ཚོན་འདུལ་སྦྱང་གི་ལག་ལེན་དངོས་སུ་བྱེད་པ་ལ།མཚལ་མཐིང་སྤང་གསུམ་རླན་ཅུང་ཡོད་པར་བྱས་ཏེ་ཤེད་ཆུང་ཕྱུང་ནས་བཏུལ།དཀར་ནག་སེར་གསུམ་ཤེད་ཆེན་འདུལ།བོད་མཐིང་སྤང་ཆུ་དང་བཅས་ཏེ་འདུལ།རྒྱ་མཐིང་རྒྱ་སྤང་སྤྱིན་ཆུ་བཅས་ཏེ་འདུལ།མཚལ་ནི་ངེས་པ་མེད་གསུངས་ཀྱང་།ཕལ་ཆེར་བོད་མཐིང་སྐབས་དང་མཚུངས།འདིའི་ལག་ལེན་རྒྱས་པ་གཞན་དུ་བཀོད་ཡོད།བ་བླ་སྐམ་འཐག་མདོག་དང་ལྡན།ཆུ་འཐག་ཞི་སླ་སེར་སྐྱ་འབྱུང་།གཞན་ཀུན་ཐོག་མར་སྐམ་འདུལ་བྱ།།གདུལ་བའི་སྣོད་ནི་གཙང་བ་ལ།།རྡུལ་མ་ཤོར་བར་གཟབ་པར་གཅེས།།གང་ཞིང་རྡུལ་མིག་འཛིན་གྱུར་ན།།ཆུ་ཡིས་སྦྱངས་ནས་ཡང་དུ་འདུལ།།སོགས་མང་ཡང་།དེ་ཐམས་ཅད་ནི་འདུལ་མ་མྱོང་བའི་གསར་དུ་འདུལ་དགོས་པའི་ཚོན་གྱི་རིགས་ལ་བཤད་པ་ཡིན་མོད།དེང་དུས་སུ་བཟོ་བོ་ཕལ་ཆེ་བས་བཏུལ་ཟིན་པའི་ཚོན་སྤྱོད་ཀྱིན་ཡོད་པས་དགོས་པ་ཆེར་མ་མཐོང་ཞིང་།གསེར་སོགས་རིན་ཆེན་རིགས་ཀྱི་འདུལ་སྦྱང་གི་ཤེས་བྱ་མཁོ་གལ་ཆེ་ཡང་ས་བཅད་གཞན་ལས་གསལ་བར་འགྱུར་རོ།།