ཡིག་འབྲུ་འཕག་མི་ཤོར་བར་ཚུར་གཞོག་པ་དང་།དེ་རྗེས་གསེག་ཁ་མར་བསྐོར་ནས་ཡང་གཞན་བྱེད་པ་ལས་འཕྲལ་དུ་ཟུར་ལ་བཅར་མི་རུང་བ་དང་།རྐང་འབྲིང་གི་ཡི་གེ་རིགས་བྱུང་ཚེ་ཟབ་རྩེ་འཕྲོད་པ་བྱེད་དེ་བཟོ་རྐུབ་དང་གས་བརྗེས་མི་འབྱུང་བ་དང་།གཙང་སྒྲོས་སལ་སིལ་མེད་པ་ནི་ཡིག་འབྲུ་ཀུན་ལ་ཐོག་མཐའ་བར་གསུམ་དུ་གཟབ་གལ་ཆེ།ཡིག་གཟུགས་ཀྱི་ལག་དང་།མགོ་སྐེ།སྦོ་ཟགས་མཆུ།ཕྲག་གོང་དང་ཁོག་གི་ཟབ་རྩེ་འཕྲོད་པ།ལི་ཁམས་འཛར་གསུམ་དོད་པ།རྐང་འགྲིག་སྦོ་འགྲིག་སོགས་སྙོམས་དགོས་པའི་རིགས་ལ་མཉམ་པར་བརྐོ་ཞིང་།གསེག་འགྲོས་དང་།རྐང་པ་དང་།མིག་དང་སྦ་སོགས་ནང་གསེས་ཀྱི་ལག་ལེན་ཞིབ་ཅིང་ཕྲ་བ་ཀུན་ལ་མཁས་ཤིང་བྱང་པ་ན།གཞུང་འདིའི་བོད་ཡིག་འབྲི་ཐབས་ལས་འབྱུང་བ་བཞིན།གཅེས་པ་བརྒྱད་དང་།འདོན་པ་བཅུ་བཞི།མ་ཆོས་ཉེར་གཅིག །སྤྱི་ཆོས་གསུམ།བུ་ཆོས་བཅུ་དྲུག་བཅས་བོད་ཀྱི་ཡི་གེའི་ཁྱད་ཆོས་དྲུག་ཅུ་རྩ་གཉིས་རྣམས་ཀྱང་རང་བཞིན་གྱིས་ཐོན་པར་འགྱུར་རོ།། དྲུག་པ།ཞུ་དག་དང་རྐོ་བཙུགས་བྱ་ཐབས་ལ།པར་ཤིང་བརྐོས་ཟིན་སླད།སྨྲར་ཞུ་དང་།བསྐྱར་ཞུ་དང་།ཡང་ཞུ་དང་།ཞུ་རྒྱན་བཅས་ཐ་ནའང་ཞུ་དག་ཐེངས་བཞི།རྒྱས་པ་ལ་ཞུ་དག་ཐེངས་བདུན་རེ་བྱེད་སྲོལ་ཡང་སྣང་བས་གང་ལྟར་ཡང་ཞུ་དག་ལེགས་པར་བགྱི་བ་དང་།
ཆག་གས་དང་འབྲུ་ནོར་ཡོད་སར་སླར་རྐོ་བཙུག་བྱ་དགོས་ལ།རྐོ་བཙུགས་བྱེད་ཐབས་ནི།པར་ཤིང་སྣུམ་སྲོལ་མ་བྱེད་གོང་དུ་རྐོ་བཙུགས་བྱ་ཡུལ་གྱི་བུ་ག་གཏོད།སྣུམ་སྲོས་བྱས་ཟིན་རྗེས་ད་གཟོད་རྐོ་བཙུགས་བྱེད་དགོས་ཏེ།པར་ཤིང་ལ་རང་ཤིང་གིས་རྐོ་བཙུགས་བྱེད་ན་གོ་འབུར་མཉམ་པ་དང་།ཤིང་གཞན་གྱིས་བཙུགས་ན་ཅུང་ཟད་འབུར་དོད།རླུང་རྟའི་པར་ཤིང་སོགས་ཤིང་གྱེན་དུ་བསླངས་པའི་རིགས་ལ་ཅུང་ཟད་དམའ་དགོས་པ་ནི་ཉམས་མྱོང་རྒན་པོའི་བསླབ་བྱ་ཡིན་ལ།ཤིང་གང་ཞིག་གིས་བཙུགས་ཀྱང་བཙུག་ཡུལ་གྱི་བུ་ག་ཅུང་ཆུང་ལ་ཟབ་ཙམ་དང་།ཤིང་གཟེར་སྦོམ་ཙམ་བཟོས་ནས་དངོས་སུ་འཛུགས་སྐབས་བུ་གའི་ནང་སྤྱིན་ཆུ་བླུགས་ཏེ་བཙུག་ཤིང་ཅུང་ཟད་རྡུང་རྒྱུ་ཡོད་པ་བྱེད་ན་མི་ལྷུང་ཡུན་དུ་གནས་པའི་གནད་ཡོད་དོ།
