག་པས་དག་ཁུངས་སུ་ངེས་སོ། 
   བརྒྱད་པ་ཧོར་འདྲ་ཟ་རྐང་གི་ཞལ་ལྕེ་ནི།   ཧོར་འདྲ་ཞེས་པ་རྒྱ་ནག་ཧོར་དུས་སུ་བོད་ལ་ལུང་རྒྱུགས་པའི་དུས་རྒྱ་ནག་གི་མི་ལ་བརྩི་འཇོག་ཤིན་ཏུ་ཆེ་བ་བྱེད་དགོས་ཀྱིན་འདུག་པ་དེ་དང་འདྲ་བའི་ཐ་སྙད་དུ་བྱས།  དཔོན་ཁུངས་ཀྱི་མི་སྣ་ལ་བརྩི་འཇོག་ཆེ་བ་དགོས་པ་དང༌།    མི་སྣས་ཀྱང་བབ་འབྲེལ་དང་མཐུན་པ་ཞིག་དགོས་ཤིང༌།   ལྷག་པར་སྐྱིད་ཤོད་འདིར་ཕྱིས་ཁྲིམས་འཆོལ་བའི་འདེད་ཀྱང་སྒེར་གཞུང་གི་དོན་ལ་དབྱེ་བ་མེད་པར་ཁས་སུ་བཙན་གྱིས་རྩེ་ནས་ཐེལ་ཙེ་བླངས་པའི་ཞོལ་སོགས་ནས་འཁྱམ་པོ་གང་རིགས་རེ་འཁྲིད་ནས་ཟ་འདེད་གཏོང་ཞིང༌།    ཟ་འདེད་ལའང་འདི་ཕན་འདི་ཚུན་གྱི་མཚམས་ཚིགས་མེད་པ་ཟ་མ་འཕྲལ་ཆས་ལ།  ཆས་ཁའི་ཁོངས་རྩིས་ལ་བྲེ་དོ།    ཆང་རིན་ལ་བྲེ་རེ་བྱས་པའི་བྲེ་གསུམ་མ།   ཉི་མ་རེ་ལ་མི་སྣའི་རྐང་པས་གང་འཁོར་ཕྱིན་པའི་ལོན་རྩི་བ་ཞིག་འདུག་ཅིང༌།    གཙང་ལུགས་རང་གི་ཁ་གཙང་བ་ཞིག་བྱས་ཀྱང་སྔ་སོར་ཟ་འདེད་མང་བའི་ཁྲལ་ཆེས་དོན་ནས་འབྲས་ཆེ་ཆུང་གང་ལ་ཡང་འཁུལ་བ་ཞིག་ཡོང་གི་མི་འདུགད་ལྟའི་འདི་ཁ་བྱས་ན་ཆ་ཞབས་ལ་ཡང་བརྡབ་གསིག་ཆེ་བ་འདུག་པས།  འོས་བབ་ཀྱི་བཅད་མཚམས་བསྒྲིགས་པར་སྒེར་གྱི་དོན་ལ་བབ་འབྲེལ་མེད་པར་ཟ་འདེད་གཏོང་ལ་མེད་ཅིང་མི་སྣ་ཡང་རྩེ་ནས་དམིགས་བསལ་བྱུང་ན་མ་གཏོགས་སུས་ཁྲིད་ལ་མི་འགྲོ།    གཞུང་གི་འདེད་སྦྱངས་ལ་བཏང་བ་རྣམས་ཀྱིས།    སྔོན་གྱི་ཁྲིམས་ཡིག་རྙིང་པ་རྣམས་ལ་ཆད་པ་སྲང་དུ་མ་ལོངས་ན་གདན་སྟོན་གྱི་ཐ་སྙད་མི་བྱེད།     སྲང་དུ་ལོངས་ན་གདན་སྟོན་ཆས་ཟ་རྒྱབ་རྐང་གླ་སོགས་ཆད་པའི་བཞི་ཟུར་རིམ་འགྲོས་སུ་བྱས་པ་ཞིག་འདུག་ཀྱང་ད་སྒོས་གསེར་སིལ་མའི་ཆད་པ་ཆེ་བ་རྣམས་ལ།  