༤རྡོ་རྐོས་ཀྱི་དབྱེ་བ།
བོད་ཀྱི་རྡོ་རྐོས་ལ་འབུར་མ་དང་།གཤོང་མ།འོབས་འབུར་མ།གཙག་མ།ལེབ་མ།འབྲུ་མ་དྲུག་ལ་འདུ་བར་བཤད་ལ། དང་པོ།འབུར་མ་བརྐོ་བ་ནི།འབུར་མ་ལ་ཡོངས་འབུར་དང་ཕྱེད་འབུར་གཉིས་ཏེ།ཡོངས་འབུར་ནི་བླུགས་སྐུ་ལྟ་བུ་མདུན་རྒྱབ་ཐམས་ཅད་འབུར་དུ་ཐོན་པར་བྱེད་པ་དང་།ཕྱེད་འབུར་ནི་མདུན་འབུར་བ་ལས་རྒྱབ་ལེབ་མོ་བྱེད་པ་དེ་ཡིན།ཡོངས་འབུར་ནི་སྐུ་གཟུགས་དང་མཆོད་རྟེན་ཙམ་ཡིན་ལ་བོད་ཀྱི་ལག་ཤེས་ལས་བཞེངས་པའི་རྡོའི་ཡོངས་འབུར་གྱི་བརྐོས་མ་འབོར་ཆེན་མེད་མོད།ཕྱེད་འབུར་གྱི་གཙོ་བོར་མ་ཎི་དབུ་ཆེན་དང་ཡི་གེ་བརྒྱ་པ།བཀའ་འགྱུར་གྱི་དབུ་ལྡེབ་སོགས་ཡིན་ལ།བརྐོ་ཐབས་ལ་ཐོག་མར་རྡོ་རྐོས་སྤྱི་དང་འདྲ་བར་བརྐོ་གཞི་རྡོའི་དབྱིབས་དང་ངོས་ལེགས་པར་བཅོས་པའི་སྟེང་ཐིག་དང་རི་མོ་ལེགས་པར་བཀོད།དེ་ནས་སྐུ་གཟུགས་དང་ཡི་གེ་གང་ཡིན་པ་དེའི་སྟོང་ཆ་ཟབ་ཏུ་བརྐོ།སྟོང་ཆ་ཇི་ཙམ་ཟབ་ཏུ་བརྐོ་ཐུབ་ན་འབུར་ཆ་དེ་ཙམ་དུ་འབུར་དུ་ཐོན་པ་ཡིན་པས་ཟབ་ཏུ་བརྐོ་བ་གཅེས་ལ།ཡི་གེ་འབུར་མ་ཡིན་ན་འབུར་ཆའི་ངོས་སྙོམ་ལ་འཇམ་པོ་བྱ་ཐུབ་པས་ཆོག་མོད།སྐུ་གཟུགས་རིགས་ནི་སླར་ཡང་སྐུ་དང་རྒྱན་གོས་གཙོས་པའི་བཀོད་པ་ཐམས་ཅད་ཕྱེད་འབུར་གྱི་འགྲོས་དང་མཐུན་པར་བརྐོས་པའི་ཐོག་གཞོག་བརྡར་ལེགས་པར་ཐུབ་དགོས།། འབུར་མ་བརྐོ་བར་གཟབ་བྱ་ནི།སྐུ་གཟུགས་རིགས་བརྐོ་བར་རི་མོའི་མདུན་རྒྱབ་དང་།སྟེང་འོག །གོས་ཀྱི་ཕྱི་ནང་སོགས་མི་འཁྲུག་པར་གཟབ་གལ་ཆེ་བ་དང་གཅིག །འབུར་མ་བརྐོ་གཞིའི་རྡོ་དེ་སྤྱིར་བཏང་གི་རྡོ་ལ་བྱ་མི་འོས་པས་ངེས་པར་དུ་རྡོའི་སྤུས་ལེགས་ཤིང་འབོལ་བ།སྲ་སྙི་རན་པ།རིམ་པ་མང་བའི་གཡའ་རྡོའི་རིགས་མིན་པས་གོག་སྐྱོན་མི་འབྱུང་ཞིང་།རྡོ་སྣ་ཐུང་བས་གྲུག་སྐྱོན་སོགས་མེད་པའི་བརྐོ་གཞི་སྤུས་ལེགས་གདམ་གལ་ཆེ་བ་དང་གཉིས།འབུར་མ་རིགས་གཏིང་ཟབ་དང་ཡུན་རིང་བརྐོ་དགོས་པས་ཆག་གོག་གྲུག་གསུམ་གྱི་སྐྱོན་འབྱུང་ཉེན་ཆེ་བས་ཐོག་མཐའ་བར་གསུམ་དུ་བརྐོ་གཞི་རླན་དང་མི་འབྲལ་བ་གལ་ཆེ་བ་དང་གསུམ།རྡོ་རྐོས་ལ་ཐང་ག་ལྟ་བུའི་རི་མོ་ཞིབ་ཚགས་མི་ཡོང་ཞིང་།རི་མོ་ཉོག་དྲག་ན་རྐོས་པ་ལའང་དཀའ་ཚེགས་ཆེ་བ་མ་ཚད་སྤུས་ལེགས་ཐོན་དཀའ་བས་རི་མོ་ཉུང་ལ་ཉམས་དང་ལྡན་པ་གལ་ཆེ་བ་དང་བཞི།རྡོ་རྐོ་མཁན་དེ་རི་མོ་དང་ཡིག་གཟུགས་ཀུན་ལ་མཆོག་ཏུ་མཁས་པ་ཞིག་ཡིན་ན་དེས་ཆོག་མོད།དེ་ལྟར་ཤིན་ཏུ་དཀོན་པས་དུས་རྒྱུན་པར་མ་ཎི་དབུ་ཆེན་བྲིས་ལེགས།སྐུ་གཟུགས་ཐིག་རྩ་ཚད་ལྡན་ཉམས་ཅན་ཉར་ཚགས་དཔེ་བཤུས་ཀྱིས་ཚགས་པར་བྱེད་ན་འབུར་རྐོས་མགྱོགས་ཤིང་ལེགས་པ་གཉིས་ཀར་མཁོ་གལ་ཆེ་བ་དང་ལྔ་ནི་ཉམས་མྱོང་གི་གཏམ་མོ།། གཉིས་པ།གཤོང་མ་བརྐོ་བ་ནི།དེའང་བརྐོ་བྱ་ཡིག་དྲུག་དབུ་ཆེན་དང་།རྡོ་རིང་།གཟུངས་སྔགས་ཉུང་བསྡུས་སོགས་སྤུས་ཟབ་ཏུ་བརྐོ་བ་སྟེ།བརྐོ་གཞི་ལེགས་བཅོས།ངོས་བརྡར་དང་ཐིག་རིང་ཐམས་ཅད་གོང་གི་འབུར་མའི་རྐོ་ཐབས་ལས་བཤད་ཟིན་པ་དང་ཕྱོགས་མཚུངས་ལ།གཤོང་འབུར་བརྐོ་བའི་ཁྱད་པར་གཙོ་བོར།འབུར་མ་ནི་ཡིག་འབྲུ་དངོས་འབུར་དུ་ཐོན་པ་དང་།གཤོང་མ་ནི་དེ་ལས་ལྡོག་སྟེ་སྟོང་ཆ་འབུར་ཞིང་ཡིག་འབྲུ་དངོས་ཟབས་སུ་ཕབ་པ་དེ་ཡིན།དེ་ལའང་བརྐོ་སྟངས་གཉིས་ཡོད་དེ།ཡི་གེ་སྨྱུག་རིས་ཀྱི་ཕྱོགས་གཉིས་ནས་ནང་ཕྱོགས་ནས་ཟབས་སུ་བརྐོས་ཐོག་ནང་འཇམ་པོར་བརྡར་ནས་ནང་ངོས་འོབས་ལ་སྙོམ་པ་ཡི་གེ་དངོས་ཟབས་སུ་བརྐོས་པའི་དབྱིབས་ལེབ་མོར་གྱུར་པ་དང་།སྨྱུག་རིས་ཀྱི་ཕྱོགས་གཉིས་ནང་ནས་ཕྱོགས་སུ་ཇེ་ཟབ་ཇེ་ཟབ་ཏུ་བརྐོས་པས་དབུས་ཟབ་ཅིང་སྨྱུག་རིས་ཀྱི་མཐའ་གཉིས་རིམ་བཞིན་གཡེལ་བར་གྱུར་པ་གཉིས་ཏེ།སྔ་མ་དེ་ཡིག་འབྲུ་ཆེ་ཞིང་ཉུང་བའི་རིགས་འཚམས་ཤིང་།ཕྱི་མ་དེ་ཡིག་འབྲུ་འབྲིང་པོ་སྤུས་ལེགས་རྡོ་རིང་གི་ཡི་གེ་ལྟ་བུ་ལ་འཚམས་ཤིང་ཡུན་དུ་གནས་པའི་ཁྱད་ཆོས་ཡོད་དོ།། གསུམ་པ།འོབས་འབུར་ཁ་སྤྲོད་བརྐོ་བ་ནི།བརྐོ་གཞི་རྡོ་སོགས་བཅོས་བརྡར་གོང་ལྟར་ལ།བརྐོ་བྱ་ཡིག་དྲུག་སོགས་དབུ་ཆེན་དང་ཡིག་འབྲུ་ཉུང་ལ་ཆེ་བའི་རིགས་ལས་གཞན་ལ་བྱ་དཀའ་སྟེ།བརྐོ་ཐབས་སྨྱུག་རིས་ཀྱི་ཡས་མཐའ་མས་མཐའ་གཉིས་ནས་དཀར་བཅད་སུམ་མདངས་ཀྱི་བཅད་རིས་དང་མཚུངས་པའི་རི་མོ་སྦོམ་ལ་སྙོམ་པ་ཞིག་བརྐོས་ཐོག་དཀྱིལ་འབུར་དུ་ཐོན་པ་བྱེད་པ་དང་།ཡང་ན།གོང་སྨྲོས་འབུར་བརྐོ་ཐབས་ལྟར་ཐོག་མར་སྟོང་ཆ་ཟབ་ཙམ་བརྐོ།དེ་ནས་ཡིག་འབྲུ་སྨྱུག་རིས་ནང་ཕྱོགས་ནས་ཕྱོགས་གཉིས་སུ་བཅད་རིས་སྦོམ་པོ་ལྟ་བུ་ཞིག་བཞག་ཐོག་དེའི་ནང་ཕྱོགས་ཟབ་ཏུ་བརྐོ་བ་བཅས་རིགས་གཉིས་ཡོད་ལ།གང་ལྟར་ཡང་ཡིག་འབྲུ་རེ་ལ་གཤོང་འབུམ་གསུམ་རེ་འགྲོ་དགོས་པས།དཀའ་ཚེགས་ཧ་ཅང་ཆེ་ལ་དེ་བཞིན་སྒྱུ་རྩལ་གྱི་རིན་ཐང་ཡང་ཡོད་དོ།། སྔོན་གྱི་རྡོ་རྐོས་མཁས་པས་འོབས་འབུར་ཁ་སྤྲོད་ཀྱི་དབུ་ཆེན་ཡི་གེ་དྲུག་མ་དང་།བཀའ་འགྱུར་གྱི་དབུ་ལྡེབ་རྒྱ་གར་སྐད་དུ་སོགས་ལ་སྟེང་དུ་དྲ་བ་དྲ་ཕྱེད་དང་།མཚམས་སུ་བཀྲ་ཤིས་པའི་རི་མོ།མ་དང་ཎ་ཨ་སོགས་མིག་དང་ཁུག་ལ་མེ་ཏོག་བརྐོས་པའི་སྒྱུ་རྩལ་གྱི་ཕུད་དང་བསོད་ནམས་ཀྱི་དཔལ་གྱིས་ཕྱུག་པའི་རྐོས་རྡོ་སྤུས་ལེགས་ཀྱང་མཇལ་དུ་ཡོད་དོ།།
