བོད་དུ་དཀར་ཡོལ་བྱུང་ཚུལ་ལ། དུས་རབས་་བརྒྱད་པའི་ནང་འདུས་སྲོང་མང་པོ་རྗེས་རྒྱ་ནག་ཏུ་མི་སྣ་ཆེད་མངགས་ཀྱིས་དཀར་ཡོལ་བཟོ་བའི་ལག་རྩལ་སློབ་སྦྱོང་བྱེད་དུ་བཅུག་པ་དེ་དག་བོད་དུ་ལོག་ནས་ལག་ཤེས་དེ་བོད་ལ་ཐོག་མར་དར་བ་སྟེ། ཐོག་མར་བཟོས་བའི་མིང་ལ་དར་སྣོད་དང་ར་ཚེ་ཞེས་བཏགས་སོ། །
        སྐབས་དེར་ཤབ་ཚེ་དང་། ལན་ཚེ། ཤང་ཚེ་ཞེས་དཀར་ཡོལ་རིགས་གསུམ་བཟོས་པ་ལ་གོང་གི་བཙན་པོ་མང་པོ་རྗེའི་སྐབས་བོད་དུ་ཇི་ལྟར་བྱུང་བའི་ལོ་རྒྱུས་གོང་གི་རྒྱལ་པོའི་རྣམ་ཐར་དང་ཇ་དང་དཀར་ཡོལ་གྱི་བསྟན་བཅོས་སོགས་ལས་བྱུང་བ་བཞིན་གྱི་རི་མོ། མཚོ་ལ་ཉ་དང་། སྤང་རི་ལ་ཤ་བ་འགྲོ་བ་སོགས་བྲིས་པའོ། །
     བོད་དུ་དཀར་ཡོལ་ཐོན་ཡུལ་གཙོ་བོ་གཉིས་ཡོད་པ་ལས། ཡར་ཀླུང་ཐང་པོ་ཆེ་ལས་ཐོན་པའི་ཐང་དཀར་ཏེ། དེ་ལའང་རིགས་གཉིས་ཡོད་པ་ལས་སྔ་མའི་དབྱིབས་དེང་གི་དཀར་ཡོལ་དང་ཕྱོགས་མཚུངས་ལ་ཁ་གཡེལ་ལ་ལེབ་པ་དང་། ཕྱི་མ་ནི་དབྱིབས་ཅུང་ཟད་མདོང་བའི་རྐྱེན་གྱིས་མི་ཕལ་ཆེ་བས་དེ་ལ་དཀར་ཡོལ་སྒོང་གཟུགས་མ་ཞེས་འབོད། བོད་དཀར་གྱི་དེའི་ཁྱད་ཆོས་ནི། དབྱིབས་གོང་གསལ་ལ་རྩོལ་མཉམ་ལས་རིགས་གཉིས་ལས། རྒྱུ་དཀར་དྭངས་གི་ཚད་གྲ་དཀར་ལས་དམན་ཙམ་པ། ལྗང་མདོག་ཅུང་ཟད་ཀྱིས་མཐའ་ནས་བརྒྱན་པ་འདྲ་བ་ལ། སྔ་མའི་མཐའ་བཞིར་མེ་ཏོག་པད་མས་སྤུད་པ་དང་། སྒོང་གཟུགས་མར་ཁ་རིས་ཡོད་པས་མི་འགའ་ཞིག་གི་དེ་ལ་དཀར་ཡོལ་ཁ་ནས་ཀྱང་ཟེར་ལ། གོང་གི་རིགས་གཉིས་ཀ་ཐང་པོ་ཆེ་ནས་ཐོན་རྟགས་སུ་ཕལ་ཆེར་དཀར་ཡོལ་གྱི་མཐིལ་དུ་ཐང་ཞེས་པའི་བོད་ཡིག་རེ་ཡོད་པར་བཤད།
ལྷ་སའི་ཁུལ་གྱི་གྲ་ནང་ནས་བཟོས་པའི་དཀར་ཡོལ་ནི། དེང་གི་ཕོར་བ་ལྟ་བུ་ལས་དབྱིབས་ཀྱི་འགྱུར་མ་བྱུང་བས་སྔ་ཕྱི་བར་གསུམ་ལ་ཁྱད་པར་མེད་ལ། རྒྱུའི་ཁྱད་པར་ལ་གོང་གི་ཐང་པོ་ཆེའི་དཀར་ཡོལ་ལས་དྭངས་ཆ་ཆེ་བར་སེར་ལྗང་གི་མདངས་འཕྲོ་བ། རི་མོ་ལ་ཕོར་ཁའི་ཕྱི་ཕྱོགས་སུ་ཁ་རིས་དང་། མཐིལ་དུ་སུས་ཀྱང་འགྲེལ་མི་ཤེས་པའི་པ་ལྟ་བུའི་མཚོན་རྟགས་ཙམ་ལས་རི་མོ་གཞན་མེད་པ་ཞིག་གོ །