མི་སྣ་དཔོན་གཡོག་ཁྱི་རྟ་དྲེལ་སོགས་ལྕི་ནོན་བཏང་ནས།    ཟ་མ་གཟུག་འབྲེལ།   རྒྱབ་ཆས་སྤྲོད་གསུངས།  བཀའ་ཤོག་ཏུ་གནང་བ་ལྟ་བུ་ལ།   ཆད་པ་མ་འཕྲོད་བར་གྱི་མི་སྣའི་ཟ་མ་ལ།  མི་ངོ་མ་དུས་གཉིས་ལ་ཆུང་གཟུག་རེ་དང་ཆེ་གཟུག་རེ།     གཡོག་དུ་ཡོད་ལ་དུས་གསུམ་རེ་ལ་ཆུང་གཟུག་རེ།   ཇ་སྦྱོར་ལྔ།  ཆང༌།   རྟ་དྲེལ་རྣམས་ལ་ཆག་བྲེ་དོ་མ།   ངོ་མའི་ཟ་མའི་རྒྱབ་ཞོ་རེ་ལེན་ཅིང༌།  བུ་ཚ་ལ་རྒྱབ་མི་ཐོབ།   ཟ་རྒྱབ་ཆད་འདེད་སླེབས་པ་ནས་བཟུང་བསྡུས་ཤོག་ནམ་བྱུང་གི་བར་རྩི་བ་དང༌།   དེ་སྔའི་བསྡུས་ཤོག་གི་ཚིགས་རིགས་སུ་གདན་སྟོན་ཆས་རྐང་གླ་ཆད་ཤུལ་བཞི་ཟུར་རིམ་འགྲོས་ལོང་ལས་ཕྱིར་བསྡུས་ཕེབས་པ་འདི་ལ།    དེ་སྔ་གོ་བ་ཟུར་པ་བརྒྱབ་ནས་གདན་ཞེས་པ་མི་སྣ་རང་ལ་དཔོན་གྱི་བཞུགས་གདན་དང་མཉམ་པ་དགོས་ཟེར་བ་དང༌།    སྟོན་ཆས་ཞེས་པ་སྟོན་མོའི་རྣམ་གྲངས་དང༌།   ཞལ་འགྱེད་ལ་བརྒྱ་གླང་ཞེས་ཁལ་བརྒྱ་རེ་དང༌།   བཤས་གླང་རེ་ལེན་པ་སོགས་མཚམས་ཚིགས་མེད་པའི་འཕྲོག་གང་ཐུབ་བྱེད་པ་འདུག་ཀྱང༌།  སྡེ་སྲིད་ཀྱི་བཀའ་ཁྲིམས་ལས།    གདན་ཟེར་བ་བཀའ་ཤོག་ཐང་དུ་མ་ལྷུང་བའི་གོ་དོན་གྱིས།   བཀའ་ཤོག་གི་གདན་ལ་ཆད་པའི་བཞི་ཟུར།    སྟོན་ཆས་ཟེར་བ་བཀའ་ཤོག་ཞལ་འགྱེད་སའི་སྟོན་མོ་ལ་བཞི་ཟུར།    རྐང་གླ་ལ་བཞི་ཟུར།   ཆད་ཤུལ་ལ་བཞི་ཟུར་རེ་རྣམས་མིང་སོ་སོར་བྱེད་པའི་ཁྲིམས་པའི་ཆེ་བ་ཡིན་ཞིང༌།    ལག་ཡོད་དེ་རྣམས་དྲིལ་བས་གཞུང་དུ་ཆད་པ་གང་དུ་ཕུལ་བའི་ཤུལ་ལས་སྤྲོས་པ་མི་ལེན།   ཟ་རྒྱབ་ཆད་པའི་རྟིང་བསྐུལ་ཡིན་པས་ཞག་ཏུ་སོང་གི་རྩིས་རྒྱག  སྨར་གསེར་གྱི་སྲང་གྲངས་ལ་མི་སྣ་གཉིས་སྦྲེལ་ཙམ་ལ།   ཟ་མ་གཟུག་སྤྲོད་གསུངས་པ་ལ།    དུས་གསུམ་དུ་ཆུང་གཟུག་ཇ་ཆང༌།    རྟ་ཡོད་ན་གཟན་ཆག་འོས་འགབ་རེ་ལ་ཟ་མ་གཟུག་ཕྱེད་སྤྲོད་ཕེབས་པར་ཆུང་གཟུག་གི་ཕྱེད་དང༌།  རྐང་གླ་བྲེ་ལྔ།   སྲང་དུ་མ་ལོངས་པས་གདན་སྟོན་ཆས་སོགས་སྙད་མེད་པར་བྱེད།    བོགས་ཡོང་བཞེས་སོགས་ཁྲལ་བསྐུལ་གྱི་འདེད་ལ་མི་ཉིས་སྤྲེལ་རེ་གནང་བའི་ཟ་མ་འཕྲལ་ཆས་སྒྲུབ་ཕེབས་པ་ལ།   རྒན་པོ་རྒན་ཆགས་ཡོད་པ་རྣམས་ཀྱིས་རྒན་པོ་མང་གི་ཟ་མ་དུས་གསུམ་ལ་ཁ་ངོམ་གྲོད་འགྲང་རྒྱ་རི་གཟན་ཕོགས།   ཁྲལ་ཡོང་དུས་ཐོག་ལ་འགྲིལ་ན་རྐང་གླའི་སྙད་མི་བྱེད།    དེ་ལས་འགྱངས་ན་ཉིན་རེ་རྐང་གླ་བྲེ་ལྔ་རེ་བྱིངས་སུ་བསྡུས་ནས་ཉི་མའི་ཁ་གྲངས་སྒྲིག་དགོས་པ་མ་གཏོགས།   འདེད་ཡུལ་གྱི་ཐེམ་སུ་ཡོད་རྐང་པ་གང་འཁོར་གྱི་འདེད་པ་མི་བྱེད།  རེ་གཉིས་ངན་ཁྲེབ་ཀྱི་རྒན་པོས་མ་འཁུལ་ན་མི་སྣ་ཁ་གཏད་བྱས་པའི་ཁོ་རང་གི་ཞག་གང་ཐོགས་ཀྱི་ཟ་རྐང་ལེན་དགོས་པ་དང༌།    ཟློས་པ་ཆེ་བའི་བཤེར་འབོད་ལ་ཞོ་རེ།   སྡེ་སྲིད་གཞུང་དོན་གྱི་མནའ་ལ་མནའ་གོས་མི་ཡོང་ཞིང་རང་རང་ཟློས་པའི་མི་དྲག་པའི་མནའ་རྒྱབ་ལ་སྲང་གང་དོ་སོགས་སྐབས་དང་བསྟུན་ཞིང༌།    འབྲིང་སྨད་ཀྱི་ལག་འཇུ་ཅན་ལ་གསེར་ཞོ་དོ་རེ།   རང་མནའ་ལ་གསེར་ཞོ་རེ།   རྡོ་ལ་ལྷ་ཡོལ་ལྷ་སྟེན་བཀྲབ་སླང་བཀྲབ་སྡེར།   མེ་ཁྱེམ་ལྕགས་སྐམ་ཟེར་བ་མི་སྣའི་ཟ་སྒོ་དང་རྡོ་ཁུངས་སྒེར་གཞུང་གང་གི་ཁོངས་ལ་ཡོད་ཀྱང་དཔོན་ཁུངས་དེ་ལ་དགུ་ཚན་བདུན་ཚན་གང་འོས།  མི་སྣ་ལ་རྡོ་རྒྱབ་གོམ་པ་རེའི་སར་ཐུན་གསུམ་གྱི་སྲང་རེ།  སྣུམ་ལ་ཡང་ལྷ་ཡོལ་ལྷ་གདན་སྣུམ་སྣོད་ཀྱི་སླང་ང་ཟངས་གང་རུང་སྣུམ་རྒྱབ་སྲང་རེ་རྣམས་འོས་བབ་སྐབས་དང་བསྟུན་པའི་ལེན་ལུགས།    དཀྱུས་མའི་འཇུ་ཅན་གྱི་མནའ་ལ་སྨར་ཞོ་དོ།    རང་མནའ་ལ་སྨར་ཞོ་གང༌།