དགུན་ཟླ་ཐ་ཆུང་གསུམ་ནི་རོང་ཁུལ་མི་དམངས་ལ་མཚོན་ན་ལོ་གཅིག་གི་བྱ་བ་ཐམས་ཅད་གནས་སྐབས་མཚམས་འཇོག་ནས་མལ་གསོའི་དུས་དང་འཁེལ་ཞིང་ལོ་གཅིག་དཀའ་ལས་རྒྱག་པའི་འབྲས་བུ་ཡང་སྨིན་ནས་འདོད་ཡོན་ལོངས་སྤྱོད་འབེལ་བའི་དུས་ཡིན་པས་བོད་ཟླ་བཅུ་གཉིས་པའི་དུས་ཚོད་ཕལ་ཆེར་བ་ལོ་གསར་སྔོན་གྱི་གྲ་སྒྲིག་བྱེད་ཀྱིན་རེད།   རོང་ཁུལ་ནང་བསྟན་གྱི་དགོན་པ་ཕལ་ཆེར་གྱིས་དགུ་གཏོར་འཆམ་པའི་སྟ་གོན་ཡང་བྱེད་ཀྱི་ཡོད།   དགུ་གཏོར་ནི་ལོ་ཪྙིང་པའི་ནད་ངན་རྐྱེན་ངན་བཀྲ་མི་ཤིས་པ་ཐམས་ཅད་ཕྱིར་སྐྲོད་ཅིང་དགེ་ལེགས་ཀྱི་དཔལ་ཕུན་སུམ་ཚོགས་པ་ཚུར་བསུ་བའི་ཆོས་ལུགས་ཀྱི་དུས་སྟོན་ཆེན་པོ་ཞིག་ཡིན་པས་མཇལ་མཁན་གྱི་མི་སེར་ཧ་ཅང་མང་།    ལོ་སར་ལ་ཉེ་བའི་ཚེ་ན་མི་རྣམས་ཀྱིས་ཤ་དང་།   དཀར་གསུམ་མངར་གསུམ།   ཆང་རག   སིལ་ཏོག    རྒྱན་ཆ།   རླུང་རྟ་དཔུང་རྒྱན་སོགས་ཉོ་སྒྲུབ་བྱེད་པ་ལ་བྲེལ་ཞིང་།   དེ་མིན་གྲོ་ཆེན་བརྡུང་བའི་བྱ་བ་ཙག་ཙིག་དང་རྟ་རྒྱུག་དང་བག་སྟོན་སྐོར་དང་འབྲེལ་བའི་གྲ་སྒྲིག་ཀྱང་ཚགས་སུ་ཚུད་པ་བྱེད་དགོས།   དེང་དུས་མི་དམངས་ཀྱི་འཚོ་བ་ཉིན་བཞིན་ཡར་རྒྱས་སུ་ཕྱིན་པས་ལོ་རེའི་ལོ་གསར་གྱི་གྲ་སྒྲིག་བྱེད་པའི་ཅ་དངོས་ཀྱང་ཇེ་མང་དང་ཇེ་རྒྱས་སུ་འགྲོ་བཞིན་འདུག   དེ་ཡང་ལོ་མ་སར་པའི་སྔོན་དུ་སྡེ་ཚོ་སོ་སོའི་སྡེ་དཔོན་གཙོས་པའི་རྒན་རིམ་རྣམས་ལྷན་དུ་འཛོམས་ནས་ལོ་གསར་ཇི་ལྟར་བསུ་བའི་བགྲོ་གླེང་བྱས་ཏེ་འོས་འཚམ་གྱི་དུས་ཤིག་བདམས་ནས་མི་དམངས་འདུས་ཚོགས་ཀྱི་ཁྲོད་དུ་དྲིལ་བསྒྲགས་གཏོང་ཞིང་དེ་དང་ལྷན་དུ་ལོ་གཅིག་གི་སྡེ་ཚོ་སོ་སོའི་ལེགས་ཉེས་ཀྱི་ཕྱོགས་བསྡོམས་བྱས་རྗེས་བཟང་ལ་བྱ་དགའ་དང་ངན་ལ་ཆད་པ་བཅད་ཀྱིན་ཡོད།   ཚེས་ཉེར་དགུའི་ཞོགས་པ་སྔ་མོར་དགུ་གླུད་ཅེས་ཁང་པའི་དུ་རྒན་དང་ཁ་ཁ་ཁུག་ཁུག་ཀུན་གྱི་མི་གཙང་བ་རྣམས་ཕགས་ནས་བཞག་ཅིང་།   ཉིན་དཀར་དགུ་འཁྲུ་དགུ་བཤལ་ཞེས་ལུས་པོ་དང་མི་གཙང་བའི་གོས་ཆས་ཐམས་ཅད་བཀྲུ་དགོས།