ཞེས་པ་ལ་སོགས་གཙང་པ་རྒྱལ་པོ་ལ་དམའ་འབེབས་པའི་འཆལ་གཏམ་མང་པོ་ཞིག་བཤད་འདུག་པ་འདི་ནི་ལོ་ངོ་བརྒྱ་ཕྲག་མང་པོའི་གོང་དུ་བྱུང་བའི་ས་ཕྱོགས་དང་གྲུབ་མཐའི་ཕྱོགས་རིས་ཀྱི་འཐབ་རྩོད་བྱུང་བའི་རྔ་མ་ལ་འཆང་ཞིང༌།  དགའ་ལྡན་ཕོ་བྲང་གི་ཕྱོགས་སུ་ལངས་ཁུལ་གྱི་གཏམ་དུ་ངེས་ཀྱང༌།  དེ་ལྟ་བུའི་འདས་པའི་དོན་ལ་བློ་གཟུ་བོར་གནས་པའི་དཔྱད་པ་ལས་ཕྱོགས་རིས་གཏམ་གྱི་དགོས་པ་གང་ཡང་མེད་དེ།  གཙང་པ་རྒྱལ་པོ་རིག་གནས་དང་ཆབ་སྲིད་ལ་སྦྱངས་པ་དམན་པ་ཡིན་མིན་ཁྲིམས་ཡིག་ཞལ་ལྕེ་བཅུ་དྲུག་གཏན་འབེབས་གནང་ཚུལ་ལ་བློ་གཟུ་བོར་གནས་པས་བརྟགས་ན་ཤེས་སོ།  ལྷག་པར་དུ་ཁྲིམས་ཡིག་དོན་ཚན་གསུམ་པ་རྒྱལ་པ་མེ་ལོང་གདོང་གི་ཞལ་ལྕེའམ་སྣེ་མོ་ལས་འཛིན་གྱི་ཞལ་ལྕེའི་ནང་དུ།  ཆོས་ཕྱོགས་ཀྱི་ཞྭ་རིགས་དང་གྲུབ་མཐའ་མི་བསྒྱུར།   དུས་ཆེན་གྱི་ཟླ་བ་ལྔ་ལ་རི་རྒྱ་ཀླུང་རྒྱ་བསྡོམས་པ།  གཉེར་ཚང་ལ་དཀར་སྡོར་བྱེད་པ།  སྐུ་གསུང་ཐུགས་ཀྱི་རྟེན་ཞིག་གསོ།   ལམ་འཕྲང་འཆོས་པ།  སོག་ཟློག་ལ་དམིགས་པའི་སྤྲེ་ཟླ་བའི་ཚེས་བཅུ་ལ་ཡུལ་ཚན་སོ་སོར་སྐྲ་ཐོག་གསོལ་འདེབས་བྱེད་བཅུག་པ།   གཉེར་ཚང་དུ་ཚེས་བཅུ་ཆག་མེད་འཇུག་པ།  ཞེས་སོགས་གཏན་འབེབས་གནང་བའི་ཁྲིམས་སྲོལ་འདི་ཡིས་དགེ་ལུགས་པ་ལ་མདུང་རྩེ་གཏད་པ་དང༌།  བཙན་ཤེད་ཀྱི་གྲུབ་མཐའ་བསྒྱུར་པ་སོགས་ཀྱི་བྱ་བ་བྱས་མེད་པ་གསལ་པོར་ངེས་ཤིང༌།  ཕག་གྲུ་སྡེ་སྲིད་བདུན་པ་ཀུན་དགའ་ལེགས་པའི་སྐབས་སུ་སེར་འབྲས་ཀྱི་གྲྭ་ཚང་དང༌།  ཞྭ་དམར་པའི་གྲྭ་ཚང་བར་རྩོད་གཞི་ཅུང་ཟད་བྱུང་བ་དང༌།  རྩེ་ནས་རྩེད་ཐང་ཚོགས་པ་ལ་ཞྭ་དམར་གྱོན་དགོས་པའི་ཁྲིམས་བསྒྲགས་པ་སོགས་ཀྱི་ནང་འགལ་གྱི་དོན་རྐྱེན་ཅུང་ཟད་བྱུང་བ་དེ་རིགས་སླད་ནས་མི་འབྱུང་བའི་ཆེད་དུཆོས་ཕྱོགས་ཀྱི་ཞྭ་རིགས་དང་གྲུབ་མཐའ་མི་བསྒྱུརཞེས་རྩ་ཁྲིམས་ནང་དུ་གཏན་འབེབས་གནང་ཡོད་པར་ངེས་སོ།  །  འོན་ཀྱང་སློབ་དཔོན་པད་མའི་དུས་ཆེན་སྤྲེལ་ཟླའི་ཚེས་བཅུ་ཉིན་ལ་སོག་དམག་བཟློག་པའི་དུས་མཆོད་འཛུགས་དགོས་པ་རྩ་ཁྲིམས་ནང་དུ་གཏན་འབེབས་བྱས་པ་འདི་ཡིས།  དབུས་ཕྱོགས་ཀྱི་དཔོན་རིགས་འགའ་དང་སེར་འབྲས་ཀྱི་གྲྭ་ཚང་རྣམས་ཐུགས་ལ་ཅུང་མ་བདེ་བ་ཞིག་བྱུང་ཡོད་ངེས་ཏེ།  ཏཱ་ལའི་བླ་མ་སྐུ་ཕྲེང་བཞི་པ་ཡོན་ཏན་རྒྱ་མཚོ་སོག་པོའི་གདུང་ལས་འཁྲུངས་པ་དང༌།  སྐབས་དེར་སོག་པོའི་དཔོན་རིགས་ཁག་གིས་དགེ་ལུགས་པའི་སྦྱིན་བདག་ཡིན་པའི་ཟོལ་གྱིས་བོད་དོན་ལ་ཐེ་གཏོགས་བྱེད་པའི་གོ་སྐབས་གང་ཐོབ་འཚོལ་བཞིན་ཡོད།