ཚོན་གྱི་དགྲ་གྲོགས་ནི།དཀར་སེར་ཚོན་གྱི་ལོང་བ་ཡིན།།དེ་གཉིས་མ་བསྡེབ་བསེར་ཞིག་ཡོད།།དམར་ལྗང་ཚོན་གྱི་བག་མ་ཡིན།།ཚོན་མདངས་དེ་ལ་མཛེས་ཤིག་ཡོད།།སྤང་མཐིང་ཚོན་གྱི་གྲ་སྡེབ་ཡིན།།དེ་གཉིས་བསྡེབས་ན་བསིལ་ཞིག་ཡོད།།དཀར་ནག་ཚོན་གྱི་ཁྲ་བོ་ཡིན།།དེ་གཉིས་བསྡེབས་ན་བཀྲག་ཅིག་ཡོད།།ལྗང་སེར་ཚོན་གྱི་སོས་ཀ་ཡིན།།ཚོན་མདངས་དེ་ལ་དྭངས་ཤིག་ཡོད།།སེར་མཐིང་ཚོན་གྱི་མེ་ཏོག་ཡིན།།དེ་གཉིས་བསྡེབ་ན་མདོག་ཅིག་ཡོད།།དམར་སེར་ཚོན་གྱི་བླ་མ་ཡིན།།ཚོན་མདངས་དེ་ལ་སྣུམ་ཞིག་ཡོད།།དམར་ནག་ཚོན་གྱི་དྲག་པོ་ཡིན།།དེ་གཉིས་བསྡེབས་ན་རྔམ་ཞིག་ཡོད།།ཅེས་སོགས་ནི་ལྷ་བཟོ་རྒན་པོའི་ངག་རྒྱུན་ནོ།།
 སྤྱིར་ཚོན་ལ་དྲོ་གྲང་གཉིས་སུ་དབྱེ་བ་ལས།ནང་གསེས་དྲོ་བའི་དྲོ་བ་དང་།དྲོ་བའི་གྲང་བ་དང་།དེ་བཞིན་དུ་གྲང་བའི་གྲང་བ་དང་།གྲང་བའི་དྲོ་བ།གྲོགས་ཀྱིས་བསྒྱུར་བའི་དྲོ་བ་དང་།གྲོགས་ཀྱིས་བསྒྱུར་བའི་གྲང་བ།དྲོ་གྲང་འགྱུར་བ་ཅན་སོགས་ཡོད་ཅིང་།དྲོ་གྲང་འཐབ་པའི་ཐབས་ལ་བརྟེན་ནས་ཚོན་གྱི་བཀྲག་མདངས་ཕྱུང་ཐབས་ཀྱི་ཤེས་བྱ་རྒྱ་ཆེན་པོ་ཕྱི་གླིང་པའི་རི་མོའི་བསྟན་བཅོས་ལས་འབྱུང་བ་ཡང་།།འདིར་བརྗོད་བྱ་གཙོ་བོ་བོད་རིས་ཀྱི་ལག་ཤེས་ཡིན་ཕྱིར་མ་བྲིས་སོ།།