ཚོན་འདུལ་སྦྱང་གི་ལག་ལེན་བྱེད་པ་ལ།ཐོག་མར་ཚོན་གྱི་རྒྱུ་བཟང་ངན་བརྟག་དགོས་ཏེ།ཇི་སྐད་དུ།ཚོན་གྱི་རྒྱུ་ནི་ངན་པ་ལ།།ཇི་ལྟར་གཟབ་ཀྱང་མདོག་མི་འོང་།།རིང་དུ་མི་གནས་ཁ་དོག་ཡལ།།དེའི་ཕྱིར་རྒྱུ་ནི་གཟབ་པར་གཅེས།།ཞེས་ཏེ་ཚོན་རྒྱུ་ངན་པ་ལ་འདུལ་སྦྱང་གི་དཀའ་བ་ཇི་ལྟར་བྱས་ཀྱང་ལེགས་པོ་མི་འོང་ཡུན་དུ་མི་གནས་པས་སྤང་དགོས་པ་དང་།ཡང་།རས་ཚོས་མི་འདྲེས་སྐུ་སྲོག་སྙི།།ཟེར་བས་ཆུ་ཚོན་དང་།རས་ཚོན།ཁྱད་པར་དུ་དེང་དུས་སྤྱོད་སྒོ་ཆེ་བའི་ཚོན་བྱེ་ལྡན་ནམ་དྲིལ་བསྒྲགས་ཀྱི་ཚོན་ཡང་ཟེར་ཞིང་ལྡུམ་དང་རྩི་ཤིང་སོགས་ལས་བླངས་པའི་ཚོན་སོགས་ཚོན་ཆེན་དག་མ་མ་ཡིན་པ་ཐམས་ཅད་སྤང་དགོས་ཏེ།དེའི་རྒྱུ་མཚན་ནི།ཚོན་དེ་དག་གིས་རི་མོ་ཐོག་མར་བྲི་དུས་ཚོན་ཁ་གསབ་བས་ལེགས་པ་ལྟར་སྣང་ཡང་།ཚོན་ཆེན་ལྟ་བུའི་བརྗིད་མེད་པ་དང་།བཀྲག་མདངས་ཡུན་དུ་མི་གནས་པར་མདོག་ཡལ་ངེས་པས་སོ།།མདོར་ན་ཐོན་ཁུངས་དང་རྒྱུ་སྤུས་ཐམས་ཅད་ལ་ལེགས་པར་བརྟགས་ཏེ་ཚོན་ཆེན་ཚོན་རྒྱུ་ལེགས་ཤིང་སྲོག་སྙི་བའི་ཚོན་གཞན་གྱིས་ལྷད་མ་ཞུགས་པ།དེང་གི་རྫས་འགྱུར་གྱི་ཚོན་མ་ཡིན་པ་དག་གིས་རི་མོ་འབྲི་བ་ནི་ཚོན་མདོག་མི་ཉམས་ཡུན་དུ་གནས་ཤིང་བོད་གངས་ཅན་གྱི་བཟོའི་རྒྱུན་གྱི་རང་ལུགས་མི་འཆོར་བའི་ཁག་ཐེག་ཀྱང་ཡིན་ནོ།།