ཚོན་གྱི་ཕ་མ་བུ་ཚ་དང་དགྲ་གྲོགས་གཉིས་ལས།དང་པོ་ཚོན་གྱི་ཕ་མ་བུ་ཚ་སོགས་ནི།།ལི་མཐིང་སྤང་མཚལ་སྐག་བ་བླ།།རམས་བཅས་ཕ་བདུན་ཀ་རག་མ།།ཞེས་སྤྱིར་མཚལ་སོགས་བདུན་ནི་ཚོན་གྱི་ཕ་དང་།།ཀ་རག་གམ་དཀར་ནི་མ་སྟེ།།དེ་གཉིས་རེ་སྡེབ་སྦྱོར་བྱས་པ་ལས་བྱུང་བའི་ཚོན་གྱི་ཡན་ལག་ཐམས་ཅད་ནི་ཚོན་གྱི་བུ་ཚ་ཡིན་ནོ།། དེ་ཡང་ནང་གསེས་ལ་ལི་སྐྱ་ལི་སེར་ལིའི་བུ་སྟེ།དཀར་ལ་ལི་ཁྲི་བསྲེས་པ་ལ་ལི་སྐྱ་དང་།ལི་ཁྲིར་དཀར་དང་བ་བླ་བསྲེས་པ་ལ་ལི་སེར་ཏེ།།དེ་གཉིས་ཀྱི་རྒྱུན་ལས་སྤེལ་བ་ཐམས་ཅད་ལ་ལིའི་བུ་ཚ་ཞེས་སུ་འབོད།།དེ་བཞིན་དུ་སྔོ་སྐྱ་སྔོ་སེར་མཐིང་གི་བུ་སྟེ།།དཀར་ལ་མཐིང་མང་ཙམ་བསྲེས་པ་ལ་སྔོ་སྐྱའམ་མཐིང་སྐྱ་དང་།ཉུང་དུ་བསྲེས་པ་ལ་མཐིང་ཀའམ་མཐིང་གསལ་ཞེས་བརྗོད་དེ་དེ་ལས་འཕྲོས་པ་མཐིང་གི་བུ་ཚ་དང་།ལྗང་སྐྱ་ལྗང་སེར་སྤང་གི་བུ་ཞེས་སྤང་ལ་དཀར་བསྲེས་པ་སྤང་སྐྱ་དང་།སྤང་ལ་བ་བླ་བསྲེས་པས་སྤང་སེར་འབྱུང་ཞིང་དེའི་ཡན་ལག་ཏུ་གྱུར་པ་ལ་སྤང་གི་བུ་ཚ་དང་།།དམར་སྐྱ་མི་ཤ་མཚལ་གྱི་བུ་ཞེས།།དཀར་ལ་མཚལ་མང་ཙམ་བསྲེས་པས་དམར་སྐྱ་དང་།།ཉུང་ཙམ་བསྲེ་ན་མི་ཤ་སྟེ་དེའི་རིགས་ཐམས་ཅད་མཚལ་གྱི་བུ་ཚར་གཏོགས་པ་དང་།（ཤ་མདོག་ལ་བཟོ་བོ་ཁ་ཅིག་གིས་ལི་སྐྱ་ལས་བྱས་ན་བཟང་བར་བཤད་ཅིང་རྒྱ་ནག་གི་རི་མོ་ཡང་དེ་དང་མཐུན་པས་དཔྱད་འཚལ）ངང་མ་སེར་སྐྱ་བ་བླའི་བུ་ནི།དཀར་ལ་བ་བླ་བསྲེས་ན་སེར་སྐྱ་དང་།དེ་ལ་ལི་ཁྲི་འདྲེས་ཙམ་བསྲེས་ན་ངང་མ་སྟེ།།དེ་ལས་འཕྲོས་པའི་ཡན་ལག་ཐམས་ཅད་བ་བླའི་བུ་ཚ་དང་།།ཡང་གློ་ཁ་ཟི་ཧུང་སྐག་གི་བུ་ནི།།སྐག་སྐྱ་ལ་ལི་ཁྲི་འདྲེས་ཙམ་བསྲེས་པས་གློ་ཁ།།སྐག་སྐྱ་ལ་རྒྱ་མཐིང་གི་ཁ་ཆུ་བསྲེས་ན་ཟི་ཧུང་ངམ་ལྕགས་བཙའ་མདོག་ཏུ་འགྱུར་བས།།སྐག་སྐྱ་ཡན་ལག་དང་བཅས་པར་སྐག་གི་བུ་ཚར་བརྗོད།མཆིན་ཁ་རམས་སེ་རམས་ཀྱི་བུ་ཞེས་རམས་སྐྱ་ལ་མཚལ་བསྲེས་པས་མཆིན་ཁ་དང་།དཀར་ལ་རམས་ཉུང་ཙམ་བསྲེས་པ་ལ་རམས་སེའམ་རམས་སྐྱ་སྟེ།དེ་ལས་གྱེས་པའི་མདོག་ཀུན་ལ་རམས་ཀྱི་བུ་ཚར་འདོད་པ་དང་།གཞན་ཡང་།ཇ་ཁ་དུད་ཁ་གཡུ་ཁ་གསུམ།།ཚོན་གྱི་སྲིང་མོ་རྣམ་གསུམ་ཡིན།།ཞེས་སྦྱོར་ཐབས་ཚོན་གྱི་ཡན་ལག་སྐབས་བཤད་ཟིན་པ་ལྟར།ཚོན་གྱི་རོགས་སྐྱོར་ཙམ་ལས་རང་རྐྱ་མི་ཐུབ་པས་དེ་ལྟར་བཏགས་པར་བཤད་པ་དང་།མཚལ་སྣག་འདྲེས་པའི་སྨུག་ནག་གམ་གྲིབ་ནག་མདོག་དང་གཡོས་སོགས་སུ་འབོད་པ་དེ་ཚོན་གྱི་གཡོག་བཅས་ཡོད་པར་བཤད་དོ།། གོང་གི་ཚོན་གྱི་སྡེབ་སྦྱོར་ནི་སྤྱི་འགྲོ་ཙམ་ཡིན་པས།དེའི་ནང་དུ་མ་འདུས་པའི་ལག་ལེན་དང་མན་ངག་ཀྱང་མང་སྟེ།དཔེར་ན།འཆད་འགྱུར་ལྟར་ལྷང་ཚེར་འདུལ་སྦྱང་ལེགས་པར་བྱས་ན་ཆུ་ཤེལ་གྱི་མདོག་འོད་འཕྲོ་བ་འབྱུང་བ་དང་།དེ་ལ་ཚོན་གྱི་དྭངས་སྣ་ཚོགས་ཀྱིས་ཁ་དོག་བསྒྱུར་ན་ཤེལ་གྱི་རིགས་སྣ་ཚོགས་ཀྱི་མདོག་འོང་བས་ཁ་དོག་བསྒྱུར་གཞིའི་མཆོག་ཏུ་བཤད་པ་དང་།སྤང་སྐྱ་ལ་ཤེལ་ཀ་ར་བསྲེས་ན།ལྗང་སེར་འོད་འཕྲོ་བ་འབྱུང་བ་དང་།རྒྱ་མཐིང་ལ་སྤང་སྐྱ་འདྲེས་ཙམ་སྲེས་ནས་བཏུལ་ན་མདོག་ཤིན་ཏུ་ལེགས་པོ་འོང་བ་དང་།ལི་ཁྲི་དང་མཚལ་ཆ་མཉམ་པ་བསྲེས་ན་པདྨ་རྰ་གའི་མདོག་མཆོག་ཏུ་གྱུར་པ་འབྱུང་བ་དང་།དེ་ལ་མཚལ་གྱི་ནང་དུ་དཀར་བསྲེས་ནས་བྱེད་པའང་ཡོད་ཀྱང་པདྨ་རྰ་གའི་མདོག་དང་ཆ་ཙམ་ཡང་མི་འདྲ་ཞིང་ཚོན་ཁ་ཡང་མི་གསལ་བས་མི་ལེགས་པ་སོགས།མན་ངག་དང་ཉམས་མྱོང་གི་གཏམ་ཡང་མང་པོ་ཡོད་དོ།།