བོད་དམངས་ཀྱི་འཚོ་བའི་ཁྲོད་དུ་སྤྱོད་སྒོ་རྒྱ་ཆེ་བའི་རླུང་རྟ་ནི།དབུས་སུ་རྟ་མཆོག་དང་།ཟུར་བཞིར་སྟག་སེང་ཁྱུང་འབྲུག་བཞིའི་གཟུགས་རིས་བཀོད་ཡོད།རླུང་རྟའི་ལྷ་ལ་གསོལ་མཆོད་བྱེད་པའི་ཆོ་ག་ནི་སྔོན་རིང་མོ་ཞིག་ནས་བོད་དུ་དར་ཡོད་པ་ལོ་རྒྱུས་སུ་གསལ་ཡང་།སྟག་སེང་ཁྱུང་འབྲུག་རྟ་མཆོག་དང་བཅས་པའི་རླུང་རྟའི་རི་མོ་ནི་དུས་ཚོད་ག་དུས་ཞིག་ཏུ་བྱུང་ཚུལ་ནི་མཐོང་ཐོས་སུ་མ་གྱུར།འོན་ཀྱང་དེ་ཡང་བོད་རང་གནས་ནས་བྱུང་ཞིང་དར་བའི་རི་མོ་ཐོག་མའི་གྲས་ཤིག་ཡིན་པ་སུས་ཀྱང་བསྙོན་དུ་མེད་དོ།།
     རླུང་རྟ་ཞེས་པའི་མིང་ནི་ཕྱིས་སུ་བྱུང་བ་ཞིག་སྟེ།ཐོག་མར་གྲགས་པའི་མིང་ནི་ཀླུང་རྟའམ་ཀློག་རྟ་ཞེས་ཀྱང་བྱང་།དོན་ནི།ཀླུང་ཞེས་པ་ཡོངས་ཁྱབ་བམ་ཀུན་གྱི་བདག་ཉིད་ཅེས་པའི་དོན་དང་།རྟ་ཞེས་པ་ཅང་ཤེས་མགྱོགས་འགྲོའི་མིང་སྟེ་བགྲོད་པ་མྱུར་བའི་མཚོན་བྱེད་ཡིན།དེ་ཡང་མཐའ་ན་ཡོད་པའི་སྟག་སེང་ཁྱུང་འབྲུག་དང་བཅས་པའི་མཚོན་དོན་ནི།ཁ་ཅིག་གིས་སྡེ་བཞིའི་གཟུགས་བཀོད་པ་དེས་མི་འཇིགས་པ་སྟེ་རྣམ་པར་རྒྱལ་བ་མཚོན་པ་ཡིན་ཞེས་བཤད་སྲོལ་ཡོད་འདུག་པ་དེའང་བདེན་ངེས་སྲིད་མོད།དངོས་དོན་ནི་འབྱུང་བའི་མཚོན་བྱེད་དུ་གོ་ན་ལེགས་ཏེ།སྟག་ནགས་ཚལ་དུ་གནས་པས་འབྱུང་བ་ཤིང་ཁམས་སམ་རླུང་གི་ཁམས་མཚོན་པ་དང་།སེང་གེ་རི་བོར་གནས་པས་སའི་ཁམས་མཚོན།ཁྱུང་བར་སྣང་དུ་གནས་ཤིང་རྭ་ལས་མེ་འབར་བས་མེའི་ཁམས་མཚོན་པ་དང་།འབྲུག་རྒྱ་མཚོ་ན་གནས་པས་ཆུའི་ཁམས་མཚོན་པ་དང་།རླུང་ནི་ཀུན་ལ་ཁྱབ་པས་ནམ་མཁའི་ཁམས་མཚོན་པ་བཅས་ཀྱིས་འབྱུང་བ་དང་།
