ནུབ་མོར་སླེབས་ཚེ་གླུད་སྒྲིལ་ཞེས་རྩམ་པ་ཆུ་གྲང་ནང་བརྫིས་ནས་མཛུབ་མོ་ལྔ་ཀའི་རྗེས་བཀྲ་བ་ཞིག་ཁུར་ནས་མགོ་ཐོག་ནས་མར་དལ་གྱིས་ལུས་ཡོངས་ལ་བསྒྲེས་རྗེས་ཞོགས་སྔ་མོའི་ཕགས་ལུད་ནང་དུ་འཕངས་ནས་ཕྱོགས་ནག་གི་ཕྱོགས་སུ་ལམ་སུམ་མདོ་རུ་འདོར་དགོས་ཀྱི་ཡོད།   གནམ་གང་གི་ཉིན་ཁང་པར་ས་དཀར་བྱུགས་ཤིང་ལྷ་ཤིང་དང་བསང་ཤུག་ཁུར་དུ་འགྲོ་དགོས།    ནུབ་མོར་སྦྲང་ཡོས་དང་གྲོ་གཅུས།   ཕྱེ་མར་བཀྲ་ཤིས་བདེ་ལེགས་གཙོས་པའི་ཁ་ཟས་དང་བཤམས་མཆོད་ཀྱི་རིགས་རྣམས་བཟོ་དགོས།    གནམ་གང་ནས་བཟུང་སྟེ་ལོ་གསར་ཚེས་བཅོ་ལྔའི་བར་དུ་ནུབ་རེ་བཞིན་མར་མེའི་མཆོད་ཀོང་མཚན་ཐུབ་སྦར་དགོས་ཀྱི་ཡོད།  གནམ་གང་གི་ནུབ་མོར་དུ་དུང་དཀར་ཐིག་རྒྱག་པ་ཞེས་ས་དཀར་གྱི་ཁུ་བར་རས་ཀྱི་ཡོས་མགོ་ལྟ་བུ་ཞིག་བསྡམས་ནས་ནག་དྲེག་ཆགས་པའི་གདུང་མ་རྣམས་ལ་དཀར་པོའི་སྒོར་ཐིག་ཁྲ་ལམ་མེར་རྒྱག་པ་དང་།   གྲོ་ཕྱེ་མཐེབ་མོ་དང་མཛུབ་མོའི་གསེབ་ཏུ་གཅུན་ནས་ཐབ་ཀའི་རྒྱབ་ངོས་དང་རྒྱབ་མཐོངས་ཀྱི་གྱང་ངོས་སུ་ཉི་ཟླ་དང་ནོར་བུ་མེ་འབར།   བཀྲ་ཤིས་རྟགས་བརྒྱད་སོགས་ཀྱི་རི་མོ་རྒྱག་སྲོལ་ཡོད།    འོན་ཀྱང་ད་ལྟར་འཚོ་རྐྱེན་བཟང་བས་ཡུལ་ལུང་ཀུན་ཏུ་སྲོལ་འདི་རྒྱུན་ཆད་ལ་ཁད་འདུག   དེ་ནས་བྱ་ཕོས་དང་སྐད་གྲག་པ་དང་གྲོ་ཆེན་དང་ཁ་ཟས་ཉུང་ངུ་ཁྱེར་ཏེ་གསེར་ཆུ་དང་དངུལ་ཆུ་འཕྲོག་ཏུ་འགྲོ་དགོས།    གལ་ཏེ་ཁྱིམ་ཚང་སུ་ཞིག་གིས་གསེར་ཆུ་སྟེ་བྱ་སྐད་ཐོག་མ་བཏང་ཟིན་པ་ནས་ཨང་དང་པོ་བླངས་ཐུབ་པའི་ཆུ་ལ་ཟེར་ཞིང་དེ་སུ་ཚང་གིས་འཕྲོག་ཐུབ་ན་བསོད་ནམས་ཆེན་པོ་དང་གཟི་བརྗིད་ཆེན་པོ་བརྩིས་ཀྱི་ཡོད།   དེ་མིན་ཐམས་ཅད་དངུལ་ཆུ་ཡིན། འོན་ཏེ་བྱ་ཕོས་སྐད་མ་གཏོང་གོང་དུ་ཆུ་ལེན་དུ་ཕྱིན་པ་ཡིན་ན་ལྐུགས་ཆུ་ཞེས་བཟང་པོ་མི་བརྩིའོ།།    དེའི་ཕྱིར་རུང་ཁུལ་གྱི་ཁྱིམ་ཚང་ཚང་མ་ལ་བྱ་དེ་ཕོ་རེ་མེད་པ་དཀོན་པའི་རྒྱུ་མཚན་ཡང་འདི་ལ་ཐུག་ཡོད།    ཡིན་ན་ཡང་ད་ལྟ་ཏང་གི་དམངས་ཕན་སྲིད་ཇུས་བཟང་པོ་ལག་བསྟར་དོན་འཁྱོལ་བྱུང་བ་ལ་བརྟེན་ནས་རང་བྱུང་ཆུ་སྦུག་དུད་ཁྱིམ་སོ་སོའི་སྒོ་འགྲམ་དུ་བསླེབས་པས་གསེར་ཆུ་དངུལ་ཆུ་འཕྲོག་པའི་འགྲན་རྩོད་བྱེད་ཤུགས་ཇེ་ཆུང་དུ་གྱུར་འདུག    