མཐོ་སྒང་བོད་ཀྱི་ས་ཆ་གཞན་དག་དང་འདྲ་བར་ལོ་རྒྱུས་ཐོག་ལ་འདབ་པ་རྫོང་ནི་མཐའ་འཁོབ་ཏུ་ཆགས་ཤིང་འགྲིམ་འགྲུལ་མི་བདེ་ལ་བརྡ་འཕྲིན་འབྱོར་དཀའ་བས་སྤྱོད་གོ་ཆོད་ཅིང་འཚོ་བར་དངོས་སུ་ཕན་པའི་རིག་གནས་གསར་པའི་ཐོན་འབྲས་རྣམས་ཕྱི་རོལ་དུ་བཀག་པ་ལས་ནང་འདྲེན་བྱེད་མ་ཐུབ།ཡུལ་མི་རྣམས་ཀྱི་བསམ་བློའི་གོ་རྟོགས་དང་འཚོ་གཞེས་ཀྱི་གནས་སྟངས་བཅས་ཀྱི་ཐད་ལ་རྨོངས་པའི་དྲི་ངན་འཐུལ་ཞིང་བག་འཁུམ་པའི་རྟགས་ཀྱང་མངོན།དེ་འདྲའི་ཁོར་ཡུག་ནང་ལ་མི་དྲག་དང་ཚོང་པའི་ཁྱིམ་ཚང་རེ་གཉིས་ཀྱིས་ཧ་ཡང་དང་དཀར་ཡོལ་གྱི་ཡོ་བྱད་བེད་སྤྱོད་ཐུབ་པ་ལས་དེ་མིན་རྣམས་ཀྱིས་ཤིང་དང་རྫ་ལས་བཟོས་པའི་སྣོད་ཆས་ཁོ་ན་སྤྱད་དགོས་པ་རེད།ཡིན་ན་ཡང་།སྐབས་དེ་དུས་ཐོན་སྐྱེད་ལག་རྩལ་དམའ་བས་སྟ་རེ་དང་གྲི།འབུག་སོགས་ཀྱིས་བཅད་གཏུབ་གཞོག་འབིགས་བྱས་པའི་སྣོད་ཀྱི་བཟོ་དབྱིབས་མི་མཛེས་ལ་འཛིན་བཟུང་དང་ལག་འཁྱེར་མི་བདེ་བས་མི་རྣམས་ཀྱིས་མིག་ལ་མཛེས་ཤིང་ལག་ལ་བདེ་བ་དང།སྤྱོད་གོ་ཆོད་པའི་སྣོད་ཆས་དང་ཡོ་བྱད་ལ་རེ་སྨོན་བྱེད།སྐབས་དེར་སྡེ་གསར་གྲོང་པར་དོན་གྲུབ་ཅེས་རྣམ་རིག་བཀྲ་བའི་མི་ཞིག་ཡོད།ཁོང་གིས་དུས་རྒྱུན་དུ་འཚོ་བའི་སྣོད་ཆས་དང་ཡོ་བྱད་ལ་འཚོལ་རྟོག་དང་བསམ་གཞིག་བྱས།ཉིན་ཞིག་ལ་ཁོང་གིས་ཆུ་ཡིས་བསྐོར་ཏེ་རྩམ་པ་འཐག་པའི་ཆུ་འཁོར་ལ་བལྟས་ནས་བསམ་གཞིག་འདྲ་མིན་སྣ་ཚོགས་བྱས་མཐར་ཤིང་དུམ་བུ་ཞིག་ཆུ་འཁོར་གྱི་སྟེང་རྡོ་ལ་བརྡར་དུ་བཅུག་པས་ཤིང་དུམ་གྱི་ཕྱི་ངོས་འཇམ་པོར་ཆགས།དེ་ནས་ཁོང་གིས་ལྕགས་གུག་གཅིག་བརྡུངས།རྐང་པས་བརྫིས་ནས་བསྐོར་ཆོག་པའི་འཁོར་ལོ་ཞིག་བཟོས་ཏེ་ཤིང་གི་ཕྱི་ངོས་འཇམ་པོར་ཆགས་ཐབས་དང་ནང་ལ་སྟོང་ཆ་ཡོང་ཐབས་བཅས་ཀྱི་གནད་དོན་ཐག་བཅད་པས་དུས་དེ་ནས་བཟུང་མི་རྣམས་ལ་མཛེས་ཤིང་གོ་ཆོད་པའི་ཤིང་ཕོར་སྣོད་ཆས་འདྲ་མིན་སྣ་ཚོགས་ཐོན་ཏེ་འཚོ་བའི་སྤུས་ཀ་སྔོན་མ་ལས་ལྡབ་འགྱུར་གྱིས་ཕུན་སུམ་ཚོགས་པར་གྱུར།།   ཤིང་ལ་བརྐོས་པའི་སྣོད་ཆས་རྣམས་ཀྱི་རིན་གོང་ནི་ཤིང་གི་རྒྱུ་ཆ་བཟང་ངན་གྱིས་ཐག་གཅོད་བཞིན་ཡོད།གོང་ཁེ་པོ་ནི་སྒོར་བརྒྱ་མན་ཆད་དང་གོང་མཐོ་ཤོས་ནི་སྟོང་ཡན་ཆད་རེད།ཤིང་ཕོར་དང་བཅས་པའི་སྣོད་ཆས་རྣམས་ནི་མི་རྣམས་ཀྱིས་དགའ་བསུ་ཞུ་བའི་བཟའ་བཏུང་གི་ཡོ་བྱད་དང་བོད་ཀྱི་འཚོ་བའི་རྒྱན་ཆ་ཡང་ཡིན་པས་ལག་རྩལ་པ་རྣམས་ཀྱི་ཕྱག་ཟུང་ལས་ཐོན་པའི་ཐོན་རྫས་རྣམས་རྒྱལ་ཡོངས་ས་གནས་སོ་སོ་དང་ཕྱི་ཡི་རྒྱལ་ཁབ་ཁག་གི་ཚོང་ལམ་དུའང་བྲིན་གིན་ཡོད།   ཤིང་ཕོར་རྐོ་བའི་ལག་རྩལ་དར་སའི་སྡེ་གསར་གྲོང་ནི་འདབ་པ་ནས་ཉི་སྟེན་བར་གྱི་གཞུང་ལམ་སྤྱི་ལེ53གྱི་མཚམས་སུ་གནས་ཤིང་གཡས་གཡོན་དུ་རི་བོའི་ཕྲེང་བ་མཚར་དུ་དངར་ལ་གངས་ཆུ་གཙང་མ་ལྷུང་ལྷུང་བཞུར་བས་ཁོར་ཡུག་ལྷོད་ཆགས་སུ་གནས།བོད་པའི་ཁྱད་ཆོས་ལྡན་པའི་བོད་ཁང་རྣམས་ནི་མུ་ཏིག་རེ་རེ་དང་འདྲ་བར་གཞུང་ལམ་གྱི་ལོགས་གཉིས་སུ་བཀྲམ་ནས་ཡོད་ལ་ལྷུན་གྱིས་གྲུབ་པའི་རང་བྱུང་ཁོར་ཡུག་ལྟ་བས་མི་ངོམ།དམངས་གཙོས་སྒྱུར་བཅོས་མ་བྱས་གོང་ལ་གྲོང་པ་དེ་རུ་དུད་ཁ་བཅོ་ལྔ་ཙམ་ལས་མེད་ཀྱང་ཡུལ་མི་ཚང་མས་ཕན་ཚུན་གཅིག་སེམས་གཅིག་བརྟེན་གྱིས་རོགས་རམ་དང་རྒྱབ་སྐྱོར་བྱས་པར་བརྟེན་ཕྱི་ལ་བལྟས་ན་དུད་ཁ་བཅོ་ལྔ་ཡིན་ཡང་།ནང་ལ་བལྟས་ན་བུ་སྤུན་བཅོ་ལྔ་ཞེས་ཁ་རྒྱུན་སྙན་པོ་ཡོད་ལ་དོན་དུའང་དེ་ལྟར་ལགས་ཏེ།རང་རང་གིས་ཤེས་པའི་ལག་རྩལ་སོགས་སུས་ཀྱང་སྦ་གསང་བྱེད་སྲོལ་མེད་པས་ཡུལ་དེར་ཤིང་བཟོ་དང་རྡོ་བཟོ།མགར་བ་བཅས་ལག་རྩལ་པ་མང་པོ་ཡོད་པ་མ་ཟད་བརྒྱུད་འཛིན་ཡང་ཡག་པོ་བྱས་ཡོད། དུས་ད་ལྟར་ལག་རྩལ་པའི་གྲོང་པ་ཞེས་འབོད་པའི་སྡེ་གསར་གྲོང་པ་ཡིས་ཕྱི་ནང་གི་ཡུལ་སྐོར་བ་དང་ཚོང་པ་དོན་གཉེར་ཅན་མང་པོ་རང་ཕྱོགས་སུ་བཀུག་སྟེ་ཕྱི་རོལ་ནས་ཡོང་བའི་ལུས་སེམས་གཉིས་ལ་ཕན་པའི་བསིལ་རླུང་ལྡང་བཞིན་སྦྲང་ཆར་བསིལ་མ་འབེབས་དང་འབབ་བཞིན་པ་ནི་བྲག་ལ་ལྕགས་ཕུར་ཟུག་པ་ལྟ་བུའི་སྙིང་རུས་ལྡན་པའི་མེས་པོ་རྣམས་ཀྱི་སྐུ་དྲིན་དང་གསར་སྐྱེས་ན་གཞོན་ཚོའི་རང་ཁ་རང་གསོ་བྱེད་པའི་སྙིང་སྟོབས་ལགས་པས་ང་ཚོས་བསྔགས་འོས་པའི་གནས་སུ་བཞག་སྟེ་བཀའ་དྲིན་རྗེས་དྲན་བྱེད་བཞིན་དུ་ལས་དེ་དག་ལ་མུ་མཐུད་དུ་འཇུག་དགོས་པ་མིན་ནམ།།      གོང་དུ་བཤད་པ་ལྟར་སྡེ་གསར་གྲོང་གི་ཤིང་ཕོར་རྐོ་བའི་ལག་རྩལ་ནི་ལོ་རྒྱུས་ཡུན་རིང་ལྡན་པ་ཞིག་ཡིན།ལག་རྩལ་འདི་ཐོག་མར་གསར་དུ་རྙེད་དུས་ཇ་ཕོར་ཙམ་ལས་བཟོས་མི་ཤེས་པ་ནས་ད་ལྟར་མ་དཔེ་ཡོད་ན་ཚང་མ་བཟོས་ཤེས་པའི་ཆུ་ཚད་གསར་པར་བསླེབས་ཡོད་དེ་སྤུས་ལེགས་ལ་མཛེས་པའི་བཟའ་བཏུང་གི་ཡོ་བྱད་བཟོས་པ་མ་ཟད་སྡུག་གུར་བཀྲ་བའི་ལག་གདུབ་དང་མེ་ཏོག་བུམ་པ།བཀྲ་ཤིས་རྟགས་བརྒྱད་སོགས་བཟོས་ཐུབ་པ་ལས་ང་ཚོས་འདབ་པའི་བོད་མི་རྣམས་ནི་ལོ་རྒྱུས་ཀྱི་ཟིན་བྲིས་སུ་བཀོད་པ་ལྟར་ལས་ལ་བརྩོན་ཞིང་དཔའ་ངར་ལྡན་ལ་བློ་གྲོས་རིག་པ་ཅན་གྱི་མི་རིགས་ཤིག་གི་རྒྱུད་འཛིན་འཁྲུལ་དུ་མེད་པ་ཞིག་ཡིན་པའི་གདེང་ཚོད་རྙེད་སོང་།     མིག་སྔར་ཕྱི་ནང་ཀུན་ལ་ངོམ་ངོམ་བྱེད་ཆོག་པའི་ཇ་ཕོར་དང་ཆང་གསོལ་བྱེད་ཀྱི་ཆང་ཕོར།མར་སྒམ།རྩམ་སྒམ།བཀྲ་ཤིས་རྟགས་བརྒྱད།མེ་ཏོག་བུམ་པ།ལག་གདུབ།ཆོ་གའི་སྤྱད་བྱེད་སྣ་ཚོགས་དང་སྡེར་མ་སོགས་སྣ་ཁ་མང་པོས་ཡུལ་མི་རྣམས་ཀྱི་འོངས་སྒོ་དབྱར་ཁའི་མཚོ་ལྟར་རྒྱས་སུ་འཇུག་བཞིན་ཕྱི་རོལ་ལྟད་མོ་བ་རྣམས་ཀྱི་འདོད་དབང་ཚིམ་པས་དེ་དང་དེ་འདྲ་བའི་ལག་རྩལ་ནི་ང་ཚོས་མུ་ནས་མུ་རུ་བསྲིངས་ན་མི་རིགས་ཀྱི་དཔལ་འབྱོར་གྱི་རྨང་གཞི་བརྟན་པོར་ཚུགས་རྗེས་རིག་གནས་ཀྱི་གཞུང་རྟ་རྒྱས་ཏེ་བསམ་བློའི་འདུ་ཤེས་དང་བྱ་བའི་ཀུན་སྤྱོད་བཟང་པོས་མིང་དོན་མཚུངས་པའི་ཤམ་བྷ་ལའི་ཞིང་ཁམས་དེ་རབ་འབྲིང་ཐ་གསུམ་གྱི་སེམས་ཅན་ཀུན་གྱིས་མིག་གིས་མཐོང་ལ་སེམས་ཀྱིས་རོལ་ཞིང་ལུས་ཀྱིས་སྤྱོད་ཐུབ་པ་མིན་ནམ།།