གཙང་སྤང་གཙང་མཐིང་ནི་བོད་ཀྱི་རི་མོ་རྩ་ཆེན་རིགས་སུ་སྤྱོད་པའི་ཚོན་དཀོན་ཞིང་རིན་ཐང་ཅན་ཞིག་སྟེ།འབྱུང་ཁུངས་བོད་ཀྱི་གཙང་ཁུལ་ཡིན་པའམ་ཚོན་ཚད་ལྡན་ལྷད་མེད་པའི་དོན་གྱིས་མིང་དེ་ལྟར་གྲགས་སོ།།འདིའི་ལག་ལེན་ལ་མཁས་གྱུར་ན།སྡེབ་སྦྱོར་མ་ཡིན་པའི་ཚོན་སྦྱང་བཏུལ་གྱི་བྱ་ཐབས་ཁོ་ནར་བརྟེན་ནས་ཁ་དོག་རིགས་དུ་མར་བསྒྱུར་ཆོག་པ་དང་།ཚོན་གཞན་ལས་ལྷག་པའི་དགེ་མཚན་དུ་མ་མངའ་བ།རིན་ཐང་གསེར་ལས་ལྷག་པ་ཞིག་སྟེ།སྔོན་གྱི་ཐང་ཀ་རྩ་ཆེན་རིགས་ལ་གཙང་སྤང་གཙང་མཐིང་དང་གསེར་ལ་སོགས་རིན་ཆེན་རིགས་ཀྱི་ཚོན་ལས་བྲིས་ཞེས་བཤད་པ་དེ་ཡིན།རིན་ཆེན་དང་པོ་གསེར་དུ་བགྲངས་མོད་ཀྱང་།གསེར་གྱི་ཐོག་མར་གཙང་སྤང་གཙང་མཐིང་ཞེས་སྨྲ་བ་ཐོས་སོ།
 འདིའི་ལག་ལེན་རགས་པ་ནི། ཐོག་མར་དཀར་ཡོལ་སོགས་སྣོད་གཙང་མའི་ནང་དུ།སྤྱིན་ཆུ་འདྲེས་ཙམ་གྱི་ཆུར་མང་ཉུང་ཇི་ལྟར་འདོད་པའི་གཙང་སྤང་ངམ་ཡང་ན་གཙང་མཐིང་སྤུས་ལེགས་བྱེ་མ་ལྟ་བུ་དེ་སྦངས་ལ།འདུལ་བུས་ཡུན་དུ་བཏུལ་མཐར།ཡུད་ཙམ་བགྲུངས་ཏེ་ཚོན་ཕྱེ་དང་འདྲེས་པའི་ཁ་ཆུ་སྣོད་གཞན་དུ་དྭངས་བཞུར་བྱ།དེ་ལྟར་ཡང་ཡང་བཏུལ་བ་ལ་ཐེངས་རེ་ལས་ཐེངས་རེར་ཁ་དོག་སྐྱ་བ་འབྱུང་བས།སྤྲིན་གྱི་ཁ་དོག་དོགས་སྐྱའི་རིགས་ཀྱི་རྒྱུ་མཆོག་ཏུ་བཤད་དོ།། གཉིས་པ།དྭངས་བཞུར་ཐེངས་གཅིག་བྱ་ཟིན་པའི་སྙིགས་མ་ཡང་དུ་བཏུལ་བའི་དྭངས་མ་སྔ་ལྟར་སྣོད་གཞན་དུ་བླུགས་པས་ཞིབ་ཏུ་བཏུལ་བ་དེ་ལ་སྤང་མཐིང་གི་ཁ་དོག་དཀྱུས་མ་ཙམ་འབྱུང་བས་སྤང་མཐིང་སྤྱི་ལྟར་སྤྱོད་པའི་མདོག་མཆོག་ཏུ་གྱུར། གསུམ་པ།གོང་གི་དྭངས་བཞུར་ཐེངས་གཉིས་ལས་ལུས་པའི་སྙིགས་མ་ཞིབ་ཏུ་བཏུལ་བ་དེ་ལ་སྤང་ནག་དང་མཐིང་ནག་བཅས་རིགས་གསུམ་འབྱུང་ཞིང་།ལག་ལེན་ཞིབ་པ་དེ་རེ་རེ་ལའང་གསུམ་གསུམ་དུ་བྱ་ཆོག་པར་མཁས་པའི་ངག་རྒྱུན་ལས་ཐོས་སོ།། ཚོན་ཐུལ་མིན་བརྟག་ཐབས་ནི།།ཚོན་གྱི་འདུལ་བུ་ཚོན་གྱི་ནང་དུ་བསླངས་ན་མི་འགྱེལ་བ་བྱུང་བ་དེ་འདུལ་ཐུབ་པའི་ཚད་དུ་བཤད་དོ།། མདོར་ན།ཚོན་འདི་དཀོན་ཞིང་རིན་ཐང་ཆེ་བ།ལག་ལེན་དཀའ་བ།ལག་ལེན་མཁས་གྱུར་ན་ཁ་དོག་ཕུན་སུམ་ཚོགས་པ་འབྱུང་བ།མདོག་ཚོན་གཞན་གྱི་མི་བརྫི་བ།མི་ཉམས་ཡུན་དུ་གནས་པ་བཅས་ཏེ།ཐང་ཀ་དང་ལྡེབས་རིས་སོགས་རི་མོ་རྩ་ཆེན་རིགས་ལ་མེད་ཐབས་མེད་ལ།བོད་བཟོའི་ལག་ཤེས་ཀྱི་གྲུབ་ཆ་དང་ཁྱད་ཆོས་གཙོ་བོ་ཞིག་ཀྱང་ཡིན་པས།ལྷ་བཟོ་ཚད་དང་ལྡན་པ་ཞིག་གིས་གོང་གི་ལག་ལེན་ལ་མཁས་པ་གལ་ཆེ་བར་སྣང་ངོ་།།