བཞི་པ།བཙགས་མའམ་གཙག་མ་བརྐོ་བ་ནི།བརྐོ་གཞི་རྡོ་ལེབ་དང་རྡོ་རིལ་དང་རུང་གི་ངོས་ལེགས་པར་བརྡར་བའི་སྟེང་བཙགས་སྨུག་ལེབ་བྱུག་བྱས་པའི་སྟེང་ནས་ཡི་གེ་དང་རི་མོ་གང་རུང་བརྐོས་པས་བརྐོ་གཞི་དམར་སྨུག་ལ་ཡི་གེ་དང་རི་མོ་དཀར་པོ་འབྱུང་བས་མཛེས་ཁྱད་ཡོད་པ་དང་།བཙགས་སྨུག་དེ་ས་རྡོའི་རིགས་ཏེ་མདོག་མི་འགྱུར་ཡུན་དུ་གནས་པའི་ཁྱད་ཆོས་ཅན་ཏེ།གཙག་མ་ནི་དབུ་ཆེན་རིགས་ལ་བྱ་སྟེ།ཡིག་འབྲུ་གཙགས་སྨུག་རང་མདངས་ཅན་ལ་མཐའ་ནས་འབུར་མ་བརྐོ་ཐབས་ཀྱིས་འབུར་དུ་བརྐོས་ཐོག་ཡི་གེའི་མིག་དང་ཁུག་བར་སྟོང་།མཐའ་ཐམས་ཅད་ཐོ་གཟོང་གིས་གཙག་པས་སྦལ་རྒྱབ་མ་བྱས་པས་གྲུབ་ལ།བརྐོ་གཞིའི་རྡོ་ལ་བཙགས་སྨུག་བྱུག་པས་རྒྱུའི་སྒོ་ནས་བཙགས་མ་དང་།བར་སྟོང་ཐོ་གཟོང་གིས་གཙག་པས་གཙག་ཞེས་འདོད་དེ།གང་ལྟར་ཡང་རྡོ་རྐོས་ཀྱི་ལག་ལེན་འདི་བྱ་སླ་ཞིང་བཀྲག་མདངས་ཁྱད་ཆོས་ཡོད་པས་རྐོ་མཁན་མང་བ་དང་།གཞི་བཙགས་སྨུག་ལ་ཡིག་དྲུག་གི་ཡིག་འབྲུ་གཞུང་བསྟུན་ཚོན་ཁྲ་བྱས་པའང་ཡོད་དོ།། ལྔ་པ།ཚེག་མ་བརྐོ་བ་ནི།བོད་གངས་ཅན་དུ་མ་ཎི་རྡོ་དུང་དུ་གྲགས་པ་དང་།བཀའ་འགྱུར་རྡོ་བརྐོས་མ་སོགས་ཀྱི་རྡོ་འབུམ་རྒྱ་ཆེ་བ་གང་བཞུགས་པ་ཐམས་ཅད་རྐོས་བཟོ་འདི་ལས་བྱུང་བ་ཡིན་ལ།སྤྱིར་བརྐོ་བྱ་རྒྱ་ཆེ་ཕྱིར་དབུ་ཆེན་དང་སྐུ་གཟུགས་རིགས་བརྐོ་བའི་གཞི་དང་འདྲ་བར་རྡོའི་དབྱིབས་བཅོས་དང་ངོས་བརྡར་མི་གཏུབ་ལ།རྡོའི་རང་བཞིན་རང་སོར་བཞག་ཐོག་ཡིག་འབྲུ་ཆེ་ཆུང་གང་འདོད་ལྟར་གཟོང་ཁ་ཆེ་ཆུང་གིས་བྱ་ལ།གཟོང་ཁ་སྐོར་སྟངས་མཁས་ཤིང་བྱང་བ་ནི་ཚེག་མ་རྐོས་ལེགས་པའི་གནད་ཀྱི་དམ་པ་སྟེ།དེའི་གོ་རིམ་ནི།ཐོག་མར་འགོ་ཚག་ལེན།དེ་རྗེས་དཔུང་པ་སྐོར།དེ་ནས་བར་ཆོད་སྐོར།དེ་ནས་སྦོ་མཉེན་དང་རྐང་པ་བརྐོ།ཐ་མར་འདོགས་དང་དབྱངས་སོགས་ཡི་གེ་བཀླག་ཐབས་ཀྱི་རིམ་པ་བཞིན་བརྐོ་དགོས།
ཚེག་མ་བརྐོ་བའི་ཁྱད་ཆོས་ལ།ཐོག་མར་མགོ་ཚག་རྐོ་བར་མགོ་ཚག་ཉིས་ལེན་དགོས་པ་བཤད་པ་ནི།ཡིག་མགོ་རྐོ་བར་གཡོན་ནས་གཡས་དང་གཡས་ནས་གཡོན་དུ་གཟོང་ཁ་ཐེངས་གཉིས་ཕན་ཚུན་བསྣོལ་ནས་བརྐོ་དགོས་ལ།དེ་ལ་ཡིག་འབྲུ་གཏིང་ཟབ་པ་དང་ཡིག་གཟུགས་ལེགས་པའི་དགོས་པ་ཡོད་དོ།། རྡོ་རྐོ་རྒན་པོ་རྣམས་ཀྱི་ངག་རྒྱུན་མན་ངག་མི་ཉག་མཁྱེན་རབ་འོད་གསལ་གྱིས་ཕྱོགས་གཅིག་ཏུ་བསྡེབས་པ་ནི།ཨ་མིག་མ་མིག་ན་མིག་གསུམ།མཚོ་སྔོན་མོའི་ནང་གི་ཉ་མིག་དགོས།ས་རྐེ་ད་རྐེ་ཧྰྭ་རྐེ་གསུམ།བྲག་ནང་གླ་བའི་རྐེ་འདྲ་དགོས།གུག་གུ་བྱ་རོག་ཤ་བཏོག་དགོས།ཞབས་ཀྱུ་ཉ་མོ་ལྕགས་ཀྱུ་དགོས།འགྲེང་བུ་སྤང་ལ་མདའ་ཟུག་དགོས།ན་རོ་ཐང་དཀར་གཤོག་བརྒྱང་དགོས།ཞེས་གསུངས་པ་བཞིན་ལ།རྡོ་རྐོས་ཀྱི་རིགས་ལ་ཚེག་མ་ཞེས་པ་ནི་ཡི་གེའི་ཚེག་ཁྱིམ་གྱི་སྒོ་ནས་བཏགས་པའམ།ཡང་ན་རྡོ་རྐོ་སྟངས་ཤིན་ཏུ་མགྱོགས་པས་ཚེག་གི་སྒྲའི་སྒོ་ནས་བཏགས་པར་བཤད་དོ།།
ཚེག་མ་བརྐོ་བར་གཟབ་གལ་ཆེ་བ་ནི།ཚེག་མ་བརྐོ་བྱ་ཕལ་ཆེ་བ་བཀའ་འགྱུར་དང་མ་ཎི་དུང་སོགས་འབོར་ཆེ་བ་རྣམས་ཡིན་ཕྱིར།གོང་གི་རྡོའི་རྒྱུ་འདེམས་ཐབས་དང་བཅོས་ཐབས་ལས་བཤད་པ་ཇི་བཞིན་འབྱུང་དཀའ་ཡང་།ཆག་གས་གྲུག་གསུམ་གྱི་སྐྱོན་ཆེར་མེད་ཅིང་ངོས་ལེགས་པ་ལ་ཡི་གེ་དག་སྙོམས་འགྲིག་གསུམ་ཟབ་ཚད་དང་ལྡན་པ་ཞིག་བརྐོ་བ་གལ་ཆེ་སྟེ།ཟ་འདོད་དང་མགྱོགས་འདོད་ཀྱིས་བརྐོ་སྟངས་ཤིན་ཏུ་ཞན་པ་ལ་ནི།ཐེའུ་རང་གིས་སྦར་འདེབས་བྱས་པ་འདྲ་ཞེས་པའི་མིང་ངན་དེ་མི་འབྱུང་བ་དང་།བརྐོས་ཟིན་པར་རབ་ན་སྨར་ཞུ་དང་།ཡང་ཞུ་དང་ཞུ་རྒྱན་ཏེ་ཞུ་དག་ཐེངས་གསུམ།མ་ཐ་ཡང་སྨར་ཞུ་ཞེས་ཡི་གེ་ཀློག་བཟང་ལ་སྒྲ་དག་པ་ཞིག་གིས་རྡོ་རྐོས་ཀྱི་ཡི་གེ་བཀླགས་ཤིང་གཞན་གཅིག་གིས་མ་དཔེའི་དཔེ་ཆར་བལྟས་ནས་ཞུ་དག་ཞིབ་ཚགས་པ་ཞིག་འགྲོ་དགོས།སྤྱིར་རྒྱལ་བའི་བཀའ་དང་གཟུངས་སྔགས་རིགས་རྡོ་ལ་བརྐོ་བ་ནི་བོད་ཀྱི་ལག་ཤེས་ཀྱི་གྲུབ་ཆ་སྒྱུ་རྩལ་གྱི་རིན་ཆེ་བ་དང་།དེའི་ཕན་ཡོན་བརྗོད་ལས་འདས་ཀྱང་།རྐོས་ངན་ལྷག་ཆད་ཅན་ལ་ནི་ཉེས་པ་ཆེན་པོ་འབྱུང་བས་རྐོས་པ་རྣམས་ཀྱིས་རང་གཞན་གཉིས་ཀར་ཕན་བྱ་བར་འབད་པ་གལ་ཆེ་ཚུལ་མཁས་པ་དུ་མས་གསུངས་སོ།། དྲུག་པ།འབྲུ་ཆེན་བརྐོ་བ་ནི།འབྲུ་ཆེན་ནམ་འབྲུ་མ་ཞེས་པ་ནི།བྲག་ངོས་དང་།རྡོ་ལེབ་ཆེན་པོ།ཕ་བོང་དཔངས་ཞིང་ཆེ་བའི་ངོས་བཅོས་བརྡར་བྱས་ཐོག །ངོས་རེ་ལ་ཡིག་འབྲུ་ཤིན་ཏུ་ཆེ་ཞིང་གཏིང་ཟབ་འབུར་ཁྱད་ཅན་རེ་བརྐོས་ནས་གྲུབ་པ་དེ་ཡིན་ལ།བརྐོ་བྱ་ཕལ་ཆེར་ཡི་གེ་དྲུག་མ་ཡིན་པས་འགའ་ཞིག་གིས་ཡིག་དྲུག་རྡོ་དྲུག་ཅེས་འབོད་པ་སྟེ།རྐོས་ཡོན་ནི་འབྲུའི་ཆེ་ཚད་དང་འབུར་ཚད།ཡིག་གཟུགས་ལེགས་ཤིང་རྒྱང་མཛེས་ཆེ་ཚད།ཡི་གེའི་བར་མཚམས་སྟོང་ཆ་ཟབ་ཏུ་བརྐོས་ཚད་བཅས་ལ་གཞིགས་ནས་ཡོན་འབུལ་དགོས་པས།ཡིག་གཟུགས་ཆེ་ཞིང་འབུར་ཁྱད་ཅན།ཨ་མིག་མ་མིག་སོགས་ཀྱི་ཁུ་བུ་རེའི་ནང་ཆུ་ཟངས་དཀར་ཆེན་པོ་གང་རེ་ཤོང་བ་དང་།ཡིག་འབྲུ་རེ་ལ་བརྐོ་ཡོན་འབྲི་མ་རེ་བྱིན་པ་ཡིག་དྲུག་འབྲི་མར་གྲགས་པ་ཡོད་དོ།། དམངས་ཁྲོད་ཀྱི་ངག་རྒྱུན་དུ།འབྲུ་ཆེན་བརྐོས་པའི་ཕན་ཡོན་ནི།གཤིན་རྗེ་ཆོས་ཀྱི་རྒྱལ་པོས་གཤིན་པོའི་དགེ་སྡིག་རྒྱ་མར་འགྱོག་སྐབས་འབྲུ་ཆེན་བརྐོ་གཞིའི་རྡོ་དེ་ཇི་ཙམ་ལྗིད་པ་དེ་ཙམ་གྱིས་རྒྱ་ཁ་ལོངས་པ་དང་དགེ་བའི་བསོད་ནམས་ཀྱང་དེ་ཙམ་ཆེ་ཞེས་བཤད་སྲོལ་ཡོད་དོ།
 རྡོ་རྐོས་ཀྱི་ཤེས་བྱ་འདི་ནི་རྡོ་དྲིལ་གྱིས་བྲིས་པའི་《བོད་ཀྱི་རྡོ་རྐོས་རྣམ་བཞག་མཐོང་བ་ཀུན་བཏུས་》ཞེས་པར་གཞིར་བཞག །ལག་ལེན་དངོས་ལ་མཁོ་བའི་ཤེས་བྱ་གཙོ་བོར་དམིགས།རང་གི་ལག་ལེན་གྱི་ཉམས་མྱོང་ཕྲན་བུས་ཁ་གསབས་ཏེ་གོ་བདེ་བར་བཀོད་པ་ལགས་སོ།།