༡ ཁེལ་སྒ་གཞོག་ཐབས།
དང་པོ་སྒ་འཇོག་བྱེད་ཀྱི་རྒྱུ་ཤིང་ཆེས་ཡང་ཤོས་ནི། སྟག་པ་ཤིང་དང་གྲོ་བ་ཤིང་བཅས་ཡིན།
      སྒ་འཇོག་བྱེད་ཀྱི་ཤིང་སྐྱེས་ཡོད་ས་ནི་ཤིང་ནགས་ཆེ་སའི་ངོ་གཟར་མོའི་ན་ཤིང་རང་འགུག་ཅན་ཡག་ཤོས་རྣམས་སྐྱེས་ཡོད། སྒ་ཤིང་ཕུད་རྗེས་དེ་ནས་སྒའི་སྔ་རུ་དང་ཕྱི་རུ་གཉིས་གཞོག་དགོས་ཤིང་འཇོག་བྱེད་ཀྱི་ལག་ཆ་སྟེའུ་རྩེག་དང་འབུས་ཁ་འོར་སོགས་དགོས། སྒ་སྔ་རུ་ལ་ཡ་ཐོད་སྟེང་དུ་བུ་ག་གྲུ་བཞི་མ་ནར་མོ་ཕར་ཚུར་གཉིས་ལ་རེ་རེ་འབིགས་དགོས། ཁྱོན་བུ་ག་གཉིས་དགོས། སྒ་ཕྱི་རུ་ལ་བུ་ག་སྒོར་མོའམ་ཟླུམ་པོ་ཕྱོགས་རེར་བུ་ག་རེ་རེ་བཅས་ཁྱོན་བུ་ག་གཉིས་རེ་ཕུག་དགོས།  ཡང་དེའི་འོག་ཏུ་སྒ་འཛེར་རྒྱག་སའི་བུ་ག་ཆུང་ཆུང་སྒ་སྔ་རུ་དང་ཕྱི་རུ་དང་ཕྱི་རུ་གཉིས་ལ་བུ་ག་གཉིས་རེ་གཉིས་རེ་བཅས་ཁྱོན་བཞི་རེ་ཕུག་དགོས།   སྔ་རུ་ཕྱི་རུ་གཉིས་འབྲེལ་བྱེད་དྲལ་འུ་གཉིས་གཞོག་དགོས། དྲལ་འུའི་མགོ་མཇུག་གཉིས་ནི་སྔ་རུའི་བུ་ག་གྲུ་བཞི་ནར་མོའི་ནང་དུ་བཅུག་རྒྱུ་གཅིག་དང་ཕྱི་རུའི་བུ་ག་ཟླུམ་པོའི་ནང་ལ་བཅུག་རྒྱུའི་སྒའི་དྲལ་འུའི་ཤིང་གི་སྣེ་མོ་ལ་དེ་ལྟ་བུའི་བཟོ་དབྱིབས་ཕུད་དགོས། དེ་ནས་སྒ་ལ་ཡག་ཤིང་ལེབ་ལེབ་ཆ་གཅིག་གཞོག་དགོས་ཤིང་ཡག་མ་ཤིང་གི་རྒྱབ་ཏུ་སྒ་སྔ་དང་ཕྱི་རུ་གཉིས་ཀྱི་སྣེ་འགྲམ་ཡག་མའི་ཤུར་ལམ་གཉིས་ཀྱི་ནང་དུ་སྦྲག་དགོས། ཡག་མའི་ཤུར་ལམ་རེའི་འགྲམ་ཡག་རྩར་སྒ་འཛེར་རྒྱག་སའི་བུ་ག་བཞི་རེ་འབིག་དགོས། ཞར་བྱུང་སྒའི་ཐག་ཆ་ལ། གློ་དང་གོང་ཐག   སྙེད་ཐག   སྙེད་ལྕིབས་ (ལྗིབས་ཡང་འབྲི)བཅས་སོ། །
     རྟ་སྒ་གཞོག་ཐབས།
རྟ་སྒ་གཞོག་བྱེད་ཀྱི་རྒྱུ་ཆ་རྟ་སྒའི་ཤིང་བཅད་ས་འགྲོ་སྐབས།སྒ་མཁན་གྱིས་མི་ཤེད་ཆེན་ཁ་ཤས་ཁྲིད་ནས་ས་མཐོ་ས་དང་ནགས་མང་པོ་ཡོད་ས་ལ་ཉི་མ་མང་པོ་འདུག་རྒྱུ་བྱས་ནས་ཟ་རྒྱུ་གྱོན་རྒྱུ། ཐབ་ཆ། སྟ་རེ། རྐོ་མ་སོགས་ཁུར་ནས་རྟ་ཞོན་ཟོག་དེད་ནས་རྟ་སྒ་གཞོག་བྱེད་ཀྱི་ཤིང་གི་རྒྱུ་ཆ་འཚོལ་སར་འགྲོ་དགོས། རྟ་སྒ་གཞོག་བྱེད་ཀྱི་ཤིང་ལ་སྟག་པ་ཤིང་གི་རྩ་བྲད་སྦོམ་ལ་རང་འགུག་ཅན་བཟང་བས། ཤིང་སྡོང་རྩ་བ་བརྐོས་ནས་སྒ་འོས་མིན་བཅས་ལ་སྒ་མཁན་རང་ཉིད་ཀྱིས་བརྟག་དཔྱད་བྱ་དགོས། གལ་སྲིད་སྒ་ཤིང་གཞོག་བྱེད་ཀྱི་རྒྱུ་ཆ་མི་ཉན་ན་སྐྱུར་རྒྱུ་དང་ཉན་ན་གཅད་དགོས། སྒ་ཤིང་བཅད་ཚར་རྗེས་སྒ་མཁན་གྱིས་ཆེ་གཞོག་ཡག་པོ་བྱས་ནས་རྟ་ཟོག་སོགས་ལ་བཀལ་ནས་ཁྱིམ་དུ་དྲངས་ནས། ཟླ་བ་ལྔ་དྲུག་གམ་ལོ་གཅིག་གཉིས་ཙམ་ལ་བསྐམ་བཅུག་ནས་ད་གཟོད་རྟ་སྒ་གསར་པ་གཞོག་དགོས།
     རྟ་སྒ་ལ་གཞོག་ལུགས། དེ་ནས་སྒ་གཞོག་མཁས་པ་ཞིག་གིས་གཞོག་དགོས། རྟ་སྒ་སྔ་རུ་བཞོགས་ཚར་རྗེས་སྒ་སྔ་རུའི་ངོས་ལ་སྲོལ་རྒྱུན་ལྟར་འབུར་རིས་བརྐོ་རྒྱབ་ནས་མཛེས་ཆ་ཕུད་དགོས། དེ་ནས་སྒ་ཕྱི་རུ་བཞོགས་ནས་འབུར་ཆ་བཅས་སྔ་རུ་དང་ཕྱི་རུ་གཉིས་ཆ་ཚང་བ་བཞོགས་ཚར་རྗེས། ད་གཟོད། སྔོན་གྱི་རྟ་སྒ་ལ་བདེ་མོ་ཞིག་ལ་དཔེ་བལྟས་ནས། སྒའི་ཡོག་མ་ལ་ཤུར་ལམ་དང་བུ་ག་ཕུག་རྒྱུག་སོགས་བཟོས་ཚར་རྗེས་སྒའི་སྔ་རུ་དང་ཕྱི་རུ་གཉིས་ཀྱི་ནང་ཡང་ཡང་སྤྲད། དེ་ནས་ཡོག་མ་བཞོགས་ནས་བུ་ག་ཕུག་རྒྱུ་དང་སྔ་རུ་དང་ཕྱི་རུ་གཉིས་ཀྱི་སྦྲག་སའི་ཤུར་ལམ་རྐོ་རྒྱུ་དང་སྒ་མཛེས་རྒྱག་སའི་བུ་ག་ཕུག་ཚར་རྗེས་སྒ་འཛེར་བརྒྱབ་ནས་ཡོག་མ་གཉིས་སྤྲད་དགོས།
       བོད་ཀྱི་རྟ་སྒའི་ཁྱད་ཆོས་ལ། སྔ་རུ་མཐོ་ལ་ཕྱི་རུ་དམའ་བ། སྔ་རུ་དྲང་པོ་བསླངས་ཤིང་ཕྱི་རུ་ཅུང་ཟད་བསྙལ་བའི་རྣམ་པ་ཅན། སྔ་རུ་དང་ཕྱི་རུ་གཉིས་ཀ་རྒྱ་ཆེ་བ་སོག་སྒ་དང་རྒྱ་སྒ་ལས་ཁྱད་པར་ཅན་ཞིག་སྟེ། སྒ་ཁོག་དོགས་ཆེ་ན་རྟའི་རྒྱབ་གཅད། ལེབ་ཆེ་ན་འགྱུར་སླ། སྔ་རུ་དང་ཕྱི་རུ་མཐོ་ཆེ་ན་བལྟད་ལ་མི་བདེ། ཧ་ཅང་དམའ་ན་བརྗིད་དང་མཛེས་ཆ་མེད་པས་སྒ་མཁན་གྱི་ཉམས་མྱོང་དང་སྒ་དཔེ་ལེགས་པོ་ལ་དཔེ་བྱ་རྒྱུ་གལ་ཆེའོ། །སྒའི་གཞོག་ཐབས་གཉིས་འདི་རིག་བསྟན་གྱི་རྩོམ་ཡིག་ལས་དྲངས་པའོ། །