༢ མཐིང་ཤོག་བཟོ་བའི་ལག་ཤེས།
གསེར་བྲིས་དངུལ་བྲིས་ཀྱི་གཞི་མཐིང་ཤོག་བྱ་ཐབས་ལ།ནག་མཚུར་བགྲུངས་སུ་བཅུག་ནས་ས་རྡུལ་མ་སོང་བར་དྭངས་བསིང་བྱ།ཐར་ནུའི་རླངས་པ་མིག་ཏུ་མ་སོང་བར་གདུས་པར་ཚ་ལ་བསྲེས་ཏེ་རས་ཚགས་ལ་བཙགས།དེ་གྲོ་ཆང་སྐྱུར་མོ་དང་བསྲེས་ཏེ་སྐོལ་བར།ཚ་ལ་དང་ནག་མཚུར་ཉུང་ཞིང་། གྲོ་ཆང་དང་ཐར་ནུ་མང་དགོས་ཏེ་ཚོད་ཟིན་པར་བྱ།ཤོག་སྐྱ་ལ་བྱུག་ནས་ཚོད་ལྟ་བྱེད་པར།ཤོག་བུ་ནག་ལོག་གེར་སོང་ན་ཚོས་པའི་ཚད་ཡིན་པས་ཐབ་ལས་བླངས་ཏེ་ཅུང་ཞིག་གྲང་ནས་དྲོ་འཇམ་ཙམ་སོང་བའི་ནང་དུ།དེང་གི་ཤོག་གུ་སྣ་ཐུང་རིགས་མ་ཡིན་པའི་བོད་ཤོག་སྤུས་ལེགས་པར་དྲངས་ཏེ་སྐམ་དུ་བཅུག །དེ་ནས་ཨ་རུ་ར་འགའ་ཞིག་བརྡུངས་ཏེ་བཙོས་ནས་ཁུ་བ་རས་ཚགས་ལ་བཙགས་པར་ཤོག་བུ་དྲངས་པས་མཐིང་ཤོག་གྲུབ་ཅིང་།འདུལ་ཐབས་ཤོག་བུ་དཀྱུས་མའི་ལག་ལེན་ལྟར་བྱའོ།།
ཡང་རྒྱ་ནག་གི་ལུགས་སུ།མགྲོན་བུ་བསྲེགས་པ་ཞིབ་བཏགས་བྱས་པ་ལ།གྲོ་ཆང་དང་ཛཱ་ཏི་བཏབས་ཏེ་གདུས་པའི་ཁུ་བར་ཤོག་བཟང་དྲངས་པས་མཐིང་ཤོག་འབྱུང་ཞིང་།སྐམ་ནས་ཆགས་བྱས་ལ།ཨ་རུ་རའི་ཆུ་གོང་ལྟར་ལས་བཏོན་པར་བྱའོ།།སོགས་མཐིང་ཤོག་བཟོ་བའི་ལག་ཤེས་མང་དུ་འབྱུང་ཡང་ལག་ལེན་སྟབས་བདེ་གཉིས་ཙམ་བྲིས་པའོ།།
༣དབུར་རྡོ་དང་དབུར་གདན་གྱི་ཤེས་བྱ།
ཤོག་བུའི་དབུར་རྡོ་ནི།བྲིས་པའི་ཉམས་མྱོང་ལ་ཤོག་བུའི་དབུར་རྡོ་དུང་ལས་བྱས་ནས་དབུར་ན་འཇམ་པོར་འོང་ཡང་མདོག་སྔོན་པོར་འགྲོ།རྡོས་དབུར་ན་ཪྙེད་པ་སླ་ཡང་ཤོག་བུ་ཚིག་ནས་སྣ་ཐུང་བ་འོང་།མཆོང་གིས་དབུར་ན་རི་མོ་དོད།ཟངས་དང་ལྕགས་སོགས་ཀྱི་དབུར་ན་གཡའ་འབྱུང་།དེས་ན་དབུར་རྡོ་ཐམས་ཅད་ཀྱི་མཆོག་ཏུ་གྱུར་པ་ནི་གཟི་སེར་ཁྲ་དེ་ཡིན་ལ།དེས་དབུར་ན་མདོག་ལེགས་ཤིང་ངོས་འཇམ་པ་ཤོག་བུ་འབོལ་བ་འོང་བར་ཡིན་ཡང་།དེ་ལར་ཪྙེད་པ་དཀའ་མོད།མ་ཪྙེད་ན་རྭ་དང་དཀར་ཡོལ་སོགས་ཀྱིས་རུང་ཙམ་དང་།རིན་པོ་ཆེ་རྟའི་ཀླད་པའམ་མ་ན་ཧོ་སོགས་རིན་ཆེན་རིགས་ཀྱི་རྡོ་འཇམ་ཞིང་སྲ་མཁྲེགས་ཅན་རྣམས་བཟང་བར་བཤད་དོ།།
 དབུར་གདན་ཤིང་ལེབ་ནི།འཛེར་མ་དང་གས་ཆག་སོགས་མེད་པའི་སྲ་ཤིང་ལས་བྱས་པའི་ཤིང་ལེབ་རྒྱ་ཆེ་ཞིང་ངོས་འཇམ་པ།བརྟན་ཅིང་དྲི་མ་དང་བྲལ་བ་དེ་ཡིན་ལ།ཤོག་བུ་དབུར་བར་མཐའ་དབུས་ཐམས་ཅད་དུ་མ་ཁྱབ་པ་མེད་པར་ཤེད་རན་པར་ཕྱུང་ནས།ཡུན་དུ་དབུར་ན་ལེགས་ལ།དབུར་ངན་དབུར་དང་མཉེང་ངན་གྱི།དཀྱིལ་ནས་འདུལ་བཞིན་མཐའ་ནས་གྱོ ང་།ཟེར་བ་ཡོད་པས། དེ་ལྟར་མི་ཤོར་བ་གལ་ཆེ།གོང་གི་དབུར་རྡོ་དང་དབུར་གདན་ཐང་གའི་རས་གཞི་བཟོ་བ་ལའང་འཚམས་སོ།།