     ཡང་སྟག་སེང་ཁྱུང་འབྲུག་དགྲ་ལྷ་བཞི་ཞེས་འབྱུང་བས་གང་འཆང་བ་པོའི་ཕོ་ལྷ་དགྲ་ལྷ་དར་བའི་མཚན་མ་དང་།དེ་བཞི་ལས་སེང་གེ་དཀར་པོ་ཤར་ཞི་བའི་ལས་དང་།རྒྱ་སྟག་སེང་པོ་ལྷོ་རྒྱས་པའི་ལས་དང་།བྱ་ཁྱུང་དམར་པོ་ནུབ་དབང་གི་ལས་དང་།གཡུ་འབྲུག་སྔོན་པོ་བྱང་དྲག་པོའི་ལས་སྟེ་དེ་བཞི་ཕྱོགས་བཞིར་བཀོད་པ་ནི་ལས་བཞི་ལྷུན་གྱིས་འགྲུབ་པའི་རྟེན་འབྲེལ་བཅས་དེའི་བྱེད་ལས་ཀྱི་མཚོན་དོན་གསལ་བར་བསྟན།དེ་ལྟ་བུའི་བྱེད་ལས་དེ་ཉིད་རྟ་མཆོག་གི་གཟུགས་སུ་བཀོད་པ་དེའང་ཉེས་པ་ནས་ལེགས་པར་བགྲོད་པ།ལྟས་ངན་པ་ནས་བཀྲ་ཤིས་པར་བགྲོད་པ་སོགས་མཚོན་ཕྱིར་དང་།སྐྱེས་བུའི་རེ་འདོད་ཡོངས་སུ་སྐོང་བ་ཡིད་བཞིན་གྱི་རིན་ཆེན་དང་འདྲ་བས་རྟ་མཆོག་དེར་ཡང་ནོར་བུའི་རྒྱན་དུ་འགོད་སྲོལ་བྱུང་བ་ནི་རླུང་རྟའི་གོ་དོན་ཡང་དག་པར་འཁུམས།
     དུས་ཕྱིས་སུ་རླུང་རྟ་ཞེས་རླུང་གི་བཞོན་པ་ལྟ་བུའི་གོ་དོན་དང་སྦྱར་ནས་འབྲི་སྲོལ་བྱུང་འདུག་པ་འདི་དག་ནི།རླུང་རྟ་བར་སྣང་དུ་འཕྱར་ཞིང་རླུང་གིས་གཡོ་བའི་བྱེད་ལས་དང་བསྟུན་པས་དེ་སྐད་དུ་འབྲི་སྲོལ་བྱུང་བར་སེམས།
     ཡང་མི་ཕམ་པའི་རྡོ་རྗེ་ཚེ་རྒྱལ་ལས་གསུངས་པའི་གེ་སར་རླུང་རྟ།དབུས་སུ་སེང་ཆེན་ནོར་བུ་དགྲ་འདུལ་གྱི་སྐུ་བརྙན་མི་མཐུན་གཡུལ་ལས་རྒྱལ་བའི་རི་མོ་དང་བཅས།རླུང་རྟ་ལ་དཀར་སེར་དམར་ལྗང་གི་དར་ལྕེ་བཞིར་ལས་བཞི་ལྷུན་གྱིས་འགྲུབ་པའི་འདོད་གསོལ་དང་བཅས་ཤིན་ཏུ་རྒྱས་པ་དང་།འཕགས་པ་རྒྱལ་མཚན་གྱི་རྩེ་མོའི་དཔུང་རྒྱན་སོགས་ཕྱོགས་ལས་རྣམ་པར་རྒྱལ་བའི་རླུང་རྟ་དང་།བསམ་ལྷུན་དང་སྒྲོལ་མ་སོགས་སྲུང་སྐྱོབ་དང་བྱ་བ་ལམ་དུ་འགྲོ་བར་བྱེད་པའི་རླུང་རྟ་དང་།གདུགས་དཀར་དང་རྡོ་རྗེ་སྡེར་མོ་སོགས་རྐྱེན་དང་བར་ཆད།ལྟས་ངན་པ་ཐམས་ཅད་བཟློག་བྱེད