ལྗང་བཙོ་ནི་གསེར་བཞུས་ཞུན་ལིང་ལྗང་བརྡུང་བྱ།སྲབ་མཐུག་གི་ཚད་ནི་གསེར་ཞོ་རེ་ལ་ཞེང་སོར་དོ་རེ་དང་།དཀྱུས་མཐེབ་མཛུབ་གང་མ་བར་དུ་བརྡུང་བའི་བྱང་བུ་ལ་ཚྭ་དང་སྟར་བུའི་ཁུ་བ་སླ་མོས་བྱུགས།སྐམ་ནས་བཙོ་ཐལ་དུ་བཞག་ལུགས་དང་ཐམས་ཅད་གོང་གི་འབྲུ་བཙོ་ལྟར་བྱ་ཞིང་།བཙོ་སྒམ་ལ་གས་ཆག་སོགས་ཀྱི་རླུང་གསེང་ཤོར་ན་གསེར་ཞུ་ནས་ཐིག་པོར་འདྲིལ་ཉེན་ཡོད་པས་གཟབ་དགོས།བཙོ་སྤྲད་ལེགས་པའི་མཚན་ཉིད་ནི་དམར་སེར་ལི་ཁྲིའམ་གུར་གུམ་གྱི་མདོག་ལྟ་བུ་འབྱུང་བས་ལྗང་བཙོ་གལ་ཆེ་སྟེ།འདི་མ་སོང་བའི་འབྲུ་བཙོ་རྐྱང་པས་ལེགས་པོ་མི་འོང་ཞིང་འབྲུ་ལྗང་གཉིས་ཀ་སོང་ན་ཤིན་ཏུ་ལེགས།ཚ་གསེར་དང་གྲང་གསེར་གང་བྱེད་ལྗང་བཙོ་ཐེངས་གཅིག་གིས་ཆོག །ལྗང་བཙོ་མ་བྱས་པའི་འབྲུ་བཙོ་གཅིག་པུས་ལེགས་པོ་མི་འབྱུང་ཞིང་།ཁྱད་པར་གསེར་ཤོག་བྱེད་རྒྱུ་ཡིན་ན་བཙོ་ཐག་ཆོད་ངེས་དགོས་པས་འབྲུ་བཙོ་དང་ལྗང་བཙོ་གཉིས་ཀ་འགྲོ་བ་གལ་ཆེའོ།། གསེར་བཙོ་སྤྲད་བྱས་རྗེས་ལྕི་ཚད་ལ་ཆད་འཕྲི་ངེས་ཅན་ཞིག་འབྱུང་བར་དེའི་ཆད་ཚད་ནི།གསེར་སྤུས་རབ་ལ་དགུ་ཆ་གཅིག་ཆད་པ་དང་།དེ་བཞིན་དུ་འབྲིང་ལ་བརྒྱད་ཆ།ཐ་མ་ལ་བདུན་ཆ་གཅིག་ཙམ་ཆད་པ་ཡིན་ཡང་།ཚ་གསེར་གྲང་གསེར་གང་ལ་སྤྱད་ཀྱང་མ་བཙོས་པ་ལས་བཙོས་པ་ཁྱབ་ཆེ་ཞིང་སྣ་རིང་བས་དོན་དངོས་ལ་ཁྱད་པར་མི་འབྱུང་བ་མ་ཟད།བཙོ་སྤྲད་བྱས་མ་བྱས་པའི་གསེར་གྱི་ཁ་དོག་ལ་ཁྱད་པར་ཤིན་ཏུ་ཆེ་བ་ཡིན་ནོ།།