བརྒྱད་པ།རི་མོ་བརྐོ་ཐབས་ལ།རི་མོ་རྐོ་བྱེད་ཀྱི་ལག་ཆ་ནི།གོང་སྨོས་ཡི་གེ་རྐོ་བྱེད་ལག་ཆས་གཞིར་བྱས་ཐོག །རྐོས་གྲི་མེ་ལོང་ཁ་དང་བཟང་ཁ་གཉིས་བསྣན་དགོས་ཤིང་།དེ་རེ་རེ་ལའང་ཆེ་ཆུང་གསུམ་རེ་སྟེ་ལག་ཆ་དྲུག་བསྣན་དགོས།པར་ཤིང་གི་རྒྱུ་སྤྱིར་ཡི་གེ་བརྐོ་གཞི་དང་འདྲ་བར།རི་མོའི་པར་ཤིང་དེ་དཔེ་ཆའི་པར་ཤིང་ལས་ཆེ་བས་དེ་མཚུངས་སྡོང་པོ་སྦོམ་ལ་ཤིང་རྒྱུ་བཟང་བ།རུལ་སྐྱོན་དང་འཛེར་མ་མེད་པའི་སྟག་པའི་ཤིང་ལེབ་དེ་ཤིང་སྣ་འཚོ་བ་དང་ཤིང་སྣ་འདེད་ལུགས་མ་ནོར་བར་པར་ཤིང་ཆེ་འབྲིང་རིགས་མཐུད་སྦྱར་སྲུབ་མེད་ལེགས་པ་གལ་ཆེ།
རི་མོའི་པར་ཤིང་རྐོ་མཁན་གྱི་ཆ་རྐྱེན་ནི།རྐོས་རིས་མི་འཁྲུགས་པར་རི་མོའི་ལམ་ཙམ་ཤེས་པ་དང་།རྐོས་ཀྱི་ལག་རྩལ་ལ་བྱང་བ་ཡི་གེ་དང་རི་མོ་ཉུང་བསྡུས་སོགས་མང་ཙམ་རྐོས་མྱོང་བ།ལས་ཀར་ཞིབ་ཚགས་ལྡན་ཕྱིར་སེམས་རྣམ་དུ་ཕབ་པ་བཅས་སོ།། རི་མོ་དངོས་རྐོ་བར།རི་མོའི་པར་རྩ་མ་ལེགས་ན།པར་ཤིང་ལེགས་པོ་ཡོང་ཐབས་མེད་ལ།ཐོག་མར་རི་མོ་མཐོང་ན་ཉམས་དགའ་བ་ཞིག་བྲིས་ནས་ཡི་གེའི་པར་རྩ་བཞིན་སྦྱར།དེ་སྟེང་རི་མོའི་སྲང་དབྲག་གི་དབྱིབས་མི་འདྲ་བ་ལ་ཆེ་ཆུང་གི་སྒོ་ནས་རེས་འགར་ཟབ་རྩེ་དང་རེས་འགར་རྐང་གདན་བཞག་པ་སོགས་ཆེ་རྐོས་གཙུག་སྟེས་བྱས་ནས།ཟུར་ཁུག་དང་འཁྱུག་པའི་རི་མོའི་རིགས་ལ་གཙུག་སྐྱོབ།སྦྲེལ་མཚམས་རྣམས་གཙང་བ།རི་མོ་གུ་དོག་ལ་ལག་འགོ་གྱེན་སློང་དང་གདིང་ཟབ་ལ་དཀར་སོ་ཕྱུང་བ་སོགས་བྱའོ།། རི་མོ་རྐོ་བྱེད་ཀྱི་ལག་ཆ་སྤྱོད་སྟངས་ནི།རི་མོ་བར་སྟོང་དབྲག་རིས་དང་མཐུན་པར།གྲུ་བཞིའི་རིགས་ལ་བཟང་ཁ།ཟླུམ་པོའི་རིགས་ལ་སྦོ།ཟུར་གསུམ་རིགས་ལ་གསེག་གཅོད།ཟླ་གམ་རིགས་ལ་མེ་ལོང་ཁ་སོགས་སྐབས་བསྟུན་དུ་སྤྱོད་པར།རི་མོའི་བར་གྱི་དཀར་ཆའི་དབྱིབས་གྲུ་བཞི་དང་།ཟུར་གསུམ།ཟླུམ་པོ་གང་བྱུང་ཡང་ཆེ་སར་ཁྱི་ཕག་དོང་ཞིག་ཟབ་བྲུད་དང་།ཆུང་སར་སྲིན་བུའི་ལམ་སྟེ་གཤོང་རིས་དོད་ཙམ་གྱི་སྐྱོན་དང་།རི་མོ་སྦྲེལ་མཚམས་ལ་ནག་ཆ་ལྷག་པའི་སྐྱོན་དང་།ཤ་རིས་དང་རིང་འཐེན་གྱི་སར་ཡོ་འཁྱོག་གི་སྐྱོན་དང་།རི་མོ་དོག་སར་གཏིང་ཟབ་ཏུ་རྐོ་མ་ཐུབ་པའི་སྐྱོན་དང་།གོས་རིས་སོགས་ལ་བཀྱག་མནན་མེད་པའི་སྐྱོན་དང་།མེ་རིས་སོགས་སྣེ་ཅན་གྱི་རི་མོ་གཞོག་མ་ཐུབ་པས་སྣེ་མོ་སྦོམ་པའི་སྐྱོན་སོགས་སྤང་ནས་རི་མོའི་ཉམས་ཐོན་པ་ནི་གལ་ཆེ་སྟེ།ཤིང་པར་གྱི་ཡིག་གཟུགས་ཇི་ལྟར་ཞན་ཀྱང་ཀློག་ཉན་ལ།རི་མོ་རྡུགས་ན་འདྲེ་དང་འདྲ་ཟེར་བས་ཧམ་པས་གང་བྱུང་དུ་བརྐོ་མི་རུང་། གཞན་ཡང་།ཇོ་དར་པར་ཤིང་གྱེན་དུ་བསླངས་ན་རྐོ་བའི་རིགས་ལ་རྐང་གདན་མེད་ལ་ཡི་གེའི་ལྟག་མགོ་ནས་བར་ལྷུ་ལེན་པ་དང་།།ཚེག་མི་དགོས་པར་བཤད་པ་དང་།པར་ཤིང་རྐོ་སྐབས་རྐོ་མཁན་ལུས་དྲང་པོར་འདུག་དགོས་ཏེ།ཡོ་འདུག་གིས་ལག་མགོ་འཇོག་སྟངས་ངན་པར་གོམས་ན་ཡི་གེ་ཡོ་འགྲོ་བས།འདུག་སྟངས་དང་ལག་མགོ་འཇོག་སྟངས་ཡང་དག་པས་ཡི་གེའི་ཆེ་བཅད་གྲུ་བཞིའི་དབྱིབས་སུ་བརྐོས་ནས།ཡི་གེ་ལ་ཡོ་འགྱིང་མེད་པ་རྒྱལ་པོ་ཁྲི་ལ་བཞུགས་པ་བཞིན་རང་ཚུགས་ཟིན་པ་ཞིག་དགོས་ཚུལ་དང་།ལྷ་རིས་ཀྱི་རི་མོ་ཕྲ་ཞིབ་དང་སྤྱད་སོགས་རྐོ་སྐབས།འུར་སྒྲ་དང་སེམས་འཁྲུགས་པ་མེད་པ།སྐར་ཁུང་ཁ་ལྷོར་བསྟན།ཤར་ཕྱེས་ཤིང་མདུན་རི་ལ་ནགས་ཚལ་ཡོད་པ།ནམ་མཁའ་གཡའ་དྭངས་ཤིང་སྤྲིན་དཀར་ཕྱུར་བའི་ཉིན་ཕྱེད་རྟའི་དུས་ལ་བརྐོས་ན།གསལ་ཆ་ཆེ།རིག་པ་དྭངས།རྣམ་གཡེང་སྤང་།ངལ་དུབ་མེད་པ་སོགས་ཀྱིས་རྐོས་ལེགས་པོ་འོང་བ་དང་།ཡི་གེ་རྐོ་བར།པར་རྩ་ལེགས་པ་རྣམས་དཀར་ཆ་དང་ནག་ཆ་མཉམ་པར་བརྐོ།བྲིས་ངན་དག་ནག་ཆ་ལས་དཀར་ཆ་ལྡབ་ཕྱེད་ཉིས་ཆེ་བར་བྱས་ཏེ་པར་རྐོ་མཁས་པས་གང་དགོས་ལྟར་སྨྱུག་ཁམ་སྤོ་སྣུར་གྱིས་ལེགས་པར་བཅོས་ཆོག་པ་སོགས་ནི་པར་རྐོ་མཁན་པོའི་ཞལ་རྒྱུན་ཡིན་ནོ།།