དེ་ནས་ཉ་སྟོང་གི་དུས་ཚེས་པའི་ཉིན་ལ།  མི་རྣམས་ཀྱིས་བསུར་རྩམ་དང་གྲོ་ཆས་སོགས་འཁྱེར་ནས་རྒན་སྐྱོར་གཞོན་ཁྲིད་ཀྱིས་བཟའ་མི་ཡོངས་རྫོགས་དུར་ས་ལ་རང་ཉིད་ཀྱི་སྔོན་གཤེགས་གཉེན་ཉེ་སོགས་ལ་དྲན་གསོ་ཞུ་རུ་ཕེབས།  སྐབས་དེ་ཡང་དུད་ཚང་རང་ ཉིད་ཀྱི་ཆ་རྐྱེན་ལྟར་བླ་གྲྭ་གདན་འདྲེན་ཞུས་ནས་བསུར་དང་བསྔོ་སྨོན་བྱེད་པའི་སྲོལ་ཡོད།
དུ་རྒན་འཕོ་བའི་མཛད་སྒོ། 
དེའི་ནུབ་མོར་དུ་རྒན་ཕྱི་ལ་འཕོ་དགོས་ལ། དུ་རྒན་ཕྱིར་ལ་འཕོ་སྐབས་སུའང་ཕྱིར་བལྟས་བྱེད་མི་ཆོག་པ་དང་།  དུད་རྒན་ཚོམ་བུ་ཆུང་ཆུང་ཁག་དགུ་ལ་བགོས་ནས།  མཐར་སྨོན་ལམ་དང་རེ་བ་གང་ལེགས་བཏབ་ཏེ་ཡོངས་རྫོགས་འཕོ།
སྐར་ཆུ་ལེན་པའི་མཛད་སྒོ།
དེ་ནས་ཚེས་གཅིག་ནམ་ཡང་མ་ལངས་གོང་ལ་གནམ་ལ་སྐར་ཚོགས་ཁྲ་ལམ་མེར་ཡིན་པའི་སྐབས་སུ།  དགྱེས་སྤྲོ་ཞལ་པད་འབྱེད་པའི་མི་ཚོ་ཕན་ཚུན་བོས་ཏེ་ཐུན་མོང་གིས་གྲོང་པའི་མཐའ་འཁོར་དུ་ཡོད་པའི་ཆུ་སྣ་འདྲ་མིན་རྣམས་ལེན་དུ་ཕྱིན། དེ་ལ་སྐར་ཆུའམ་ཆུ་འགོ་ལེན་པ་ཟེར།
ཞོགས་པའི་ཞལ་ཟས་དང་པོའི་སྐོར།
ཞོགས་པའི་ཁ་ཟས་དང་པོ་ཕྱེ་མར་རེ་འགམ།  ཆང་འཁོལ་མ་རེ་འཐུང། བཀྲ་ཤིས་པའི་རྟེན་འབྲེལ་བརྗོད།  ལོ་གསར་ པའི་ནང་ལ་ཚེ་རིང་ནད་མེད་ཅིང་བསོད་ནམས་དང་ལོངས་སྤྱོད་ཕུན་སུམ་ཚོགས་པའི་རྟེན་འབྲེལ་བསྒྲིགས།
བསང་མཆོད་ཀྱི་མཛད་སྒོ།
དེ་ནས་བསང་གཏོང་བའི་སྐོར་ནི། ཚེས་གཅིག་ནས་འགོ་བརྩམས་ཏེ་ཚེས་བདུན་ནམ་བཅོ་ལྔའི་བར་གཏོང་བའི་སྲོལ་ཆགས་ཡོད་ལ།  དེས་ཀྱང་རང་གིས་རྟག་ཏུ་བརྟེན་པའི་ཡུལ་ལྷ་དང་གནས་བདག   གེ་སར་ནོར་བུ་དགྲ་འདུལ།  དགྲ་ལྷ་ཝེར་མ་སྐོར་བཅས་གདན་འདྲེན་དང་སྐུ་བསྟོད་འཕྲིན་བཅོལ་བཅས་བསང་མཆོད་གྱ་ནམ་པ་ཞུ།
བཀྲ་ཤིས་བརྩེགས་པ་དང་། གཡང་སྐྱབས་སོགས་བཏོན་ནས་ལོ་གསར་པའི་ནང་ལ་ཕྱི་འབྱུང་བཞིས་གྲུབ་པའི་འཇིག་རྟེན་ཁམས་དང་ནང་བཅུད་དུ་འཚོ་བའི་སེམས་ཅན་ཐམས་ཅད་ལ་རྐྱེན་ངན་དང་བར་ཆད་ཀྱི་འགོང་པོས་མ་ཟིན་ཞིང་གཏན་བདེ་དར་རྒྱས་ཡོང་བའིསྨོན་ལམ་ཡང་འདེབས།
དགའ་སྟོན་རྟེན་འབྲེལ་གྱི་མཛད་སྒོ་སོགས་ལ་དངོས་སུ་འཇུག་པ་སྟེ།  ཆས་གཟབ་སྤྲོས་རྨ་བྱ་འདྲ་བྱེད་།  ཁ་དགེ་ཞིང་བཀྲ་ཤིས་པའི་སྨོན་ཚིགབརྗོད།  ཉེ་འབྲེལ་མགྲོན་དུ་འབོད།  རྒན་རབས་ལ་སྲི་ཞུ་བཟང་པོ་སྒྲུབ།  ཟས་ནོར་ལོངས་སྤྱོད་ཕུན་སུམ་ཚོགས་པའི་བདེ་བ་མྱོང་།  སྲིད་པའི་བྲོ་ར་བསྒྲིགས།  དམ་པའི་ཆོས་རར་མཆོད།  ཡ་རབས་ཀྱི་སྤྱོད་ལམ་འཁྱོངས།  འདོད་ཡོན་དང་ཕུང་ཁམས་ཀྱི་སྤྱོད་ཡུལ་སུམ་རྩེན་གནས་ལ་འགྲན་ལ་ཁད་བྱས་ནས་ལོ་སར་གྱི་ཉིན་མོར་རོལ་བར་བྱས། །