གསེར་ཆུ་དངུལ་ཆུ་བླངས་ཚར་རྗེས་ནམ་ལངས་ལ་རན་པས་ཁྱིམ་མིའི་ལས་དང་དབང་འགན་ཁུར་བ་རྣམས་ཀྱིས་བཤམས་མཆོད་སྒྲིག་འགོ་ཚུགས་ཤིང་གསེར་ཆུ་དངུལ་ཆུས་གྲོ་ཆེན་བཙོས་འགོ་བརྩམ།   རོང་ཁུལ་གྱི་བཤམས་མཆོད་བྱེད་ས་གཙོ་བོ་ནི་མཆོད་ཁང་ངམ་གཡང་ཁང་ཞེས་མ་ཁྱིམ་ལ་ཟུར་སྦྱར་བྱས་པའི་ཁང་མིག་དགུ་ཅན་ནམ་བཅུ་གཉིས་ཅན་ཞིག་གི་ནང་དུ་ཡིན་ཞིང་དེའི་ནང་དུ་ཆོས་དཔེ་དང་།  ཆོས་ཆས།   ཐང་ག   ལྷ་སྐུ།    བླ་སྤྲུལ་གྱི་སྐུ་པར་དང་རིན་པོ་ཆེ་གཙོས་པའི་ཁྱིམ་ནོར་རྩ་ཆེན་རྣམས་བཞག་ཡོད་པས་དེ་དག་གི་མདུན་དུ་བཤམས་པའི་མཆོད་རྫས་ཡང་གྲངས་ཀ་མང་བ་མ་ཚད་གཙང་ཞིང་བཟང་ལ་ཡིད་དབང་འཕྲོག་པ་ཞིག་ཡིན།   དེ་ནས་ནམ་ལངས་པ་དང་ཁྱིམ་མི་རྣམས་ཀྱིས་ཁ་ལག་གཙང་མ་བཀྲུས་རྗེས་ཁྱིམ་མི་རྒན་རིམ་ཞིག་གིས་ཕྱེ་མར་བཀྲ་ཤིས་བདེ་ལེགས་ཁེམ་བུ་གང་རེ་ཁྱིམ་མི་སོ་སོའི་ལག་ཏུ་བླུག་རྗེས་ཁ་ཕྱེ་མར་གྱིས་གང་།   ལུས་བསོད་ནམས་ཀྱིས་གང་ཞེས་ཟེར་ཞོར་ཕྱེ་མར་འགམས་དགོས།   དེ་ནས་གསེར་ཆུ་དངུལ་ཆུས་བཙོས་པའི་གྲོ་ཆེན་འཐུང་དགོས།    ལོ་གསར་ཚེས་གཅིག་གི་ཞོགས་སྔ་མོར་བྱིས་པ་རྣམས་རང་ཁྱིམ་གྱི་གྲོ་ཆེན་ཕོར་བ་གང་ཁྱེར་ནས་ཁྱིམ་གཞན་དུ་སྐྱེལ་བ་ལ་ཧ་ཅང་དགའ་ཞིང་གང་རེད་ཅེ་ན་གཅིག་ནི་ཁྱིམ་ཚང་སོ་སོའི་གྲོ་ཆེན་གྱི་ཞིམ་ཞན་ལྟ་ཐུབ་པ་དང་།   གཉིས་སུ་ན་བྱིས་པ་ཚང་མས་ཁ་ཟས་མང་པོ་རག་གི་ཡོད་པ་རེད།   ཉི་རྩེ་ཁང་ཐོག་ཕོག་པ་དང་བསང་དུ་མཉམ་འཕྱུར།    ལྷ་དར་མཉམ་འཕར་བྱེད་ཐུབ་དགོས།  དེའི་རྗེས་བོད་སྦྲང་དང་གྲོ་མ།  མར་བཅས་བསྲེས་པའི་གྲོ་མ་མར་ཁུ་བཟོས་ཏེ་ཆུང་དམར་འབྱར་གྱི་ཕྲུ་གུ་ཡན་ཆད་ལ་རང་རང་སོ་སོའི་བགོ་སྐལ་དུ་གྲོ་མ་མར་ཁུ་ཕོར་པ་གང་རེ་བཞག་པའི་སྲོལ་ཡོད། རོང་ཁུལ་དུ་གྲོ་མ་དཀོན་པས་གྲོ་མ་མར་ཁུ་ནི་ཧ་ཅང་རྩ་ཆེན་ཞིག་ཏུ་འཛིན་གྱི་ཡོད།   དེ་ནས་ཁྱིམ་དུ་ཡིག་འདོན་ཤེས་མཁན་ཡོད་ན་གཡང་སྐྱབས་དང་བཀྲ་ཤིས་བརྩེགས་པ་སོགས་འདོན་དགོས་པ་དང་མེད་ཚེ་ཨ་མཆོད་རྒན་རིམ་ཞིག་བཀུགས་ནས་འདོན་དགོས་ཀྱིན་ཡོད་པ་རེད།   ལོ་གསར་ཚེས་གཅིག་ཉིན་གད་བདར་བྱེད་མི་ཆོག་ཅིང་ཕོར་པ་སོགས་ཀྱང་བཀྲུ་སྲོལ་མེད།