ཚོན་ཆེན་བཙོ་འདུལ་སྦྱོར་གསུམ་གྱི་ལག་ཤེས།

དཀོན་མཆོག་བསྟན་འཛིན།འཕྲིན་ལས་རྒྱལ་མཚན།    བོད་ཀྱི་ལག་ཤེས་ཀུན་འདུས་ཆེན་མོ།    2011-02-25

ཚོན་ཆེན་བཙོ་འདུལ་སྦྱོར་གསུམ་གྱི་ལག་ཤེས།
གསེར་བཙོ་སྤྲད་བྱེད་པ་ལ་འབྲུ་བཙོ་དང་ལྗང་བཙོ་གཉིས་ཡོད་དེ།གཉིས་ཀ་གང་བྱེད་ཀྱང་ཐོག་མར་རྫ་ས་སྤུས་ལེགས་ཀྱིས་བཙོ་སྒམ་སྲབ་མཐུག་དང་གས་ཆག་མེད་པ།བཙོ་བྱ་གསེར་གྱི་མང་ཉུང་དང་འཚམས་ཤིང་ཁེབས་གཅོད་རང་འགྲིགས་ཡོད་པ་ཞིག་བཟོས་ནས།སེ་ཐེབས་ངེས་ཀྱིས་མེར་བསྲེགས།དེ་ནས་རྫ་མ་གསར་པ་མདོག་དམར་པོ་སྤྱོད་མ་མྱོང་བ་ཞིག་ཞིབ་ཏུ་བཏགས་པའི་ཕྱེ་མ་ལ་ཚྭ་དཀར་ལྷད་མེད་ལྔ་ཆ་ག་ཅིག་དང་མཚུར་ནག་ཚྭ་འདེབས་ཙམ་བསྲེས་ནས་ཞིབ་ཏུ་བཏུལ་བ་ལ་བཙོ་ཐལ་ཞེས་ཟེར་ཞིང་།གསེར་འབྲུ་བཙོ་དང་ལྗང་བཙོ་གཉིས་ཀར་མེད་དུ་མི་རུང་བ་སྟེ།དེ་བཙོ་སྒམ་དུ་གྲི་ལྟག་མཐུག་ཤོས་ཙམ་ཁོད་སྙོམས་པར་བཀྲམ་པའི་སྟེང་དུ།འབྲུ་བཙོ་བྱས་ན་གསེར་འབྲུ་ཐིག་པའམ།བྱེ་གསེར་དངུལ་ཆུ་དང་བྲལ་བ་དེ་དག་གཅིག་གིས་གཅིག་ལ་མ་རེག་པར་བཀོད་པའི་སྟེང་དུ་བཙོ་ཐལ་སྔ་མའི་སྲབ་མཐུག་ཙམ་བཀབ་ལ་ཡང་དུ་གསེར་གོང་ལྟར་བཀྲམ། དེའི་སྟེང་དུ་ཡང་གཅིག་སྟེ་རིམ་པར་གསུམ་ལས་མང་མི་ཉན།དེ་ལྟར་གསེར་ཕན་ཚུན་དང་ཕྱིའི་སྒམ་ལ་མ་རེག་པར་བཙོ་ཐལ་གྱིས་བར་གསེང་བཀང་ལ་ཁེབས་གཅོད་བཀབ།བར་མཚམས་ཚྭ་འདམ་དང་སོལ་ཕྱེ་བསྲེས་མས་ཞལ་བ་ལེགས་པར་བྱ།སྐམ་ནས་གས་བྱུང་ན་ཞལ་བ་ཡང་ཡང་བྱས་ཏེ་གསེང་མེད་པར་བྱ།།དེ་ནས་རྫ་མ་ཞབ་རྡོལ་ཆེན་པོ་ཞིག་གི་ནང་དུ་རྫ་སའི་རྐང་གསུམ་བཙུགས་པའི་ཁར་བཙོ་སྒམ་བཞག །རྫ་མའི་ནང་ཤིང་དང་སོལ་བས་བཀང་།ཕྱོགས་ཡོངས་ནས་རྫ་མའི་ནང་དུ་རླུང་རྒྱུ་བའི་བུ་གཏོད།བོང་མེ་བསྲེག་ཀྱང་རུང་བ་ལ་རླུང་ཆེན་ལྡང་ན་ཚ་དྲགས་པའི་ཉེན་ཁ་ཡོད་པས།རླུང་ཆེན་མི་ལྡང་བ་བྱས་ཤིང་མེ་སྤར་ནས་ཉིན་ཞག་གཅིག་བསྲེགས་རྗེས་གྲང་བ་དང་ཁ་ཕྱེ་ལ་བཙོ་ཐལ་ཆུས་བཀྲུས་ནས་བླངས་ཏེ་བཞུ་བླུག་སོགས་གང་དགོས་སྤྱད་ན་འགྲིག་གོ།


  • ལེ་ཚན་སྔོན་མ།:ཚོན་བྱུག་གི་སྔོན་དཔག
  • ལེ་ཚན་རྗེས་མ།: གསེར་ལྗང་བཙོ་བྱེད་པའི་ལག་ཤེས།
  • དོ་སྣང་ཆེ་བའི་རྩོམ།