༡རྡོ་རྐོས་ཀྱི་ལོ་རྒྱུས།
སྤྱིར་བོད་དུ་རྡོ་རྐོས་ཀྱི་ལག་རྩལ་དར་སྔ་ཞིང་།ལག་རྩལ་དེ་ལས་ལོ་རྒྱུས་དང་རིག་གནས་ཀྱི་རིན་ཐང་ལྡན་པའི་དངོས་པོ་མང་པོ་བྱུང་ཡོད་པ་ནི།སྟོད་མངའ་རིས་ཕྱོགས་ནས་མི་ལོ་ལྔ་སྟོང་ཡན་དུ་བརྐོས་པའི་བྲག་རྐོས་ཀྱི་རི་མོ་རྙེད་པ་དང་།བོད་རྒྱལ་ཐོག་མ་གཉའ་ཁྲི་བཙན་པོའི་སྑབས་ཕོ་བྲང་ཡུམ་བུ་བརླ་སྒང་བརྩིགས་པ་དང་།ལྷ་ཐོ་ཐོ་རི་གཉན་བཙན་སྐབས་མཆོད་རྟེན་བང་རིམ་གསུམ་པ་རྡོ་ལ་བརྐོས་ཚུལ་འཁོད་པ་དང་།སྲོང་བཙན་གྱི་དུས་ཐུ་མིའི་ཕྱག་བྲིས་རྡོ་ལ་བརྐོས་པའི་ཀ་ཆེན་གྱི་ཡི་གེ་དྲུག་མ་དང་།འབིས་རྣམ་པར་སྣང་མཛད་ཀྱི་སྐུ་གཟུགས་དང་རྡོ་ལ་བརྐོས་པའི་མཚན་བྱང་བཅས་ད་ལྟའང་མཇལ་དུ་ཡོད་པ་དང་།ཁྲི་སྲོང་ལྡེ་བཙན་སྐབས་བསམ་ཡས་བཀའ་གཙིགས་ཀྱི་རྡོ་རིང་དང་།ངོ་མཚར་རྡོའི་མཆོད་རྟེན་རྣམ་པ་ལྔ་ལ་སོགས་བཟོ་དངོས་ཁྱད་དུ་འཕགས་པ་དང་།གྲུབ་ཆེན་ཐང་སྟོང་པ་སོགས་ཀྱིས་རྡོའི་རིན་ཆེན་རིགས་ལ་བརྐོས་པའི་མཁའ་འགྲོ་སྡེ་ལྔ་དང་།གཡུའི་སྒྲོལ་མ་དང་།དུང་གི་ཐུགས་རྗེ་ཆེན་པོ།བྱུ་རུའི་ཚེ་དཔག་མེད།པདྨ་ར་གའི་འོད་དཔག་མེད་སོགས་བྱིན་རླབས་ཀྱི་ཚན་ཀ་འབར་བ་རྣམས་དང་།ཕྱིས་སུ་བརྐོས་པའི་རྒྱ་ནག་མ་ཎི།དཔལ་སྤྲུལ་མ་ཎི།མི་ཉག་གསེར་རྒྱ་སྒོའི་རྡོ་འབུམ་ཆེན་པོ་སོགས་སྲིད་ན་འགྲན་ཟླ་དང་བྲལ་བ་མང་པོ་བཞུགས་ལ།ཁྱད་པར་དུ་ཡིག་དྲུག་དང་རྒྱལ་བའི་བཀའ་འགྱུར་སོགས་རྡོ་ལ་བརྐོས་པའི་རྡོ་འབུམ་འདི་འདྲ་བ་ནི་མི་རིགས་གཞན་སུ་ལའང་མཐོང་དཀའ་བ་ཡོད་དོ།།
༢རྡོ་རྐོས་ལག་ཆས་ཀྱི་སྟ་གོན།