་ཀྱི་རླུང་རྟ་དང་གཟུངས་སྔགས་སོགས་ཀྱི་རིགས་ཤིན་ཏུ་མང་ངོ་།གོང་གི་ལྷ་གཞི་བདག་གསོལ་བ་དང་ལས་བཞི་ལྷུན་གྱིས་འགྲུབ་པ་དང་།ཕྱི་ནང་གི་བར་ཆད་ཐམས་ཅད་ཞི་བའི་ཕྱིར་དང་།དུས་སྟོན་སོགས་ཀྱི་ཆེད་དུ་མ་ཡིན་པར་གཤིན་ཆོས་སྡིག་བཤག་ཏུ་དམིགས་ནས་བཙུགས་པར་དར་ལྕོག་དང་ཡང་ན་ཇོ་དར་ཞེས་སྟེ།ནང་དོན་གཙོ་བོར།མ་ཎི་དང་ཡི་གེ་བརྒྱ་པ།ལྟུང་བཤགས་དང་བཟང་སྤྱོད་སོགས་བཤགས་སྨོན་གྱི་རིགས་ཡིན་ལ།དར་ལྕོག་སྟོང་དར་ཁྲི་དར་མང་པོ་འཛུགས་པ་ནི་བོད་སྔ་མོའི་གོམ་སྲོལ་དང་བོད་བརྒྱུད་ནང་བསྟན་གཅིག་ཏུ་འདྲེས་པའི་ལག་ཤེས་ཀྱི་དངོས་པོ་ཁྱད་ཆོས་ཅན་ཞིག་ཡིན།
     སྔར་ལུགས་ན།ཤིང་པར་གྱི་རླུང་རྟ་དང་ཇོ་དར་གྱི་པར་ཤིང་ཐོག་སྣག་དང་མཚལ་ཆུ་གང་རུང་བྱུགས་ནས་རས་དང་སིང་རས་ལ་དཔར་སྒྲིལ་དཔར་བར་ཕྱོགས་གཅིག་ལ་དཔའ་ལུང་ཞེས་འདོག་བྱེད་ཀྱི་ཐག་པ་དང་།ཕྱོགས་གཅིག་ཏུ་རས་སམ་གོས་དར་གང་རུང་གི་དར་ལྕེ་གདག་དགོས་ཏེ།གྱེན་དུ་བསྒྲེང་བྱའི་དར་ལྕོག་ལ་ཡིག་མགོའི་ཕྱོགས་སུ་དཔའ་ལུང་དང་མཇུག་ཕྱོགས་སུ་དར་ལྕེ་གདགདར་ཕྲེང་སོགས་ཕྲེད་དུ་དགལ་བྱ་ལ་དབུ་ཕྱོགས་སུ་དཔའ་ལུང་དང་།ཞབས་ཕྱོགས་དར་ལྕེ་གདག་དགོས།
     སྤྱིར་རླུང་རྟ་འདོག་སྟངས་ལ་ༀ་བཏག་ཧྰུཾ་ཕྱར་ཞེས་གསུངས་ཏེ།དེའི་རྒྱུ་མཚན་ནི།དར་ལྕོག་གི་ཡི་གེ་ཀློག་བྱེད་རླུང་ཡིན་པས།རླུང་གིས་དར་ཡུ་བརྒྱུད་ༀ་ནས་ཧྰུཾ་གི་ཕྱོགས་སུ་བཀླག་དགོས་པས་ཡིན་ཡང་།འགའ་ཞིག་གིས་སྲུང་བ་ལ་ༀ་བཏག་ཧྰུཾ་ཕྱར་དང་བཟློག་པའི་རིགས་ཧྰུཾ་བཏག་ༀ་ཕྱར་ཞེས་ཀྱང་བཤད་དོ།།
     དར་ལྕོག་གི་དབྱིབས་དང་རྣམ་པ།དར་ཆེན་ཞེས་རྩེ་ལ་དར་སྣ་ཚོགས་ཀྱི་རྒྱལ་མཚན་ཟངས་གསེར་གྱི་ཏོག་དང་བཅས་པ།དར་ཤིང་འདོམ་བཅུ་ཡན་ཆད་ཡོད་པ་ལ་དར་སྣ་ཁ་དོག་བཞིའམ་ལྔ་ལ་དཔར་བའི་དར་རིང་དར་ལྕེ་ཡིས་མཛེས་པ།དེ་ལའང་རྒྱལ་མཚན་གྱི་དབྱིབས་སུ་བཀོད་པ་སོགས་རྒྱས་སྤྲོས་ཀྱང་ཡོད་དོ།།

     དར་རིང་ཞེས་དུད་ཚང་གི་སྒོ་ཁར་བསྒྲེངས་པ་ནི།དབྱིབས་དང་མཐོ་དམན་གོང་དང་ཕྱོགས་མཚུངས་རྩེར་ཤིང་གི་ཉི་ཟླ་དང་རྔ་ཡབ་སོགས་བརྒྱན་པའི་དར་རིང་དང་།ལབ་རྩེ་སོགས་སུ་ཡུལ་ལྷ་གཞི་བདག་མགུ་བར་བྱེད་པའི་རྩེ་མོ་མདའ་སྒྲོའི་དབྱིབས་དང་།
     གྲི་དང་།མདུང་དང་།འཕང་ལོ་ལ་སོགས་ཀྱིས་བརྒྱན་པའི་དར་ལྕོག་ལུས་ཚད་མའི་རིགས་དང་།འཕྲེད་དུ་དགལ་བྱའི་དར་ཕྲེང་རིགས་སྣ་ཚོགས་དར་ལྕོག་ལུས་ཚད་མའི་རིགས་དང་།འཕྲེད་དུ་དགལ་བྱའི་དར་ཕྲེང་རིགས་སྣ་ཚོགས་དང་དར་ཕྲེང་མ་ཡིན་པར་ཕྲེད་དུ་བཀལ་བའི་འཕྱང་དར་དང་།གདུགས་དང་།ཡང་ན་གུར་གྱི་རྣམ་པར་འཕྲེད་དུ་བཀལ་ཞིང་རྩེ་མོ་རྒྱལ་མཚན་སོགས་ཏོག་གིས་མཛེས་པ་ཇོ་གུར་ཞེས་གྲགས་པ་དང་།དེང་སང་རི་ངོས་སུ་དར་ལྕོག་གིས་བསྐྲུན་པའི་མཆོད་རྟེན་གྱི་དབྱིབས་དང་།རྟགས་བརྒྱད་ཀྱི་དབྱིབས་སོགས་རྣམ་པར་རྒྱ་ཆེ་བ་མང་དུ་ཡོད་པ་རྣམས་སོ།།
     གོང་དུ་སྨོས་པའི་རླུང་རྟའི་པར་ཤིང་དང་།པར་གཞི་དང་།པར་བྱེད་ཀྱི་རྒྱུ་དང་།དཔའ་ལུང་དར་ལྕེ་ཐམས་ཅད་ནི་བོད་སྲོལ་རྒྱུན་གྱི་ལག་རྩལ་ཏེ།དེང་དུས་སུ་འཕྲུལ་པར་གྱིས་དཔར་བའི་རླུང་རྟའི་རིགས་མང་ལ།རིན་གོང་ཆུང་བ་དང་།སྤུས་ལེགས་པ།ཡིག་འབྲུ་དང་རི་མོ་སོགས་ཡུན་དུ་བཀྲ་བ།རྒྱུ་སྤུས་དང་ཡིག་འབྲུ།རིན་གོང་ཆེ་ཆུང་གང་འདོད་དུ་བདམ་ང་བྱ་ཡུལ་ཕུན་སུམ་ཚོགས་པ་ཡོད་ཕྱིར་སྲོལ་རྒྱུན་གྱི་ལག་ཤེས་འདི་རྒྱུན་བསྲིང་དཀའ་བ་ལྟར་སྣང་ངོ་།།（རྩོམ་སྒྲིག་པ་ཨོ་རྒྱན། ）