     ལག་ཤེས་ཀྱི་དངོས་པོ་འདི་བོ་ལ་ཐོག་མར་དར་དུས། དར་སྣོད་དང་དར་ཚེ་ཞེས་པའི་ཐ་སྙད་བཏགས་པ་ལ། དཀར་ཡོལ་ཞེས་པའི་མིང་ཇི་ལྟར་བྱུང་བ་ལ། མཁས་པ་འགའ་ཞིག་གིས་དཀར་ནི་ཁ་དོག་དང་། ཡོལ་ནི་རྒྱ་ནག་གི་དཀར་ཡོལ་བཟོ་བའི་ལག་རྩལ་གྱི་“釉”    ཞེས་པ་དེ་སྒྲ་དང་དོན་གཉིས་ཀྱི་ཆ་ཕྱོགས་མཚུངས་ཀྱི་སྒོ་ནས་བྱུང་བ་མིན་ནམ་ཞེས་དཔྱད་དེ། དེ་ལྟར་ལག་རྩལ་དེ་ནི་དཀར་ཡོལ་བཟོ་བའི་ལག་ཤེས་ཀྱི་ཚད་མཐོ་ཤོས་ཞིག་སྟེ། བཟོ་ཐབས་ལ་ཐོག་མར་དཀར་ཡོལ་ས་སྤུས་ལེགས་ཀྱིས་དཀར་ཡོལ་གྱི་རྫ་མ་བཟོ་བ་ལྟར་བཟོས་ནས་སྐམ་པ་དེ་གུག་གྲིས་ཕྱི་ནས་བཞར་ཏེ། ཁོད་སྙོམས་ཤིང་ཧ་ཅང་སྲབ་པའི་སྟེང་དུ་རི་མོ་དང་ཡི་གེ་བྲི། དེའི་སྟེང་དུ་གོང་གི་“釉”ཞེས་པའི་རྩི་དར་བ་ལྟབུ་དེ་བྱུགས་རྗེས་སོ་བཏང་ནས་གྲུབ་ལ། ལག་ཤེས་དེ་ནི་དཀར་ཡོལ་བཟོ་བའི་ལག་རྩལ་ལས་ཆེ་དཀའ་ཤོས་དང་ཆེ་ཤོས་དེ་ཡིན་ལ། དེ་ལའང་གོང་གི་ཕྱི་རྩི་ཁས་སྤུར་ནས་བཟོ་བའི་སྤུར་ཡོལ་དང་།  ཐོག་ཏུ་བླུགས་ནས་བཟོ་བའི་བླུག་ཡོལ། མཆོད་ནས་བཟོ་བའི་མཆོད་ཡོལ་སོགས་ཀྱི་བཟོ་ཐབས་སྣ་ཚོགས་ཡོད་ལ། དེ་བཟོ་བའི་གོ་རིམ་ལ་དཀར་ཡོལ་ཀྱི་རིགས་འདི་ཧ་ཅང་བྱ་དཀའ་བ། བཟོ་ཡུན་རིང་བ། སྤྱིར་བཏང་གི་ལག་ཤེས་ཞིག་གིས་བཟོ་ཡུན་ལས་འདས་པ། འགྲོ་གྲོན་ཧ་ཅང་ཆེ་བ་བཅས་ཏེ། གལ་ཏེ་ལམ་དུ་མ་སོང་ན་གྱོང་ཀུན་ཆེ་བས་ན། དཀར་ཡོལ་འདི་བཟོ་མཁན་དེ་དཀར་ཡོལ་རིགས་བཟོ་བའི་ལག་རྩལ་མཆོག་ཏུ་མཁས་ཤིང་མི་ལོ་སུམ་ཅུ་དཀར་ཡོལ་བཟོ་བའི་ལག་ཉམས་མྱོང་ཅན་ཞིག་མིན་ན་ལག་ཤེས་འདི་བཟོ་ཐབས་བྲལ་ལོ་ཞེས་བཤད་པ་དེ་ཡིན།
    དཀར་ཡོལ་འདིའི་ཁྱད་ཆོས་ནི། རྒྱུ་ཧ་ཅང་སྲབ་ཅིང་། ཁ་དོག་དཀར་ལ་དྭངས་པ། ཕྱི་ནང་གཉིས་ལ་རི་མོ་མེད་ཀྱང་། དཀར་ཡོལ་བཀྱག་ནས་ནམ་མཁར་བལྟས་ན། དཀར་ཡོལ་གྱི་བར་ན་རི་མོ་དང་ཡི་གེ་གསལ་པོ་མཐོང་རྒྱུ་ཡོད་པའི་ཧ་ཅང་རིན་ཐང་ཆེ་བ་དེ་ཡིན།
   དཀར་ཡོལ་ཞེས་པའི་ཐ་སྙད་དེ་གོང་གི་ལག་རྩལ་ལས་བྱུང་བའི་དབང་དུ་བྱེད་ན། བོད་ལ་ཆེས་སྔ་མོ་ཞིག་ནས་དཀར་ཡོལ་བཟོ་བའི་ལག་ཤེས་ཙམ་དུ་མ་ཟད། བཟོ་རྩལ་ཚད་མཐོན་པོའི་ཞིག་ཡོད་པ་ངང་གིས་རྟོགས་མོད། ད་ལྟར་བཟོ་རྒྱུན་དེ་ནི་ལོ་རྒྱུས་ཀྱི་ཤེས་བྱ་ཙམ་ལས་ལག་ལེན་དངོས་བྱེད་མཁན་མེད་ལ། རྫ་མ་བཟོ་བའི་ལག་རྩལ་གྱི་རྒྱུན་མ་ཆད་པར་དཀར་ཡོལ་བཟོ་བའི་རྒྱུན་ཆད་པའི་རྒྱུ་མཚན་གང་ཡིན། དུས་ནམ་ཙམ་ཆད་པ་ཡིན་སོགས་དཔྱད་བྱར་གྱུར་ཅིང་། དེབ་འདིའི་ནང་ཐག་གཅོད་དགོས་པའི་གནད་དོན་ཞིག་མིན་ཡང་། བོད་ཀྱི་ལོ་རྒྱུས་ཐོག་ལག་ཤེས་འདི་དར་མྱོང་བས་དྲན་སྐུལ་ཙམ་དུ་བྲིས་པའོ།  །