རྡོ་རྐོས་ལེགས་པ་ལ་ཐོག་མར་རྡོ་མགར་བྱེད་དང་།རྡར་བྱེད་དང་།གཞོག་བྱེད།རྐོ་བྱེད།འབིག་བྱེད་བཅས་རྐོས་བཟོ་དངོལ་ལ་མཁོ་བ་དང་།དེའི་ཞོགས་འདེགས་ལ་མཁོ་བའི་ཐིག་སྐུད།ཚད་ཤིང་།ཚགས་པར་རིགས་སྣ་ཚོགས་སོགས་ཏེ།རྐོ་བྱེད་ལག་ཆས་ཀྱི་གཙོ་བོར་གཟོང་དང་ཐོ་བ་གཉིས།ཐོ་བ་ལ་དབུ་ཆེན་དང་སྐུ་འདྲ་ཆེན་པོ་རིགས་བརྐོ་བར་མཁོ་བའི་ཐོ་བ་ཕྱོགས་ཆ་ལྡན་དབྱིབས་རིལ་ཞིང་ཕྱོགས་གཅིག་རྣོ་བ་ཡུ་བ་རིང་ཐུང་འཚམས་ཤིང་འཛིན་བདེ་བའི་ཆེ་ཆུང་སྣ་ཚོགས།གཞན་ཡང་རྡོ་སྟ་ཞེས་རྡོའི་ཟུར་སོགས་ཆེ་གཅོད་དུ་མཁོ་བའི་དབྱིབས་དགྲ་སྟ་དང་ཕྱོགས་མཚུངས་དང་།ཐོ་བ་མཆུ་ལེབ་ཅེས་ཕྱོགས་གཅིག་ཐོ་བ་སྤྱི་དང་མཚུངས་པ་ལ་ཕྱོགས་གཅིག་ཕྲེད་ལེབ་སྨྱུ་གུའི་མཆུ་དང་མཚུངས་ལ་ཅུང་ཞིག་གུག་པ།ཐོ་བ་བྱ་མཆུ་མ་ཞེས་ཕྱོགས་གཅིག་རིལ་ཞིང་རྣོ་བ་དང་།ཐོ་དབྱིབས་གྲུ་བཞི་ཟུར་བརྒྱད་སོགས་སྣ་ཚོགས་པའོ།། རྐོ་བྱེད་གཟོང་གི་རིགས་ལ།ཐོག་མར་ལྕགས་ཀྱི་རྒྱུ་གལ་ཆེ་སྟེ།ལྕགས་ཀྱི་རྒྱུ་མཁྲེགས་ཆེ་ན་ཆག་སླ་ཞིང་གཟོང་སོ་གྲུག་ཉེན་ཡོད།མཉེན་དྲག་ན་གཟོང་ཡུ་འཁྱོག་ཉེན་དང་སོ་ཁ་འགྱུར་ཉེན་ཡོད།ངར་མེད་ན་སོ་རྡུགས་སླ་བ་ཡིན་པས།རྡོ་རྐོས་ཀྱི་གཟོང་གི་རྒྱུ་ནི་རྣོ་དབལ་ངར་གསུམ་ཅུང་ཟད་མཉེན་དང་ལྡན་ལ་ཁྱད་པར་རྡོའི་རིགས་ལ་མཆོག་ཏུ་རྣོ་བའི་གངས་ལྕགས་ཀྱི་རིགས་ལས་བཟོ་དགོས་པར་བཤད་དོ།། གཟོང་མགར་བར་སྤྱིར་རིང་ཐུང་སོར་བདུན།ཆེ་བའི་རིགས་ལ་སོར་བརྒྱད་ནས་བཅུའི་བར།ལྷ་སྐུ་དང་དབུ་ཆེན་རིགས་ཀྱི་རྐོ་གཟོང་ཡུ་བ་རིང་ལ་ཅུང་ཟད་སྦོམ་པ།ཡིག་ཆུང་རྐོ་བྱེད་ཀྱི་གཟོང་ཡུ་བ་ཕྲ་ལ་ཅུང་ཟད་ཐུང་བ་བྱས་ན།ལག་སྒྲིལ་ལམ་གཟོང་ཁ་བསྐོར་བདེ་བའི་གནད་ཡོད།ཅེས་རྡོ་རྐོ་རྒན་པོའི་ཉམས་མྱོང་ཡིན་ལ།གཟོང་སོའི་དབྱིབས་ནི།གཟོང་ཁ་ལེབ་ཅིང་དྲང་པོར་བཅད་པ་སྤྱི་འགྲོས་ཀྱི་གཟོང་དང་།སེན་མོའི་དབྱིབས་ལྟ་བུ་སེན་གཟོང་།སོ་ཁ་གསེག་བཅད་བྱས་པའི་གསེག་གཟོང་།གཟོང་རྩེ་མཐེ་བོང་ལྟ་བུ་ཡུ་བའི་དཀྱིལ་སྦོམ་སོ་ཞིང་ས་ཁ་ཆེ་བའི་བཞར་གཟོང་དང་།སོ་ཁ་དྲང་བཅད་ལེབ་མོ་གཟོང་སོའི་ཕྱོགས་ཀྱི་བཞི་ཆ་ཙམ་ནས་རྒྱ་བསྐྱེད་ནས་སོ་ཁ་རྒྱ་ཆེ་བའི་གཞོག་གཟོང་སྟེ།གཟོང་འདི་གཉིས་ལ་ཤིང་ཡུ་སྤྲད་པའང་ཡོད།གཞན་ཡང་གཟོང་ཟུར་བརྒྱད་ཞ་སྨྱུག་གཞོག་པ་ལྟ་བུའི་འབིག་གཟོང་དང་།གཟོང་སོའི་ཕྱོགས་གཉིས་འབུར་ཞིང་དབུས་སྟོང་པ།རྡོ་ལ་རི་མོ་བརྐོ་དུས་གཤོང་འབུར་གསུམ་རེ་དོད་ཐུབ་པའི་གསེར་གཟོང་སོགས་མདོར་ན་རྡོའི་ངོས་འཇམ་བརྡར་དང་རི་མོ་གཤོང་འབུར་སོགས་གང་ལ་གང་འཚམས་ཀྱི་གཟོང་སྣ་ཚོགས་ཡོད་དོ།། རྡོ་རྐོས་ཀྱི་ལག་ཆས་གཞན།ཐིག་སྐུད།ཚད་ཤིང་།མཐོང་སྐོར།སྐུ་གཟུགས་དང་དབུ་ཆེན་རིགས་ཀྱི་ཚགས་པར་སྤུས་ལེགས་ཆེ་ཆུང་སྣ་ཚོགས་དང་བརྡར་རྡོ་བཅས་ནི་མེད་དུ་མི་རུང་བ་ཡིན།
༣བརྐོ་གཞི་རྡོའི་དབྱེ་བ།
བོད་ཡུལ་གྱི་བརྐོ་གཞི་རྡོའི་རིགས་ལ།རྡོ་ཀ་མ་རུ་དཀར་པོ།ཆུ་རྡོ་དང་དུར་ཁྲོད་ཀྱི་རྡོ་ཞེས་གྲགས་པའི་རྡོ་ནག །སྤང་རྡོ་ཕྱི་སོབ་ཅིང་རྡོ་སྙིང་སྲ་བའི་སེར་པོ།གཡའ་རྡོ་སྔོན་པོ་རིམ་པ་གོག་སླ་བ་དེ་མ་ཡིན་པ།བྲག་ལ་རིམ་བཞིན་བཀོག་ཆོག་ཏུ་ཡོད་པའི་རྡོ་སོབ་སྐྱ་བོ་བཅས་གཙོ་བོ་ལ།དེ་མིན་ཆུ་རྡོ་དང་རྫ་རྡོ།འདྲེ་རྡོ་སོགས་རྡོ་སྲ་མཁྲེགས་ཅན་གྱི་རིགས་བརྐོས་པ་ཉུང་ཙམ་དང་།པདྨ་ར་ག་དང་གཡང་ཊི།གཡུ་སོགས་རིན་ཆེན་རིགས་ཀྱི་རྡོ་ལ་བརྐོ་བའང་ཡོད་དོ།། རྡོ་སྲ་མཁྲེགས་ཅན་དང་གྲུག་སླ་བའི་རྡོའི་རིགས་ལ་རི་མོ་དང་ཡི་གེ་བརྐོ་ན།རྡོ་དེ་ས་རླན་ཅན་གྱི་དོང་དུ་རླན་ཕབ་ནས་བཞག་པའམ།སྟབས་མ་བདེ་ན་རྩ་དང་ཤིང་ལོ་རླན་དང་བཅས་པས་ཡུན་དུ་བཀབ་ནས་རྡོ་སྙིང་དང་བཅས་བངས་བ་བྱས་ཏེ་བརྐོ་བ་ནི་རྡོ་མཉེན་འབོལ་སྣ་རིང་འབྱུང་བའི་མན་ངག་གོ།།