གསེར་གྲང་འདུལ་བྱེད་ཐབས་ལའང་རྒྱས་བསྡུས་གཉིས་ཏེ།དང་པོར་རྒྱས་པ་ལ་གསེར་བཙོ་མའམ།བཞུས་མ་གང་ཡང་རུང་བ་ལ་ཀོ་བ་ཡངས་པ་བཏིང་བའི་ལྕགས་ཀྱི་ཏི་ཅིའི་སྟེང་དུ།སྦྲང་བུའི་འདབ་གཤོག་ཙམ་གྱི་སྲབ་མཐུག་ཏུ་བརྡུངས་ལ་ཞིབ་ཏུ་གཏུབ་ནས།མཚོ་ཚྭ་དཀར་པོ་ལྷད་མེད་གསེར་གྱི་སུམ་འགྱུར་ཙམ་དུ་གཏུན་ལེགས་གཙང་ལ་རླན་ཅུང་ཟད་ཕབ་ལ་བརྡུང་།དེ་ནས་ཆུ་ཚན་གྱིས་ཚྭའི་བྲོ་བ་མེད་པར་བཀྲུས་ཤིང་སྤྱིན་གྱི་དྭངས་མ་སྣག་སྤྱིན་གྱི་དམ་ཚོད་ཙམ་དང་ཆང་གསེར་གྱི་བདུན་འགྱུར་ཙམ་བླུགས་ལ་རྡོ་གཏུན་བཟང་པོར་སླར་ཡང་འདུལ།རྡུལ་བྱ་རྩི་ལྟར་དུལ་མ་རྣམས་རིམ་པར་ཐུར་འགོས་བླངས་ནས་དཀར་ཡོལ་དུ་བསགས།རྡུལ་དང་སྐྱོན་མི་ཤོར་ཞིང་ཡང་ཆང་སྤྱིན་སྔ་མ་ལྟར་བསྣན་ནས།འདུལ་སྦྱངས་རིམ་པར་བྱས་མཐར་ཆུས་བཀྲུ་བཤལ་གྱིས་ཆང་དང་སྤྱིན་གྱི་རོ་མེད་པར་བཀྲུས་སླད་སུག་པའི་ཁུ་དྭངས་ཀྱིས་སྦྱར་སྐམ་ལན་མང་བྱ།དེ་ལྟར་སྦིར་ལེན་པ་ལན་ཚྭ།གཡའ་གཅོད་པ་ཆང་།དྲི་འདོན་ལ་སྤྱིན།དག་བྱེད་སུག་པ་ཡིན་པས་གལ་ཆེ།གསེར་གྱི་ཁ་དོག་བསྒྱུར་བར་འདོད་ན་སྟར་བུ།སེའུ་འབྲུ།སེར་མཚུར་བཟང་པོ་གསུམ་གྱི་ཁུ་དྭངས་སྙིགས་མེད་པའི་མེ་ཉོབ་ཁར་དལ་བུས་བཙོ་ལ་སྔར་ལྟར་རྫས་ཀྱི་རོ་མེད་པར་བཀྲུ་བཤལ་བྱས་རྗེས་དམར་སེར་འདོད་ན་བཙོད་ཀྱི་ཁུ་དྭངས་གར་མར་བཙོ།སེར་སྣུམ་འདོད་ན་མྱང་རྩི་སྤྲས་དང་ཁ་ཆེའི་ཁུ་བར་བཙོ།དམར་བར་འདོད་ན་བོང་ང་དམར་པོའི་རྩ་བ་སྟོད་ནས་བྱུང་བའི་ཁུ་བས་བཙོ།གང་གིས་བཙོས་ཀྱང་བཙོས་ཟིན་རྗེས་སྐྱ་མཉེད་མི་བྱེད་པར་ཆུ་གྲང་བརྒྱབ་ནས་གྲུང་བཅུག་སྟེ་བཤལ་དོར་ལན་གཅིག་བཅས་བྱའོ།།